News @ M-Media

Tag: Bahrain

  • အာရပ်ဒေသရှိ အကြီးဆုံး ခရစ်ယာန်ဘုရားကျောင်း ဘာရိန်းတွင်ဖွင့်လှစ်

    အာရပ်ဒေသရှိ အကြီးဆုံး ခရစ်ယာန်ဘုရားကျောင်း ဘာရိန်းတွင်ဖွင့်လှစ်

    ဒီဇင်ဘာ ၁၁၊ ၂၀၂၁
    M-Media

    -အာရေဗျကျွန်းဆွယ်မှာ အကြီးဆုံးဖြစ်လာမယ့် ခရစ်ယာန်ကက်သလစ် ဘုရားကျောင်းတစ်ခုကို ဘာရိန်းနိုင်ငံမှာ ဒီဇင်ဘာ ၉ ရက်နေ့က ဖွင့်လှစ်လိုက်ပါတယ်။

    Our Lady of Arabia လို့ အမည်ပေးထားတဲ့ အဲဒီဘုရားကျောင်းဟာ မြို့တော် မန်နာမာရဲ့တောင်ဘက်မှာ တည်ရှိပါတယ်။ သမ္မာကျမ်းစာလာ တမန်တော် မိုးစက်က ယုံကြည်သူတွေနဲ့ တွေ့ဆုံခဲ့တဲ့ တဲပုံစံ ဆောက်လုပ်ထားပြီး လူပေါင်း ၂၃၀၀ လောက် တစ်ကြိမ်တည်း ဝတ်ပြုဆုတောင်းနိုင်ပါတယ်။

    ဘုရားကျောင်းဟာ ခေတ်သစ်ဗိသုကာလက်ရာ ပြယုဂ်တစ်ခုလည်း ဖြစ်ပါတယ်။

    “ဝမ်းသာတယ်၊ ကျေနပ်တယ်၊ ပီတိဖြစ်တယ်ပေါ့ဗျာ။ ဒီပရောဂျက်တစ်ခုလုံးရဲ့ အသက်က ‘အလင်း’ ပါ။ နေ့ဖက်မှာဆို အလင်းနဲ့ လေထုကိုလိုက်ပြီး အရောင်တွေပြောင်းနေမှာ” လို့ ဘုရားကျောင်းကို ဒီဇိုင်းဆွဲပေးခဲ့တဲ့ အီတလီဗိသုကာပညာရှင် မက်တီယာ ဒဲလ် ပရီတီက ပြောပါတယ်။

    ဘုရားကျောင်းဆောက်လုပ်ဖို့အတွက် နိုင်ငံတကာက ဗိသုကာပညာရှင်တွေကို ဖိတ်ခေါ်ခဲ့ပြီးတဲ့နောက် ပရီတီရဲ့ ဒီဇိုင်းကို ရွေးချယ်ခဲ့တာ ဖြစ်ပါတယ်။

    “အင်မတန်ကို နှစ်ထောင်အားရဖြစ်မိပါတယ်။ ဘာရိန်းက ဗိသုကာဆိုင်ရာ ပြယုဂ်တစ်ခုဖြစ်လာမယ့် ကြီးကျယ်ခမ်းနားတဲ့ ဒီဘုရားကျောင်းကြီး ရရှိတဲ့အတွက် အလွန်ပျော်ရွှင်မိပါတယ်။ ကျေးဇူးလည်းတင်ပါတယ်” လို့ ဂိုဏ်းအုပ်ဘုန်းတော်ကြီး ဘစ်ရှော့ ပေါလ်ဟင်ဒါက ပြောပါတယ်။

    ဘုန်းတော်ကြီး ဟင်ဒါဟာ ကာတာ၊ ဘာရိန်း၊ ကူဝိတ်နဲ့ ဆော်ဒီအာရေဗျတို့ပါဝင်တဲ့ အာရေဗျကျွန်းဆွယ်မြောက်ပိုင်းက ခရစ်ယာန်ကက်သလစ်အသင်းတော်ကို ကြီးကြပ်ကွပ်ကဲရသူ ဖြစ်ပါတယ်။

    ဘုရားကျောင်းဆောက်လုပ်ဖို့အတွက် ​မြေဧက စကွဲယားမီတာ ၉၀၀၀ ကို ဘာရိန်းဘုရင် ဟာမဒ် ဘင် အီဆာ အလ် ခါလီဖာက လွန်ခဲ့တဲ့ ၈ နှစ်အရင်ကတည်းက ခရစ်ယာန်လူ့အဖွဲ့အစည်းကို ပေးအပ်ထားတာ ဖြစ်ပါတယ်။

