Tag: Ebola

အောက်တိုဘာ ၃၀၊ ၂၀၁၄
M-Media

– အနောက်အာဖရိကတွင် အီဘိုလာပြန့်နှံ့မှု အများဆုံးဖြစ်နေသော လိုက်ဘေးရီးယားနိုင်ငံတွင် သေဆုံးမှုများ၊ ရောဂါကူးစက်မှုများ လျော့ကျသွားခဲ့သည်ဟု ကမ္ဘာ့ကျန်းမာရေးအဖွဲ့ WHO က ပြောကြားလိုက်သည်။

“အီဘိုလာအပေါ်တုံ့ပြန်မှု အသာစီးရပြီလားလို့ ယုံကြည်သလားဆိုရင်တော့… ဟုတ်ပါတယ် ရောဂါကူးစက်မှုနှုန်းကျလာတာကို ကျွန်တော်တို့ တွေ့နေရပါတယ်။ ကျွန်တော်တို့ ဒီမှာ ဂရုစိုက်ဖို့ လိုပါတယ်။ ဒါဟာ တောင်အောက်ကို ပြုတ်ကျသလိုမျိုး (အလျင်အမြန် လျော့ကျတာမျိုး) တော့ မဟုတ်ပါဘူး။ ” ဟု ယမန်နေ့က ပြုလုပ်ခဲ့သော ညှိနှိုင်းအစည်းဝေးတွင် WHO ၏ လက်ထောက် ဒါရိုက်တာ ဘရုစ် အိုင်လ်ဝါဒ်က ပြောကြားခဲ့သည်။

ယခုလက်ရှိတွင် အီဘိုလာပြန့်ပွားနေသည့် နိုင်ငံ ၈ ခု၌ ရောဂါကူးစက်နေသူ အရေအတွက်မှာ ဗုဒ္ဓဟူးနေ့နှောင်းပိုင်း ထုတ်ပြန်ချက်အရ ၁၃၇၀၃ ဦး ရှိနေပြီး သေဆုံးသူ အရေအတွက်မှာ ၅၀၀၀ ကျော်နေပြီဖြစ်သည်။

ပြီးခဲ့သည့် စနေနေ့မှစတင်ကာ ရောဂါကူးစက်သူ အရေအတွက် ၃၀၀၀ ကျော်ရှိခဲ့သည်ဟု သတင်းပေးပို့ခဲ့သော်လည်း အချက်အလက် အဟောင်းများကို မှားယွင်းဖော်ပြမှုကြောင့် ဖြစ်သည်ဟု အိုင်လ်ဝါဒ်က ဆိုသည်။

ထို့ပြင် အီဘိုလာအား ထိန်းချုပ်နိုင်ပြီဟု ယူဆနိုင်ကြောင်း၊ ယခုနှုန်းအတိုင်း ဆက်သွားပါက ဒီဇင်ဘာ ၁ ရက်နေ့တွင် အီဘိုလာ ထိန်းချုပ်မှုလုပ်ငန်းများ တိုးတက်ရမည်ဟူသော ရည်ရွယ်ချက်မှာ အဆိုးဆုံး ကူးစက်နေသည့် နိုင်ငံများဖြစ်သည့် ဂီနီ၊ လိုက်ဘေးရီးယား၊ ဆီရာလီယိုနီ နိုင်ငံများ၌ ပြည့်မီနိုင်မည်ဖြစ်ကြောင်း ၎င်းက ထပ်လောင်းပြောကြားခဲ့သည်။

အောက်တိုဘာ ၂၄ ၊ ၂၀၁၄
M-Media

– မကြာသေးမီက အနောက်အာဖရိကမှပြန်လာသည့် အမေရိကန် ဆရာဝန်တစ်ဦးတွင် အီဘိုလာဗိုင်းရပ်စ်ပိုး တွေ့ရှိခဲ့ရသောကြောင့် နယူးယောက်ဆေးရုံသို့ တင်ပို့ခဲ့ရသည်ဟု နယူးယောက် မြို့တော်ဝန်က အတည်ပြု ပြောကြားခဲ့သည်။

ခရေ့ဂ်ျစပန်ဆာဟု အမည်ရသည့် အဆိုပါဆရာဝန်မှာ နယ်စည်းမခြားဆရာဝန်များအဖွဲ့နှင့် အီဘိုလာဗိုင်းရပ်စ်ပိုး ကူးစက်နေသည့် အနောက်အာဖရိက နိုင်ငံများတွင် သွားရောက် တာန်ဝန်ထမ်းဆောင်ခဲ့သူ ဆရာဝန်တစ်ဦးဖြစ်ပြီး လွန်ခဲ့သည့် ၂၁ ရက်အတွင်းက အမေရိကန်သို့ ပြန်လည်ရောက်ရှိလာခဲ့သူ ဖြစ်သည်။

