မေ ၁၈၊ ၂၀၂၃
M-Media
-ခရစ်ယာန်နဲ့ မွတ်စလင်တွေ အပါအ၀င် လူနည်းစုတွေကို အစွန်းရောက်တွေက တိုက်ခိုက်မှု တိုးမြှင့်ပြုလုပ်လာတာကို တားဆီးဖို့အတွက် အိန္ဒိယအစိုးရကို အမေရိကန်က တိုက်တွန်းလိုက်ပါတယ်။
ကမ္ဘာတစ်၀ှမ်း ဘာသာရေးလွတ်လပ်ခွင့်နဲ့ပတ်သက်တဲ့ အစီရင်ခံစာတစ်စောင်ကို အမေရိကန်အစိုးရက တနင်္လာနေ့မှာ ထုတ်ပြန်ခဲ့တာပါ။
အစီရင်ခံစာနဲ့ပတ်သက်ပြီး သတင်းထောက်တွေကို ဖြေကြားခဲ့တဲ့ ကန်အစိုးရ တာ၀န်ရှိသူတစ်ဦးက အိန္ဒိယမှာရှိတဲ့ လူနည်းစုတွေအပေါ် အကြမ်းဖက်တိုက်ခိုက်မှု ကျယ်ကျယ်ပြန့်ပြန့် အဆက်မပြတ်ဖြစ်ပွားနေတာနဲ့ပတ်သက်ပြီး ၀မ်းနည်းမိတယ်လို့ ဆိုပါတယ်။
ဒီလုပ်ရပ်တွေကို အိန္ဒိယအစိုးရက ရှုတ်ချဖို့၊ ကျူးလွန်သူတွေကို အရေးယူဖို့လည်း တိုက်တွန်းခဲ့ပါတယ်။
မွတ်စလင်လူ့အဖွဲ့အစည်းတစ်ခုလုံး မျိုးဖြုတ်သတ်ဖြတ်ဖို့ ဟိန္ဒူအစွန်းရောက်တွေက တိုက်တွန်းမှုတွေ၊ လူအုပ်စုနဲ့ ရိုက်နှက် သတ်ဖြတ်မှုတွေ၊ လူနည်းစုတွေရဲ့ ၀တ်ပြုရာနေရာတွေနဲ့ နေအိမ်တွေကို တိုက်ခိုက်ဖြိုဖျက်မှုတွေနဲ့ ပတ်သက်ပြီး စိုးရိမ်မိတယ်လို့ ကန်တာ၀န်ရှိသူက ပြောပါတယ်။
ဒါတွေကို တားဆီးနိုင်ရေး အမေရိကန်အစိုးရက အိန္ဒိယအစိုးရနဲ့ တိုက်ရိုက် ဆက်သွယ်ပြောဆိုဖို့ ရှိနေပြီး၊ အခြေအနေကို အနီးကပ် ဆက်လက်စောင့်ကြည့်သွားမှာ ဖြစ်ပါတယ်။
၂၀၁၄ ခုနှစ် ဟိန္ဒူအမျိုးသားရေးပါတီ အာဏာရပြီးတဲ့နောက်ပိုင်း အိန္ဒိယမှာ ခရစ်ယာန်တွေ၊ မွတ်စလင်နဲ့ ဒါလစ်ဇာတ်နိမ့်တွေကို ဟိန္ဒူအစွန်းရောက်တွေက အကြမ်းဖက်တိုက်ခိုက်မှု ပိုမိုမြင့်တက်လာတာ ဖြစ်ပါတယ်။
Ref: Aljazeera
