အစ္စလာမ့်ရေးရာကောလိပ်တစ်ခုကို စင်ကာပူအစိုးရက တည်ထောင်ပေးမည်

သြဂုတ် ၁၉၊ ၂၀၂၄
M-Media

-အနာဂတ် အစ္စလာမ့်ခေါင်းဆောင်တွေ ပေါ်ထွက်လာဖို့အတွက် ‘အစ္စလာမ့်ရေးရာကောလိပ်တစ်ခု’ တည်ဆောက် ထူထောင်ပေးမယ်လို့ စင်ကာပူ၀န်ကြီးချုပ် လောရင့် ၀ွန်က ပြောပါတယ်။

သြဂုတ်လ ၁၈ ရက်နေ့က ပြုလုပ်တဲ့ အမျိုးသားနေ့ ချီတက်ပွဲမှာ လောရင့်က ကြေငြာတာပါ။ ၀န်ကြီးချုပ်ဖြစ်ပြီးနောက် ချီတက်ပွဲကို ပထမဆုံးအကြိမ် တက်ရောက်တာလည်း ဖြစ်ပါတယ်။

အစ္စလာမ့်ရေးရာ ကောလိပ်တစ်ခု စင်ကာပူမှာ ပေါ်ပေါက်လာဖို့အတွက် ၂၀၁၆ ခုနှစ်မှာ အဲဒီတုန်းက မွတ်စလင်ရေးရာ ၀န်ကြီးအဖြစ် တာ၀န်ထမ်းဆောင်ခဲ့တဲ့ ယာကွဘ် အီဘရာဟင်က အဆိုပြုခဲ့တာပါ။

လောရင့်က နိုင်ငံအတွင်းက မလေးမွတ်စလင် လူ့အဖွဲ့အစည်းနဲ့ ခေါင်းဆောင်တွေဟာ နိုင်ငံ တိုးတက်အောင်မြင်ဖို့အတွက် ဘက်ပေါင်းစုံကနေ ကူညီပံ့ပိုးပေးခဲ့ပြီး ဒီလုပ်ဆောင်ချက်တွေကို သူ့အနေနဲ့ အသိအမှတ်ပြုတယ်လို့ ပြောကြားခဲ့ပါတယ်။

မွတ်စလင်လူ့အဖွဲ့အစည်းက ပေါ်ထွက်လာတဲ့ မှတ်ချက်တွေ၊ အတွေးအမြင်တွေကို မိမိတို့အစိုးရအနေနဲ့ တလေးတစား နားထောင်နေပြီး ခိုင်ခိုင်မာမာ ပူးပေါင်းဆောင်ရွက်သွားမယ်လို့လည်း ၀န်ကြီးချုပ်က ပြောပါတယ်။