News @ M-Media

Tag: Islam in China

  • ၀ီဂါများ ဥပုသ်စောင့်မှုကို တရုတ်အစိုးရက တားမြစ်

    ၀ီဂါများ ဥပုသ်စောင့်မှုကို တရုတ်အစိုးရက တားမြစ်

    မတ် ၂၆၊ ၂၀၂၃

    M-Media 


    -တရုတ်နိုင်ငံအနောက်ပိုင်း ရှင်ကျန်းပြည်နယ်က ၀ီဂါမွတ်စလင်တွေကို ဥပုသ်သီလ မဆောက်တည်ဖို့ တရုတ်အာဏာပိုင်တွေက အမိန့်ထုတ်ထားပြီး စောင့်ကြည့် အရေးယူမှုတွေလည်း ပြုလုပ်နေပါတယ်။ 

    တရုတ်ကွန်မြူနစ်အစိုးရဟာ ပြီးခဲ့တဲ့နှစ်တွေအတွင်း ၀ီဂါလူမျိုးတွေအပေါ် ဖိနှိပ်ညှင်းပမ်းတာ၊ တရုတ်ဇာတ်သွင်းတာတွေ ပိုမို လုပ်ဆောင်လာပြီး ရှင်ကျန်းမှာ ၀ီဂါနဲ့ အခြားလူမျိုးစု နှစ်သန်းလောက်ကိုလည်း အကျဥ်းစခန်းတွေထဲမှာ ပိတ်လှောင်ထားပါတယ်။ 

    အစ္စလာမ်ဘာသာ၀င်တွေရဲ့ ရမ်ဇာန် ဥပုသ်လဟာ မတ်လ ၂၃ ရက်နေ့မှာ စတင်ခဲ့ပြီး တရုတ်အစိုးရက ၀ီဂါတွေ ဥပုသ်မစောင့်ဖို့ အမိန့်ထုတ်ထားပါတယ်။ 

    ကမ္ဘာ၀ီဂါကွန်ဂရက်ရဲ့ ဥက္က ဌDilshat Rushit က တရုတ်အာဏာပိုင်တွေဟာ ရှင်ကျန်းမှာ ၀ီဂါတွေကို ၂၄ နာရီ ပတ်လုံး စောင့်ကြည်ကာ နေအိမ်တွေကို ၀င်ရောက်စစ်ဆေးတာတွေ လုပ်ဆောင်တယ်လို့ ပြောပါတယ်။

    လူ့အခွင့်အရေး အဖွဲ့တွေက ၁၁.၄ သန်းသော ၀ီဂါလူမျိုးတွေဟာ တရုတ်ကွန်မြူနစ်အာဏာပိုင်တွေရဲ့ လူမျိုးတုန်းရှင်းလင်းမှု အန္တရာယ်ကို ရင်ဆိုင်ေနရတယ်လို့ မကြာသေးခင် ထုတ်ပြန်ခဲ့တဲ့ အစီရင်ခံစာမှာ ဖော်ပြထားပါတယ်။ 

    ၀ီဂါတွေကို အရက်အတင်းသောက်ခိုင်းတာ၊ ၀က်သားအတင်းစားခိုင်းတာတွေကိုလည်း တရုတ်အစိုးရက လုပ်ဆောင်ပါတယ်။ 

    Ref: OpInadia

  • ဟဂျ်ပြုသည့်အတွက် တရုတ်အစိုးရက ထောင်ချခဲ့သည့် ဝီဂါတရားဟောဆရာ ထောင်အတွင်း ကွယ်လွန်

    ဟဂျ်ပြုသည့်အတွက် တရုတ်အစိုးရက ထောင်ချခဲ့သည့် ဝီဂါတရားဟောဆရာ ထောင်အတွင်း ကွယ်လွန်

    ဒီဇင်ဘာ ၃၀၊ ၂၀၂၂
    M-Media

    -ဆော်ဒီအာရေဗျနိုင်ငံကို ဟဂျ်ဘုရားဖူးသွားတဲ့အတွက် တရုတ်အစိုးရက ထောင်ဒဏ် ၅ နှစ်ချမှတ်ခဲ့တဲ့ ဝီဂါတရားဟောဆရာ အိုမာရ် ဟူစိန်ဟာ အသည်းကင်ဆာရောဂါနဲ့ ထောင်ထဲမှာ ကွယ်လွန်သွားပါတယ်။

