ဂါဇာရှိရေချိုရင်းမြစ်များကို ဖျက်ဆီးနေသည့် အစ္စရေး

ဖေဖော်၀ါရီ ၅၊ ၂၀၂၄

M-Media 

-ပါလက်စတိုင်း လွတ်မြောက်ရေးအဖွဲ့ ဟားမက်စ်ရဲ့ မြေအောက်လှိုဏ်ခေါင်း ကွန်ရက်ကို အစ္စရေးက ပင်လယ်ရေဖြည့်ဖျက်ဆီးနေတာဟာ နိုင်ငံတကာ ဥပဒေကို ချိုးဖောက်တဲ့ လုပ်ရပ်မျိုးဖြစ်တယ်လို့ ကျွမ်းကျင်သူတွေက သတိပေးလိုက်ပါတယ်။ 

အစ္စရေးရဲ့ ဒီလုပ်ရပ်ကြောင့် ဂါဇာက ရေချိုအရင်းမြစ်တွေ ပျက်ဆီးကာ ပါလက်စတိုင်းပြည်သူတွေ ပိုမိုဒုက္ခရောက်နိုင်တာကို ပညာရှင်တွေက ထောက်ပြနေကြပါတယ်။

မြေအောက်လှိုင်ခေါင်းတွေကို အစ္စရေးက ပင်လယ်ရေတွေဖြည့် ဖျက်ဆီးနေတယ်ဆိုတဲ့ သတင်းတွေဟာ ပြီးခဲ့တဲ့ လတွေကတည်းက ထွက်ပေါ်နေတာပါ။ အခုတစ်ပတ်မှာတော့ အစ္စရေးစစ်တပ်က ဒီသတင်းဟုတ်မှန်ကြောင်း အတည်ပြုပါတယ်။ 

ဟားမက်စ်ကို တုန့်ပြန်တယ်ဆိုတဲ့ ခေါင်းစဥ်နဲ့ အောက်တိုဘာ ၇ ရက်နေ့ကတည်းက ပြုလုပ်တဲ့ ဂါဇာလူသတ်ပွဲမှာ အသတ်ခံရသူ ပါလက်စတိုင်းအရေအတွက်ဟာ ၂၇၀၀၀ ရှိလာပါပြီ။ 

အစ္စရေးဟာ ဧရာမ ရေစုပ်စက် ၅ လုံးကနေ ၇ လုံးအထိ အသုံးပြုကာ ဟားမက်စ်ရဲ့ မြေအောက်လှိုင်ခေါင်းတွေကို ပင်လယ်ရေတွေ ဖြည့်နေတာ ဖြစ်ပါတယ်။ 

၂၀၀၇ ခုနှစ်ကတည်းက ဂါဇာကမ်းမြှောင်ကို အစ္စရေးက လမ်းကြောင်းအားလုံး ပိတ်ဆို့ထားတာကြောင့် ပါလက်စတိုင်းပြည်သူတွေဟာ စားနပ်ရိက္ခာ၊ လောင်စာ၊ ပြတ်တောက်မှု ကြုံတွေ့ခဲ့ရပြီး ဟားမက်စ်ရဲ့လှိုင်ခေါင်းတွေကတစ်ဆင့် မှောင်ခိုသွင်းကာ အသက်ဆက်နေရတာဖြစ်ပါတယ်။ 

ဒီလှိုင်ခေါင်းတွေကို အစ္စရေးက ပင်လယ်ရေသွင်းဖျက်ဆီးမှုဟာ သီတင်းပတ်နဲ့ချီ ကြာနိုင်ပါတယ်။ 

သဘာ၀ပတ်၀န်းကျင်ဆိုင်ရာ ကျွမ်းကျင်သူတွေက ဒီလုပ်ရပ်ကြောင့် သောက်သုံးရေအတွက် ပါလက်စတိုင်းပြည်သူတွေ အဓိကအားထားနေရတဲ့ ဂါဇာက မြေအောက်ရေချိုရင်းမြစ်တွေ ပျက်ဆီးသွားနိုင်တယ်လို့ ထောက်ပြပါတယ်။ 

အစ္စရေးဟာ ပါလက်စတိုင်းပြည်သူတွေနဲ့ ပတ်သက်လာရင် ရေအရင်းအမြစ်ကို လက်နက်သဖွယ် အသုံးပြုနေတယ်လို့ Geneva Graduate Institute က သောက်သုံးရေဆိုင်ရာ ပညာရှင် မာ့ခ် ဇိုက်တွန်က ပြောပါတယ်။ 

ပါလက်စတိုင်းပိုင်နက်တွေဖြစ်တဲ့ ဂါဇာနဲ့ အနောက်ဖက်ကမ်းက ရေပေး၀ေရေး အခြေခံအဆောက်အဦးတွေဟာ အစ္စရေးရဲ့ လက်ချက်ကြောင့် လုံး၀ ပျက်ဆီးလုနီးပါး ဖြစ်နေတာပါ။ 

အောက်တိုဘာ ၇ ရက်နေ့နောက်ပိုင်း ဂါဇာကို အစားအစာ၊ သောက်သုံးရေနဲ့ လောင်စာဆီအပါအ၀င် လူ့အဖွဲ့အစည်းတစ်ခု အသက်ရှင်ရပ်တည်ရေး လိုအပ်တဲ့ ရင်းမြစ်တွေအားလုံး ပိတ်ပင်ဖို့ အစ္စရေးက လုပ်ဆောင်ခဲ့ပါတယ်။ 

Ref: Aljazeera