ကုလစစ်ရှောင်စခန်းကို အကြမ်းဖက်တိုက်ခိုက်ခဲ့တဲ့ အစ္စရေး

ဇန်န၀ါရီ ၂၄၊ ၂၀၂၄

M-Media

-ဂါဇာမှာ သတ်ဖြတ်မှုတွေ ဆက်လက်လုပ်ဆောင်နေတဲ့ အစ္စရေးမနေ့ဟာ မနေ့က ခန်ယူနစ်မြို့မှာရှိတဲ့ ကုလ စစ်ရှောင်စခန်းကို ပစ်မှတ်ထား တိုက်ခိုက်ခဲ့ပါတယ်။ 

“ခန်ယူနစ်မြို့က လူ ၈၀၀ လောက်ရှိနေတဲ့ အဆောက်အဦးကို တင့်ကားနှစ်စီးနဲ့ ပစ်တာပါ။ လက်ရှိ ၉ ယောက်သေသွားပြီး ၇၅ ဦး ဒဏ်ရာရတယ်လို့ သတင်းရပါတယ်”လို့ ကုလရဲ့ ပါလက်စတိုင်း အကူအညီပေးရေးအဖွဲ့ UNRWA တာ၀န်ရှိသူ သောမတ်စ်၀ှိုက်က ဆိုရှယ်မီဒီယာကနေတစ်ဆင့် ထုတ်ပြန်ပါတယ်။ 

အစ္စရေးဟာ အဲဒီအဆောက်အဦးကို မီးရှို့တာတွေလည်း လုပ်ဆောင်ခဲ့ပါတယ်။ တိုက်ခိုက်မှုဟာ အစုလိုက်အပြုံလိုက် ထိခိုက်နိုင်တဲ့ အနေအထားမျိုး ရှိတာကြောင့် သေဆုံး ဒဏ်ရာရမှုအရေအတွက် မြင့်တက်လာနိုင်တယ်လို့လည်း ၀ှိုက်က ထည့်သွင်းပြောဆိုခဲ့ပါတယ်။ 

UNRWA အဖွဲ့ ပြောရေးဆိုခွင့်ရှိသူ အဒ်နန် အဘူ ဟက်စ်နာက တိုက်ခိုက်မှုမလုပ်ခင် အစ္စရေးဖက်က သတိပေးချက်ထုတ်ပြန်တာ၊ ရွှေ့ပြောင်းခိုင်းတာမျိုး မရှိဘူးလို့ ဆိုပါတယ်။ 

အဆောက်အဦးပတ်ပတ်လည်မှာ အစ္စရေးတင့်ကားတွေ ရှိနေတာကြောင့် ပြီးခဲ့တဲ့ ၄၈ နာရီအတွင်း ကုလ၀န်ထမ်းတွေဟာ အဆောက်အဦးထဲကို သွားလို့မရဘဲ၊ အခြအနေဟာ အလွန်အန္တရာယ်ရှိနေတယ်လို့လည်း ဟက်စ်နာက ထည့်သွင်းပြောဆိုခဲ့ပါတယ်။ 

ဟားမက်စ်ကိုလက်တုန့်ပြန်တယ်ဆိုတဲ့ ခေါင်းစဥ်နဲ့ အစ္စရေးဟာ အောက်တိုဘာ ၇ ရက်နေ့ကစတင်ပြီး ဂါဇာမှာ လူသတ်ပွဲ လုပ်လာတာပါ။

၃ လကျော်အတွင်း ပါလက်စတိုင်းပြည်သူ ၂၅၀၀၀ ကျော် အသတ်ခံထားရပြီး၊ ဂါဇာကမ်းမြှောင်တစ်ခုလုံးက အဆောက်အဦးတွေရဲ့ ၈၀ ရာခိုင်နှုန်းကျော် ဖျက်ဆီးခံထားရပါတယ်။ 

ဒဏ်ရာရသူ သောင်းချီနဲ့ အဆောက်အဦးအပျက်တွေအောက်မှာ ပိတ်မိပျောက်ဆုံးနေသူ ၉ ထောင်နီးပါး ရှိနေပါတယ်။ 

Ref: Aljazeera