News @ M-Media

Tag: Arab World

  • အာရပ်လေးနိုင်ငံ၏ စက်မှုဖွံ့ဖြိုးရေး စီမံကိန်းကြီးများ စတင်အကောင်အထည်ဖော်

    အာရပ်လေးနိုင်ငံ၏ စက်မှုဖွံ့ဖြိုးရေး စီမံကိန်းကြီးများ စတင်အကောင်အထည်ဖော်

    ဇူလိုင် ၂၈၊ ၂၀၂၂
    M-Media

    -အီဂျစ်၊ ယူအေအီး၊ ဂျော်ဒန်တို့ရဲ့ ဒေသတွင်း စက်မှုလက်မှုနဲ့ နည်းပညာကဏ္ဍ ဖွံ့ဖြိုးတိုးတက်ရေး စီမံချက်မှာ ဘာရိန်းနိုင်ငံပါ ပါ၀င်လာပါတယ်။

    ကနဦးအနေနဲ့ စိုက်ပျိုးရေး၊ စားနပ်ရိက္ခာနဲ့ ဓာတ်မြေသြဇာ ထုတ်လုပ်ရေး၊ ဆေး၀ါးထုတ်လုပ်ရေး လုပ်ငန်းတွေနဲ့ပတ်သက်တဲ့ စီမံကိန်း ၈၇ ခု ဖော်ဆောင်မှာဖြစ်ပြီး ကန်ဒေါ်လာ ၃.၄ ဘီလီယံ တန်ဖိုးရှိမှာ ဖြစ်ပါတယ်။

    နောက်ပိုင်းမှာတော့ ဓာတုဗေဒပစ္စည်း၊ ပလက်စတစ်၊ ချည်မျှင်နဲ့ အထည်ချုပ်၊ ဆေး၀ါးထုတ်လုပ်ရေးတွေအပြင် အခြားကဏ္ဍတွေမှာပါ ဖွံ့ဖြိုးရေးစီမံကိန်းတွေကို ဖော်ဆောင်သွားဖို့ စီစဥ်ထားပါတယ်။

    ယူအေအီး၊ အီဂျစ်နဲ့ ဂျော်ဒန်တို့ရဲ့ စက်မှုလက်မှု လုပ်ငန်းတွေဟာ အရှေ့အလယ်ပိုင်းနဲ့ မြောက်အာဖရိက စက်မှုကဏ္ဍရဲ့ ၃၀ ရာခိုင်နှုန်းအထိ ရှိနေပါတယ်။

    ဘာရိန်းကတော့ အလူမီနံနဲ့ သံရိုင်း အဓိကထုတ်လုပ်တဲ့နိုင်ငံ ဖြစ်ပါတယ်။

    ဒီလေးနိုင်ငံရဲ့ စက်မှုလက်မှု ဖွံ့ဖြိုးတိုးတက်ရေး စီမံကိန်းဟာ ဒေသအတွင်း အလုပ်အကိုင်အခွင့်အလမ်း ပိုမို ဖန်တီးပေးနိုင်ဖို့၊ ဒေသရဲ့ စီးပွားရေး ပိုမိုကောင်းမွန်လာဖို့ ရည်ရွယ်တာ ဖြစ်ပါတယ်။

    စီးပွားရေး ကဏ္ဍပေါင်းစုံမှာ အဆင့်မြင့်နည်းပညာတွေ သွတ်သွင်း သုံးစွဲနိုင်ရေး၊ လူ့စွမ်းအားအရင်းအမြစ် မြှင့်တင်ပေးရေး၊ ကုန်စည်သယ်ယူပို့ဆောင်ရေးဆိုင်ရာကဏ္ဍ ဖွံ့ဖြိုးရေး စတာတွေကိုပါ လုပ်ဆောင်သွားမှာ ဖြစ်ပါတယ်။

