News @ M-Media

Tag: မမလ

  • ၁၉၈၂-ခုနှစ် မြန်မာနိုင်ငံသား ဥပဒေဆိုင်ရာ ဟောပြောပွဲ ပြုလုပ်

    ၁၉၈၂-ခုနှစ် မြန်မာနိုင်ငံသား ဥပဒေဆိုင်ရာ ဟောပြောပွဲ ပြုလုပ်

    ဇွန် ၃၀၊ ၂၀၁၃
    M-Media
    အမ်တူးအေ

    ရန်ကုန် ။ ။ ၁၉၈၂-ခုနှစ် မြန်မာနိုင်ငံသား ဥပဒေဆိုင်ရာ ဟောပြောပွဲ တစ်ရပ်ကို ပြည်ထောင်စု သမ္မတမြန်မာနိုင်ငံတော် မြန်မာနိုင်ငံလုံးဆိုင်ရာ မြန်မာမွတ်စလင်မ် လူငယ်များ (ဘာသာရေး)အဖွဲ့မှ ယနေ့ နေ့လည် (၁း၃၀)တွင် ၎င်းတို့  ဌာနချုပ်ခန်းမ၌ ကျင်းပပြုလုပ်ခဲ့ပါသည်။

    အဆိုပါ ဟောပြောပွဲအား ဦးခင်မောင်ချို(တရားလွှတ်တော်ရှေ့နေ)မှ ဦးဆောင်ဟောပြောတင်ပြခဲ့ပြီး ၁၉၈၂-ခုနှစ် ဥပဒေနှင့်ပတ်သက်၍ သိသင့်သည်များကို အဓိက ဆွေးနွေးခဲ့ပြီး။ ၁၉၆၇-ခုနှစ်ဥပဒေ၊ ၂၀၀၈-ခုနှစ် ဖွဲ့စည်းပုံ ဥပဒေတို့ကိုလည်း ထည့်သွင်း ဟောပြောခဲ့ပါသည်။ ဦးခင်မောင်ချို၏ ဟောပြောမှုအပြီးတွင် တက်ရောက်လာသူများမှ မရှင်းလင်းသည်များ၊ သိလိုသည်များကို မေးမြန်းခဲ့ကြပြီး ဟောပြောသူမှ ပြန်လည် ဆွေးနွေးပေးခဲ့ပါသည်။

    ယခုကဲ့သို့ ဟောပြောပွဲပြုလုပ်ရခြင်းနှင့်ပတ်သက်ပြီး “ယခုလို ၈၂-ခုနှစ် ဥပဒေဆိုင်ရာ ဟောပြောပွဲမှာ အဓိကတင်ပြသွားတာတွေက ဥပဒေတစ်ခုရဲ့ အားနည်းချက် အားသာချက်တွေ၊ ဥပဒေတစ်ခုနဲ့ တစ်ခု ချိတ်ဆက်တဲ့ အကြောင်းအရာတွေကို လေးလေးနက်နက် တင်ပြသွားတာ တွေ့ရကြောင်း၊ ဥပဒေတစ်ခုနဲ့ တစ်ခု ချိတ်ဆက်မှုတွေကို အဓိကထားရမှာဖြစ်ကြောင်း၊ ဥပဒေကို အခြေပြုပြီးဖြစ်ပေါ်လာတဲ့ အကြောင်းအရာတွေ များစွာရှိကြောင်း၊ ဥပဒေကို အသုံးမပြုပဲဖြစ်နေတဲ့ကိစ္စရပ်များစွား ရှိခဲ့ကြောင်း၊ ရှိပြီးသားဥပဒေကို ဟန့်တားခွင့်များ ဆုတ်ယုတ်နေသည်များလည်းရှိကြောင်း၊ ယခု ဟောပြောပွဲသည် ဥပဒေ၏ ရေသောက်မြစ်ကို အဓိက ရှာဖွေခြင်းဖြစ်ကြောင်း၊ ယနေ့အချိန်အခါသည် ဘာသာကိုအကြောင်းပြုပြီး လူမျိုးသတ်မှတ်လေ့ရှိပြီး ကိုးကွယ်သည့် ဘာသာကိုကြည့်၍ ဥပဒေကို သတ်မှတ်သည့် အခြေအနေများ ရှိနေသည့် အတွက် ယခုလို ဟောပြောပွဲပြုလုပ်ရသည်ကို နားလည်စေလိုကြောင်း၊ ယခုလို ဟောပြောဆွေးနွေးပွဲများတွင် လိုအပ်၍ ဆွေးနွေးပါက ခိုင်ခိုင်လုံလုံဆွေးနွေးတတ်ရန် လိုအပ်ကြောင်း၊ အင်တာနက်နှင့် ဖေ့ဘွတ် စာမျက်နှာများတွင် ပြောကြားနေကြသလို မပြောမိကြစေရန် အထူးမေတ္တာရပ်ခံကြောင်း”ကို မ.မ.လ ဌာနချုပ် ဥက္ကဋ္ဌ ဦးမြင့်ထွန်းမှ ဟောပြောပွဲနိဂုံးချုပ်စကားတွင် ထည့်သွင်းပြောကြားသွားခဲ့ပါတယ်။

