Author: YinYin

သြဂုတ် ၅၊ ၂၀၁၄
M-Media
လမင်း

ရန်ကုန်   ။      ။      ယာဉ်စည်းကမ်း၊ လမ်းစည်းကမ်း ချိုးဖောက်သည့် ယာဉ်မောင်းလိုင်စင်များအား ဥပဒေနှင့်အညီ ပြစ်မှုအမျိုးအစားအလိုက်ရုပ်သိမ်း (ပိတ်သိမ်း) ကာလတွင် ၃ ပတ်အတွင်း လိုင်စင်ပိတ်သိမ်းခံရမှုမှာ ၅၉ မှုရှိနေပြီဖြစ်ကြောင်း အမှတ် (၂) ယာဉ်ထိန်းရဲတပ်ဖွဲ့ဌာနမှ ထုတ်ပြန်ထားသော သတင်းများအရ သိရသည်။
“ကျွန်တော်တို့ အရေးယူမယ့်နေ့မတိုင်မီကတည်းက သတင်းစာတွေ မှာကြေညာာထားပါတယ်။ ပညာပေးကာလ ကလည်းပြီးသွားပြီဖြစ်တဲ့အတွက် ထိရောက်စွာအရေးယူနေရခြင်းဖြစ်ပါတယ် ” ဟု အမှတ် (၂)ယာဉ်ထိန်းရဲဌာနမှ ဒုရဲမှူးကြီး လင်းထွဋ်က ရှင်းလင်းပြောကြားခဲ့သည်။
ရန်ကုန်မြို့တွင် ယာဉ်စည်းကမ်း လမ်းစည်းကမ်း ထိန်းသိမ်းရေးအဖွဲ့ ယခင် ၉ ဖွဲ့ရှိရာ ယခု ၁ ဖွဲ့တိုးပြီး ၁၀ ဖွဲ့ဖြင့် လှည့်လည်၍ စည်းကမ်းမဲ့ယာဉ်များအား လိုက်လံဖမ်းဆီးလျက်ရှိပါသည်။ ယာဉ်ထိန်းရဲ အင်အားကိုလည်း ၁၅၀ နီးပါး ထပ်မံတိုးမြှင့်ထားပြီး စည်းကမ်းမဲ့ယာဉ်များကို ထိရောက်စွာ အရေးယူနေကြောင်း သိရသည်။
မီးနီဖြတ်ခြင်း၊ အရက်သေစာသောက်စားမောင်းနှင်ခြင်း၊ မရပ်ရနေရာတွင်ရပ်ခြင်း၊ အမြန်နှုန်းကန့်သတ်ချက်ထက်ပိုမောင်းခြင်း စသည့်ဖြင့် ပြစ်မှုအမျိုးအစား ၁၄ မျိုးဖြင့် ယာဉ်လိုင်စင်များကို နှစ်အလိုက် ပိတ်သိမ်းမှုများပြုလုပ်ပြီး အရေးယူလျက်ရှိနေသည်။
ယာဉ်မောင်းသမားများ ယာဉ်တိုက်မှုဖြစ်ပြီး ထွက်ပြေးတိမ်းရှောင်ပါက ယာဉ်မောင်းလိုင်စင်အား ရာသက်ပန်ပိတ်သိမ်းမည်ဖြစ်ကြောင်းကိုလည်း အမှတ်(၂) ယာဉ်ထိန်းရဲဌာနမှ သတင်းထုတ်ပြန်ထားသည်။

ဇူလိုင် ၂၂၊ ၂၀၁၄
M-Media
လမင်း

ရန်ကုန်  ။       ။       သဘာဝခေါ်သံဖောင်ဒေးရှင်း၏ တက္ကသိုလ်ခြေလျင်နှင့် တောင်တက်အသင်းမှ အသင်းသားများက မြန်မာနိုင်ငံသားများအနေဖြင့် ခါကာဘိုရာဇီတောင်ထိပ်သို့ ပထမဆုံးအကြိမ်ဖြင့် တက်ရောက်မည်ဖြစ်ကြောင်း သတင်းရရှိပါသည်။