    Ref: Zawya

  • ၂၀၂၁ အာရပ်ဖလားပြိုင်ပွဲတွင် အလ်ဂျီးရီးယားအသင်း ဗိုလ်စွဲ

    ၂၀၂၁ အာရပ်ဖလားပြိုင်ပွဲတွင် အလ်ဂျီးရီးယားအသင်း ဗိုလ်စွဲ

    ဒီဇင်ဘာ ၁၉၊ ၂၀၂၁
    M-Media

    -ကာတာနိုင်ငံမှာ မနေ့က ကျင်းပခဲ့တဲ့ အာရပ်ဖလား ဗိုလ်လုပွဲမှာ အလ်ဂျီးရီးယားအသင်းက တူနီးရှားအသင်းကို ၂ ဂိုးပြတ်နဲ့အနိုင်ရပြီး ဗိုလ်စွဲသွားပါတယ်။

    ပွဲချိန်မိနစ် ၉၀ အတွင်း ဂိုးမရှိသရေကျနေတာကြောင့် အချိန်ပိုကစားရာ ၉၉ မိနစ်မှာ အမီရ်ဆာယွဒ်၊ အချိန်ပို နောက်ဆုံးမိနစ်မှာ ယာစီနီ ဘရာဟီမီတို့က အနိုင်ဂိုးတွေ သွင်းယူပေးခဲ့တာဖြစ်ပါတယ်။

    အလ်ဂျီးရီးယားဟာ အာရပ်ဖလားပြိုင်ပွဲမှာ လူငယ်ကစားသမားအများစုနဲ့ ဝင်ရောက်ယှဉ်ပြိုင်တာဖြစ်ပါတယ်။ ပထမဆုံးအနိုင်ဂိုးသွင်းခဲ့တဲ့ အမီရ်ဆာယွဒ်ဟာ အသက် ၃၁ နှစ်ရှိပြီဖြစ်ပြီး ပြိုင်ပွဲတစ်ခုလုံးမှာ ဝင်မကစားခဲ့ရပဲ ဗိုလ်လုပွဲမှာလည်း မိနစ် ၆၀ ကျော်မှ လူစားဝင်ကစားရတာပါ။

    အလ်ဂျီးရီးယားဟာ ၂၀၁၉ ခုနှစ် အာဖရိကဖလားချန်ပီယံဖြစ်ပြီး လာမယ့်လ ကင်မရွန်းမှာ ကျင်းပမယ့် ၂၀၂၂ အာဖရိကဖလားပြိုင်ပွဲမှာ ချန်ပီယံဘွဲ့ကို ကာကွယ်ရမှာဖြစ်ပါတယ်။

    တတိယနေရာလုပွဲမှာ ကာတာက အီဂျစ်ကို ပင်နယ်တီအဆုံးအဖြတ်နဲ့ အနိုင်ရခဲ့ပါတယ်။

    အာရပ်ဖလား ဘောလုံးပြိုင်ပွဲ ကျင်းပတာ ၁၀ ကြိမ်ရှိပြီဖြစ်ပြီး အခုအကြိမ်ဟာ ဖီဖာရဲ့ စီမံမှုအောက်မှာ ပထမဆုံး ကျင်းပတဲ့ပြိုင်ပွဲ ဖြစ်ပါတယ်။

    တူနီးရှားတိုက်စစ်မှူး ဆိုက်ဖူဒင် ဂျာဇီရီက စုစုပေါင်း သွင်းဂိုး ၄ ဂိုးနဲ့ ဂိုးသွင်းအများဆုံး ကစားသမား ဖြစ်ခဲ့ပြီး၊ ပြိုင်ပွဲတစ်လျှောက် အကောင်းဆုံးကစားသမားဆုကို အလ်ဂျီးရီးယားကစားမသား ယာစီနီ ဘရာဟီမီ၊ အကောင်းဆုံးဂိုးသမားဆုကို အလ်ဂျီးရီးယား ဂိုးသမား ရာအီစ် အလ်ဘိုလ်ဟီတို့က ရရှိခဲ့ပါတယ်။

    အခုပြိုင်ပွဲမှာ စုစုပေါင်း ၂၃ သင်း ပါဝင်ယှဉ်ပြိုင်ခဲ့ပြီး နောက်ဆုံးအဆင့်မှာ ၁၆ သင်း အုပ်စု ၄ ခုခွဲကာ ကစားခဲ့တာ ဖြစ်ပါတယ်။