  • ၄ လ တကြိမ် ပြုလုပ်တဲ့ မ.မ.လ မှ ကြီးမှူးသော ၁၂ ကြိမ်မြောက် သွေးလှူပွဲ

    မေလ ၂၇၊ ၂၀၁၃
    M-Media
    သတင်း – ဆူးထက်

    မြန်မာနိုင်ငံလုံးဆိုင်ရာ မြန်မာမွတ်စလင် လူငယ်များ(ဘာသာရေး) အဖွဲ့ မ.မ.လ ဌာနချုပ်မှ ကြီးမှူး၍ ပုံမှန်ကျင်းပမြဲဖြစ်သော (၁၂)ကြိမ်မြောက် စုပေါင်း သွေးလှူဒါန်းပွဲကြီးကို မေလ ၂၆ရက်နေ့က ရန်ကုန်မြို့ ၊ အမျိုးသားသွေးဌာနတွင် နံနံက် (၈း၃၀) နာရီက စတင် ကျင်းပပြုလုပ်ခဲ့ကြောင်း သတင်းရရှိသည်။

    P5260391

    အဆိုပါ အခမ်းအနားသို့ မ.မ.လ မြို့နယ် အဆင့်ဆင့် အဖွဲ့ခွဲများ၊ ဧရာဝတီတိုင်း ကျောင်းကုန်း၊ Myanmar Chelsea Fans Club အဖွဲ့ နှင့် အခြား အဖွဲ့အသီးသီး တို့အတူ ပူးပေါင်း သွေးလှူဒါန်းခဲ့ကြောင်း သိရသည်။

    ဧရာဝတီတိုင်း ဒေသကြီး ကျောင်းကုန်းမြို့နယ်မှ အဖွဲ့ခေါင်းဆောင် ကိုလှိုင်မျိုးဆွေမှ “ ကျွန်တော်တို့ ကျောင်းကုန်းက အဖွဲ့ဝင် လူနှစ်ထောင်လောက်ရှိပါတယ်၊ အခု မမလ ဌာနချုပ်နဲ့ အတူ ပူပေါင်း သွေးလှူဖို့ လာတာက အယောက် ၅၀ကျော်ပါ၊ ၄လတစ်ကြိမ် လှူကြတာပါ၊ ကျွန်တော်တို့ သွေးနဲ့ ဆင်းရဲ ချမ်းသာ မရွေးလူတစ်ယောက် အသက်ရှင်တယ် ဆိုတာနဲ့ပဲ ကျွန်တော်တို့ ပီတီ ဖြစ်ရပါတယ်” ဟု M-Media သို့ပြောသည်။

    P5260394

    ဧရာဝတီတိုင်း ကျောင်းကုန်းမြို့နယ်မှ သွေးအကြိမ်( ၁၀၀)ကျော် အလှူရှင်တစ်ဦး ဖြစ်သူ ဦးမြရီမှ “ ကျွန်တော် မ.မ.လ အဖွဲ့နဲ့ အတူ လှူတာ နှစ်ကြိမ်မြောက်ပါပြီ၊ ဦးလေး သွေးလှူဒါန်းတာကတော့ အကြိမ် တစ်ရာကျော်ပါပြီ၊ ဦးလေး သွေးလှူဒါန်းဖြစ်တဲ့ အကြောင်းကတော့ ဆင်းရဲ ချမ်းသာမရွေး လှူဒါန်းလို့ရတယ်၊ ပြီး ဦးလေး ကိုယ်တိုင်က ဆင်းရဲတဲ့ လူတစ်ယောက်ဖြစ်တယ်၊ ဆင်းရဲတဲ့ လူဖြစ်နေတော့ ငွေကြေးကို ဦးလေး မလှူနိုင်ဘူး၊ မလှူနိုင်တဲ့ အခါကြတော့ ဦးလေး ကိုယ်ထဲက သွေးနဲ့ပဲ ပြည်သူတွေရဲ့ အသက်ကို ကယ်ပေးမယ်ဆိုပြီး ဆုံးဖြတ်ချက်ချပြီး လှူခဲ့တာပါ၊ ဦးလေး (၁၇)နှစ်သား ကျောင်းသား လောက အရွယ်ကတည်းက စပြီး လှူခဲ့တာပါ၊ ဦးလေးက ကျောင်းကုန်းမြို့နယ် အထွေထွေ အုပ်ချုပ်ရေးမှူး ဌာနက ၀န်ထမ်းပါ၊ ဦးလေးကတော့ ကိုယ်ကိုကိုယ် နမူနာ ပြ အနေနဲ့ စံပြ ပြီးတော့ သူများတကာကို ဒီအလှူဒါနလေး ဖြစ်အောင် ပြည်သူတွေ အသက်ကို ကယ်လို့ရတယ်လို့ ပြောပြီးတော့ ဆွဲဆောင်ခဲ့ပါတယ်၊ သွေးလှူရှင်တွေကို သိမ်းသွင်းခဲ့ပါတယ် ” ဟု M-Media သို့ပြောသည်။

