လျှပ်စစ်ကားလောကထဲ ရုတ်တရက်၀င်လာတဲ့ ရှောင်မီ

မတ် ၁၂၊ ၂၀၂၄

M-Media

– တရုတ် ထိပ်တန်း စမတ်ဖုန်းလုပ်ငန်းတစ်ခုဖြစ်တဲ့ Xiaomi က သူတို့ရဲ့ ပထမဆုံး လျှပ်စစ်ကားကို အခုလအတွင်း ပြည်သူတွေလက်ထဲ အရောက်ထည့်ပေးတော့မယ်လို့ ကြေငြာလိုက်ပါတယ်။ 

ရှောင်မီဟာ Speed Ultra 7 (SU7) လို့ အမည်ပေးထားတဲ့ သူတို့ရဲ့ ပထမဆုံးလျှပ်စစ်ကားကို ပြီးခဲ့တဲ့နှစ်က ချပြခဲ့တာပါ။ တန်ကြေး ဘယ်လောက်ရှိမလဲဆိုတာကို မတ်လ ၂၈ ရက်နေ့ ကြေငြာမယ်လို့ ဆိုပါတယ်။ 

တရုတ်နိုင်ငံက မြို့ပေါင်း ၂၉ မြို့မှာ စင်တာ ၅၉ ခု ဖွင့်လှစ်ပြီး အမှာတွေကောက်သွားမယ်လို့လည်း ရှောင်မီက ပြောပါတယ်။ 

လျှပ်စစ်ကားလောကမှာ ရောင်းစျေးပြဿနာ အပြိုင်အဆိုင် ဖြစ်နေတဲ့အချိန် ရှောင်မီက အခုလို ရုတ်တရက် ၀င်ရောက်လာတာ ဖြစ်ပါတယ်။ 

နောက် ၁၀ နှစ်အတွင်း လျှပ်စစ်ကားကဏ္ဍမှာ ကန်ဒေါ်လာ ၁၀ ဘီလီယံ အသုံးပြုဖို့ ရည်မှန်းထားကြောင်း ရှောင်မီ အကြီးအကဲ လီဂျွန်က ပြောပါတယ်။ 

SU7 ဟာ စူပါလျှပ်စစ်မော်တာကို အသုံးပြုထားတဲ့အတွက် နာမည်ကြီး ကုမ္ပဏီတွေဖြစ်တဲ့ Tesla နဲ့ Porsche တို့ရဲ့ လျှပ်စစ်ကားတွေကို ကောင်းကောင်း ယှဥ်နိုင်မှာ ဖြစ်ပါတယ်။

တရုတ်မှာ လျှပ်စစ်ကားစျေးကွက်က ပြိုင်ဆိုင်မှု ပြင်းထန်လာပြီး BYD လို ပြည်တွင်းကုမ္ပဏီတွေရဲ့ လျှပ်စစ်ကားထုတ်ကုန်ကြောင့် အီလွန်မက်စ်ရဲ့ Tesla ဟာ တရုတ်မှာ သူတို့ရဲ့ လျှပ်စစ်ကားကို စျေးနှုန်းအများအပြား လျှော့ချပေးခဲ့ရပါတယ်။ 

Ref: BBC