    Ref: Aljazeera

  • အာရပ်ကမ္ဘာ၏ လူဦးရေ ၃ ပုံ ၁ ပုံ အဟာရချို့တဲ့မှုဒဏ်ကို ခံစားနေရ

    အာရပ်ကမ္ဘာ၏ လူဦးရေ ၃ ပုံ ၁ ပုံ အဟာရချို့တဲ့မှုဒဏ်ကို ခံစားနေရ

    ဒီဇင်ဘာ ၁၇၊ ၂၀၂၁
    M-Media

    -အာရပ်ကမ္ဘာရဲ့ လူဦးရေ သုံးပုံတစ်ပုံလောက်ဟာ ဆာလောင်မွတ်သိပ်မှု၊ အဟာရချို့တဲ့မှုဒဏ် ခံစားနေရတယ်လို့ ကုလသမဂ္ဂ စားနပ်ရိက္ခာအဖွဲ့ (FAO) ရဲ့ နောက်ဆုံးအစီရင်ခံစာမှာ ဖော်ပြထားပါတယ်။

    အာရပ်ကမ္ဘာရဲ့လူဦးရေ သန်းပေါင်း ၄၂၀ ရှိရာမှာ ၂၀၁၉ ကနေ ၂၀၂၀ အတွင်း အဟာရချို့တဲ့သူအရေအတွက် ၁၆ ရာခိုင်နှုန်းရှိကာ ၆၉ သန်း ရှိလာတာပါ။ ဒါဟာ ပြီးခဲ့တဲ့တစ်နှစ်ကထက် ၄.၈ သန်း တိုးလာတာ ဖြစ်ပါတယ်။

    ပဋိပက္ခတွေ၊ မတည်ငြိမ်မှုတွေ ရှည်ကြာနေတာ၊ ဆင်းရဲမွဲတွေမှု၊ လူတန်းစားမညီမျှမှု၊ ရာသီဥတုပြောင်းလဲမှု၊ သဘာ၀သယံဇာတတွေ ရှားပါးလာတာ၊ ကိုဗစ်ကပ်ရောဂါနဲ့ နွယ်တဲ့ စီးပွားရေးကျဆင်းမှုတွေက ဒီပြဿနာရဲ့ အဓိကအကြောင်းအရင်းတွေ ဖြစ်ပါတယ်။

    “အဟာရချို့တဲ့မှု ပမာဏဟာ ပဋိပက္ခဖြစ်နေတဲ့နိုင်ငံတွေမှာရော၊ မဖြစ်တဲ့နိုင်ငံတွေက လူတန်းစားအားလုံးမှာ ဖြစ်ပွားနေတာပါ။ ၂၀၂၀ ခုနှစ်တွင်း ၁၄၁ သန်းနီးပါးလောက် အစားအစာ လုံလုံလောက်လောက် မရပါဘူး။ ဒါဟာ ၂၀၁၉ ခုနှစ်နဲ့ယှဉ်ရင် ၁၀ သန်းကျော် တိုးလာတာဖြစ်ပါတယ်” လို့ FAO ရဲ့ အစီရင်ခံစာမှာ ဖော်ပြထားပါတယ်။

    ပဋိပက္ခဖြစ်ပွားရာနိုင်ငံတွေ၊ ဒေသတွေမှာ တွေ့ရတဲ့ အဟာရချို့တဲ့မှုပမာဏဟာ ငြိမ်ချမ်းတဲ့ဒေသမှာ တွေ့ရတဲ့ ပမာဏထက် ၆ ဆ မြင့်မားနေတယ်လို့ FAO က တာဝန်ရှိသူ အဘ်ဒူလ်ဟာကင် အလ်ဝေအာက ပြောပါတယ်။

    အာရပ်ကမ္ဘာမှာ ပြီးခဲ့တဲ့နှစ် အဟာရချို့တဲ့မှုဒဏ်ကို အခံရဆုံးနိုင်ငံတွေက ဆိုမာလီယာနဲ့ ယီမင်တို့ဖြစ်ပြီး ဆိုမာလီယာပြည်သူ ၆၀ ရာခိုင်နှုန်း၊ ယီမင်ပြည်သူ ၄၅ ရာခိုင်နှုန်းကျော် ဒီဒဏ်ကို ခံစားနေရတာ ဖြစ်ပါတယ်။