    မ.မ.လ ဌာနချုပ် သွေးလှူဒါန်းရေး တာဝန်ခံ ဆော်သြရေးမှူး ဦးမောင်မောင်မှ “ အခုဆိုရင် မ.မ.လ ဌာနချုပ်က ကြီးမှူးပြီးတော့ ၁၂ ကြိမ်မြောက် စုပေါင်းသွေးလှူဒါန်းပွဲ ဖြစ်ပါတယ်၊ လူဦးရေ အနေနဲ့ အယောက်နှစ်ထောင် ငါးရာ ကျော်သွားပါပြီ၊ ဘာသာပေါင်းစုံ ချစ်ကြည်ရေးကို ရှေ့ရှူပြီး လူမျိုး၊ ဘာသာမရွေး လိုအပ်နေတဲ့ သွေးတွေကို ပံပိုး ကူညီတဲ့ ရည်ရွယ်ချက်လေး ဖြစ်ပါတယ်၊ ရန်ကုန်တိုင်းမှာ ရှိတဲ့ ကျွန်တော်တို့ မ.မ.လ မြို့နယ် (၂၀) ရယ်၊ အပြင်က အဖွဲ့အစည်းတွေလည်း ပါပါတယ်၊ ကျွန်တော်တို့ အအနေနဲ့ ဒီလို သွေးလှူဒါန်းပွဲ အခမ်းအနား ဖြစ်လာအောင် တစ်လကြိုတင်ပြီးတော့ မြို့နယ်တွေကို အကြောင်းကြားတယ်၊ ဆော်သြတယ်၊ ဆေးတွေပေးတယ်၊ သွေးအလှူရှင်တွေ စုခိုင်းတယ် ပြီတော့ သွေးလှူဘဏ်က ဒေါက်တာ သီတာအောင်၊ ဒေါက်တာ ခင်ထွေးတို့ နဲ့ ဆက်သွယ် လှူဒါန်းတာ ဖြစ်ပါတယ်၊ မ.မ.လ ဌာနချုပ်ရဲ့ လုပ်ငန်းစဉ် တစ်ခုအနေနဲ့ လုပ်တဲ့ အထဲမှာ သွေးလှူဒါန်းတာ  ပါပါတယ်၊ (၄)လတစ်ကြိမ်ကို ပုံမှန် စဉ်ဆက်မပြတ် လှူဒါန်းနေတာ ဖြစ်ပါတယ်၊ သွေးလှူဒါန်းရှင်တွေကို ဂုဏ်ပြုလွှာ၊ တီရှပ်အင်္ကျီ၊ အာဟာရ ၊ ဒံပေါက် တစ်ယောက် တစ်ထုပ် ပြန်ပြီး ပေးပါတယ်” ဟု M-Media သို့ပြောသည်။

    မ.မ.လ ဌာနချုပ်၏ တွဲဖက် စာရင်းစစ် ဖြစ်သူ ဦးဇော်ဝင်းမှ “ လူ့အသက်တစ်ချောင်းကို ကယ်နိုင်ဖို့ဆိုတာ အဓိကပဲ၊ ဘာသာအယူဝါဒတွေ မတူတာတွေ ရှိမယ်၊ အရောင်အဆင်း မတူတာတွေ ရှိမယ် ဒါပေမယ့် လူသားဆိုပြီး ဖြစ်လာပြီဆိုကတည်းက သွေးဆိုတာ အရောင် တစ်မျိုးတည်းပဲ ရှိတယ်၊ သွေးထဲမှာ အမျိုးအစားပေါင်း များစွာ ကွဲနေပါစေ ဒါပေမယ့် ဒီသွေးသည် လူ့ရဲ့ အသက်တစ်ချောင်းကို ကယ်နိုင်ပါတယ်၊ လူဆိုတာက လူကိုပဲ ကယ်နိုင်တယ်၊ သွေးဆိုတာကလည်း မရှိမဖြစ် လိုအပ်တဲ့ အရာ ဘယ်လူသားကမှ ဖန်ဆင်းလို့ မရပါဘူး၊ လူဆီကပဲ ရတာပါ၊ လူက လူကို ကူညီတယ်ဆိုတာ လူသားဆန်တဲ့ သဘောပါ၊ ကျွန်တော် ကိုယ်တိုင်ကလည်း အစ္စလာမ် ဘာသာဝင် တစ်ယောက်ပါ၊ အစ္စလာမ်ဘာသာက ပိုပြီးတော့တောင် ပြထားပါတယ်၊ လူတစ်ယောက်ရဲ့ အသက်ကို ကယ်ရမယ်၊ ကူညီရမယ်၊ အိမ်နီးချင်းရဲ့ တာဝန်ကို အကုန်လုံး ကျေပွန်ရမယ် အဲဒီရည်ရွယ်ချက်လည်း ပါတယ်၊ သွေးဆိုတာက ဘယ်ဘာသာဝင် မဆို ဆေးရုံတက်ပြီး ကုသလို့ လိုအပ်လာပြိ ဆိုရင် ပေးနိုင်အောင် (၄)လတစ်ကြိမ် ကျွန်တော်တို့ ဒီပွဲ ဖြစ်လာအောင် ကြိုးစား အကောင်အထည်ဖော် ဆောင်ရွက်လာတာပါ၊  အခု ဆိုရင် (၁၂)ကြိမ်မြောက် ရှိပါပြီ ” ဟု M-Media သို့ပြောသည်။