    “ဒီကက်သလစ်ဘုရားကျောင်းဟာ သမိုင်းကြောင်းသာမကဘဲ အရွယ်အစားအရလည်း အရေးပါပါတယ်။ ဒါဟာ ဘာရိန်းနိုင်ငံအတွက် အော​မြင်မှုဖြစ်ပါတယ်။ တစ်ခြားနိုင်ငံကသူတွေ ဘာရိန်းကိုလာနေဖို့အတွက် ဒါက တွန်းအားဖြစ်လာမှာပါ။ အားလုံးကို ကြိုဆိုပါတယ်” လို့ ‘ကင်းဟာမဒ် ငြိမ်းချမ်းရေးစင်တာ’ ဘုတ်အဖွဲ့ဥက္ကဌ ရှိခ် ခါလစ်က ပြောပါတယ်။

    ဘာရိန်းမှာ ခရစ်ယာန်ကက်သလစ်ဘာသာဝင် ၈ သောင်းလောက်ရှိတယ်လို့ ဗာတီကန်က ခန့်မှန်းတွက်ချက်ထားပြီး အများစုဟာ အိန္ဒိယနဲ့ ဖိလစ်ပိုင်တို့လို အာရှနိုင်ငံတွေက လာရောက်အလုပ်လုပ်ကိုင်ကြသူတွေ ဖြစ်ပါတယ်။

    ဂျူးနဲ့ ဟိန္ဒူဘာသာဝင်တွေလည်း ဘာရိန်းမှာ ရှိ​ပါတယ်။ လွန်ခဲ့တဲ့ နှစ်ပေါင်း ၂၀၀ ကတည်းက ဆောက်လုပ်ထားတဲ့ ဟိန္ဒူဘုရားကျောင်းတစ်ခုကို ဟိန္ဒူဘာသာဝင်တွေက ယခုအချိန်အထိ အသုံးပြုဆဲပါ။

    Ref: The National News

  • ယူအေအီးနှင့် ဘာရိန်းတို့ တရားမျှတမှုနှင့် ငြိမ်းချမ်းရေးကို ချိုးဖောက်ခဲ့သည်ဟု အဘတ်စ်ပြော

    ယူအေအီးနှင့် ဘာရိန်းတို့ တရားမျှတမှုနှင့် ငြိမ်းချမ်းရေးကို ချိုးဖောက်ခဲ့သည်ဟု အဘတ်စ်ပြော

    စက်တင်ဘာ ၂၆၊ ၂၀၂၀
    M-Media

    -အစ္စရေးနဲ့ ဆက်ဆံရေးတည်ဆောက်ခဲ့တဲ့ အာရပ်စော်ဘွားများပြည်ထောင်စု (ယူအေအီး) နဲ့ ဘာရိန်းတို့ရဲ့လုပ်ရပ်ကို ပါလက်စတိုင်းသမ္မတ မဟ်မူးဒ်အဘတ်စ်က ကုလသမဂ္ဂမိန့်ခွန်းမှာ ဝေဖန်ရှုတ်ချလိုက်ပြီး နိုင်ငံတကာ ဥပဒေအောက်မှာ တရားမျှတပြီး ရေရှည်တည်တံ့မယ့် အဖြေတစ်ခု ပေါ်ပေါက်လာရေးကို ဆန့်ကျင် ချိုးဖောက်လိုက်တာ ဖြစ်တယ်လို့ ပြောကြားခဲ့ပါတယ်။

    အွန်လိုင်းကတစ်ဆင့် ပြုလုပ်နေတဲ့ ၇၅ ကြိမ်မြောက် ကုလသမဂ္ဂ အထွေထွေညီလာခံမှာ မနေ့က အဘတ်စ်ဟာ မိန့်ခွန်းပြောခဲ့ပြီး စစ်မှန်တဲ့ ငြိမ်းချမ်းရေးလုပ်ငန်းစဉ် ပေါ်လာရေးအတွက် နိုင်ငံတကာညီလာခံတစ်ခု လာမယ့်နှစ်စောပိုင်းမှာ ခေါ်ဖို့လည်း တိုက်တွန်းခဲ့ပါတယ်။

