News @ M-Media

Tag: Hajj 2020

  • မက္ကာနှင့် မဒီနာမှ မြင့်မြတ်ရာဗလီနှစ်လုံး မကြာခင် ပြန်ဖွင့်တော့မည်

    မက္ကာနှင့် မဒီနာမှ မြင့်မြတ်ရာဗလီနှစ်လုံး မကြာခင် ပြန်ဖွင့်တော့မည်

    ဧပြီ ၃၀၊ ၂၀၂၀
    M-Media

    -မက္ကာမြို့က ‘မတ်စ်ဂျစ်ဒ်ဟရမ်ဗလီ’ မဒီနာမြို့က ‘မတ်စ်ဂျစ်ဒ်နဗဝီ’ ဗလီတို့ကို လူအများ ဝတ်ပြုနိုင်အောင် ပြန်လည်ဖွင့်ပေးဖို့ စီစဉ်နေတယ်လို့ ဂေါပကအဖွဲ့ အကြီးအကဲ ရှိခ် အဘ်ဒူလ်ရဟ်မန် အလ်-ဆူဒိုက်စ်က ပြောကြားလိုက်ပါတယ်။

    ကိုရိုနာဗိုင်းရပ်စ် ပြန့်နှံ့နေမှုကြောင့် ဆော်ဒီအာရေဗျ တစ်နိုင်ငံလုံးမှာ ဗလီဝတ်ကျောင်းတော်တွေကို ပိတ်ထားပြီး မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော် နှစ်လုံးမှာတော့ ဗလီဆရာတွေနဲ့ ဝန်ထမ်းတွေ ရမ်ဇာန်ဥပုသ်လ သာရာဝီ ဝတ်ပြုမှုကို ခွင့်ပြုထားပါတယ်။

    အလ်-ဆူဒိုက်စ်က မြင့်မြတ်ရာဗလီတွေ ပိတ်ထားရတဲ့အတွက် အစ္စလာမ်ဘာသာဝင်တွေရဲ့ ဝမ်းနည်းမှုနေ့ရက်တွေ မကြာခင် ကုန်ဆုံးတော့မယ်လို့ အင်္ဂါနေ့က သူ့ရဲ့ ဆိုရှယ်မီဒီယာအကောင့်တွေက ဗီဒီယိုမှာ ပြောကြားခဲ့ပါတယ်။

    “အစ္စလာမ်လူ့အဖွဲ့အစည်းမှာ ရှိနေတဲ့ ဝမ်းနည်းမှုတွေ ပျောက်ကင်းသွားမယ့်ရက်တွေ ရောက်လာပါတော့မယ်။ မြင့်မြတ်ရာ ဗလီဝတ်ကျောင်းတော် ၂ ခုမှာ ဝတ်ပြုဆုတောင်းလို့ရတဲ့နေ့၊ ဆဖာရ်နဲ့ မရ်ဝါတောင်တွေကို ဆအီပြုလို့ရတဲ့နေ့၊ ကိုတော်မြတ်ရဲ့ ဂူဗိမာန်တော်ကို သွားရောက်ဂါရ၀ပြုကာ အဲဒီမှာ ဝတ်ပြုဆု​တောင်းလို့ရမယ့် နေ့ရက်တွေ လာတော့မှာပါ”

    အစိုးရဟာ ဒီ မြင့်မြတ်ရာဗလီနှစ်လုံးမှာ ဘေးအန္တရာယ်ကင်းတဲ့ ပတ်ဝန်းကျင်တစ်ခု ဖော်ဆောင်ရေးအတွက် စိတ်အားထက်သန်စွာ လုပ်ဆောင်နေတယ်လို့လည်း အလ်-ဆူဒိုက်စ်က ထည့်သွင်း ပြောဆိုခဲ့ပါတယ်။

    ဆော်ဒီ ဟဂျ်နှင့် အွမ္မရာ ဘုရားဖူးရေးရာဝန်ကြီးဌာနက မက္ကာနဲ့ မဒီနာမြို့တွေက မြင့်မြတ်ရာ ဗလီဝတ်ကျောင်းတော် ၂ လုံးကို မကြာခင် ပြန်လည်ဖွင့်လှစ်ပေးသွားမယ်လို့ Twitter စာမျက်နှာမှာ ရေးသားခဲ့ပါတယ်။