    မ.မ.လ ဌာနချုပ် ဓမ္မသတ်မှူး ရှိုက်ခ် မွတ်စတဖာ ကမာလ် မှ “ သွေးလှူတာနဲ့ ပတ်သပ်ပြီး သာသနာမှာ မလှူရဘူး ဆိုတဲ့ တားမြစ်ချက်ဆိုတာ ဘာမှ မရှိဘူး၊ အစ္စလာမ် သာသနာက ဒီလို သွေးလှူဒါန်းခြင်းကိစ္စကို အများကြီး တိုက်တွန်းထားတယ် ဆိုတဲ့ အချက်တွေကို ကျွန်တော်တို့ ကျမ်းမြတ် ကုရ်အာန်ထဲမှာရော၊ တမန်တော်မြတ် (ဆွ)ရဲ့ သြ၀ါဒတော်တွေထဲမှာ အများကြီး လာရှိတာကို တွေ့ရတယ်၊ ကျမ်းမြတ်ကုရ်အန်ထဲမှာ အလ္လဟ်ရှင်မြတ် အမိန့်ရှိထားတယ်၊ လူတစ်ယောကကို ဘာအပြစ်မှ မရှိပဲနဲ့ အကြောင်းမဲ့ သတ်လိုက်မယ်ဆိုရင် အဲဒီလူက တနည်း လူသားထု တစ်ရပ်လုံးကို သတ်ပစ်လိုက်တာနဲ့ တူတယ်လို့ အမိန့်ရှိတယ်၊ လူတစ်ယောက်ကို အသက်ရှင်အောင် ပြုလုပ်ပေးလိုက်မယ် ဆိုလို့ရှိရင် အဲဒီလူက လူသားထု တစ်ရပ်လုံးကို အသက်ရှင်အောင် ပြုလုပ်ပေးတာနဲ့ အလား သဏ္ဍန်တူတယ် ဆိုတဲ့ အာယာသ်တော်တွေကိုလည်း ကျွန်တော်တို့ တွေ့ရှိရတယ်” ဟု M-Media သို့ပြောသည်။

    အဆိုပါ မ.မ.လ ဌာနချုပ်၏ (၁၂)ကြိမ်မြောက် စုပေါင်းသွေးလှူဒါန်းပွဲတွင် သွေးလှူဒါန်းရှင် စုစုပေါင်း (၂၈၃) ဦးလှူဒါန်း ခဲ့ကြောင်း၊ မ.မ.လ ဌာနချုပ်၏ စာရင်းမှတ်တမ်းများ အရ သိရသည်။ ဆက်လက်၍ (၄)လ တစ်ကြိမ် ပုံမှန် စဉ်ဆက် မပြတ် လှူဒါန်းသွားမည် ဖြစ်ကြောင်း သတင်းရရှိသည်။

    P5260385

    IMG_9040

    ဓါတ်ပုံများ ကြည့်ရန်။

    https://www.facebook.com/media/set/?set=a.542043585838116.1073741894.468226919886450&type=1

     

  • မ.မ.လ ဋ္ဌာနချုပ်၏ (၁၂)ကြိမ်မြောက် စုပေါင်းသွေးလှူဒါန်းပွဲကြီး ကျင်းပမည်

    မေလ ၁၈၊ ၂၀၁၃
    M-Media
    သတင်း – ဆူးထက်

    blood donation
    မြန်မာနိုင်ငံလုံးဆိုင်ရာ မြန်မာမွတ်စလင်(မ်) လူငယ်များ (ဘာသာရေး) အဖွဲ့ မ.မ.လ  ဋ္ဌာနချုပ်မှ ကြီးမှူးကျင်းပမြဲ ဖြစ်သော အစဉ်အလာမပျက် (၄)လတစ်ကြိမ် စုပေါင်းသွေးလှူဒါန်း ပွဲကြီးကို မေလ ၂၆ရက်နေ့တွင် နံနက် (၈း၀၀)နာရီမှ စတင်၍ ရန်ကုန်မြို့ အမျိုးသားသွေးလှူဌါနတွင် ကျင်းပပြုလုပ်သွားမည် ဖြစ်ကြောင်း သတင်းရရှိသည်။

    အဆိုပါ သွေးလှူဒါန်းပွဲ အတွက် မ.မ.လ ဋ္ဌာနချုပ်၏ ဆောင်ပုဒ်ဖြစ်သော “ကိုယ်ချင်းစာနာတတ်ခြင်းသည်ပင်လျှင် တရားစစ် တရားမှန် ဖြစ်သည်” ကို အကောင်အထည်ဖော်၍ ဘာသာပေါင်းစုံ ချစ်ကြည်ရေးကို ရှေးရှုလျက် လူမျိုး ဘာသာ မရွေးပါဝင်လှူဒါန်းကြပါရန် တိုက်တွန်း နှိုးဆော် ထားကြောင်း သိရသည်။

    “မ.မ.လ ဋ္ဌာနချုပ်မှ လှူဒါန်းခဲ့သော သွေးစာရင်းများ”

