ဇူလိုင် ၂၊ ၂၀၂၄
M-Media
![](http://www.m-mediagroup.com/wp-content/uploads/2024/07/india.jpg)
-အိန္ဒိယနိုင်ငံမြောက်ပိုင်း အူတာပရာဒက်ရှ်မြို့ ဟက်သရာခရိုင်က ဟိန္ဒူဘုရားပွဲတစ်ခုမှာ လာရောက်သူတွေ စုပြုံတိုး၀ှေ့မှုဖြစ်တာကြောင့် အနည်းဆုံး ၈၇ ဦး သေဆုံးတယ်လို့ အိန္ဒိယပြည်တွင်းမီဒီယာတွေက ဖော်ပြပါတယ်။
ရှီဗာနတ်ဘုရားပူဇော်ပွဲမှာ နာမည်ကျော် တရားဟောဆရာ ဘိုလေးဘာဘာရဲ့ တရားပွဲအပြီး ပြန်အထွက်မှာ ထောင်နဲ့ချီတဲ့လူတွေ တိုး၀ှေ့မှု ဖြစ်ခဲ့တာပါ။ ဆေးရုံကို ရောက်ရှိလာတဲ့ အရေအတွက်အရ သေဆုံးသူဟာ အနည်းဆုံး ၈၇ ဦး ရှိပြီး ထပ်မံမြင့်တက်လာနိုင်တယ်လို့ အာဏာပိုင်တွေက ပြောပါတယ်။
အိန္ဒိယ၀န်ကြီးချုပ် မိုဒီက ဒီအဖြစ်အပျက်အတွက် ၀မ်းနည်းကြောင်း အောက်လွှတ်တော်မိန့်ခွန်းမှာ ထည့်သွင်းပြောကြားခဲ့ပါတယ်။
ခရိုင်ရဲတပ်ဖွဲ့က ဘာသာရေးအခမ်းအနား ခွင့်ပြုမိန့်ဟာ လူ ၅ ထောင်အတွက်သာ ချပေးတာဖြစ်ပြီး၊ အမှန်တကယ် တက်ရောက်လာသူက ၁၅၀၀၀ ကျော်ရှိခဲ့တယ်လို့ ထုတ်ပြန်ပါတယ်။ ဒီအဖြစ်အပျက်အတွက် အာဏာပိုင်တွေက စုံစမ်းစစ်ဆေးမှုတွေ လုပ်ဆောင်နေပါတယ်။
အိန္ဒိယက ဘာသာရေးပွဲတွေမှာ လူစုပြုံတိုး၀ှေ့မှုတွေ ဖြစ်တတ်ပြီး ၂၀၁၃ ခုနှစ် နိုင်ငံအလယ်ပိုင်း မဒ်ယာ ပရာဒက်ရှ်ပြည်နယ်က အဖြစ်အပျက်တစ်ခုအတွင်း လူ ၁၁၅ ဦး သေဆုံးခဲ့ပါတယ်။ ၂၀၀၈ ခုနှစ်က မြောက်ပိုင်း ရာဂျက်စတန်ပြည်နယ် ဘုရားပွဲတစ်ခုမှာ လူတိုး၀ှေ့မှုကြောင့် အနည်းဆုံး ဘုရားဖူး ၂၂၄ ဦး သေဆုံးခဲ့ပါတယ်။
Ref: CNN
Comments