ပေါင်မုန့်တစ်လုံးအတွက် ကျည်ဆံကို အန်တုနေရပြီဖြစ်တဲ့ ပါလက်စတိုင်းများ

ဖေဖော်၀ါရီ ၁၉၊ ၂၀၂၄

M-Media 

-အစ္စရေးရဲ့ အကြမ်းဖက် တိုက်ခိုက်သတ်ဖြတ်မှုတွေကို ခံနေရတဲ့ ဂါဇာကမ်းမြှောင်က ပါလက်စတိုင်းပြည်သူတွေရဲ့ အသက်ရှင်ရပ်တည်မှု အခြေအနေဟာ အလွန်အမင်း ဆိုးရွားလာနေပါတယ်။ 

လူဦးရေ ၂ သန်းကျော်ရှိတဲ့ ဂါဇာမှာ ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ အစ္စရေးရဲ့ တစ်ကျော့ပြန် လူသတ်ပွဲကြောင့် ၈၅  ရာခိုင်နှုန်းလောက်ဟာ အိုးအိမ်စွန့်ခွာ ထွက်ပြေးကာ ဒုက္ခသည်စခန်းတွေမှာ နေထိုင်နေရပါတယ်။ 

စားနပ်ရိက္ခာ၊ သောက်သုံးရေ၊ ဆေး၀ါး၊ လောင်စာ စတဲ့ အသက်ရှင်ရပ်တည်ရေး အခြေခံလိုအပ်ချက်တွေ မရအောင် အစ္စရေးက လုပ်ဆောင်ထားပြီး နိုင်ငံတကာပေးတဲ့ အကူအညီတွေ မ၀င်ရောက်နိုင်အောင်လည်း ကန့်သတ်မှုတွေ ပြုလုပ်နေပါတယ်။ 

အကူအညီတွေမရတဲ့အတွက် သွားရောက်တောင်းဆိုတဲ့ ပါလက်စတိုင်းပြည်သူတွေကို အစ္စရေးက ပစ်ခတ်သတ်ဖြတ်မှုတွေ လုပ်ဆောင်နေပါတယ်။ 

ဖေဖော်၀ါရီ ၁၈ ရက်နေ့က ဂါဇာစီးတီးမြို့ကို ရောက်လာတဲ့ ကုလရဲ့ အကူအညီပေးရေး ထရပ်ကားတွေနားကို အပြေးအလွှား သွားရောက်တန်းစီတဲ့ ပါလက်စတိုင်းတွေကို အစ္စရေးစစ်တပ်က ပစ်ခတ်ခဲ့ပြီး ဒီအဖြစ်အပျက် ဗီဒီယိုဟာ အွန်လိုင်းမှာ ပြန့်နှံ့သွားခဲ့ပါတယ်။ 

“ဂျုံနည်းနည်းလောက်များ ရမလားဆိုတဲ့ မျှော်လင့်ချက်နဲ့ ထရပ်ကားတွေဆီကို သူတို့လာကြပါတယ်။ မိသားစုအတွက် နည်းနည်းပါးပါးလောက်ရဖို့ သူတို့ရဲ့ အသက်တွေကို စတေးပြီး လာကြရတာပါ။ ကျွန်တော်တို့မှာ လုံး၀ ဇီးရိုးပဲ။ စားဖို့ ဘာမှမရှိဘူး။ ဆာလောင်မွတ်သိပ်ပြီး သေကြရတော့မှာပါ”လို့ ပါလက်စတိုင်း အမျိုးသားတစ်ဦးက ပြောပါတယ်။ 

“အမှိုက်ပုံတွေကိုသွားပြီး ရှာစားရတဲ့အခြအနေအထိ ရောက်နေပါပြီ” 

ငါးဖမ်းသားများလည်းမလွတ်

ဂါဇာကမ်းရိုးတန်းမှာ ငါးရှာထွက်တဲ့ လှေငယ်တွေကို အစ္စရေးစစ်သင်္ဘောတွေက ပစ်ခတ်တဲ့ ဗီဒီယိုမှတ်တမ်းတွေလည်း ပေါ်ထွက်လာပါတယ်။ 

အောက်တိုဘာ ၇ ရက် တစ်ကျော့ပြန်လူသတ်ပွဲမစခင် အစ္စရေးဟာ ပါလက်စတိုင်း တံငါလှေတွေ ဂါဇာ ကမ်းရိုးတန်းကနေ ၃၇ ကီလိုမီတာထက် ကျော်ပြီး မသွားဖို့ ကန့်သတ်ပိတ်ဆို့ထားတာပါ။ 

အခုဆိုရင် ငါးဖမ်းသင်္ဘောတွေ ကမ်းကခွာလို့မရတော့ဘူးလို့ ဒေသခံတွေက ပြောပါတယ်။ 

ပါလက်စတိုင်းတွေ စားနပ်ရိက္ခာ ရှာဖွေစားသောက်လို့မရအောင် အစ္စရေးက လုပ်ဆောင်ထားတာ ဖြစ်ပါတယ်။ 

ဂါဇာမှာ လူ့အဖွဲ့အစည်းတစ်ခုလုံး ငတ်မွတ်ခေါင်းပါးမှုအခြေအနေကို ကြုံတွေ့ရနိုင်တယ်လို့ ကုလသမဂ္ဂက သတိပေးထားပါတယ်။

ဂျုံတောင်မရှိ 

ဂါဇာမြောက်ပိုင်း ဂျာဘာလီယာ ဒုက္ခသည်စခန်းမှာဆိုရင် အခြေခံစားသောက်ကုန်ဖြစ်တဲ့ ဂျုံတောင် မရှိတော့ပါဘူး။ 

“ဂျုံဆို မရှိတော့ဘူး။ ဂျုံတစ်အိတ်ကို ဒေါ်လာ တစ်ထောင်ကျော်ဖြစ်နေပြီ” လို့ ဂျုံစက်ထောင်ထားသူ ပါလက်စတိုင်းအမျိုးသားတစ်ဦးက ပြောပါတယ်။ 

နိုင်ငံတကာက ဖိအားတွေပေးနေပမယ့် အစ္စရေးဟာ ဂါဇာကမ်းမြှောင်ဆီ အကူအညီတွေ ၀င်ရောက်ခွင့် မပေးပါဘူး။ 

ဆေးရုံ၊ လူနေအိမ်၊ စာသင်ကျောင်းတွေအပါအ၀င် ဂါဇာကမ်းမြှောင်တစ်ခုလုံးက အဆောက်ဦးတွေရဲ့ ၈၅ ရာခိုင်နှုန်းလောက်ကို အစ္စရေးက တိုက်ခိုက်ဖျက်ဆီးထားပါတယ်။ 

Ref: Aljazeera