    ၁။ ပထမအကြိမ်        ၈.၃.၂၀၀၉              ၁၁၆  ဦး
    ၂။ ဒုတိယအကြိမ်     ၂၆.၇.၂၀၀၉        ၁၄၂   ဦး
    ၃။ တတိယအကြိမ်     ၁၇.၁.၂၀၁၀       ၁၉၃   ဦး
    ၄။ စတုတ္ထအကြိမ်      ၁၈.၇.၂၀၁၀       ၂၄၀   ဦး
    ၅။ ပဉ္စမအကြိမ်        ၂၈.၁၁.၂၀၁၀      ၂၈၀  ဦး
    ၆။ ဆဋ္ဌမအကြိမ်      ၂၇.၃.၂၀၁၁         ၂၅၇  ဦး
    ၇။ သတ္တမအကြိမ်     ၂၄.၇.၂၀၁၁        ၂၃၂   ဦး
    ၈။ အဋ္ဌမအကြိမ်       ၈.၁.၂၀၁၂          ၁၈၅  ဦး
    ၉။ နဝမအကြိမ်       ၁၃.၅.၂၀၁၂           ၂၅၁  ဦး
    ၁၀။ ဒဿမအကြိမ်      ၂၃.၉.၂၀၁၂       ၃၂၁   ဦး
    ၁၁။ (၁၁)ကြိမ်မြောက်  ၂၇.၁.၂၀၁၃           ၃၁၈   ဦး
    စုစုပေါင်း  = (၂၅၃၅)ဦး ရှိပြီ ဖြစ်ကြောင်း မ.မ.လ  ဋ္ဌာနချုပ်၏ သတင်းထုတ်ပြန် ကြေညာချက် စရင်းအရ သိရှိရသည်။

        “သွေး”
    ဘာသာ၊ သာသနာ
    အယူဝါဒ မတူကြလည်း
    အာဒမ်နွယ်ဖွား ကမ္ဘာလူသားတို့
    ကိုယ်ချင်းစာနာ၊ ဒို့သွေးရင်းခြာတို့
    ကြည်ဖြူပေးလှူ၊ “သွေး”အလှူ
    သွေးလှူဒါန်းလိုသူ သွေးအလှူရှင်များ အနေဖြင့် အမှတ် ၁၉၄၊ ၁၉၆၊ ဗိုလ်ဆွန်ပက်လမ်း (အလယ်)၊ ပန်းဘဲတန်းမြို့နယ်၊ ရန်ကုန်တိုင်းဒေသကြီး၊ ဖုန်း၊ ၀၁ ၂၄၁၂၁၂၊ ၀၁ ၂၅၂၇၉၉ သို့ ဆက်သွယ် စရင်းပေးသွင်းနိုင်ကြောင်း သတင်းရရှိသည်။

  • မ.မ.လ အဖွဲ့ချူပ်မှ စာဆိုတော်နေ့အထိမ်းအမှတ် စာပေဟောပြောပွဲ ပြုလုပ်မည်

    ဖေဖော်ဝါရီ ၅ ၊ ၂၀၁၃
    M-Media
    အမ်တူးအေ

    sar so taw nae

    စာဆိုတော်နေ့ အထိမ်းအမှတ်အဖြစ် စာပေဟောပြောပွဲအခမ်းအနားတစ်ရပ်ကို မ.မ.လ  (မြန်မာ မွတ်စလင်မ် လူငယ်များ – ဘာသာရေး)အဖွဲ့မှ ကျင်းပပြုလုပ်မည်ဟု သတင်းရရှိပါသည်။

    ယင်း စာပေဟောပြောပွဲအား ဖေဖော်ဝါရီလ ၁၂-ရက် (ပြည်ထောင်စုနေ့)နေ့လည် (၁း၃၀)နာရီတွင် ဟာဂျီမဒေါ်ချိုခန်းမ၊ မ.မ.လ ဌာနချုပ်၊ အမှတ်(၁၉၄/၁၉၆)၊ ဗိုလ်ဆွန်ပက်လမ်း၊ ရန်ကုန်တွင် ကျင်းပပြုလုပ်မည်ဖြစ်ပြီး စိတ်ပါဝင်စားသူများ တက်ရောက်နိုင်ကြောင်း သိရသည်။

    စာဆိုတော်နေ့အထိမ်းအမှတ် စာပေဟောပြောပွဲတွင် မွတ်စလင်မ် စာဆိုတော်များ၏ အထ္ထုပ္ပတ္တိကို ပြောကြားဖတ်ကြားမှာဖြစ်ပြီး စာဆိုတော်များ၏ အကြောင်းကို လက်ဆင့်ကမ်း မျှဝေသိစေလို၍ ရည်ရွယ်ကျင်းပပြုလုပ်ခြင်းဖြစ်ကြောင်း သိရပါသည်။

  • “မမလ” အဖွဲ့က ဦးစီးတဲ့ ၁၁ ကြိမ်မြောက် မွန်မြတ်လှတဲ့ ဘာသာပေါင်းစုံ သွေးလှူပွဲ ကျင်းပ

