အိမ်သာသန့်ဆေးရည်ကြောင့် အသက်ဆုံးရှုံးခဲ့ရသည့် ထိုင်းနိုင်ငံမှ သားအမိ ၃ ဦး

သြဂုတ် ၁၃၊ ၂၀၂၄
M-Media

-ထိုင်းနိုင်ငံ ချွန်ဘူရီမြို့မှာ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက်တို့ ဓာတ်ပြုရာကနေ ထွက်လာတဲ့ အဆိပ်ငွေ့ကြောင့် သားအမိ ၃ ဦး သေဆုံးတဲ့ ဖြစ်ရပ်တစ်ခု သြဂုတ်လ ၁၂ ရက်နေ့မှာ ဖြစ်ပွားခဲ့ပါတယ်။

အသက် ၆၀ အရွယ် ရဲအရာရှိ အမျိုးသမီး၊ အသက် ၃၄ နှစ်နဲ့ ၂၅ နှစ်အရွယ် သမီး ၂ ဦး စုစုပေါင်း သုံးဦးတို့ကို ရဲလိုင်းခန်းက သူတို့နေထိုင်ရာအခန်းရဲ့ ရေချိုးခန်းမှာ သေဆုံးလျက် တွေ့ရှိခဲ့ရတာ ဖြစ်ပါတယ်။

သေဆုံးသူတွေဟာ ပါးစပ်ကနေ အမြှုပ်ထွက်နေပြီး၊ လက်သည်းတွေလည်း နီနေကာ၊ သူတို့ဘေးနားမှာ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက် အထုပ်ကို တွေခဲ့ရပါတယ်။ ရဲတပ်ဖွဲ့ကတော့ ကနဦး စုံစမ်းစစ်ဆေးမှုအရ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက်အမှုန့်တို့ ဓာတ်ပြုရာကနေ ထွက်လာတဲ့ အဆိပ်ငွေ့ကြောင့် သေဆုံးရတာလို့ ထုတ်ပြန်ထားပါတယ်။

အိမ်သာသန့်ဆေးရည်မှာ ပါ၀င်တဲ့ ဓာတုပစ္စည်းဟာ ဆိုဒီယမ် ဟိုက်ဒရောက်ဆိုက်နဲ့ ဓာတ်ပြုရင် အသက်ရှုလမ်းကြောင်းကို ထိခိုက်စေတဲ့ အဆိပ်ဓာတ်ငွေ့ တစ်မျိုးကို ထွက်စေပါတယ်။ ဒီအငွေ့ကို ရှူမိရင် မူးမေ့တတ်ပြီး လေလုံနေတဲ့ အခန်းမျိုးမှာဆို သေဆုံးတဲ့အထိ ဖြစ်နိုင်ပါတယ်။

Ref: The Star