    လက်ရှိ မတ်စ်ဂျစ်ဒ်ဟရမ်နဲ့ မတ်စ်ဂျစ်ဒ် နဗဝီ ဗလီဝတ်ကျောင်းတော် နှစ်လုံးမှာ အပူချိန်တိုင်း ကင်မရာတွေ တပ်ဆင်နေပြီး အခြား ဘေးအန္တရာယ်ကင်းရှင်းရေး လုပ်ငန်းတွေကိုလည်း လုပ်ဆောင်နေပါတယ်။

    Ref: Saudi Gazette

  • အွမ္မရာဗီဇာကြေးနှင့် ဝန်ဆောင်ခများကို အေးဂျင့်ဆီမှ ပြန်ထုတ်နိုင်ဟု ဆော်ဒီကြေငြာ

    အွမ္မရာဗီဇာကြေးနှင့် ဝန်ဆောင်ခများကို အေးဂျင့်ဆီမှ ပြန်ထုတ်နိုင်ဟု ဆော်ဒီကြေငြာ

    မတ် ၂၊ ၂၀၂၀
    M-Media

    -ပြည်ဝင်ခွင့် ယာယီပိတ်ပင်မှုကြောင့် ဝင်ခွင့်မရတဲ့ အွမ္မရာဘုရားဖူးခရီးသွားတွေ ပေးထားတဲ့ ဗီဇာကြေးနဲ့ ဝန်ဆောင်ခတွေကို ပြန်ထုတ်ပေးသွားမယ်လို့ ဆော်ဒီအာရေဗျ ဟဂျ်နှင့် အွမ္မရာဝန်ကြီးဌာနက ထုတ်ပြန်ကြေငြာလိုက်ပါတယ်။

    ကမ္ဘာတစ်ဝှမ်း ပြန့်နှံ့နေတဲ့ ကိုရိုနာဗိုင်းရပ်စ်သစ် အန္တရာယ်ကြောင့် ဆော်ဒီအာရေဗျဟာ အခုနှစ် အွမ္မရာ ဘုရားဖူးခရီးစဉ်ကို ပြီးခဲ့တဲ့တစ်ပတ်မှာ ယာယီပိတ်ပင်လိုက်တာပါ။

    အွမ္မရာဘုရားဖူးခရီးစဉ်အတွက် ငွေကြေးပေးအပ်ထားတဲ့ ကမ္ဘာတစ်ဝှမ်းက မွတ်စလင်ခရီးသွားတွေအနေနဲ့ သက်ဆိုင်ရာ အွမ္မရာအေးဂျင့်တွေဆီကနေ ဗီဇာကြေးနဲ့ ဝန်ဆောင်ခတွေကို ပြန်ထုတ်လို့ရပြီး အဲဒီအတွက် အီလက်ထရောနစ် ဝန်ဆောင်မှုလည်း ထားရှိပေးထားတယ်လို့လည်း ဝန်ကြီးဌာနရဲ့ ထုတ်ပြန်ချက်မှာ ဖော်​ပြထားပါတယ်။

    ဒီကိစ္စအတွက် ဝန်ကြီးဌာနကို မေးမြန်းလိုတယ်ဆိုရင် ဖုန်းနံပါတ် ၀၀၉၆၆-၉၂၀၀၀၂၈၁၄ ဒါမှမဟုတ် အီးမေးလ် [email protected] တို့ကို ဆက်သွယ်မေးမြန်းနိုင်တယ်လို့လည်း ဆိုပါတယ်။

    အွမ္မရာဘုရားဖူးခရီးသွားတွေအပြင်၊ ကိုရိုနာဗိုင်းရပ်စ်သစ် ပြန့်နှံ့နေတဲ့ နိုင်ငံက ခရီးသွားတွေ၊ ပင်လယ်ကွေ့နိုင်ငံတွေက နိုင်ငံသားတွေကိုလည်း ဆော်ဒီက ပြည်ဝင်ခွင့် ပိတ်ပင်ထားပါတယ်။ ဒါပေမယ့် နိုင်ငံအတွင်း ၁၄ ရက်နေထိုင်ခဲ့ပြီး ရောဂါလက္ခဏာ မပြခဲ့သူတွေ၊ အလုပ်ဗီဇာ၊ စီးပွားရေးဗီဇာ၊ မိသားစု အလည်အပတ်ဗီဇာ ကိုင်ဆောင်ထားသူတွေကတော့ ပြည်ဝင်ခွင့် ရရှိမှာဖြစ်ပါတယ်။