    ဇန်န၀ါရီလ၂၇၊၂၀၁၃၊
    M-Media
    သတင်း-ပသီဆောင်းနှင်းမှုံ

    ရန်ကုန်။     ။ မြန်မာနိုင်ငံလုံးဆိုင်ရာ မြန်မာမွတ်စလင် လူငယ်များ(ဘာသာရေး) အဖွဲ့မှ ကြီးမှူး၍ ပုံမှန်ကျင်းပမြဲ ဖြစ်သော (၁၁)ကြိမ်မြောက် ဘာသာပေါင်းစုံ သွေးလှူဒါန်းပွဲ အခမ်းအနားကို ဇန်န၀ါရီလ ၂၇ရက်နေ့က ရန်ကုန်ပြည်သူ့ဆေးရုံကြီး အမျိုးသား သွေးလှူဌာန၌ နံနက် ၈း၃၀မှ ၁၂း၀၀ ထိကျင်းပပြုလုပ်ခဲ့ကြောင်း သတင်းရရှိသည်။

    DSCF7734

    ရန်ကုန်တိုင်းဒေသကြီး မြို့နယ် ၂၂မြို့နယ်၊ဧရာဝတီတိုင်း ကျောင်းကုန်းမြို့နယ် အပါအ၀င် စုစုပေါင်း သွေးလှူဒါန်းရှင် (၃၁၇)ယောက် သွေးလှူဒါန်းနိုင်ခဲ့ကြောင်း သိရသည်။

    “မမလ”ဌာနချုပ်မှ သွေးလှူဒါန်းဖြစ်မြောက်ရေးတွင် ဦးဆောင်ပါဝင်သူတစ်ဦးဖြစ်သော မချို(ခ)ဒေါ်စမ်းစမ်းအေးမှ“မမလ ဌာနချူပ် အနေနဲ့ သွေးလှူဒါန်းဖို့ စတင် အကောင်အထည်ဖော် ဆောင်ရွက်ခဲ့တဲ့ ပထမဆုံးအကြိမ်မှာပဲ ညီနောင်ဘာသာပေါင်းစုံကည်း အတူ ပူပေါင်းဆောင်ရွက်ခဲ့တဲ့ အတွက် စုစုရုံးရုံး ညီညီညတ်ညွှတ် သွေးလှူဖြစ်ခဲ့ပါတယ်။မြန်မာနိုင်ငံမှာ ရှိတဲ့တိုင်းရင်းသား အစ္စလာမ် ဘာသာဝင်တွေဟာလည်း မျိုးချစ်စိတ်ရှိပြီး ကိုယ့်ရဲ့သွေးနဲ့ တပါးသူကို ကူညီနိုင်ရမယ် ကျန်းမာရေးကောင်းမွန်ပြီး ကိုယ်ကျင့် တရားကို စောင့်ထိန်းနိုင်တယ်ဆိုတဲ့ ရည်ရွယ်ချက်တွေနဲ့ ကုသိုလ်တစ်ခုထဲကို ကြည့်ပြီး သွေးလှူကြခြင်းဖြစ်ပါတယ်။ ဒီလို ပရဟိတစိတ်ထက်သန်တဲ့ လူငယ်တွေကြီးပဲဖြစ်လာဖို့ အတွက် ငယ်ငယ်လေးထဲက ကလေးတွေကို ပရဟိတ စိတ်ဓာတ်လေးတွေ ရှင်သန်ဖွံ့ဖြိုးလာဖို့အတွက် အသိပညာတွေပေးချင်တယ်။ ပရဟိတ စိတ်ရှိတဲ့ လူတွေကိုလည်း လှိုက်လှိုက်လှဲလှဲ ကြိုဆိုတယ်။ကျွန်မတို့အနေနဲ့ ဒီလိုပွဲကြီးဖြစ်မြောက်ဖို့အတွက် စရိတ်တွေ ထုတ်သုံးနိုင်ရုံနဲ့ ပံ့ပိုးပေးနိုင်ရုံနဲ့ ဒီလိုမွန်မြတ်တဲ့ သွေးလှူဒါန်းပွဲဟာ အထမြောက် အောင်မြင်လာမှာ မဟုတ်ပါဘူး။သွေးလှူရှင်တွေရဲ့ စေတနာထက်သန်တဲ့ လှူချင်တဲ့စိတ်၊ သူတို့ရဲ့ ကျန်းမာရေးတွေ ကောင်းမွန်လို့သာ ဒီပွဲကြီး အောင်မြင်တာ ဖြစ်ပါတယ်။သွေးလှူရှင်တွေကို အာဟာရကျွေးမွေး ပြုစုပြီး လက်ဆောင်တွေ ပြန်ပေးသော်ဌာလည်း သူတို့ရဲ့ သွေးတွေကတော့ ဘယ်လိုအရာတွေနဲ့မှ တန်ဖိုး မဖြတ်နိုင်လောက်အောင် မွန်မြတ်လှပါတယ်”ဟု M-Media သို့ပြောကြားခဲ့သည်။

