News @ M-Media

Tag: Hajj2021

  • ၂၀၂၁ ခုနှစ် ဟဂျ်ဘုရားဖူးကာလ လူအကန့်အသတ်ဖြင့် စတင်

    ၂၀၂၁ ခုနှစ် ဟဂျ်ဘုရားဖူးကာလ လူအကန့်အသတ်ဖြင့် စတင်

    ဇူလိုင် ၁၇၊ ၂၀၂၁
    M-Media

    -၅ ရက်တာကြာမြင့်မယ့် ဟဂျ်ဘုရားဖူးကာလကို ဆော်ဒီအာရေဗျနိုင်ငံ မက္ကာမြို့မှာ စတင်နေပြီ ဖြစ်ပါတယ်။

    ကိုဗစ်ကပ်ရောဂါကြောင့် အခုနှစ် ဟဂျ်အတွက် နိုင်ငံအတွင်းနေထိုင်ပြီး ကာကွယ်ဆေးထိုးထားတဲ့ နိုင်ငံသား၊ နိုင်ငံခြားသား ၆ သောင်းကိုသာ ဆော်ဒီက ဟဂျ်ပြုခွင့်ပေးပါတယ်။

    ဟဂျ်ကျင့်စဉ်ဟာ အစ္စလာမ်ဘာသာရဲ့ မဏ္ဏိုင် ၅ ခုထဲက တစ်ခုဖြစ်ပြီး ငွေကြေးတတ်နိုင်ကာ ကျန်းမာရေးကောင်းတဲ့ အစ္စလာမ်ဘာသာဝင် အမျိုးသား၊ အမျိုးသမီးတိုင်း တစ်သက်မှာတစ်ကြိမ် ဟဂျ်ဘုရားဖူးသွားဖို့ တာဝန်ရှိပါတယ်။

    ကပ်ရောဂါကာလမတိုင်ခင်က ကမ္ဘာတစ်ဝှမ်း ဟဂျ်ပြုဖို့လာရောက်သူအရေအတွက်ဟာ တစ်နှစ်ကို ၂ သန်းခွဲလောက်ရှိတာ ဖြစ်ပါတယ်။ ပြီးခဲ့တဲ့နှစ်ကဆိုရင် လူ ၁ သောင်းကိုသာ ဆော်ဒီက ဟဂျ်ပြုခွင့်ပေးခဲ့ပါတယ်။

    “အခုနှစ် ဟဂျ်ပြုခွင့်ရသူ အနည်းငယ်ထဲမှာ ပါဝင်ခွင့်ရတဲ့အတွက် ကံကောင်းတယ်လို့ခံစားရပြီး ကျေလည်းကျေနပ်ပါတယ်” လို့ ဟဂျ်ပြုခွင့်ရသူ အမီနာက ပြောပါတယ်။

    ဟဂျ်ပြုခွင့်ရသူ ၆ သောင်းထဲမှာ ပါဝင်ဖို့နိုင်ဖို့အတွက် အွန်လိုင်းကနေ လူသိန်းချီ လျှောက်ထားခဲ့ကြပြီး လွန်ခဲ့တဲ့ ၅ နှစ်အတွင်း ဟဂျ်မပြုဖူးသူတွေ၊ အသက် ၅၀ ကျော်သွားပေမယ့် အရင်က ဟဂျ်ဘုရားဖူး တစ်ခါမှ မလာရောကဖူးသူတွေကို ဦးစားပေးရွေးချယ်ခဲ့တာလို့ ဆော်ဒီအာဏာပိုင်တွေက ပြောပါတယ်။

    ဟဂျ်ပြုခွင့်ရသူတွေဟာ ဘုရားဖူးကာလတစ်လျှောက်လုံး တင်းကြပ်တဲ့ ကိုဗစ်စည်းမျဉ်းတွေကို လိုက်နာရမှာ ဖြစ်ပါတယ်။

    Ref: Aljazeera

  • ၂၀၂၁ ခုနှစ် ဟဂျ်ကိစ္စ လာမည့်ရက်ပိုင်းအတွင်း ဆော်ဒီက ထုတ်ပြန်မည်

    ၂၀၂၁ ခုနှစ် ဟဂျ်ကိစ္စ လာမည့်ရက်ပိုင်းအတွင်း ဆော်ဒီက ထုတ်ပြန်မည်

    ဇွန် ၇၊ ၂၀၂၁
    M-Media

    ၂၀၂၀ ဟဂျ်ကျင့်စဉ်မြင်ကွင်း

    -ကိုဗစ်ကပ်ရောဂါကြောင့် ဖြစ်ပေါ်လာမယ့် စိန်ခေါ်မှုတွေကို လေ့လာသုံးသပ်မှု ပြုလုပ်ခဲ့ပြီး လာမယ့်ရက်ပိုင်းအတွင်း ဟဂျ်နဲ့ပတ်သက်တဲ့ အစီအစဉ်တွေကို ထုတ်ပြန်မယ်လို့ ဆော်ဒီအာရေဗျက ပြောကြားလိုက်ပါတယ်။