    Ref: Saudi Gazette

  • COVID-19 ဗိုင်းရပ်စ်ကြောင့် အွမ္မရာဘုရားဖူးခရီးစဉ်များကို ဆော်ဒီက ယာယီရပ်ဆိုင်း

    COVID-19 ဗိုင်းရပ်စ်ကြောင့် အွမ္မရာဘုရားဖူးခရီးစဉ်များကို ဆော်ဒီက ယာယီရပ်ဆိုင်း

    ဖေဖော်ဝါရီ ၂၇၊ ၂၀၂၀
    M-Media

    -ကမ္ဘာတစ်ဝှမ်းမှာ ပြန့်နှံ့နေတဲ့ ကိုရိုနာဗိုင်းရပ်စ်သစ် စိုးရိမ်ရမှုကြောင့် အစ္စလာမ်ဘာသာဝင်တွေ မက္ကာဟ်ကို အွမ္မရာ ဘုရားဖူးခရီး လာရောက်မှုနဲ့ မဒီနာက တမန်တော်မြတ် ဗလီဝတ်ကျောင်းတော် သွားရောက်လည်ပတ်မှုတွေကို ဆော်ဒီအာရေဗျက ယာယီပိတ်ပင်လိုက်ပါတယ်။

    ဆော်ဒီ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ နိုင်ငံအတွင်း ဗိုင်းရပ်စ် ပြန့်နှံမှုမရှိအောင် ကြိုတင်ကာကွယ်ရေးတွေ အမြင့်ဆုံး လုပ်ဆောင်ထားဖို့လိုတယ်ဆိုတဲ့ ကျန်းမာရေး တာဝန်ရှိသူတွေရဲ့ အကြံပေးချက်အရ ဒီလို ပိတ်ပင်လိုက်တာလို့ ဖော်ပြထားပါတယ်။ လက်ရှိ ကိုရိုနာဗိုင်းရပ်စ်သစ် ဖြစ်ပွားနေတဲ့ နိုင်ငံက ခရီးသွားတွေ ဝင်ရောက်မှုကိုလည်း ဆော်ဒီက ပိတ်ပင်ထားပါတယ်။

    ပြီးခဲ့တဲ့ ရက်ပိုင်းအတွင်း အရှေ့အလယ်ပိုင်းမှာ COVID-19 ဗိုင်းရပ်စ်ပိုး ကူးစက်ပြန့်နှံ့မှု သိသိသာသာ မြင့်တက်လာပြီး အီရန်နိုင်ငံမှာဆိုရင် အနည်းဆုံး လူ ၁၉ ဦး သေဆုံးခဲ့ပါတယ်။ ကူဝိတ်၊ ဘာရိန်း၊ အိုမန်၊ လက်ဘနွန်၊ အီရတ်နဲ့ ယူအေအီးနိုင်ငံတွေမှာလည်း ဗိုင်းရပ်စ်ပိုး ကူးစက်နေသူတွေကို တွေ့လာရပါတယ်။

    ဆော်ဒီအာရေဗျမှာတော့ ဗိုင်းရပ်စ်ပိုး ကူးစက်နေသူ မရှိသေးပါဘူး။ ဆော်ဒီနိုင်ငံသားတွေနဲ့ ပင်လယ်ကွေ့နိုင်ငံတွေက နိုင်ငံသားတွေ ဆော်ဒီနိုင်ငံကို လာရောက်တာ၊ ဆော်ဒီကနေ အခြားနိုင်ငံကို သွားရောက်လည်ပတ်တာတွေကိုလည်း ဆော်ဒီက ယာယီ ပိတ်ပင်ထားပါတယ်။ ဒါပေမယ့် နိုင်ငံခြားက ဆော်ဒီနိုင်ငံသားတွေ နေရပ်ပြန်လာမှု၊ ဆော်ဒီက ပင်လယ်ကွေ့နိုင်ငံသားတွေ မိမိနေရပ် ပြန်မှုကိုတော့ ခြွင်းချက်အဖြစ် ခွင့်ပြုထားပါတယ်။

    လက်ရှိ ပိတ်ပင်ထားမှုဟာ ယာယီသာဖြစ်ပြီး အာဏာပိုင်တွေက အချိန်နဲ့တစ်ပြေးညီ စောင့်ကြည့်ကာ လိုအပ်တာတွေကို ဆက်လက် ဆောင်ရွက်သွားမယ်လို့လည်း နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

    Ref: Alarabiya