    ပြီးခဲ့တဲ့ နှစ် ၂၀ အတွင်း အာရပ်ကမ္ဘာမှာ အဟာရချို့တဲ့မှု၊ ဆာလောင်မွတ်သိပ်မှု အရေအတွက်ဟာ ၉၁.၁ ရာခိုင်နှုန်း မြင့်တက်လာပါတယ်။

    Ref: Aljazeera

  • ဘာသာရေးစော်ကားခွင့်ပြုသည့် ပြင်သစ်သမ္မတကို ကမ္ဘာ့အစ္စလာမ်ဘာသာဝင်များ ရှုတ်ချ

    ဘာသာရေးစော်ကားခွင့်ပြုသည့် ပြင်သစ်သမ္မတကို ကမ္ဘာ့အစ္စလာမ်ဘာသာဝင်များ ရှုတ်ချ

    အောက်တိုဘာ ၂၇၊ ၂၀၂၀
    M-Media

    ပါလက်စတိုင်းမှ မြင်ကွင်း

    -လွတ်လပ်စွာပြောဆိုခွင့်ခေါင်းစဉ်အောက်မှာ ဘာသာရေးခေါင်းဆောင်တွေ၊ ဘာသာတရားတွေကို စော်ကားခွင့်ပြုထားတဲ့ ပြင်သစ်သမ္မတမာခရွန်ရဲ့ မူဝါဒကို ကမ္ဘာတစ်ဝှမ်းမှာရှိနေတဲ့ အစ္စလာမ်ဘာသာဝင်တွေက ရှုတ်ချခဲ့ပြီး ဆန္ဒပြမှုတွေလည်း ပြုလုပ်နေကြပါတယ်။

    စာသင်ခန်းထဲမှာ တမန်တော်မိုဟာမက်ကို ရုပ်ပြောင်နဲ့ လှောင်ပြောင်စော်ကားခဲ့တဲ့ ကျောင်းဆရာတစ်ယောက် ပြီးခဲ့တဲ့တစ်ပတ်မှာ အကြမ်းဖက်သတ်ဖြတ်ခံရပြီးတဲ့နောက်ပိုင်း ပြင်သစ်က လွတ်လပ်စွာပြောဆိုခွင့်အပေါ် မေးခွန်းထုတ်မှုတွေ မြင့်တက်လာတာပါ။

    သမ္မတမာခရွန်က မိမိတို့အစိုးရအနေနဲ့ ဘာသာရေးခေါင်းဆောင်တွေအပေါ် ရုပ်ပြောင်ဆွဲလှောင်ပြောင်တာမျိုးကို ဆက်လက်ခွင့်ပြုသွားမှာဖြစ်တယ်လို့ သတ်ဖြတ်ခံလိုက်ရတဲ့ ကျောင်းဆရာရဲ့ ဈာပနမှာ ပြောကြားခဲ့ပါတယ်။

    မာခရွန်ရဲ့ အဲဒီမှတ်ချက် ထွက်လာပြီးတဲ့နောက် အာရပ်ကမ္ဘာနဲ့ ကမ္ဘာတစ်ဝှမ်းက အစ္စလာမ်ဘာသာဝင်တွေအကြားမှာ ဝေဖန်မှုတွေ မြင့်တက်လာခဲ့ပြီး ဆန္ဒပြကန့်ကွက်တာ၊ ပြင်သစ်ကုန်ပစ္စည်းတွေကို သပိတ်မှောက်တာတွေ ဖြစ်လာပါတယ်။

    ဆော်ဒီအာရေဗျ

    အစ္စလာမ်ဘာသာ စတင်ထွန်းကာရာနေရာဖြစ်ပြီး အစ္စလာမ့် အထွဋ်အမြတ်နေရာတွ​ေရှိတဲ့ ဆော်ဒီအာရေဗျ နိုင်ငံခြားရေးဝန်ကြီးဌာနက တမန်တော်မိုဟာမက်ကို လှောင်ပြောင်သရော်တာ၊ အကြမ်းဖက်ဝါဒကို အစ္စလာမ်နဲ့ချိတ်ဆက်ပြောကြားတာကို ရှုတ်ချကြောင်း ထုတ်ပြန်ခဲ့ပါတယ်။

