ဇွန် ၁၃၊ ၂၀၂၁
M-Media
-ကားနဲ့တိုက်သတ်ခံလိုက်ရတဲ့ မွတ်စလင်မိသားစုအတွက် စာနာဝမ်းနည်းကြောင်း၊ နိုင်ငံတစ်ဝှမ်းက အစ္စလာမ်ဘာသာဝင်အားလုံးနဲ့ တစ်သားတည်းရှိကြောင်း ပြသတဲ့ ချီတက်တက်ပွဲတစ်ခုကို ကနေဒါနိုင်ငံမှာ သောကြာနေ့က ပြုလုပ်ခဲ့ပါတယ်။
ကနေဒါနိုင်ငံ အွန်တာရီယိုပြည်နယ်က လန်ဒန်မြို့မှာ ပြီးခဲ့တဲ့ တနင်္ဂနွေနေ့ညပိုင်းက မွတ်စလင်မိသားစုတစ်ခု မျဉ်းကြားကူးဖို့ စောင့်ဆိုင်းနေစဉ် အသက် ၂၀ အရွယ် နသန်နီယဲလ် ဗဲလ်တ်မန်ဆိုသူက ထရပ်ကားနဲ့ ဝင်တိုက်ခဲ့တာပါ။
အဲဒီအဖြစ်အပျက်အတွင်း မိသားစုဝင် ၄ ဦး သေဆုံးခဲ့ပြီး ရဲတပ်ဖွဲ့က ဒါဟာ လူမျိုးရေး၊ ဘာသာရေး မုန်းတီးစိတ်ကို အခြေခံလုပ်ဆောင်တဲ့ တိုက်ခိုက်မှုဖြစ်တယ်လို့ ထုတ်ပြန်ခဲ့ပါတယ်။
ကနေဒါ၀န်ကြီးချုပ် ဂျက်စတင် ထရူဒူက အကြမ်းဖက်တိုက်ခိုက်မှုအဖြစ် သတ်မှတ်ခဲ့ပါတယ်။
သောကြာနေ့က ထောင်နဲ့ချီတဲ့ ကနေဒါပြည်သူတွေဟာ အခင်းဖြစ်ပွားရာနေရာမှာ ငြိမ်သက်ဆုတောင်းခဲ့ကြပါတယ်။ အဲဒီနောက် အနီးအနားမှာရှိတဲ့ ဗလီဝတ်ကျောင်းတော်တစ်ခုကို ချီတက်ခဲ့ကြပြီး သေဆုံးသွားသူတွေအတွက် ဝမ်းနည်းကြေကွဲကြောင်း၊ နိုင်ငံအတွင်းမှာရှိနေတဲ့ အစ္စလာမ်ဘာသာဝင်တွေနဲ့ တစ်သားတည်းရှိကြောင်း ပြသခဲ့ကြပါတယ်။
ဆန္ဒပြပွဲမှာ ပါဝင်သူတွေဟာ ‘အမုန်းအတွက်နေရာမရှိ’ ‘မေတ္တာက အမုန်းကို လွှမ်းမိုးရမည်’ ဆိုတဲ့ ဆိုင်းဘုတ်တွေလည်း ကိုင်ဆောင်ခဲ့ကြပါတယ်။ ဒီလှုပ်ရှားမှုမှာ ပါဝင်တဲ့ လူ့အဖွဲ့အစည်းတိုင်းက ကိုယ်စားလှယ်တွေက ဘာသာရေးလူမျိုးရေးမုန်းတီးမှုကို ဆန့်ကျင်ရှုတ်ချတဲ့မိန့်ခွန်းတွေ ပြောကြားခဲ့ပါတယ်။
တိုရွန်တို၊ အိုတာဝါ၊ မွန်ထရီယဲလ်၊ ကျူဘတ်မြို့တို့မှာလည်း ဒီလို ချီတက်ပွဲတွေ ပြုလုပ်ခဲ့ကြပါတယ်။
မွတ်စလင်မိသားစုကို ကားနဲ့တိုက်သတ်ခဲ့တဲ့ ဗဲလ်တ်မန်ကို လူသတ်မှုစွဲချက် ၄ ခု၊ လူသတ်ရန်ကြိုးစားမှု စွဲချက်တစ်ခုနဲ့ တရားစွဲဆိုထားပါတယ်။
Ref: Aljazeera