    “နိုင်ငံတကာဥပဒေကို အခြေခံပြီး စစ်မှန်တဲ့ ငြိမ်းချမ်းရေးလုပ်ငန်းစဉ် စတင်ရေး အာဏာအပြည့်အ၀ ရှိနိုင်မယ့် ညီလာခံမျိုးပါ။ ကျူးကျော်သိမ်းပိုက်မှုတွေကို အဆုံးသတ်ပြီး ပါလက်စတိုင်းတွေ မိမိတို့ရဲ့ဇာတိမြေမှာ ၁၉၆၇ ခုနှစ်က နယ်နမိတ်အတိုင်း အရှေ့ဂျေရုစလင်ကို မြို့တော်အဖြစ်ထားကာ လွတ်လပ်တဲ့နိုင်ငံတစ်ခု ရရှိရေး၊ ဒုက္ခသည်ပြဿနာလို အရေးပါတဲ့ ကိစ္စတွေတွေအတွက် နောက်ဆုံးအဆင့် အဖြေထွက်ရေး ရည်ရွယ်တဲ့ ညီလာခံမျိုး ဖြစ်သင့်ပါတယ်”

    အခုနှစ်စောပိုင်းက ပါလက်စတိုင်း-အစ္စရေးပြဿနာဖြေရှင်းရေး အမေရိကန်က အဆိုပြုချက်တစ်ခု ထုတ်ပြန်ခဲ့ပေမယ့် ဒါကို ပါလက်စတိုင်းအာဏာပိုင်အဖွဲ့က လက်မခံပါဘူး။ ဒီအဆိုပြုချက်ဟာ အစ္စရေးကို လုံးလုံးလျားလျား အသာပေးထားတယ်လို့ဆိုကာ အမေရိကန်၊ အစ္စရေးတို့နဲ့ ပါလက်စတိုင်းအာဏာပိုင်အဖွဲ့က အဆက်အသွယ် ဖြတ်တောက်ခဲ့ပါတယ်။

    ကုလရဲ့ အရင်က ဆုံးဖြတ်ချက်တွေ၊ သဘောတူညီချက်တွေ၊ နှစ်ဖက် အပြန်အလှန် ငြိမ်းချမ်းရေးဆွေးနွေးမှု သဘောတူညီချက်တွေကို အခြေခံကာ ဒီပြဿနာကို ဖြေရှင်းဖို့လည်း ပါလက်စတိုင်းအာဏာပိုင်တွေက တိုက်တွန်းခဲ့ပါတယ်။

    စက်တင်ဘာ ၁၅ ရက်နေ့မှာ တရားဝင်လက်မှတ်ရေးထိုးပြီး အစ္စရေးနဲ့ ဆက်ဆံရေး ထူထောင်ခဲ့ကြတဲ့ ယူအေအီးနဲ့ ဘာရိန်တို့က သူတို့ရဲ့ ဆောင်ရွက်မှုဟာ ပါလက်စတိုင်းလွတ်မြောက်ရေးကို ပိုမိုအားထုတ် ကြိုးပမ်းပေးနိုင်ဖို့ ဖြစ်တယ်လို့ တုန့်ပြန်ပြောကြားခဲ့ပါတယ်။

    လွတ်လပ်ရေးဆိုတဲ့ မျှော်လင့်ချက်ကို ပါလက်စတိုင်းတွေ မရမချင်း ဒီပြဿနာကို ဖြေရှင်းနိုင်မှာမဟုတ်ဘူးလို့လည်း အဘတ်စ်က မနေ့မှာ ထည့်သွင်းပြောဆိုခဲ့ပါတယ်။

    “ကျူးကျော်သိမ်းပိုက်မှုတွေ အဆုံးမသတ်ဘဲနဲ့ ငြိမ်းချမ်းရေး၊ လုံခြုံရေး၊ တည်ငြိမ်အေးချမ်းရေးနဲ့ အတူယှဉ်တွဲနေထိုင်ရေးဆိုတာ ကျွန်တော်တို့ဒေသမှာ ရှိလာမှာ မဟုတ်ပါဘူး”

    Ref: Aljazeera

  • အစ္စရေးနှင့်ဆက်ဆံခြင်းက ပါလက်စတိုင်းနိုင်ငံပေါ်ပေါက်ရေးအတွက်ဟု ဘာရိန်းဘုရင်ပြော