    အကြမ်းဖက်လုပ်ရပ်တွေကို ဘယ်သူကပဲ ကျူးလွန်သည်ဖြစ်စေ ဆော်ဒီက ဒါကို ရှုတ်ချတယ်လို့လည်း ကြေငြာချက်မှာ ဖော်ပြထားပါတယ်။

    ပါလက်စတိုင်း

    ပြင်သစ်သမ္မတ မာခရွန်ကိုရှုတ်ချကြောင်း ပါလက်စတိုင်းတွေက ဂျေရုစလင်မှာ ဆန္ဒပြပွဲတစ်ခု ဒီကနေ့မှာ ပြုလုပ်ခဲ့ပါတယ်။ ဆန္ဒပြသူတွေဟာ တမန်တော်မိုဟာမက်အပေါ် စော်ကားတာကို ဆန့်ကျင်ကြောင်း ဖော်ပြတဲ့ ဆိုင်းဘုတ်တွေ ကိုင်ဆောင်ကာ ကျွေးကြော်သံတွေကိုလည်း ဟစ်အော်ခဲ့ကြပါတယ်။

    ဂျော်ဒန်

    ဂျော်ဒန်နိုင်ငံခြားရေးဝန်ကြီးဌာနက ‘လွတ်လပ်စွာပြောဆိုခွင့်’ ခေါင်းစဉ်အောက်မှာ တမန်တော်မိုဟာမက်ကို စော်ကားတဲ့ ရုပ်ပြောင်တွေ ရေးဆွဲထုတ်ဝေခွင့် ပြုထားမှုကို ဝေဖန်ခဲ့ပါတယ်။

    ဘင်္ဂလားဒေ့ရှ်

    ဘင်္ဂလားဒေ့ရှ်နိုင်ငံ မြို့တော်ဒါကာက ဆန္ဒပြပွဲမှာတော့ သောင်းနဲ့ချီတဲ့လူတွေ ပါဝင်ခဲ့ပြီး ပြင်သစ်သမ္မတ မာခရွန်ရဲ့ ရုပ်ပုံကို မီးရှို့တာ၊ ပြင်သစ်ထုတ်ကုန်တွေကို သပိတ်မှောက်ဖို့ ဆော်ဩတာတွေ လုပ်ဆောင်ခဲ့ပါတယ်။ ဆန္ဒပြလူအုပ်ကြီးဟာ ပြင်သစ်သံရုံးကို ချီတက်ခဲ့ကြပေမယ့် ​ရဲတပ်ဖွဲ့က တားဆီးခဲ့ပြီး ငြိမ်းချမ်းစွာ လူစုခွဲစေခဲ့ပါတယ်။

    အီရန်

    ပြင်သစ်သံအမတ်ကို ခေါ်ယူတွေ့ဆုံကာ တမန်တော်မိုဟာမက်ကို အဂါရ၀ပြုတာ၊ အစ္စလာမ်သာသနာကို စော်ကားတာတွေအားလုံးကို ပြင်းပြင်းထန်ထန်ရှုတ်ချကြောင်း ပြောကြားခဲ့တယ်လို့ အီရန်သံရုံးက ထုတ်ပြန်တဲ့ ကြောငာချက်မှာ ဖော်ပြထားပါတယ်။

