ထိုင်းနိုင်ငံက ကွန်ဒိုစျေးကွက်ကို စိုးမိုးထားတဲ့ မြန်မာ

မေ ၂၉၊ ၂၀၂၄

M-Media 

-၂၀၂၄ ခုနှစ် ပထမ ၃ လပတ် ထိုင်နိုင်ငံတစ်၀ှမ်း နိုင်ငံခြားသားတွေ ကွန်ဒိုတိုက်ခန်း ၀ယ်ယူမှု မြင့်တက်လာခဲ့ပြီး ဒါဟာ တရုတ်၊ မြန်မာနဲ့ ရုရှားနိုင်ငံတို့က ၀ယ်လက်တွေကြောင့် ဖြစ်တယ်လို့ ထိုင်း အိမ်ခြံမြေ စောင့်ကြည့်ရေးအဖွဲ့ REIC က ထုတ်ပြန်ပါတယ်။ 

ပြီးခဲ့တဲ့နှစ် ပထမ ၃ လပတ်မှာ ထိုင်းနိုင်ငံတစ်၀ှမ်း နိုင်ငံခြားသားတွေ ကွန်ဒို၀ယ်ယူမှုနှုန်းဟာ ၄ ဒဿမ ၃ ရာခိုင်နှုန်း ရှိခဲ့ရာကနေ ဒီနှစ်မှာ ၅ ဒဿမ ၂ ရာခိုင်နှုန်းအထိ မြင့်တက်လာခဲ့ပါတယ်။ 

ဘတ်ငွေ ၁၈ ဘီလီယံ တန်ဖိုးရှိခဲ့ပြီး ကွန်ဒိုအခန်းပေါင်း ၃၉၃၈ ခန်း နိုင်ငံခြးသားတွေကို လွှဲပြောင်းပေးခဲ့ရတာ ဖြစ်ပါတယ်။ 

ဒီမြင့်တက်မှုဟာ တရုတ်၊ မြန်မာနဲ့ ရုရှားနိုင်ငံသားတွေရဲ့ ၀ယ်လိုအားကြောင့်ဖြစ်တယ်လို့ REIC ရဲ့ အကြီးအကဲ ဗီချိုင် ဗီရက်ကာပန်က ပြောပါတယ်။ 

“ပြည်တွင်းက ၀ယ်လိုအားက ကျလာပါတယ်။ နိုင်ငံခြား ၀ယ်လိုအားသာ မရှိဘူးဆိုရင် ကွန်ဒိုတိုက်ခန်း ရောင်းချရမှုနှုန်း ကျဆင်းလာမယ်ဆိုတဲ့ သဘောပါ”

ထိုင်းနိုင်ငံမှာ ၂၀၂၂ ခုနှစ်ကတည်းက စတင်ပြီး နိုင်ငံခြားသားတွေ ကွန်ဒိုတိုက်ခန်း ၀ယ်ယူမှု မြင့်မားလာတာ ဖြစ်ပါတယ်။ 

မြန်မာနိုင်ငံသားတွေ အများဆုံး၀ယ်ယူတဲ့ နေရာတွေကတော့ ဘန်ကောက်၊ စမွတ်ပရာကန်၊ ချွန်ဘူရီ၊ ချင်းမိုင်နဲ့ တာ့က်ခရိုင်တို့မှာ ဖြစ်ပါတယ်။

Ref: Bangkok Post