ဂါဇာအကြမ်းဖက်မှုကြောင့် တူရကီက အစ္စရေးနှင့် ကုန်သွယ်ရေး အဆက်အသွယ်ဖြတ်

မေ ၃၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးက တိုက်ခိုက်မှုတွေ မရပ်မချင်း ကုန်သွယ်ရေးရပ်ဆိုင်းသွားမယ်လို့ တူရကီက ထုတ်ပြန်ကြေငြာပါတယ်။ 

ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ အရေအတွက်ဟာ ၃၅၀၀၀ နီးပါး ရှိလာပါပြီ။

တိုက်ခိုက်ဖျက်ဆီးမှုတွေကြောင့် အိုးအိမ်စွန့်ခွာထွက်ပြေးရတဲ့ ပါလက်စတိုင်းပြည်သူ ၂ သန်းကျော်ကို နိုင်ငံတကာက ပေးပို့တဲ့ အထောက်အပံ့တွေကိုလည်း မရအောင် အစ္စရေးက တားဆီးဟန့်တားမှုတွေ ပြုလုပ်နေပါတယ်။ 

ဂါဇာမှာ အစ္စရေးက အပြည့်အ၀ အပစ်ရပ်ပြီး လူသားချင်း စာနာထောက်ထားမှုဆိုင်ရာ အကူအညီတွေကို ၀င်ခွင့်ပြုတဲ့အချိန်အထိ နှစ်နိုင်ငံကုန်သွယ်ရေးကို ရပ်ဆိုင်းထားမယ်လို့ တူရကီ ကုန်သွယ်ရေး၀န်ကြီး အိုမာရ် ဘိုလတ်က ပြောပါတယ်။ 

၂၀၂၃ ခုနှစ် စာရင်းတွေအရ တူရကီနဲ့ အစ္စရေးတို့အကြား ကုန်သွယ်ရေးတန်ဖိုးဟာ တစ်နှစ်ကို ကန်ဒေါ်လာ ၆ ဒဿမ ၈ ဘီလီယံဖိုး ရှိပါတယ်။ 

သွင်းကုန်၊ ပို့ကုန်အားလုံးကို ရပ်ဆိုင်းလိုက်တာဖြစ်ပြီး ဒါဟာ ဂါဇာမှာ အစ္စရေးရဲ့ စက်ဆုပ်ဖွယ် အပြုအမူတွေကို တုန့်ပြန်တာလို့လည်း ဘိုလတ်က ထည့်သွင်းပြောဆိုခဲ့ပါတယ်။ 

ဂါဇာက အတိဒုက္ခရောက်နေသူတွေကို လေကြောင်းကနေ အကူအညီတွေ ချပေးရေးမှာ တူရကီပါ၀င်ဖို့ အစ္စရေးက ခွင့်မပြုခဲ့တာကြောင့် ပြီးခဲ့တဲ့လကစပြီး တူရကီက ကုန်သွယ်ရေးဆိုင်ရာ ကန့်သတ်မှုတွေ လုပ်ခဲ့တာ ဖြစ်ပါတယ်။ 

Ref: Reuters