ကန်သမ္မတဟောင်း ဒေါ်နယ်ထရမ့် မဲဆွယ်ပွဲတွင် စနိုက်ပါဖြင့် ပစ်ခံရ

ဇူလိုင် ၁၄၊ ၂၀၂၄
M-Media

-ဇူလိုင်လ ၁၃ ရက်နေ့ ပင်ဆဲလ်ဗားနီးယားပြည်နယ် ဘက်တလာမြို့မှာ ပြုလုပ်တဲ့ မဲဆွယ်ပွဲအတွင်း အမေရိကန်သမ္မတဟောင်း ဒေါ်နယ်ထရမ့် သေနတ်နဲ့ ပစ်ခံခဲ့ရပါတယ်။

ပစ်ခတ်မှုမှာ ထရမ့်ဟာ ဒဏ်ရာရရှိခဲ့ပြီး အသက်အန္တရာယ် စိုးရိမ်စရာမရှိဘူးလို့ အမေရိကန်အာဏာပိုင်တွေက ထုတ်ပြန်ပါတယ်။ ထရမ့်ဟာ အခုနှစ် နို၀င်ဘာ ရွေးကောက်ပွဲမှာ လက်ရှိသမ္မတ ဘိုင်ဒန်ကို အဓိက ယှဥ်ပြိုင်မယ့်သူလည်း ဖြစ်ပါတယ်။

သေနတ်သမားကို လုံခြုံရေးတွေက အသေပစ်ခတ်ဖမ်းဆီးနိုင်ခဲ့ပြီး၊ ဒီအဖြစ်အပျက်အတွင်း မဲဆွယ်ပွဲလာသူတစ်ဦးလည်း သေဆုံးခဲ့ပါတယ်။

သေနတ်သမားဟာ စနိုက်ပါဖြစ်ပြီး မဲဆွယ်ပွဲကျင်းပရာနေရာဘေးက အဆောက်အဦးခေါင်းမိုးပေါ်မှာ ရှိနေခဲ့တာလို့ လုံခြုံရေးအဖွဲ့တွေရဲ့ သတင်းရင်းမြစ်ကို ကိုးကားပြီး ကန်ပြည်တွင်း မီဒီယာတွေက ဖော်ပြပါတယ်။ ပစ်ခတ်မှုကို လုပ်ကြံရန်ကြံစည်မှု ခေါင်းစဥ်နဲ့ စုံစမ်းစစ်ဆေးမှုတွေ ပြုလုပ်နေပါတယ်။

အမေရိကန်သမ္မတ ဂျိုးဘိုင်ဒန်က ဒီတိုက်ခိုက်မှုကို ရှုတ်ချခဲ့ပြီး ဒီလိုအကြမ်းဖက်မှုအတွက် အမေရိကန်မှာ နေရာမရှိဘူးလို့ ပြောကြားခဲ့ပါတယ်။

“စက်ဆုပ်စရာ ကောင်းပါတယ်။ ကျွန်တော်တို့တိုင်းပြည် ညီကိုညီညွတ်ရမယ်ဆိုတဲ့ အကြောင်းအရင်းတွေထဲက တစ်ခုလည်းဖြစ်ပါတယ်။ ဒီလိုကိစ္စမျိုး ဆက်ဖြစ်မှာကို ကျွန်တော်တို့ ခွင့်ပြုလို့ မရပါဘူး”

ထရမ့်ပစ်ခတ်ခံရမှုအတွက် အခြားအမေရိကန်ခေါင်းဆောင်တွေ၊ ကမ္ဘာတစ်၀ှမ်းက ခေါင်းဆောင်တွေလည်း ရှုတ်ချပြောဆိုခဲ့ကြပါတယ်။

Ref: CNN