၄ ရက်အတွင်း Safe Zone များတွင် လူ ၆၆ ဦးကို အစ္စရေးက အကြမ်းဖက်သတ်ဖြတ်ခဲ့

မေ ၃၀၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်တောင်ပိုင်း ရာဖာမြို့က ဘေးကင်းဇုန်တွေကို အစ္စရေးက ပြီးခဲ့တဲ ၄ ရက်အတွင်း အကြမ်းဖက်တိုက်ခိုက်မှုတွေ ပြုလုပ်ခဲ့ရာမှာ အနည်းဆုံး ၆၆ ဦး အသတ်ခံခဲ့ရပါတယ်။ 

သေဆုံးသူအများစုဟာ အမျိုးသမီးနဲ့ ကလေးငယ်တွေဖြစ်တယ်လို့ Save the Children အဖွဲ့က ထုတ်ပြန်ခဲ့ပြီး အပြစ်မဲ့အရပ်သားတွေကို အမြန်ဆုံး ကာကွယ်ပေးဖို့ နိုင်ငံတကာအသိုင်းအ၀ိုင်းကို တိုက်တွန်းခဲ့ပါတယ်။ 

“ဂါဇာက မိသားစုတွေ၊ ကလေးငယ်တွေ ဘယ်နေရာမှ မလုံခြုံဘူးဆိုတာကို သိရှိနားလည်ဖို့ ကမ္ဘာ့ခေါင်းဆောင်တွေအတွက် နောက်ထပ် သက်သေတွေ ထပ်လိုနေသေးလား”လို့ Save the Children ရဲ့ ပါလက်စတိုင်းရေးရာ ဒါရိုက်တာ ဇာဗီယာ ဂျူဘာ့တ်က ပြောပါတယ်။ 

“သူတို့တွေဟာ အန္တရာယ်ဇုန် တစ်ခုကနေ နောက်တစ်ခုကို ပြောင်းရွှေ့နေရတယ်။ သူတို့က သူတို့ကြိုက်တဲ့နေရာမှာ သွားနေတာမဟုတ်ဘူး။ အစ္စရေးက မတိုက်ခိုက်ဘူးလို့ ပြောပြီး သွားခိုင်းတဲ့နေရာမှာ သွားနေတာပါ။ ဒါပေမယ့် ပစ်မှတ်ထား တိုက်ခိုက်ခံနေရတုန်းပါပဲ”

တိုက်ခိုက်မှုကို တိုက်ရိုက်မခံရတဲ့ ပါလက်စတိုင်းအရပ်သားတွေလည်း အစ္စရေးရဲ့ လုပ်ရပ်ကြောင့် ဖြစ်လာတဲ့ ငတ်မွတ်ခေါင်းပါးမှုကို ခံနေရကြောင်း၊ ကလေးငယ်တွေရဲ့ စိတ်ကျန်းမာရေး၊ ရုပ်ကျန်းမာရေးတွေဟာ အလွန် ဆိုးဆိုးရွားရွား ထိခိုက်ပျက်ဆီးလာကြောင်း ဇာဗီယာက ထည့်သွင်း သတိပေးခဲ့ပါတယ်။ 

ပြီးခဲ့တဲ့နှစ် အောက်တိုဘာလက စတင်တဲ့ အစ္စရေးရဲ့ ဂါဇာက တစ်ကျော့ပြန်လူသတ်ပွဲမှာ အသတ်ခံရသူ ပါလက်စတိုင်းအရေအတွက်ဟာ ၃၆၀၀၀ နီးပါး ရှိလာပြီ ဖြစ်ပါတယ်။ အများစုဟာ ကလေးငယ်တွေနဲ့ အမျိုးသမီးတွေပါ။ 

ဂါဇာက အခြေခံအဆောက်အဦး ၈၅ ရာခိုင်နှုန်းကျော်ကိုလည်း အစ္စရေးက တိုက်ခိုက်ဖျက်ဆီးထားပါတယ်။ 

Ref: Aljazeera