    အစ္စရေးနှင့်ဆက်ဆံခြင်းက ပါလက်စတိုင်းနိုင်ငံပေါ်ပေါက်ရေးအတွက်ဟု ဘာရိန်းဘုရင်ပြော

    စက်တင်ဘာ ၂၅၊ ၂၀၂၀
    M-Media

    ဘာရိန်းဘုရင် ဟာမဒ် ဘင် အီဆာ အလ် ခါလီဖာ

    -အစ္စရေးနဲ့ ဆက်ဆံရေးထူထောင်တာဟာ နှစ်နိုင်ငံတည်ရှိရေးမူကို အခြေခံကာ ပါလက်စတိုင်း-အစ္စရေးပြဿနာကို ဖြေရှင်းရေး ပိုမိုကြိုးပမ်းအားထုတ်ဖို့ဖြစ်တယ်လို့ ဘာရိန်းဘုရင် ဟာမဒ် ဘင် အီဆာ အလ် ခါလီဖာက ၇၅ ကြိမ်မြောက် ကုလသမဂ္ဂ မိန့်ခွန်းမှာ ပြောကြားလိုက်ပါတယ်။

    အာရပ်စော်ဘွားများပြည်ထောင်စု (ယူအေအီး) နဲ့ ဘာရိန်းတို့ဟာ ဩဂုတ်လနဲ့ စက်တင်ဘာလတွေမှာ အစ္စရေးနဲ့ ဆက်ဆံရေးထူထောင်ခဲ့ပြီး အာရပ်နဲ့ မွတ်စလင်ကမ္ဘာရဲ့ ဝေဖန်မှုကိုလည်း ခံခဲ့ရပါတယ်။

    မနေ့က မိန့်ခွန်းမှာတော့ ဘုရင် အလ် ခါလီဖာက အရှေ့ဂျေရုစလင်ကို မြို့တော်အဖြစ်ထားတဲ့ လွတ်လပ်တဲ့ ပါလက်စတိုင်းနိုင်ငံ ပေါ်ပေါက်လာ​စေမယ့် နှစ်နိုင်ငံတည်ရှိရေးမူကို အခြေခံကာ ပါလက်စတိုင်း-အစ္စရေး ပြဿနာကို ပိုမိုအားထုတ်ဖြေရှင်းကြဖို့ တိုက်တွန်းခဲ့ပါတယ်။

    အစ္စရေးနဲ့ ဆက်ဆံရေးထူထောင်ထာဟာ ငြိမ်းချမ်းရေးသတင်းစကားပေးတာမျိုး ဖြစ်တယ်လို့လည်း သူက ဆိုပါတယ်။

    “အစ္စရေးနဲ့ ဆက်ဆံရေးထူထောင်လိုက်တာဟာ မျှတဲ့ပြီး၊ အလုံးစုံပြည့်၀တဲ့ ငြိမ်းချမ်းရေးအတွက် ကျွန်တော်တို့ လက်ကမ်းပေးထားတယ်ဆိုတဲ့ ငြိမ်းချမ်းရေးသတင်းစကားကို ပါးလိုက်တာ ဖြစ်ပါတယ်”

    အစ္စရေးနဲ့ အခုလို ဆက်ဆံရေးထူထောင်လိုက်တာဟာ ပါလက်စတိုင်းပိုင် အနောက်ဖက်ကမ်းရဲ့ ၃၀ ရာခိုင်နှုန်းကို ပိုင်နက်ထဲသွတ်သွင်းမယ့် အစ္စရေးရဲ့အစီအစဉ်ကို ရပ်တန့်နိုင်ခဲ့တယ်လို့ ယူအေအီးနဲ့ ဘာရိန်းတို့က ပြောကြားခဲ့ပါတယ်။

    ဒါပေမယ့် ဝန်ကြီးချုပ်နေတန်ယာဟု အပါအဝင် အစ္စရေးအစိုးရ တာဝန်ရှိသူတွေနဲ့ အမေရိကန်အစိုးရ တာဝန်ရှိသူတွေက ပါလက်စတိုင်းဒေသတွေကို အစ္စရေးပိုင်နက်ထဲသွတ်သွင်းမယ့် အစီအစဉ်ကို ခေတ္တ ရပ်ဆိုင်းထားတာဖြစ်ပြီး လုံး၀ရပ်လိုက်တာ မဟုတ်ဘူးလို့ ပြီးခဲ့တဲ့ သီတင်းပတ်တွေအတွင်း ထုတ်ဖော်ပြောဆိုခဲ့ပါတယ်။

