ဇွန်လ ၂၊ ၂၀၁၃
M-Media
သတင်း- ဆူးထက်
ပုဇွန်တောင် မြို့နယ် အစ္စလာမ် သာသနာရေးရာ ကောင်စီမှ ကြီးမှူးကျင်းပသော ပဉ္စမကြိမ်မြောက် ၂၀၁၃-၁၄ ပညာသင်နှစ်အတွက် လူမျိုး ဘာသာမရွေး ကျောင်းအပ်နှံရေး အစီအစဉ် အခမ်းအနား
ရန်ကုန် ။ ။ ရန်ကုန်တိုင်း၊ ပုဇွန်တောင်မြို့နယ် အစ္စလာမ်သာသနာရေးရာကောင်စီမှ ကြီးမှူးကျင်းပသော ပဉ္စမကြိမ်မြောက် ၂၀၁၃-၁၄ ပညာသင်နှစ်အတွက် လူမျိုး ဘာသာမရွေး ကျောင်းအပ်နှံရေး အခမ်းအနား အစီအစဉ်ကို ဇွန်လ ၂-ရက်နေ့က ရုံးခန်းတည်ရှိရာ အမှတ်(၅၈)၊ ၅၄လမ်း၊(၂)ရပ်ကွက်၊ ပုဇွန်တောင်မြို့နယ်တွင် ကျင်းပပြုလုပ်ခဲ့ကြောင်း သတင်းရရှိသည်။
အဆိုပါ အခမ်းအနားသို့ အစ္စလာမ်သာသနာရေးရာ ကောင်စီဌာနချုပ် ဥက္ကဌ ဦးညွန့်မောင်သျှိန်၊ မဟာ ၀ိဇိတာရာမတိုက်၊ ကျွဲဆည်ကန်(၁)လမ်း၊ ပြည်ကြီး တံခွန် မြို့နယ်၊ မန္တလေး မလိခ ၀ါဆိုကျောင်းမှ ဆရာတော် ဦးဇိန၊ ရပ်မိရပ်ဖများနှင့် ဖိတ်ကြားထားသော ဘာသာပေါင်းစုံမှ ကျောင်းသားမိဘများ၊ မီဒီယာများ စုံလင်စွာ တက်ရောက်ခဲ့ကြောင်း သိရသည်။
ပုဇွန်တောင် မြို့နယ် ပညာရေး တာဝန်ခံ ကိုရဲထွန်းဟန်မှလည်း ကျောင်းအပ်နှံရေးအစီအစဉ်ရဲ့ ရည်ရွယ်ချက်ကို အခုလို ပြောပြခဲ့ပါတယ်။ “ကျွန်တော်တို့ ဒီလိုအစီအစဉ်မျိုးကို ၂၀၀၈-ခုနှစ်ကတည်းကက စတင်ခဲ့တာဆိုတော့ အခုအကြိမ်နဲ့ ဆိုရင် ၅-ကြိမ်မြောက်ပါပြီ၊ ကျွန်တော်တို့မြို့နယ် အတွင်းမှာရှိတဲ့ ကလေးသူငယ်တွေရဲ့ ပညာရေး မြင့်မားရေး နဲ့ အခြေခံ ပညာရေး အားလုံး အလုံးစုံ တတ်မြောက်ရေးအတွက် ရည်ရွယ်ချက် ဖြစ်ပါတယ်၊ ပုဇွန်တောင်မြို့နယ် အတွင်းမှာရှိတဲ့ လိုအပ်ချက်ရှိနေတဲ့ ဘာသာပေါင်းစုံက ကလေးတွေကို ပေးတာပါ။ ပုဇွန်တောင် မြို့နယ် အတွင်းမှာကို ကျွန်တော်တို တကယ်တမ်း လေ့လာတဲ့ အခါမှာ လိုအပ်နေတဲ့ ကလေးတွေကို ၀မ်းနည်းစွာ တွေ့ရတဲ့ အတွက် ဒီလိုစီစဉ်ဆောင်ရွက်ရခြင်း ဖြစ်ပါတယ်” ဟု M-Media သို့ ပြောပြခဲ့ပါတယ်။
ဘာသာပေါင်းစုံမှ မူလတန်း၊ အလယ်တန်း၊ အထက်တန်း၊ တက္ကသိုလ်ဝင်တန်း ကျောင်းသား ကျောင်းသူ စုစုပေါင်း (၂၁၉) ယောက်အား ပညာသင် ထောက်ပံ့ကြေးငွေ နှင့် ကျောင်းသုံးပစ္စည်း (ဗလာစာအုပ်၊ ခဲတံ၊ ပေတံ၊ ဘောပင်၊ ကော်ပါဗူး၊ ကျောင်းဝတ်စုံ (၃)စုံ၊ ကျောပိုးလွယ်အိတ်)တို့ ပေးအပ်ခဲ့ကြောင်း သတင်းရရှိသည်။ စုစုပေါင်း လှူဒါန်းကုန်ကျငွေ သိန်း(၄၂) ကုန်ကျ ခဲ့ကြောင်း သိရသည်။
ယင်းအခမ်းအနားကို နံနက် (၉)နာရီမှ စတင်ကျင်းပ၍ ညနေ (၅)နာရီတွင် အခမ်းအနားကို အောင်မြင်စွာ ရုတ်သိမ်းခဲ့ပါတယ်။
More Photo on FB