    DSCF7798
    “မမလ”ဌာနချုပ်မှ ဒုဥက္ကဌဦးအောင်ထွန်း (မင်းသီဟ-ဥယာဉ်မှူး)က “ကျွန်တော်တို့  “မမလ” ဌာနချုပ်အနေနဲ့ မြန်မာနိုင်ငံမှာရှိတဲ့ လူတွေကို အကျိုးပြုနိုင်တဲ့ လုပ်ငန်းတစ်ခု လုပ်မယ်လို့ဆွေးနွေး တိုင်ပင်ကြတဲ့ အခါမှာ သွေးလှူဒါန်းပွဲလုပ်ကြမယ်လို့ ဆုံးဖြတ်ချက် အဖြေထွက်ခဲ့ပါတယ်။ အဲဒီကနေစတင် အကောင်အထည် ဖော်တဲ့အချိန်မှာပဲ ဘာသာပေါင်းစုံက ပူးပေါင်း ဆောင်ရွက်လာတာ အခုဆိုရင် ၂နှစ်အတွင်းမှာ (၁၁)ကြိမ်မြောက် ရှိပါပြီ။ ကိုယ်လှူလိုက်တဲ့သွေးတွေဟာ ဘယ်ဘာသာဝင်ရဲ့ အသက်ကို မဆို ကယ်တင်နိုင်ပါတယ်။ NND ကလည်း အယောက် ၃၀ ၊ ၄၀လောက် ရောက်လာပါတယ်၊ ဒါကတောသူတို့က လာလှူတာနဲ့ ကျွန်တော်တို့နဲ့ လာပြီးတိုက်ဆိုင်သွားတဲ့အတွက် လုပ်ငန်းတူချင်း အတူပူးပေါင်းဆောင်ရွက်လိုက်တဲ့သဘောပါပဲ။အခြားအခြားသော လူမူရေးအဖွဲ့အစည်း ဘာသာရေးအဖွဲ့အစည်း ဘယ်အဖွဲ့အစည်းမဆိုနဲ့မဆို ပရဟိတ လုပ်ငန်းတွေမှာ အတူပူပေါင်းဆောင်ရွက် လုပ်ကိုင်သွားမှာ ဖြစ်ပါတယ်”ဟု M-Media သို့ပြောကြားခဲ့သည်။

    DSCF7807
    “သွေးနဲ့ပတ်သက်ပြီး ဒုက္ခရောက်နေတဲ့ အချိန်နဲ့ တပြေးညီသွေးလိုအပ်နေတဲ့ သူတွေအတွက် သွေးလှူဒါန်းလိုက်တဲ့ အတွက်သွေးလှူဘဏ်မှာ သွေးတွေ အဆင့်သင့် ရှိနေတယ်ဆိုရင် လူတွေ အများကြီးရဲ့ အသက်ကို ကယ်တင်နိုင်မှာ ဖြစ်ပါတယ်။ လူငယ်တွေ အနေနဲ့လည်း သွေးလှူဒါန်းမူ အပါအ၀င် အခြားသော လူမူရေးလုပ်ငန်းတွေကိုပါ ထဲထဲဝင်ဝင်လေ့လာပြီး ပူးပေါင်းပါဝင်လာကြဖို့ ဖိတ်ခေါ်ပါတယ်။ ကျွန်တော်ကိုယ်တိုင်လည်း သွေးလှူဒါန်း ပါတယ်။သွေးလှူဒါန်းခြင်းနဲ့ပတ်သက်ပြီး လက်ကမ်းစာစောင်တွေ၊ ဂျာနယ်တွေမှာ ပြောပြထားပေမယ့်လို့ သွေးလှူရှင် တစ်ဦးချင်းစီကလည်း ကိုယ့်နီးစပ်ရာ အချင်းချင်း မှာ သွေးလှူဒါန်းခြင်းရဲ့ အကျိုးကြောင့် ကိုယ်တိုင်ခံစားရတဲ့ ကျန်းမာရေး အကျိုးကျေးဇူးတွေကိုလည်း ပြောပြပေးပါ။ ဒါမှသာ သွေးလှူချင်ပေ့မယ် တစ်ခါမှ မလှူဘူးသူတွေဟာ စိုးရိမ်မူကင်းဝေးပြီး ဒီလို မွန်မြတ်လှတဲ့ သွေးလှူတဲ့ ကုသိုလ်ပွဲကြီးမှာ သူတို့ကိုယ်တိုင် ပါဝင်ဆင်နွှဲနိုင်ကြမှာ ဖြစ်ပါတယ်” “မမလ” အဖွဲ့ တိုင်းဥက္ကဌ အနေနဲ့ရော ဌာနချုပ်အနေနဲ့ပါ သွေးအလှူရှင်ရဖို့အတွက် စည်ရုံးကြိုးပမ်းဆောင်ရွက်သူ တစ်ဦးဖြစ်သော ဦးသန်းဝင်းမှ M-Media သို့ပြောကြားခဲ့သည်။