    ဟဂျ်ကျင့်စဉ်ဟာ ကမ္ဘာတစ်ဝှမ်းက အစ္စလာမ်ဘာသာဝင်တွေ မက္ကာမြို့ကို သွားရောက်ဆောင်ရွက်ရတဲ့ ဘာသာရေး တာဝန်တစ်ခု ဖြစ်ပါတယ်။

    တရုတ်နိုင်ငံအနောက်ပိုင်း ရှင်ကျန်းပြည်နယ်ရဲ့ ဒုတိယမြို့တော် ကိုရ်လာက Qarayulghun ဗလီဝတ်ကျောင်းတော်မှာ တာဝန်ထမ်းဆောင်နေတဲ့ ဝီဂါတရားဟောဆရာ အသက် ၅၅ နှစ်အရွယ် အိုမာရ် ဟူစိန်ကို တရုတ်အာဏာပိုင်တွေက ၂၀၁၇ ခုနှစ်မှာ ဖမ်းဆီးခဲ့တာပါ။

    ၂၀၁၅ ခုနှစ်မှာ ဆော်ဒီအာရေဗျနိုင်ငံ မက္ကာမြို့ကို သွားရောက်ကာ ဟဂျ်ပြုတဲ့အတွက် တရားစွဲဆိုခံရပြီး ထောင်ဒဏ် ၅ နှစ် ချမှတ်ခံခဲ့ရပါတယ်။ ၂၀၁၇ ခုနှစ်အတွင်း ဝီဂါ ဘာသာရေးဆရာတွေ၊ ထင်ရှားသူတွေကို တရုတ်အစိုးရက စီမံချက်နဲ့ ဖမ်းဆီးခဲ့ပြီး အိုမာရ်ဟူစိန်နဲ့ သူ့ရဲ့ ညီအစ်ကို ၃ ဦးလည်း ပါဝင်ခဲ့တာ ဖြစ်ပါတယ်။

    တရုတ်အစိုးရက ဖမ်းဆီးတဲ့အချိန်မှာ ကျန်းမာရေးကောင်းမွန်တဲ့ အိုမာရ်ဟာ အခုနှစ် ဖေဖော်ဝါရီ ၂ ရက်နေ့မှာ အကျဉ်းထောင်အတွင်းက ဆေးရုံမှာ အသည်းကင်ဆာရောဂါနဲ့ ကွယ်လွန်သွားခဲ့ပါတယ်။ ပြည်နယ်ရဲတပ်ဖွဲ့က ဒီသတင်းကို အခုမှ ထုတ်ပြန်အတည်ပြုတာ ဖြစ်ပါတယ်။

    ရှင်ကျန်းပြည်နယ်မှာ တရုတ်အစိုးရက အကျဉ်းစခန်းတွေ အများအပြား တည်ဆောက်ထားပြီး ဝီဂါနဲ့ အခြားလူနည်းစု ၁ သန်းကျော်လောက်ကို ဖမ်းဆီးထိန်းသိမ်းကာ ဘာသာတရားနဲ့ ရိုးရာယဉ်ကျေးမှု အမှတ်သညာတွေ ပပျောက်အောင် စီမံကိန်းချ ဆောင်ရွက်နေပါတယ်။

    အကျဉ်းထောင်အခြေအနေ ဆိုးရွား

    ကိုရ်လာမြို့က အခြားအကျဉ်းထောင်တစ်ခုကနေ လွတ်မြောက်လာတဲ့ ဝီဂါလူမျိုး မဟ်မွတ် မိုင်ဒွန်က အကျဉ်းထောင်အတွင်းအခြေအနေဟာ အလွန်အမင်း ဆိုးရွားကာ ပြီးခဲ့တဲ့ ၂ နှစ်အတွင်း အကျဉ်းသားအများအပြား သေဆုံးခဲ့တယ်လို့ ပြောပါတယ်။