    ဘာရိန်းဘုရင် အလ် ခါလီဖာက အစ္စရေးနဲ့ သဘောတူညီချက်ရအောင် ညှိနှိုင်းကာ ဒေသတွင်း ငြိမ်းချမ်းရေးနဲ့ တည်ငြိမ်အေးချမ်းရေး ဖော်ဆောင်ဖို့ အမေရိကန်ရဲ့ကြိုးစားမှုကို ချီးကျူးတယ်လို့လည်း ကုလမိန့်ခွန်းမှာ ထည့်သွင်းပြောကြားခဲ့ပါတယ်။

    Ref: Aljazeera

  • လာမည့် ၂ ရက်အတွင်း နောက်ထပ်အာရပ်နိုင်ငံတစ်ခု အစ္စရေးနှင့် ငြိမ်းချမ်းရေးလက်မှတ်ထိုးမည်

    လာမည့် ၂ ရက်အတွင်း နောက်ထပ်အာရပ်နိုင်ငံတစ်ခု အစ္စရေးနှင့် ငြိမ်းချမ်းရေးလက်မှတ်ထိုးမည်

    စက်တင်ဘာ ၂၄၊ ၂၀၂၀
    M-Media

    အစ္စရေး၊ အမေရိကန်၊ ဘာရိန်းနှင့် ယူအေအီးခေါင်းဆောင်များကို အိမ်ဖြူတော်တွင် တွေ့ရစဉ်

    -လာမယ့်တစ်ရက်၊ နှစ်ရက်အတွင်း နောက်ထပ်အာရပ်နိုင်ငံတစ်ခုဟာ အစ္စရေးနဲ့ ငြိမ်းချမ်းရေးစာချုပ် ချုပ်ဆိုတော့မယ်လို့ ကုလဆိုင်ရာ အမေရိကန်သံအမတ် ကီလီခရက်ဖ်က အလ်အာရေဗျ သတင်းဌာနကို ပြောကြားလိုက်ပါတယ်။

    အမေရိကန်ရဲ့ ကြားဝင်ညှိနှိုင်းမှုနဲ့အတူ အာရပ်စော်ဘွားများပြည်ထောင်စု (ယူအေအီး) နဲ့ ဘာရိန်းနိုင်ငံတို့ဟာ ဩဂုတ်နဲ့ စက်တင်ဘာတွေမှာ အစ္စရေးနဲ့ ဆက်ဆံရေးထူထောင်ကြောင်းကြေငြာခဲ့ပါတယ်။ ဒါ့ကြောင့် အာရပ်နဲ့ မွတ်စလင်ကမ္ဘာမှာ အစ္စရေးနဲ့ တရားဝင် ဆက်ဆံရေးထူထောင်တဲ့ နိုင်ငံတွေဟာ အီဂျစ်၊ ဂျော်ဒန်တို့အပါအဝင် ၄ နိုင်ငံ ဖြစ်လာတာပါ။

    ပင်လယ်ကွေ့ဒေသက အိုမန်၊ အာဖရိကက မော်ရိုကိုနဲ့ ဆူဒန်တို့လည်း အစ္စရေးနဲ့ ဆက်ဆံရေးထူထောင်တော့မယ်လို့ သတင်းထွက်နေပါတယ်။

    အမေရိကန်သံအမတ် ကီလီခရက်ဖ်က မိမိတို့ရဲ့ အစီအစဉ်ဟာ ဒီလမ်းကြောင်းမှာ အခြားနိုင်ငံတွေ ပါဝင်လာရေးဖြစ်ပြီး လာမယ့်ရက်အနည်းငယ်အတွင်း နောက်ထပ် နိုင်ငံတစ်ခု အစ္စရေးနဲ့ ငြိမ်းချမ်းရေးစာချုပ် ချုပ်ဆိုတော့မယ်လို့ ဆိုပါတယ်။

    “အခြားနိုင်ငံတွေလည်း ဒီလမ်းစဉ်ကို လိုက်လာလိမ့်မယ်ဆိုတာ ကျွန်မ သိနေပါတယ်”

    ဆော်ဒီအာရေဗျနိုင်ငံကလည်း ဒီစာချုပ်မှာ လက်မှတ်ရေးထိုးမယ်လို့ မျှော်လင့်ကြောင်း ဘာရိန်း၊ ယူအေအီးနဲ့ အစ္စရေးတို့ရဲ့ စိတ်ဆန္ဒအမှန်ကို အီရန်က အမြတ်ထုတ်မှာကို မိမိတို့ ခွင့်ပြုမှာမဟုတ်ကြောင်း ခရက်ဖ်က ထည့်သွင်းပြောဆိုခဲ့ပါတယ်။