    ပါကစ္စတန်

    ပါကစ္စတန်ကလည်း ပြင်သစ်သံအမတ်ကို မနေ့က ဆင့်ခေါ်ကာ ပြင်သစ်နိုင်ငံအတွင်း ‘အစ္စလာမ်ကြောက်ရောဂါ စနစ်တကျ ဖြန့်နေမှု” ကို အလွန်အမင်း စိုးရိမ်မိတယ်လို့ ပြောကြားခဲ့ပါတယ်။ ဝန်ကြီးချုပ် အင်မရန်းခန်းကလည်း ပြင်သစ်သမ္မတ မာခရွန်ကို အစောပိုင်းမှာ ဝေဖန်ခဲ့ပါတယ်။ တမန်တော်မိုဟာမက်ကို ရုပ်ပြောင်ရေးဆွဲမှု ရှုတ်ချတဲ့ ဆုံးဖြတ်ချက်တစ်ခုကို ပါကစ္စတန်လွှတ်တော်က ထုတ်ပြန်ခဲ့ပါတယ်။

    တူရကီ

    ဒီကိစ္စမှာ တူရကီသမ္မတ အာဒိုဂန်ဟာ မာခရွန်ကို ပြင်းပြင်းထန်ထန် ဝေဖန်သူတစ်ယောက် ဖြစ်လာပါတယ်။ မာခရွန်ဟာ စိတ်ကျန်းမာရေးစစ်ဆေးဖို့ လိုအပ်နေတဲ့ ခေါင်းဆောင်တစ်ယောက်လို့ အာဒိုဂန်ကပြောခဲ့ပြီး၊ တူရကီပြည်သူတွေအနေနဲ့ ပြင်သစ်ပစ္စည်းတွေကို မဝယ်ဖို့ တိုက်တွန်းဆော်ဩခဲ့ပါတယ်။

    ပင်လယ်ကွေ့နိုင်ငံများ

    ကာတာတက္ကသိုက်က ကျင်းပဖို့စီစဉ်ထားတဲ့ ပြင်သစ်ယဉ်ကျေးမှုသီတင်းပတ် အစီအစဉ်ကို ရပ်ဆိုင်းလိုက်ပြီး နိုင်ငံအတွင်းက စူပါမားကတ်တွေကလည်း ပြင်သစ်ထုတ်ပစ္စည်းတွေကို ဖယ်ရှားလိုက်ပါတယ်။ ကူဝိတ်နဲ့ ယူအေအီးနိုင်ငံ စူပါမားကတ်တွေကလည်း ပြင်သစ်ပစ္စည်းတွေကို သပိတ်မှောက်ဖို့ စီစဉ်နေပါတယ်။

    အခြားနိုင်ငံများ

    အီဂျစ်၊ တူနီးရှား၊ လစ်ဗျားနဲ့ ယီမင်တို့မှာလည်း မာခရွန်ကိုရှုတ်ချတဲ့ ဆန္ဒပြပွဲတွေ ပြုလုပ်ခဲ့ပါတယ်။ လက်ဘနွန်နိုင်ငံမှာလည်း ပြည်သူတွေက ဆန္ဒပြပွဲတွေ ပြုလုပ်ခဲ့ပြီး၊ အခုသီတင်းပတ်အတွင်းကျရောက်မယ့် တမန်တော်နေ့အခမ်းအနားမှာ မာခရွန်ကို ရှုတ်ချတဲ့အစီအစဉ် ထည့်သွင်းဖို့ စီစဉ်နေပါတယ်။

    ဆီးရီးယားနိုင်ငံမြောက်ပိုင်းမှာလည်း ဒီကိစ္စအတွက် ဆန္ဒပြမှုတွေလုပ်ခဲ့ပါတယ်။ အစ္စရေးက ပြင်သစ်သံအမတ်နေအိမ်အရှေ့မှာ စနေနေ့ကပြုလုပ်တဲ့ ဆန္ဒပြပွဲမှာတော့ လူ ၂၀၀ လောက် ပါဝင်ပါတယ်။

    Ref: Aljazeera, Dailysabah

  • အရှေ့အလယ်ပိုင်းတွင် ပြင်သစ်ထုတ်ကုန်များ သပိတ်မှောက်ရေးလှုပ်ရှားမှု အရှိန်မြင့်လာ

