Author: YinYin

ဇွန် ၂၁၊ ၂၀၁၄
M-Media
လမင်း

ရန်ကုန်  ။     ။   လက်ရှိအစိုးရကို မယုံကြည်တဲ့အတွက် ယခုကဲ့သို့ ဆန္ဒတွေကို ထုတ်ဖော်နေရခြင်းဖြစ်ပါတယ်လို့ ဒီမိုကရေစီရေးတက်ကြွလှုပ်ရှားသူ တစ်ဦးဖြစ်သူ ကိုနန္ဒာစစ်အောင်က ၂၀၀၈ ဖွဲ့စည်းပုံပြင်ဆင်ရေး ရန်ကုန်တောင်ပိုင်းခရိုင်လုံးဆိုင်ရာ ဆန္ဒထုတ်ဖော်ပွဲအတွက် စာနယ်ဇင်းရှင်းလင်းပွဲတွင် ပြောဆိုခဲ့သည်။

“ဒီမိုကရေစီနိုင်ငံမှာ ဆန္ဒတွေပြနေတာဟာ ဒီမိုကရေစီရဲ့ပြရုပ်တစ်ခုဖြစ်ပါတယ်။ ကျွန်တော်တို့ကတော့ မရ ရအောင်တောင်းဆိုနေမှာပါ။ နောက်ကိုလည်း ဖွဲ့စည်းပုံပြင်ဆင်ရေးအတွက် ဆက်ပြီးဆန္ဒတွေပြနေဦးမှာပါပဲ။ ပြည်သူလူထုက ရွေးချယ်တင်မြောက်တဲ့ အစိုးရတစ်ရပ်ဖြစ်လာရန်အတွက် ၅၉ (စ)ကိုပြင်ရန်အတွက်လည်း တောင်းဆိုသွားမှာပါ” ဟု ၎င်းက ဆက်လက်ပြောကြားခဲ့သည်။

၂၀၀၈ ဖွဲ့စည်းပုံပြင်ဆင်ရေး ရန်ကုန်တောင်ပိုင်းခရိုင်လုံးဆိုင်ရာ ဆန္ဒထုတ်ဖော်ပွဲတွင် တောင်ပိုင်းခရိုင်မှ မြို့နယ်များဖြစ်ကြသော သန်လျင်၊ ကျောက်တန်း၊ ခရမ်းသုံးခွ၊ ဒလ၊ တွံတေး၊ ဆိပ်ကြီးခနောင်တို၊ ကော့မှူး၊ ကွမ်းခြံကုန်း စသည့်မြို့နယ်များပါဝင်မည်ဖြစ်သည်။

အဆိုပါ ဆန္ဒထုတ်ဖော်ပွဲတွင် လူအင်အား ၃၀၀၀ ပါဝင်ရန် ခွင့်ပြုမိန့်ရရှိထားပြီဖြစ်ပြီး နေ့လည် ၂-နာရီမှ ညနေ ၅-နာရီအထိ ပြုလုပ်သွားမည်ဖြစ်ပြီး နိုင်ငံရေးနယ်ပယ်အသီးသီးမှ ပုဂ္ဂိုလ်များမှလည်း ဖွဲ့စည်းပုံနှင့်ပတ်သက်ပြီး ပြည်သူလူထုအား ဟောပြောပွဲများပြုလုပ်သွားမည်ဖြစ်သည်။

အရှေ့ပိုင်းခရိုင်လုံးဆိုင်ရာဆန္ဒထုတ်ဖော်ပွဲကို မေလ ၂၅-ရက်နေ့တွင်ကျင်းပခဲ့ပြီး ဇွန်လ ၂၂-ရက်နေ့တွင် တောင်ပိုင်းခရိုင်လုံးဆိုင်ရာ ဆန္ဒထုတ်ဖော်ပွဲကို ကျင်းပသွားမည်ဖြစ်သည်။ အနောက်ပိုင်းခရိုင်နှင့် မြောက်ပိုင်းခရိုင်လုံးဆိုင်ရာ ဆန္ဒထုတ်ဖော်ပွဲများကိုလည်း ဆက်လက်ပြုလုပ်ကျင်းပသွားမည်ဖြစ်ကြောင်း သိရသည်။

ဇွန် ၁၇၊ ၂၀၁၄
M-Media
လမင်း

ရန်ကုန် ။        ။ လူ့အခွင့်အရေး လူ့ဂုဏ်သိက္ခာ ရုပ်ရှင်ပွဲတော်ကို ရန်ကုန်မြို့ ၀ဇီရာ ရုပ်ရှင်ရုံတို့တွင် ဇွန်လ ၁၅ ရက်မှ ဇွန်လ ၁၉ ရက်နေ့ထိ နံနက် ၁၀ နာရီမှ ညနေ ၆ နာရီအထိ ပြုလုပ်လျက်ရှိသည်။