    ကိုရ်လာမြို့မှာ နေထိုင်တဲ့ အမည်မဖော်လိုသူ တစ်ဦးကလည်း အကျဉ်းထောင်အတွင်း ကျွေးတဲ့အစားအသောက်တွေ အလွန်ညံ့ဖျင်းပြီး အလုပ်ကြမ်းတွေ အဓမ္မခိုင်းတာ၊ နိုင်ငံရေးသင်တန်းတွေ အချိန်ကြာမြင့်စွာ တက်ခိုင်းတာ၊ အချိန်အခါမရှိ စစ်ကြောရေးလုပ်တာတွေ ရှိတယ်လို့ ဆိုပါတယ်။

    ညီအစ်ကိုအားလုံး ထောင်ချခံရ

    အိုမာရ်တို့မှာ ညီအစ်ကို ၄ ဦးရှိပြီး အသက် ၅၀ ကနေ ၆၂ အရွယ် ရှိပါတယ်။ ညီအစ်ကိုအာလုံးကို တရုတ်အာဏာပိုင်တွေက ရှေ့ဆင်နောက်ဆင့် ဖမ်းဆီးထောင်ချခဲ့ကြတာပါ။ မက္ကာမြို့ကို ဟဂျ်ဘုရားဖူးသွားတဲ့ စွဲချက်နဲ့ ဖြစ်ပါတယ်။

    အိုမာရ်ရဲ့အစ်ကို ဆမတ် ဟူစိန်ဟာ ထောင်ဒဏ် ၁၂ နှစ် ချမှတ်ခံခဲ့ရပြီး ၂၀၂၁ ခုနှစ်က အကျဉ်းထောင်ထဲမှာပဲ ကွယ်လွန်ခဲ့ပါတယ်။ သေဆုံးချိန်မှာ အသက် ၆၀ အရွယ်ရှိတဲ့ ဆမတ်ဟာ တရုတ်အစိုးရက စတင်ဖမ်းဆီးစဉ်ချိန်မှာ ကျန်းမာရေးကောင်းသူ တစ်ဦးပါ။

    နောက်ထပ် ညီအစ်ကို ၂ ဦးဖြစ်တဲ့ ရဟ်မန်နဲ့ အဘ်လက်တို့ကို တရုတ်အာဏာပိုင်တွေက ၂၀၁၉ ခုနှစ်မှာ ပြန်လွှတ်ပေးခဲ့ပါတယ်။ သူတို့ရဲ့ အပြုအမူတွေဟာ တိုးတက်လာပြီး၊ ဟူစိန်နဲ့ ဆမတ်တို့ဟာ လူထုကို မတည်မငြိမ်ဖြစ်အောင် လုပ်နိုင်တဲ့အန္တရာယ်ရှိတယ်လို့ တရုတ်အာဏာပိုင်တွေက ပြောပါတယ်။

    Ref: RFA

  • မွတ်စလင်နိုင်ငံအများစုက ကန့်ကွက်ခဲ့သည့် လူ့အခွင့်အရေးကောင်စီမှ ၀ီဂါအရေး ဆွေးနွေးမှု

    အောက်တိုဘာ ၁၀၊ ၂၀၂၂
    M-Media

    -တရုတ်နိုင်ငံ အနောက်ပိုင်းက ၀ီဂါလူမျိုးတွေ ညှင်းပမ်းခံရမှုနဲ့ပတ်သက်ပြီး ဆွေးနွေးဖို့ ပြီးခဲ့တဲ့တစ်ပတ်က ကုလလူ့အခွင့်အရေးကောင်စီမှာ မဲခွဲမှု ရှုံးနိမ့်သွားခဲ့ပါတယ်။

    တရုတ်အစိုးရက ဒါဟာ ‘အောင်ပွဲ’ တစ်ခုလို့ ပြောဆို သုံးနှုန်းခဲ့ပါတယ်။

    ၀ီဂါအရေးဆွေးနွေးဖို့ မဲခွဲရာမှာ ထောက်ခံမဲက ၁၇ မဲသာ ရှိခဲ့ပြီး၊ ကန့်ကွက်မဲ ၁၉ မဲ ရှိခဲ့တာပါ။ ကန့်ကွက်မဲအများစုကို မွတ်စလင်နိုင်ငံတွေက ပေးခဲ့တာဖြစ်ကာ အဲဒီအထဲမှာ အင်ဒိုနီးရှား၊ ဆိုမာလီယာ၊ ပါကစ္စတန်၊ ယူအေအီးနဲ့ ကာတာတို့ ပါ၀င်ပါတယ်။

