မတ် ၁၀၊ ၂၀၁၄
M-Media
ပိုင်စိုးနိုင်
ကျောင်းသားထုညီလာခံကို ၂၀၁၅ နှစ်ဆန်းတွင် ကျင်းပပြုလုပ်နိုင်ရန် စီစဉ်သွားမည်ဟု ဗကသများအဖွဲ့ချုပ် (ဗဟိုလုပ်ငန်းကော်မတီ) ၏ ဖေဖော်ဝါရီ ၂၅ရက်မှ မတ်လ ၁ရက်နေ့အထိ ငါးရက်ကြာ အစည်းအဝေးမှ ရလဒ်အဖြစ် သတင်းထုတ်ပြန်ခဲ့သည်။ အဆိုပါ ညီလာခံ မတိုင်မီ ကျောင်းသားထု အခွင့်အရေးနှင့် စပ်လျဉ်းသည့် အလုပ်ရုံ ဆွေးနွေးပွဲ တစ်ရပ်ကိုလည်း ကျင်းပမည်ဖြစ်ပြီး ခရိုင်အဆင့် ကျောင်းသားသမဂ္ဂများ၏ စည်းရုံးရေး လုပ်ငန်းစဉ် များကိုလည်း ဆောင်ရွက်သွားမည်ဟု သိရှိရသည်။
အဆိုပါကျောင်းသားညီလာခံသို့ တက္ကသိုလ်ကျောင်းသား သမဂ္ဂ၊ ခရိုင်ကျောင်းသား သမဂ္ဂ အသီးသီးမှ ကိုယ်စားလှယ်များ တက်ရောက်ပြီး တစ်နိုင်ငံလုံး အဆင့် ကျောင်းသားသမဂ္ဂ အမှုဆောင်အဖွဲ့ကိုလည်း ရွေးကောက် တင်မြောက်သွားမည်ဟု သိရသည်။ ကျောင်းသားညီလာခံ မဖြစ်မြောက်မီ အချိန်ထိ လက်ရှိဦးဆောင်နေသော ဗဟိုလုပ်ငန်းကော်မတီ အဖွဲ့ဝင်များကသာ ဦးဆောင်ပေးသွားမည်ဖြစ်ပြီး အမှုဆောင်သစ်ပေါ်ပေါက်လာပါက တာဝန်လွှဲ ပြောင်းပေးသွားမည်ဟု ယင်းထုတ်ပြန်ချက်တွင် ဖော်ပြထားသည်။ အဆိုပါ ကျောင်းသားထုညီလာခံဖြစ်မြောက်ရေးအတွက် ခရိုင် အသီးသီးရှိ ကျောင်းသား သမဂ္ဂများမှ ကိုယ်စားလှယ်များ ပါဝင်သည့် ဖြစ်မြောက်ရေးကော်မတီ တစ်ရပ်ကို ဖွဲ့စည်းပြီး လုပ်ငန်း အဆင့်အဆင့်ကို ဆောင်ရွက်မည် ဖြစ်ကြောင်း သိရှိရသည်။ လက်ရှိ ဗကသများ အဖွဲ့ချုပ်၏ ဗဟိုလုပ်ငန်းကော်မတီ အဖွဲ့ဝင်များတွင် တက္ကသိုလ်ကျောင်းသားကျောင်းသူများ မပါဝင်ဘဲ ကိုကျော်ကိုကို ဦးဆောင်သည့် ယခင်မျိုးဆက်ကျောင်းသားဟောင်များဖြစ်ကြသည်။
ကျောင်းသားထုညီလာခံဟု အမည်တပ်ရန်အတွက် ဗကသများ အဖွဲ့ချုပ်နှင့် မူဝါဒ ကွဲပြားသည့် အခြားကျောင်းသား သမဂ္ဂများလည်း ပါဝင်ရန် လိုအပ် သော်လည်း လက်ရှိတွင် ကျောင်းသားသမဂ္ဂများမှာ ကိုကျော်ကိုကို ဦးဆောင်သည့် အုပ်စု၊ ကိုဒီငြိမ်းလင်း ဦးဆောင်သည့် အုပ်စု၊ ကိုစည်သူမောင် ဦးဆောင်သည့် အုပ်စုဟူ၍ ကွဲပြားနေလျက်ရှိပါသည်။ ဗကသများ အဖွဲ့ချုပ်ကို ၂၀၀၇-ခုနှစ်၊ စက်တင်ဘာလ ရွှေဝါရောင်တော်လှန်ရေးနှင့်အတူ အဆိုပါကျောင်းသားခေါင်းဆောင်များက ပြန်လည်အသက်သွင်းခဲ့ကြခြင်းဖြစ်သည်။