ဧပြီ ၂၀၊ ၂၀၁၆
M-Media
– ပြည်တွင်းရှုံးထွက်ဖလား DFB-Pockal တွင် နောက်ဆုံးဗိုလ်လုပွဲသို့ တက်ရောက်နိုင်ခဲ့ပြီး ဖလား ၃ လုံးအိပ်မက် ရှင်သန်လာခဲ့သည့်အတွက် မိမိအနေဖြင့် ကျေနပ်မိသည်ဟု ဘိုင်ယန်နည်းပြ ဂွါဒီယိုလာက ပြောကြားလိုက်သည်။
ယမန်နေ့က ကစားခဲ့သည့် ၀ါဒါဘရီမင်နှင့် ဆီမီးဖိုင်နယ်ပွဲတွင် ဘိုင်ယန်မှာ ၂ ဂိုးပြတ်ဖြင့် အနိုင်ရရှိခဲ့ခြင်းဖြစ်သည်။ ဘိုင်ယန်မှာ ဘွန်ဒစ်လီဂါတွင် ရာသီပြီးဆုံးရန် ၄ ပွဲသာလိုတော့သည့်အချိန် ဒုတိယနေရာမှ ဒေါ့မွန်အား ၇ မှတ်ဖြတ်ထားကာ လက်ကျန် ၂ ပွဲ အနိုင်ရရုံဖြင့် ချန်ပီယံဖြစ်မည်ဖြစ်သည်။
ထို့ပြင် ချန်ပီယံလိဂ်တွင်လည်း ဆီမီးဖိုင်နယ်သို့ ရောက်ရှိနေပြီး ဖလား ၃ လုံးအိပ်မက်နှင့် လက်တစ်ကမ်းအကွာတွင် ရှိနေသည်။
“တကယ့်ကို ကျေနပ်ပါတယ်ဗျာ။ ဘာလင်က (ရှုံထွက်ဖလား) ဖိုင်နယ်ပွဲဟာ ကြီးကျယ်တဲ့ပွဲ ဖြစ်လာမှာပါ။ ဘရီမင်က မိုချန်ဂလာဘတ်ခ်ျနဲ့ လေဗာကူဆင်တို့ကို အနိုင်ယူခဲ့ပါတယ်။ သူရသတ္တိနဲ့ ပြည်စုံတဲ့ ပြိုင်ဘက်နဲ့ ရင်ဆိုင်ရမယ်ဆိုတာ ကျွန်တော်တို့ သိခဲ့ပါတယ်” ဟု ပွဲအပြီးတွင် ပြောကြားခဲ့သည်။
ဂွါဒီယိုလာမှာ ရာသီကုန်တွင် မန်စီးတီးအသင်းသို့ ပြောင်းရွှေ့မည်ဟု ကြေငြာထားသူဖြစ်သည်။
Ref: Goal
