ဇွန်လ ၁၅ ရက်၊ ၂၀၁၄
M-Media
ကိုင်ရို။ ။ အိန္ဒိယ ရုပ်ရှင်မင်းသမီး မိုနီကာမှ အစ္စလာမ်သာသနာသို့ ကူးပြောင်းသက်ဝင်ကြောင်း တရားဝင်ကြေငြာပြီးနောက် များမကြာမီ ဗလီဝတ်ကျောင်းတော်ထဲရောက်နေသော အိန္ဒိယရုပ်ရှင်သရုပ်ဆောင် Jai ၏ ဓာတ်ပုံများထွက်လာရာ သူသည် အစ္စလာမ်သို့ကူးပြောင်းသည့် အကျော်အမော် အိန္ဒိယအနုပညာရှင်များစာရင်း၌ ပါဝင်လာသည်ဟု မီဒီယာများအကြား သတင်းပျံ့နှံ့သွားခဲ့သည်။
“ Chennai က T Nagar ရဲ့ ဗလီတစ်လုံးမှာ Jai ရဲ့ ၀တ်ပြုပုံ ထွက်လာတယ်။ သူ့ကို ဂီတဒါရိုက်တာ Yuvan Shankar RAja နဲ့ အတူတစ်ကွ တွဲလျက်ရှိနေခဲ့တယ်။ သူဟာ အစ္စလာမ်အပေါ် ထက်သန်တိမ်းညွှတ်နေခဲ့တယ် လို့ ရာဂျာက ပြောဖူးတယ် ” ဟု ဆို၍ ဗလီတစ်လုံးအတွင်း သံပုရာခွံဦးထုပ်ငယ် ဆောင်းထားသည့် သရုပ်ဆောင်၏ ဓာတ်ပုံနှင့်တစ်ကွ ဇွန်လ ၁၀ ရက်တွင် Times of India မှ ဖော်ပြခဲ့သည်။
သူ၏အစ္စလာမ်ကူးပြောင်းခြင်း ကောလဟလသတင်းကို ဓာတ်ပုံနှင့်တစ်ကွ ဖော်ပြသည်မှာ Times of India တစ်ခုတည်း မဟုတ်ပါ။
၎င်းထက်အလျင် Deccan Chronicle မှ ယင်း ဗလီဝတ်ကျောင်းအတွင်း ရောက်နေသော သူ၏ဓာတ်ပုံ ၂ ပုံနှင့်အတူ ဇွန်လ ၈ ရက်နေ့က ဖော်ပြပြီး၊ ဟိန္ဒူ- မွတ်စ်လင်မ် ထိမ်းမြားမှုများအကြောင်း ရုပ်ရှင်ရိုက်ကွင်းတစ်ခုဟူ၍ တင်ပြခဲ့သည်။
“ ကျွန်တော် အစ္စလာမ်သာသနာကို ကူးပြောင်းမထားပါဘူး ” ဟူသော ငြင်းဆိုချက်ဖြင့် သရုပ်ဆောင် Jai က ထိုသတင်းကို ပယ်ချခဲ့သည်ဟု အခြားကောလဟလသတင်းများထွက်လာခဲ့သော်လည်း သူ့စကားသယ်လာသူက ၀မ်းမြောက်ဖွယ်ဘာသာရေး စကားရေးတင်လိုက်သောကြောင့် အတင်းအဖျင်းစကားများအတွက် မီးလောင်ရာလေပင့် ဖြစ်သွားခဲ့ရသည်။
ဧပြီလအစောပိုင်းတွင် ယင်းနာမည်ကြီးသရုပ်ဆောင်နှင့်နီးစပ်သောအသိုင်းအ၀ိုင်းတစ်ရပ်၏စကားကို TOI မှ “ Jai ဟာ အစ္စလာမ်ကို လေ့လာကျင့်သုံးနေတာ ပြီးခဲ့တဲ့နှစ်ကတည်းကပါပဲ။ ယမန်နှစ် ဥပုသ်လမှာတောင် ဥပုသ်သီလ ဆောက်တည်ခဲ့ပါသေးတယ်။ သူ့အတွေးအမြင် အပြောင်းအလဲနောက်ကွယ်က အကြောင်းရင်းမှန်ကိုတော့ ကျွန်တော်တို့ မသိပါဘူး။ ကျွန်တော်တို့အားလုံးသိကြတာက သူဟာ ဒီသာသနာလေ့လာကျင့်သုံးနေပြီး တရားဝင် ကူးပြောင်းမှုတော့ မရှိသေးပါဘူး။ သူ့နာမည်ကိုလည်း အပြောင်းအလဲ မလုပ်ထားသေးပါဘူး ” ဟူ၍ ဖော်ပြခဲ့သည်။
အကယ်၍ အတည်ဖြစ်ခဲ့ပါလျှင် အစ္စလာမ်သာသနာသို့ ရွေးချယ်ဝင်ရောက်ခဲ့သော အိန္ဒိယနာမည်ကြီးအနုပညာသည်များ၏ လတ်လတ် ဆတ်ဆတ်စာရင်းတွင် Jai လည်း ပါဝင်လာတော့မည်ဖြစ်၏။
ပြီးခဲ့သည်လအတွင်း အိန္ဒိယရုပ်ရှင်မင်းသမီး မိုနီကာသည် အစ္စလာမ်သို့ ကူးပြောင်းခဲ့ပြီး သူမ၏အမည်ကို MG Rahima ဟု ပြောင်းလဲခဲ့သည်။
ဖေဖော်ဝါရီအစောပိုင်းက ဂီတသမားနှစ်ဦးဖြစ်သော AR Rahman နှင့် Yuvan Shankar Raja တို့ကလည်း အစ္စလာမ်သာသနာသို့ ကူးပြောင်းသက်ဝင်ပြီးဖြစ်သည်ဟု သတင်းများကဆိုသည်။
ဟိန္ဒူလူများစုရှိ အိန္ဒိယတွင် မွတ်စ်လင်မ်ဦးရေမှာ သန်း ၁၈၀ ရှိနေပါသည်။
Ref: OnIslam & Newspapers
OnIslam မှ ” Has Indian Actor Jai Reverted to Islam? ” မှ သတင်းဆောင်းပါးကို မင်းထွဋ်ခေါင် ဆီလျော်အောင် ဘာသာပြန်ဆိုသည်။