စပန်ဆာတွင် အဖျားနှင့် အီဘိုလာကူးစက်သူကဲ့သို့ လက္ခဏာများ ပြနေသောကြောင့် စစ်ဆေးခဲ့ရာမှ အီဘိုလာဗိုင်းရပ်စ်ပိုး တွေ့ရှိခဲ့ရခြင်းဖြစ်သည်ဟု နယူးယောက် ကျန်းမာရေး ဌာနမှ ယမန်နေ့တွင် သတင်းထုတ်ပြန်ခဲ့သည်။

ထိုကဲ့သို့ ရောဂါပိုး ကူးစက်ကြောင်း တွေ့ရှိခဲ့ရသော်လည်း နယူးယောက်ရှိ ဆေးရုံများတွင် အီဘိုလာ ကုသရေးအတွက် ပြင်ဆင်မှုများ ပြုလုပ်ထားသောကြောင့် နယူးယောက်တွင် နေထိုင်သူများ အနေဖြင့် စိုးရိမ်မှုလွန်ကဲရန် မလိုအပ်ကြောင်း ဒေသတွင်းမီဒီယာများက ဖော်ပြခဲ့သည်။

နယူးယောက်ပြည်နယ် အုပ်ချုပ်ရေးမှူး မာရီယိုကျူယိုမိုကမူ အခြေအနေအား ထိန်းချုပ်ထားနိုင်ပြီး ရောဂါပိုးကူးစက်နေသူကိုလည်း သင့်လျော်သည့် ဆေးကုသမှုများ ဆောင်ရွက်ပေးနေသည်ဟု ပြောကြားခဲ့သည်။

အောက်တိုဘာလအစောပိုင်းက အီဘိုလာကူးစက်သူ လိုက်ဘေးရီးယားနိုင်ငံသားတစ်ဦးကို အမေရိကန်တွင် ပထမဆုံးတွေ့ရှိခဲ့ရပြီး၊ ၎င်းအားကုသပေးခဲ့သော သူနာပြုနှစ်ဦးမှာလည်း ရောဂါပိုးကူးစက်နေကြောင်း ၎င်းသေဆုံးပြီး နောက်ပိုင်းတွင် တွေ့ရှိခဲ့ရသည်။ ယခုကဲ့သို့ တွေ့ရှိမှုမှာ အမေရိကန်တွင် အီဘိုလာရောဂါပိုး ကူးစက်ခံရသည့် စတုတ္ထမြောက်လည်း ဖြစ်သည်။

ref_ Agencies

အောက်တိုဘာ ၂၀ ၊ ၂၀၁၄
M-Media

– အီဘိုလာဗိုင်းရပ်စ်ပိုးကြောင့် သီတင်းပတ် ၂ ပတ်ကြာ ဆေးကုသမှု ခံယူနေရသည့် စပိန်သူနာပြုတစ်ဦးမှာ ယမန်နေ့က စစ်ဆေးမှုများအရ အီဘိုလာလက္ခဏာ လုံးဝမရှိတော့ဟု စပိန်အာဏာပိုင်များက ပြောကြားလိုက်သည်။

သွေးစစ်ဆေးချက်များအရ သူနာပြု ထရီဇာ ရိုမဲရို၏ ကိုယ်ခံအား စနစ်မှာ အီဘိုလာဗိုင်းရပ်စ်ပိုးအား တိုက်ထုတ်နိုင်ခဲ့ပြီး ရောဂါပိုးနှင့် ပတ်သက်သည့် မည်သည့်လက္ခဏာမှ မရှိတော့သည်ကို တွေ့ရှိခဲ့ရသည်။

ယခုစစ်ဆေးမှုမှာ ကနဦးစစ်ဆေးမှုဖြစ်ပြီး ရိုမဲရို လုံးဝပျောက်ကင်းသွားသည်ကို အတည်ပြုနိုင်ရန်အတွက် ဒုတိယမြောက်စစ်ဆးမှုကို ထပ်မံပြုလုပ်သွားမည်ကို ရိုမဲရိုအား ဆေးကုသပေးနေသော မက်ဒရစ်မြို့ရှိ Carlos III ဆေးရုံမှ အဏုဇီဝဆိုင်ရာ ဒါရိုက်တာ မန်နျူယဲလ် ကျူအန်ကာက ပြောကြားခဲ့သည်။

အသက ၄၄ နှစ်အရွယ်ရှိ ရိုမဲရိုမှာ Carlos III ဆေးရုံတွင် အီဘိုလာရောဂါသည် နှစ်ဦးကို ပြုစုစောင့်ရှောက်ပေးခဲ့ပြီးနောက် အဆိုပါ ရောဂါပိုး ကူးစက်ခံခဲ့ရခြင်းဖြစ်ပြီး အနောက်အာဖရိကအပြင်ဘက်၌ ပထမဆုံး အီဘိုလာဗိုင်းရပ်စ်ပိုးကူးစက်သူလည်း ဖြစ်သည်။

အမေရိကန်တွင်လည်း အီဘိုလာရောဂါသည်အား ကုပေးခဲ့သူ သူနာပြု နှစ်ဦးမှာ ဗိုင်းရပ်စ်ပိုး ကူးစက်မှုကို ခံနေရသည်။