    မဲမပေးဘဲနေခဲ့တဲ့ ၁၁ နိုင်ငံထဲမှာလည်း မလေးရှားလို့ မွတ်စလင်နိုင်ငံတွေ ပါ၀င်ပါတယ်။

    တရုတ်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ ဟွာချွမ်ယင်က လူ့အခွင့်အရေးကောင်စီမှာ ၀ီဂါအရေး ဆွေးနွေးဖို့ မအောင်မြင်မှုဟာ ဖွံ့ဖြိုးဆဲနိုင်ငံတွေအတွက် အောင်ပွဲ၊ အမှန်တရားနဲ့ တရားမျှတမှုအတွက် အောင်ပွဲဖြစ်တယ်လို့ ပြောကြားခဲ့ပါတယ်။

    “လူ့အခွင့်အရေး ခေါင်းစဥ်တပ်ပြီး လိမ်ညာပြောဆိုတာ၊ အခြားနိုင်ငံတွေရဲ့ ပြည်တွေရေးကို ၀င်ရောက်စွက်ဖက်တာ၊ အခြားသူတွေကို ထိန်းချုပ်တာ၊ ဖိအားပေးတာ၊ အရှက်ရအောင်လုပ်တာမျိုးတွေ မဖြစ်သင့်ပါဘူး”

    တရုတ်အစိုးရဟာ နိုင်ငံအနောက်ပိုင်း ရှင်ကျန်းပြည်နယ်က ၀ီဂါနဲ့ အခြားလူမျိုးစုငယ် တစ်သန်းလောက်ကို အကျဥ်းစခန်းတွေထဲ ထည့်ပြီး လူမျိုး၊ ဘာသာနဲ့ ယဥ်ကျေးမှု အမှတ်သညာပျောက်အောင် ညှင်းပမ်းကာ တရုတ်ဇာတ်သွင်းနေတာ ဖြစ်ပါတယ်။

    ဒီလို လူ့အခွင့်အရေး ချိုးဖောက်မှုတွေနဲ့ပတ်သက်ပြီး ကုလသမဂ္ဂက ၂၀၁၈ ခုနှစ်ကတည်းက စတင်က ထုတ်ဖော်ပြောဆိုလာခဲ့တာပါ။

    ပြီးခဲ့တဲ့လအနည်းငယ်က ရှင်ကျန်းက တရုတ်အာဏာပိုင်တွေရဲ့ လျှို့၀ှက်ညွှန်ကြားချက်တွေ ပေါက်ကြားလာခဲ့ပြီး ဒီစာရွက်စာတမ်းတွေဟာ ၀ီဂါတွေအပေါ် ညှင်းပမ်းမှုနဲ့ပတ်သက်တဲ့ ခိုင်မာတဲ့ သက်သေအထောက်အထားတွေ ဖြစ်ခဲ့ပါတယ်။

    Ref: Aljazeera

  • ၀ီဂါများအပေါ် တရုတ်အစိုးရ၏ ရက်စက်ကြမ်းကြုတ်မှုများကို အချက်အလက်အသစ်များက ထပ်မံအတည်ပြုနေ

    ၀ီဂါများအပေါ် တရုတ်အစိုးရ၏ ရက်စက်ကြမ်းကြုတ်မှုများကို အချက်အလက်အသစ်များက ထပ်မံအတည်ပြုနေ