မြန်မာနိုင်ငံ၏အမြင့်ဆုံးတောင်ကို မြန်မာလူငယ်များမှ သီးသန့်တက်ရောက်နိုင်ရန်နှင့် ပြည်ထောင်စုမြန်မာနိုင်ငံတော်၏ အလံတော်ကို တောင်ထိပ်တွင် လွှင့်ထူနိုင်ရန်အတွက် ရည်ရွယ်၍ ယခုကဲ့သို့တောင်တက်ရခြင်းဖြစ်ကြောင်းကို သဘာဝခေါ်သံဖောင်ဒေးရှင်း ဥက္ကဌ ဦးမျိုးသန့် ကဆိုသည်။

“ဒီတောင်ကိုမတက်ခင် လေ့လာမှုတွေလည်း ပြုလုပ်ခဲ့ပါတယ်။ မြန်မာနိုင်ငံသားတွေအနေနဲ့ ဒီတောင်မှာ ပထမဆုံးအနေနဲ့ အလံစိုက်ခွင့်ကိုရအောင် ကြိုးစားသွားမှာပါ။ သေချာလေ့ကျင့်ထားကြတဲ့အတွက် တောင်ထိပ်ကိုရောက်မယ်လို့ ယုံကြည်ပါတယ်” ဟု တောင်တက်အဖွဲ့ခေါင်းဆောင်ဖြစ်သူ ကိုအောင်မြင့်မြတ်က ရှင်းလင်းပြောကြားသည်။

၎င်းတောင်တက်အဖွဲ့သည် ဇူလိုင်လ ၃၁ ရက်နေ့တွင် စတင်ထွက်ခွာမည်ဖြစ်ပြီး တောင်တက် တောင်ဆင်း ရက် ၆၀ ကြာမည်ဟု ခန့်မှန်းထားသည်။ တောင်အောက်ခြေသို့ တောင်တက်သမား ၈ ယောက်သွားမည်ဖြစ်ပြီး တောင်ထိပ်သို့ တောင်တက်သမားနှစ်ဦးမှ တက်ရောက်မည်ဖြစ်ပြီး မြန်မာနိုင်ငံအလံကို စိုက်ထူသွားမည်ဖြစ်သည်။

“အခုလို ဒီတောက်တက်ဖို့ကို ပါဝင်ခွင့်ရတဲ့အတွက်ဝမ်းသာပါတယ်။ အခွင့်အရေးအနေနဲ့ ဆရာကရော အသင်းကရောတာဝန်ပေးတဲ့အတွက် ၀မ်းသာမိပါတယ်။ အဖွဲ့ကစီစဉ်ထားတဲ့ လေ့ကျင့်မှုတွေကိုလည်း အားလုံးလုပ်ထားပါတယ်” ဟု တောင်တက်ရာတွင် ပါဝင်သူတစ်ဦးဖြစ်သူ ကိုဇေယျာထွန်းက ပြောခဲ့သည်။

ယင်းခရီးစဉ်ဖြစ်မြောက်ရေးအတွက် အဓိကအားဖြင့် ပရီးမီးယားကော်ဖီ ကုမ္ပဏီမှ ကူညီပံ့ပိုးပေးသွားမည်ဖြစ်ပြီး ကမ္ဘောဇဘဏ်၊ ပြင်ပစေတနာရှင်များ၊ အသင်းဝင်ဟောင်းများ၊ အသစ်များက လိုအပ်သည်များကို ၀ိုင်းဝန်းဖြည့်ဆည်းပေးခဲ့ကြသည်။

ခါကာဘိုရာဇီတောင်ထိပ်သည် ကချင်ပြည်နယ်၊ ပူတာအိုခရိုင်၊ နောင်မွန်မြို့နယ်၊ ပန်နန်းဒင်မြို့နယ်ခွဲတွင်တည်ရှိပြီး ၅၈၈၁ မီတာ၊ ၁၉၂၉၆ ပေရှိသည်။ ယင်းတောင်သို့ ပထမဆုံးတက်ရောက်ခဲ့သူမှာ မြန်မာ-ဂျပန် ချစ်ကြည်ရေးပူးပေါင်းတောင်တက်အဖွဲ့မှ ဂျပန်လူမျိုး မစ္စတာအိုဇာကီနှင့် မြန်မာနိုင်ငံသားတိဘက်လူမျိုး နမားဂျွန်ဆိန် မှ ၁၉၉၆ ခုနှစ် စက်တင်ဘာလ ၁၅ ရက်နေ့တွင် တက်ရောက်နိုင်ခဲ့ပါသည်။