    မေတ္တာရှင်အဖွဲ့မှ သွေးလှူရှင်တစ်ဦးဖြစ်သော ဦးစိုးမြင့်(စာရေးဆရာ မင်းဇေယျာ-ကျောင်းကုန်း)မှလည်း “ကျွန်တော်က ဧရာဝတီတိုင်းဒေသကြီး ပုသိမ်ခရိုင် ကျောင်းကုန်းမြို့နယ် မေတ္တာမွန် ဂရုဏာရှင်လသွေးလှူရှင်အဖွဲ့မှ သွေးလှူရှင် တစ်ဦးပါ။ကျွန်တော် သွေးလှူဒါန်းတာ (၃၃)ကြိမ်ရှိပါပြီ။ “မမလ” ဌာနချုပ်နဲ့ အတူလပူးပေါင်းပြီးလှူတာကတော့ အခုကြိမ်နဲ့ဆိုရင် ၁၁ကြိမ်ရှိပါပြီ။လကျွန်တော်အနေအထားက လှူနိုင်တာဆိုလို့ ခွန်အားနဲ့ အသွေးအသားပဲရှိပါတယ်။ဒီအသွေးအသားကို လှူတာဟာ မွန်မြတ်တယ်၊ ပါရမီဖြည့်တာလည်း ရောက်ပါတယ်။ “မမလ” ဌာနချုပ် အနေနဲ့ လူမျိုးမရွေး ဘာသာမရွေး လာရောက်လှူဒါန်းတာကို လိုလိုလားလားရှိတဲ့ အတွက် ကျွန်တော်က ဗုဒ္ဒဘာသာဝင် တစ်ဦးဖြစ်ပေမယ် “မမလ”ခေါင်းစဉ်အောက်မှာပဲ စုပေါင်းသွေးလှူဖြစ်ခဲ့ခြင်း ဖြစ်ပါတယ်။“မမလ” အနေနဲ့သွေးလှူရှင်တွေကို ဆေးဝါးကအစ အစစအရာရာလိုလေးသေးမရှိပြုလုပ်ပေးပါတယ်။ ဘာသာခြားဖြစ်လင့်ကစား လှူဒါန်းတဲ့နေရာမှာ သဒ္ဒါတရားထက်သန်တယ်။ လူမျိုးရေးခွဲခြားမူ မရှိဘဲ ဒီသွေးတွေကို ဘယ်သူပဲသုံးသုံး လှူဒါန်းနိုင်အောင် ပံ့ပိုးပေးတဲ့အတွက် အင်မတန်မွန်မြတ်တဲ့ လုပ်ငန်းဖြစ်ပါတယ်။အဲလိုလူမျိုးတွေ တိုင်းပြည်မှာ များများရှိလေ အခြေခံကျန်းမာရေး လုပ်ငန်းတွေ တိုးတက် ထွန်းကားလေဖြစ်တယ်။ ကျွန်တော်တို့ကျောင်းကုန်းကနေ ဒီကိုလာဖို့အတွက်လည်း ကားခစရိတ်တွေကို ကူညီထောက်ပံပေးခဲ့ပါတယ်။ ကျွန်တော်တို့တွေ သွေးလှူဒါန်းခြင်းအားဖြင့် ၄လတစ်ကြိမ် သွေးပုံမှန် စစ်ဆေး သလိုလည်းဖြစ်သွားတယ်။ခန္ဒာကိုယ်မှာရှိတဲ့ ရောဂါ လက္ခဏာတွေကိုလည်း ကြိုတင်ကာကွယ်လို့ရတယ်။

    ကျန်းမာရေးကိုလည်း တစ်ဘက်တစ်လမ်းကစောင့်ရှောက်သလိုလည်း ဖြစ်သွားပါတယ်။ လူငယ်တွေအနေနဲ့လည်း မူးယစ်သောက်စားမူတွေ မလုပ်ဘဲ မိမိသွေးကို အတတ်နိုင်ဆုံး သန့်ရှင်းအောင်ထားပြီး လှူဒါန်းကြဖို့ တိုက်တွန်းလိုပါတယ်။ကျွန်တော်တို့တတွေ အခုလို ပူးပေါင်းဆောင်ရွက်တာကြောင့် ခွဲခြားမူတွေ၊အမြင်စောင်းမူတွေမရှိဘဲ ရင်းနှီးချစ်ခင်လာမူ ယုံကြည်မူတိုးလာမူတွေ ရှိလာပြီး စည်းလုံးလာကြမှာ ဖြစ်ပါတယ်။ဒီလို ပွဲတစ်ခုလုပ်တာ သူတို့ သိန်းလေး ငါးဆယ်လောက် ကုန်ကျပါတယ် ဒါကို သူတို့ ၄လတစ်ကြိမ်ကို မပြတ်ဘူး အမြဲလှူနေတာပဲ၊ကျွန်တော်တို့ ဗုဒ္ဒဘာသာဝင်တွေက ဗျောစီရိုက်ပြီးလှူတာ သူတို့က ဗျောစီမရိုက်ပဲ တကယ့်ကို စိတ်အားထက်ထက် သန်သန်နဲ့သွေးလှူဒါန်းဖို့ လာတဲ့သူတွေကို ၀မ်းပန်းတသာနဲ့ လှူနေတာပါ။အဲဒါလေးက ဂုဏ်ယူဖို့ အင်မတန်ကောင်းပါတယ်”ဟု M-Media သို့ပြောကြားခဲ့သည်။

    ဓါတ်ပုံများ ကြည့်ရန်။