    ယူအေအီးနဲ့ ဘာရိန်းတို့ရဲ့လုပ်ရပ်ကို အီရန်က ရှုတ်ချခဲ့ပြီး၊ ပါလက်စတိုင်း ခေါင်းဆောင်ပိုင်းနဲ့ ပြည်သူတွေကလည်း ဒီလုပ်ရပ်ဟာ နောက်ကျောကို ဓားနဲ့ထိုးတဲ့ လုပ်ရပ်မျိုးဖြစ်တယ်လို့ ဝေဖန်ပြောဆိုခဲ့ပါတယ်။

    Ref: Alarabiya

  • အစ္စရေးနှင့် ပုံမှန်ဆက်ဆံရေးထူထောင်ရန် ဘာရိန်း သဘောတူ

    အစ္စရေးနှင့် ပုံမှန်ဆက်ဆံရေးထူထောင်ရန် ဘာရိန်း သဘောတူ

    စက်တင်ဘာ ၁၂၊ ၂၀၂၀
    M-Media

    -အစ္စရေးနဲ့ ဘာရိန်းတို့ဟာ ပြည့်စုံတဲ့ သံတမန်ဆက်ဆံရေးတစ်ခု ထူထောင်ဖို့ သဘောတူခဲ့ကြတယ်လို့ အမေရိကန်သမ္မတ ဒေါ်နယ်ထရမ့်က မနေ့မှာ ထုတ်ပြန်ကြေငြာခဲ့ပြီး ဒါဟာ သမိုင်း၀င်အောင်မြင်မှုတစ်ခုလို့လည်း ပြောကြားခဲ့ပါတယ်။

    ထရမ့်ဟာ အစ္စရေး၀န်ကြီးချုပ် ဘင်ယာမင် နေတန်ယာဟု၊ ဘာရိန်းဘုရင် ဟာမဒ် ဘင် အီဆာ အလ်ခါလီဖာတို့နဲ့ ဆွေးနွေးပြီးနောက် ဒီလို သဘောတူညီချက် ရခဲ့တာဖြစ်တယ်လို့ ၃ နိုင်ငံ ပူးတွဲကြေငြာချက်မှာ ဖော်ပြထားပါတယ်။

    ပြီးခဲ့တဲ့လမှာ အာရပ်စော်ဘွားများပြည်ထောင်စု(ယူအေအီး)ကလည်း အစ္စရေးနဲ့ ပုံမှန်ဆက်ဆံရေးထူထောင်ဖို့ သဘောတူညီချက် ရခဲ့ပါတယ်။ စက်တင်ဘာ ၁၅ ရက်နေ့ အိမ်ဖြူတော်မှာ ပြုလုပ်မယ့် လက်မှတ်ရေးထိုးပွဲအခမ်းအနားကို ယူအေအီး၊ ဘာရိန်းနဲ့ အစ္စရေးတို့ တက်ရောက်မှာ ဖြစ်ပါတယ်။

    မနေ့က ဘာရိန်းနိုင်ငံရဲ့ ထုတ်ပြန်ချက်မှာ မိမိတို့ဟာ အရှေ့အလယ်ပိုင်းဒေသမှာ မျှတပြီး ပြီးပြည့်စုံတဲ့ ငြိမ်းချမ်းရေးမျိုး အလိုရှိတယ်လို့ ဖော်ပြထားပါတယ်။

    ဘုရင်ဟာမဒ်က အဲဒီငြိမ်းချမ်းရေးဟာ ပါလက်စတိုင်း-အစ္စရေး ပူးတွဲတည်ရှိတဲ့ နှစ်နိုင်ငံအဖြေကို အခြေခံသင့်ကြောင်း ထည့်သွင်းပြောကြားခဲ့ပါတယ်။

    ပါလက်စတိုင်းလွတ်မြောက်ရေးအဖွဲ့ (PLO) က ဒီသဘောတူညီချက်ဟာ ပါလက်စတိုင်းတွေရဲ့နောက်ကျောကိုထိုးတဲ့ နောက်ထပ်သစ္စာမဲ့ဓားချက်တစ်ခု ဖြစ်တယ်လို့ တုန့်ပြန်ပြောကြားခဲ့ပါတယ်။

    Ref: Aljazeera

    (ဓာတ်ပုံ – နေတန်ယာဟု၊ ထရမ့်နှင့် ဘုရင်ဟာမဒ်)