    အရှေ့အလယ်ပိုင်းတွင် ပြင်သစ်ထုတ်ကုန်များ သပိတ်မှောက်ရေးလှုပ်ရှားမှု အရှိန်မြင့်လာ

    အောက်တိုဘာ ၂၆၊ ၂၀၂၀
    M-Media

    -တမန်တော်မိုဟာမက်ကို လှောင်ပြောင်စော်ကားမှု နောက်ဆက်တွဲအဖြစ် အရှေ့အလယ်ပိုင်းနိုင်ငံတွေမှာ ပြင်သစ်ပစ္စည်းတွေကို သပိတ်မှောက်ရေး ဆော်ဩမှု မြင့်တက်လာပြီး ပြင်သစ်အစိုးရက ဒါတွေကိုရပ်တန့်ဖို့ တောင်းဆိုခဲ့ပါတယ်။

    လွတ်လပ်စွာရေးသားပြောဆိုခွင့်ကို အာမခံထားတဲ့ ပြင်သစ်မှာ ပြီးခဲ့တဲ့နှစ်အနည်းငယ်အတွင်း အစ္စလာမ်ဘာသာနဲ့ တမန်တော်မိုဟာမက်ကို စော်ကားတဲ့ ကာတွန်းသရုပ်ဖော်မှုတွေ မြင့်တက်လာခဲ့ပြီး နောက်ဆက်တွဲအဖြစ် အကြမ်းဖက်တိုက်ခိုက်မှုတွေလည်း ဖြစ်ခဲ့ပါတယ်။

    စာသင်ခန်းထဲမှာ တမန်တော်မိုဟာမက် ရုပ်ပြောင်ကာတွန်း အသုံးပြုခဲ့တဲ့ ပြင်သစ်ကျောင်းဆရာတစ်ဦး ပြီးခဲ့တဲ့တစ်ပတ်မှာ သတ်ဖြတ်ခံခဲ့ရပြီး ပြင်သစ်သမ္မတ မာခရွန်ကတော့ ဘာသာရေးခေါင်းဆောင်တွေအပေါ် လှောင်ပြောင်သရော်တဲ့ ကာတွန်းတွေကို ဆက်လက်ရေးသားခွင့်ပြုသွားမယ်လို့ လူသိရှင်ကြား ထုတ်ပြောခဲ့ပါတယ်။

    အဲဒီနောက်ပိုင်း ကူဝိတ်နဲ့ ဆော်ဒီအာရေဗျအပါအဝင် အာရပ်နိုင်ငံတွေမှာ ပြင်သစ်ထုတ်ပစ္စည်းတွေ စူပါမားကတ်တွေမှာ မတင်တော့တာ၊ သပိတ်မှောက်ဖို့ ဆော်ဩတာတွေလည်း မြင့်တက်လာပါတယ်။

    ပြင်သစ်နိုင်ငံခြားရေးဝန်ကြီးဌာနရဲ့ မနေ့ကထုတ်ပြန်ချက်မှာ ဒီလို သပိတ်မှောက်ဖို့ ဆော်ဩတိုက်တွန်းမှုတွေဟာ အခြေအမြစ်မရှိဘူးလို့ ပြောဆိုခဲ့ပြီး ချက်ခြင်း ရပ်တန့်ဖို့လည်း တောင်းဆိုခဲ့ပါတယ်။ ဒါ့အပြင် မိတ်ဖက်နိုင်ငံတွေထံချဉ်းကပ်ကာ ပြင်သစ်ရဲ့ ရပ်တည်ချက်ကို ရှင်းပြသွားမယ်လို့ ကြေငြာချက်မှာ ဖော်ပြထားပါတယ်။

    သမ္မတမာခရွန်ကလည်း “မိမိတို့အနေနဲ့ အမုန်းစကားကို လက်မခံပေမယ့်၊ ကျိုးကြောင်းပြ ဆွေးနွေးသုံးသပ်မှုကိုတော့ ကာကွယ်သွားမယ်” လို့ Twitter စာမျက်နှာမှာ ရေးသားခဲ့ပါတယ်။

    တမန်တော်မိုဟာမက်ကို ရုပ်ပုံရေးဆွဲတာဟာ အဂါရ၀ပြုရာရောက်တယ်လို့ အစ္စလာမ်ဘာသာဝင်တွေက သတ်မှတ်ထားတာ ဖြစ်ပါတယ်။

    Ref: Alarabiya