    ယခုနှစ် ဟဂျ်ဘုရားဖူးကာလဟာ လာမယ့် ဇူလိုင်လမှာ ကျရောက်မှာပါ။ ပုံမှန်အားဖြင့် ဒီကာလမှာ ကမ္ဘာတစ်ဝှမ်းက အစ္စလာမ်ဘာသာဝင် သန်းနဲ့ချီ လာရောက်ဟဂျ်ပြုကျပေမယ့် ကိုဗစ်ကပ်ရောဂါကြောင့် ပြီးခဲ့တဲ့နှစ် ဟဂျ်ကာလမှာ နိုင်ငံအတွင်းက လူတစ်ထောင်ကိုသာ ဆော်ဒီက ဟဂျ်ပြုခွင့် ပေးခဲ့ပါတယ်။

    အခုနှစ် ဟဂျ်ကာလမှာလည်း ဆော်ဒီအစိုးရဟာ လူအများအပြားကို ခွင့်ပြုမှာမဟုတ်ဘူးလို့ သတင်းတွေ ထွက်နေတာပါ။

    ဆော်ဒီ ခေတ္တ ပြန်ကြားရေးဝန်ကြီး ဒေါက်တာ မဂျစ် အလ်-ကာဆာဘီက အစိုးရအာဏာပိုင်တွေဟာ ကိုဗစ်ကပ်ရောဂါ နောက်ဆုံးအခြေအနေတွေကို လေ့လာသုံးသပ်မှု ပြုလုပ်ခဲ့ပြီး ဟဂျ်နဲ့ အွမ္မရာဝန်ကြီးဌာနက ရက်ပိုင်းအတွင်း ဟဂျ်ကိစ္စကို ထုတ်ပြန်ပေးမလိမ့်မယ်လို့ မနေ့က သတင်းစာရှင်းလင်းပွဲမှာ ပြောကြေားခဲ့ပါတယ်။

    ပုံပြောင်းကိုဗစ် ပြန့်နှံမှုကို သေသေချာချာ တွက်ချက်ဖို့ အရေးကြီးတယ်လို့လည်း အလ်-ကာဆာဘီက ပြောပါတယ်။

    “ဟဂျ်ကာလဟာ နိုင်ငံအတွင်းနဲ့ မွတ်စလင်ကမ္ဘာမှာ ကိုဗစ်ပြန့်နှံ့မယ့် အဓိကအကြောင်းတရား ဖြစ်လာတာမျိုးကို ကျွန်တော်တို့ မလိုလားပါဘူး”

    ဆော်ဒီဟာ အွမ္မရာဟ်ဘုရားဖူးအစီအစဉ်ကိုတော့ ပြီးခဲ့တဲ့နှစ် အောက်တိုဘာလမှာ ပြန်ဖွင့်ပေးခဲ့ပြီး လူအကန့်အသတ်၊ တင်းကြပ်တဲ့ ကိုဗစ်စည်းမျဉ်းစည်းကမ်းတွေနဲ့အညီ ခွင့်ပြုတာ ဖြစ်ပါတယ်။

    Ref: Arab News

  • ဟဂျ်ဘုရားဖူးခရီးစဉ်ကို ၂ နှစ်ဆက်အဖြစ် အင်ဒိုနီးရှားက ဖျက်သိမ်း

    ဟဂျ်ဘုရားဖူးခရီးစဉ်ကို ၂ နှစ်ဆက်အဖြစ် အင်ဒိုနီးရှားက ဖျက်သိမ်း

    ဇွန် ၃၊ ၂၀၂၁
    M-Media

    -ကိုဗစ်ကပ်ရောဂါ ကူးစက်ပြန့်နှံ့မှုအန္တရာယ်ကို စိုးရိမ်တာကြောင့် ဒီနှစ် ဟဂျ်ဘုရားဖူးခရီးစဉ်ကို ရပ်ဆိုင်းလိုက်တယ်လို့ အင်ဒိုနီးရှားက ထုတ်ပြန်ပါတယ်။

