ဇူလိုင် ၁၇၊ ၂၀၂၄
M-Media
![](http://www.m-mediagroup.com/wp-content/uploads/2024/07/unrwa.jpg)
-ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ ကုလအကူအညီပေးရေးအဖွဲ့ UNRWA က ၀န်ထမ်း ၂၀၀ လောက် အသတ်ခံထားရတယ်လို့ သိရပါတယ်။
UNRWA ဟာ အစ္စရေးရဲ့ နယ်မြေလု အကြမ်းဖက်သတ်ဖြတ်မှုတွေကြောင့် အိုးအိမ်စွန့်ခွာ ထွက်ပြေးရတဲ့ ပါလက်စတိုင်းပြည်သူတွေကို အဓိက အကူအညီပေးနေတဲ့အဖွဲ့ ဖြစ်ပါတယ်။
ကုလသမဂ္ဂရဲ့ ထုတ်ပြန်ချက်အရ ၉ လကျော်အတွင်း ဂါဇာကမ်းမြှောင်က UNRWA အဆောက်အဦး ၁၈၉ ခုကို အစ္စရေးက ဖျက်ဆီးထားပြီး ၀န်ထမ်း ၁၉၇ ဦးကို သတ်ဖြတ်ထားပါတယ်။ UNRWA က ဖွင့်လှစ်ထားတဲ့ ကျန်းမာရေးစင်တာ ၂၆ ခုမှာ ၁၆ ခုက ဖျက်ဆီးခံထားရပြီး လက်ရှိမှာ ၁၀ ခုသာ သုံးလို့ရပါတယ်။
အစ္စရေးရဲ့ အကြမ်းဖက်တိုက်ခိုက်မှုတွေထဲမှာ UNRWA ရဲ့ အဆောက်အဦးနဲ့ အဆောက်အဦးထဲက ရှိနေသူတွေကို ထိခိုက်ခဲ့တဲ့ အခြေအနေပေါင်း ၄၅၈ ခု ရှိတယ်လို့ ကုလရဲ့ ထုတ်ပြန်ချက်မှာ ဖော်ပြထားပါတယ်။
၉ လကျော်အတွင်း ဂါဇာမှာ အသတ်ခံရသူ အရေအတွက်ဟာ ၃၈၇၉၄ ဦး ရှိလာခဲ့ပြီး အများစုက အမျိုးသမီးတွေနဲ့ ကလေးငယ်တွေဖြစ်ပါတယ်။ ပြီးခဲ့တဲ့ ၂၄ နာရီအတွင်း အသတ်ခံရသူ အရေအတွက်က ၈၁ ဦး ရှိပါတယ်။
Ref: Aljazeera
Comments