M-Media
မေလ ၁ ၊ ၂၀၁၆
မြန်မာနှင့်ဆက်ဆံရေးမှာ ဘင်္ဂလားဒေ့ရ်ှအတွက်အရေးကြီးကြောင်း၊ မြန်မာနိုင်ငံမှာ တရုတ်နှင့်သာမက အာဆီယံနိုင်ငံများအတွက်ပါ ဆက်ဆံရေးတံခါးဝနိုင်ငံဖြစ်နေကြောင်း ဘင်္ဂလားဒေ့ရ်ှနိုင်ငံအခြေဆိုက် bdnews က ဖော်ပြသည်။
ပြီးခဲ့သည့်စနေ့က မြန်မာနိုင်ငံဆိုင်ရာ ဘင်္ဂလားဒေ့ရ်ှသံရုံးတွင်ကျင်းပခဲ့သော ချစ်ကြည်ရေးယဉ်ကျေးမှု ဖလှယ်ပွဲအစီအစဉ်သတင်းကို bdnews က သတင်းတင်ဆက်ထားသည်။ ထိုယဉ်ကျေးမှုဖလှယ်ပွဲတွင် ဘင်္ဂလားဒေ့ရ်ှနှင့် မြန်မာတို့အကြား ဆက်စပ်နေသည့် ယဉ်ကျေးမှု အသွင်အပြင်များကို ဦးစားပေးခဲ့ကြောင်း၊ အထူးသဖြင့် နှစ်သစ်ကူးအစီအစဉ်ကို အသားပေးထားကြောင်း သိရသည်။
အခမ်းအနားသို့ အဲန်အဲလ်ဒီနာယက သူရဦးတင်ဦးနှင့် ရန်ကုန်တိုင်းဝန်ကြီးချုပ် ဦးဖြိုးမင်းသိမ်းတို့ တက်ရောက်ခဲ့သည်။
ဘင်္ဂလားဒေ့ရ်ှအစိုးရအနေဖြင့် ရွှေဂက်စ်စီမံကိန်းမှ ဂက်စ်များကို ၀ယ်ယူဖို့စိတ်ဝင်စားလျက်ရှိကြောင်းလည်း သိရသည်။ ဘင်္ဂလားဒေ့ရ်ှဘက်မှ မြန်မာနှင့် ချစ်ကြည်ရေးပြန်လည်ခိုင်မာလာစေဖို့ လိုလားလျက်ရှိကြောင်း၊ ယင်းနှင့်စပ်လျဉ်း၍ မဇ္ဈိမသတင်းဌာနမှ အယ်ဒီတာချုပ် ဦးစိုးမြင့်ကို bdnews က မေးမြန်းထားရာ ဦးစိုးမြင့်က မီဒီယာအနေဖြင့် ချစ်ကြည်ရေးပြန်လည်ခိုင်မာလာစေဖို့ အကူအညီပေးနိုင်ကြောင်း၊ မြန်မာနှင့် ဘင်္ဂလားတို့မှာတစ်နိုင်ငံအကြောင်း တစ်နိုင်ငံ ရင်းနှီးကျွမ်းဝင်ခြင်းမရှိကြောင်း၊ မြန်မာလူထုမှာလည်း ဘင်္ဂလားအကြောင်း အသေအချာ သတင်းမရရှိကြကြောင်း၊ မီဒီယာချင်း သတင်းဖလှယ်၍ ဘင်္ဂလားဒေ့ရ်ှအကြောင်းလည်း မြန်မာက ပိုသိနိုင်သလို ဘင်္ဂလားဒေ့ရ်ှကလည်း မြန်မာအကြောင်း ပိုမိုသိနားလည်နိုင်ကြောင်း ပြောပြထားသည်။