    အင်ဒိုနီးရှားနိုင်ငံဟာ ကမ္ဘာမှာ အစ္စလာမ်ဘာသာဝင်အများဆုံးရှိရာနိုင်ငံ ဖြစ်ပါတယ်။ ခွဲတမ်းချစနစ်အရ အင်ဒိုနီးရှားနိုင်ငံက အစ္စလာမ်ဘာသာဝင်တစ်ဦးဟာ ဟဂျ်ပြုခွင့်ရဖို့ အနည်းဆုံး နှစ် ၂၀ လောက် စောင့်ဆိုင်းရတာ ဖြစ်ပါတယ်။

    မနှစ်ကလည်း ကိုဗစ်ကပ်ရောဂါကြောင့် အင်ဒိုနီးရှားဟာ နိုင်ငံသားတွေ ဟဂျ်ဘုရားဖူး စေလွှတ်မယ့်ကိစ္စကို ဖျက်သိမ်းခဲ့ပါတယ်။ ဒီနှစ်နဲ့ဆို ဒီလို ဖျက်သိမ်းတာဟာ ၂ နှစ်မြောက် ရှိပါပြီ။

    “ကပ်ရောဂါနဲ့ ဘုရားဖူးတွေရဲ့ ဘေးအန္တရာယ်ကင်းရှင်းရေးကိစ္စတွေကြောင့် အင်ဒိုနီးရှားက ဟဂျ်သွားမယ့်သူတွေကို ဒီနှစ်မှာလည်း သွားရောက်ခွင့်မပြုဖို့ အစိုးရက ဆုံးဖြတ်ခဲ့ပါတယ်” လို့ အင်ဒိုနီးရှား သာသနာရေးဝန်ကြီး ယာကွတ် ချိုလီ ကူမတ်စ်က ဒီကနေထုတ်ပြန်တဲ့ ကြေငြာချက်မှာ ပြောကြားခဲ့ပါတယ်။

    ဆော်ဒီအာရေဗျကလည်း ဘယ်နိုင်ငံကိုမှ ဟဂျ်အတွက် ဝင်ရောက်ခွင့်ပေးမှာမဟုတ်ဘူးလို့ ကူမက်စ်က ပြောပါတယ်။

    “အင်ဒိုနီးရှားတင်မဟုတ်ပါဘူး။ ဆော်ဒီအာရေဗျက နားလည်မှုစာချွန်လွှာကို လက်မှတ်မထိုးထားတဲ့အတွက် တစ်ခြားဘယ်နိုင်ငံမှလည်း ဟဂျ်ခွဲတမ်းရမှာ မဟုတ်ပါဘူး”

    ဆော်ဒီအာရေဗျနိုင်ငံ မက္ကာနဲ့ မဒီနာတို့က မြင့်မြတ်ရာနေရာတွေကို သွားရောက်ပြီး ဝတ်ပြုဆုတောင်းတာကို ဟဂျ်ပြုတယ်လို့ ခေါ်ဆိုတာပါ။ အရွယ်ရောက်ပြီး၊ ငွေကြေးတတ်နိုင်တဲ့ အစ္စလာမ်ဘာသာဝင် အမျိုးသား၊ အမျိုးသမီးတိုင်း တစ်သက်မှာ တစ်ကြိမ် ဟဂျ်ပြုတာဟာ မလုပ်မနေရ ဘာသာရေးတာဝန် ဖြစ်ပါတယ်။ အခုနှစ် ဟဂျ်ဘုရားဖူးကာလဟာ ဇူလိုင်လမှာ ကျရောက်မှာ ဖြစ်ပါတယ်။

    ကိုဗစ်ကပ်ရောဂါကြောင့် ပြီးခဲ့တဲ့နှစ် ဟဂျ်ရာသီမှာ ဆော်ဒီအာရေဗျဟာ နိုင်ငံအတွင်းက လူ ၁ ထောင်လောက်ကိုသာ ကိုဗစ်စည်းကမ်းတွေ ထုတ်ပြီး ဟဂျ်ပြုခွင့် ပေးခဲ့ပါတယ်။ ဟဂျ်ကာလမှာ ပုံမှန် ကမ္ဘာတစ်ဝှမ်းက အစ္စလာမ်ဘာသာဝင်သန်းချီ လာရောက် ဟဂျ်ပြုကြတာ ဖြစ်ပါတယ်။

    အခုနှစ်မှာလည်း ပုံပြောင်းကိုဗစ်ကူးစက်မှု ကမ္ဘာတစ်ဝှမ်းမှာ မြင့်တက်နေတာကြောင့် ဆော်ဒီအစိုးရဟာ နိုင်ငံအတွင်းက ကိုဗစ်ကာကွယ်ဆေးထိုးပြီးတဲ့သူတွေကိုသာ ဟဂျ်ပြုခွင့်ပေးဖို့ စီစဉ်နေတယ်လို့ သတင်းတွေ ထွက်နေပါတယ်။

    Ref: Aljazeera