အဆိုပါ ရုပ်ရှင်ပွဲတော်တွင် ရုပ်ရှင် ၆၇ ကားပြသမည်ဖြစ်ရာ ပြည်တွင်းရုပ်ရှင် ၃၂ ကား၊ အာဆီယံရုပ်ရှင် ၉ ကား၊ နိုင်ငံတကာရုပ်ရှင် ၂၆ ကား တို့ပါဝင်သည်။ ယင်းရုပ်ရှင်ပွဲတော်ကို ရန်ကုန်မြို့အခြေစိုက် ဗြိတိသျှသံရုံး၊ အမေရိကန်အကူညီပေးရေးအဖွဲ့၊ မြန်မာ ထိုင်း ရုပ်ရှင်အဖွဲ့၊ ဆွီဒင်နိုင်ငံနှင့် ကနေဒါနိုင်ငံတို့က ပါဝင် ကူညီပေးခဲ့ကြောင်း သိရသည်။

၎င်းလူ့အခွင့်အရေး လူ့ဂုဏ်သိက္ခာ ရုပ်ရှင်ပွဲတော်တွင် ဆုများကို အကဲဖြတ်ဒိုင်လူကြီး ၂၀ ပါဝင်သည့်အဖွဲ့က စီစစ်ရွေးချယ်ကာ ဆု ၈ ဆု ချီးမြှင့်သွားမည်ဖြစ်သည်။

ယခုပြုလုပ်သော ရုပ်ရှပ်ပွဲတော်သည် ဒုတိယ အကြိမ်မြောက်ဖြစ်ပြီး ပထမအကြိမ် ရုပ်ရှင်ပွဲတော်ကို ပြည်တွင်း ပြည်ပ ရုပ်ရှင်ဇာတ်ကား ၅၄ ကားပြသခဲ့ပြီး ဆု ၇ ဆုကိုချီးမြှင့်ခဲ့ကြောင်း သိရသည်။

ယခုကျင်းပသော ဒုတိယမြောက်အကြိမ် ရုပ်ရှင်ပွဲတော်၏ ဆုချီးမြှင့်ပွဲ အခမ်းအနားကို ဇွန်လ ၁၉ ရက်နေ့တွင် ရန်ကုန်မြို့ ဆူးလေ ရှန်ဂရီလာ ဟိုတယ်တွင် ကျင်းပပြုလုပ်သွားမည်ဖြစ်ကြောင်း သိရသည်။

အဆိုပါရုပ်ရှင်ပွဲတွင် ပါဝင်ပြသရန် စီစဉ်ထားသော ဒါရိုက်တာမင်းထင်ကိုကိုကြီး ရိုက်ကူးသည့် အမိုးမရှိတဲ့ ကောင်းကင်’ မှာ အွန်လိုင်းမှ ခြိမ်းခြောက် မှုများကြောင့် ပြသခြင်းမပြုတော့ ကြောင်း သိရသည်။

မိတ္ထီလာ လူမျိုးရေး၊ ဘာသာရေး အဓိကရုဏ်းကို အခြေခံပြီး အိမ်ဖျက်ခံရသူ  မွတ်စလင်အဒေါ် အဒေါ်ဖြစ်သူထံ တူမက သွားရောက်ခဲ့ပုံနှင့် ပဋိပက္ခအပေါ် အဒေါ်၏အမြင်နှင့် ပဋိပက္ခအတွင်း ၎င်းကို အကူအညီပေးခဲ့သော ဗုဒ္ဓဘာသာဝင် မိတ်ဆွေတစ်ဦးနှင့် ၎င်းတို့ နှစ်ဦးကြား ထားရှိသော ခင်မင်မှုမေတ္တာတရားကို ရိုက်ကူးတင်ပြထားသည့်  ဇာတ်ကားဖြစ်ကြောင်း ဇာတ်ညွှန်း အရသိရသည်။

အဆိုပါ ရုပ်ရှင် ဇာတ်ကားပြသမည့် သတင်းထွက်ပေါ်ခဲ့၍ ဆိုရှယ်မီဒီယာများ တွင် အစွန်းရောက်လှုပ်ရှားသူများ ဆန့်ကျင်လှုံဆော်မှုများ ဖြစ်ပွားခဲ့ပြီးနောက် ဒါရိုက်တာ မင်းထင်ကိုကိုကြီး မှ ယခုကဲ့သို့ ဆုံးဖြတ်ခဲ့ခြင်းဖြစ်သည်။