    မေ ၂၄၊ ၂၀၂၂
    M-Media

    -တရုတ်နိုင်ငံအနောက်ပိုင်း ရှင်ကျန်းပြည်နယ်က ရဲတပ်ဖွဲ့ ဒေတာဘေ့စ်ကို ဟက်ကာတွေက ဖောက်ထွင်းပြီး အချက်အလက်တွေ ရယူခဲ့ရာမှာ ၀ီဂါတွေအပေါ် တရုတ်အစိုးရက ဘယ်လောက်အတိုင်းအတာအထိ ညှင်းပမ်းနှိပ်စက်နေလဲဆိုတာကို အသေးစိတ် တွေ့ခဲ့ရပါတယ်။

    ရှင်းကျန်းက ၀ီဂါနဲ့ အခြား အစ္စလာမ်ဘာသာ၀င်လူမျိုးစု တစ်သန်းလောက်ကို အကျဥ်းစခန်းထဲ ထည့်ပြီး သူတို့ရဲ့ ယဥ်ကျေးမှု၊ အနုပညာနဲ့ လူမျိုးပျောက်အောင် တရုတ်အစိုးရက လုပ်ဆောင်နေတယ်ဆိုပြီး နိုင်ငံတကာ အဖွဲ့အစည်းတွေက လွန်ခဲ့တဲ့ နှစ်အနည်းငယ်ကတည်းက ဖော်ပြလာခဲ့ကြတာပါ။

    တရုတ်အစိုးရက ဒါကို ပထမပိုင်းမှာ ငြင်းပေမယ့် နောက်ပိုင်းမှာတော့ ၀ီဂါတွေဟာ အသက်မွေး၀မ်းကျောင်းသင်တန်းကျောင်းတွေကို သူတို့ဆန္ဒနဲ့သူတို့ တက်ရောက်နေတာဖြစ်တယ်လို့ ပြောကြားခဲ့ပါတယ်။

    အခု ဟက်ကာတွေ ဖောက်ထွင်းရယူနိုင်ခဲ့တဲ့ မှတ်တမ်းတွေကို သုံးသပ်မှုအရ တရုတ်အစိုးရရဲ့ ပြောကြားမှုတွေဟာ လိမ်လည်ထားတာသားဖြစ်ပြီး မြေပြင်မှာ ၀ီဂါတွေဟာ နိုင်ငံတကာအသိုင်းအ၀ိုင်းကပြောသလို အကျဥ်းစခန်းထဲ အဓမ္မထည့်ပြီး နှိပ်စက်ခံနေရတယ်ဆိုတာကို ကွက်ကွက်ကွင်းကွင်း ပေါ်လွင်လာပါတယ်။

    လူမျိုးစု အမှတ်သညာ၊ ဘာသာရေး၊ ယဥ်ကျေးမှု ဓလေ့ထုံးတမ်းကို ဖျောက်ဖျက်တဲ့ လုပ်ငန်းစဥ်တွေ၊ အရက်မသောက်တာ၊ တရားနားထောင်တာလို၊ မွတ်စလင်အများစုရှိရာ နိုင်ငံကို သွားတာ စတဲ့ ကိစ္စမျိုးနဲ့ နှစ်ရှည်ထောင်ဒဏ်ချမှတ်တာ၊ ခေါင်းစဥ်မျိုးစုံတပ်ပြီး ဖမ်းဆီးအကျဥ်းချတာ၊ အကျဥ်းချထားသူတွေရဲ့ မိဘဆွေမျိုးတွေကိုပါ ဖမ်းဆီးပြီး အကျဥ်းစခန်းထဲ ထည့်ထားတာ၊ သားသမီးတွေကို အစိုးရဘော်ဒါဆောင် အဓမ္မပို့ပြီး ဦးနှောက်ကျဥ်းတာ စတဲ့ ဖိနှိပ်ညှင်းပမ်းမှု ပေါင်းစုံကို ဒီအခုပေါက်ကြားလာတဲ့ အချက်အလက်တွေမှာ တွေ့ရပါတယ်။

    ဒီအချက်အလက်တွေကို ကမ္ဘာတစ်၀ှမ်း နိုင်ငံပေါင်း ၁၁ နိုင်ငံက မီဒီယာအဖွဲ့အစည်း ၁၄ ခုကနေ ဆန်းစစ်အတည်ပြုထားတာ ဖြစ်ပါတယ်။

    ဘာတွေပါလဲ

    ကွန်ပျူတာပညာရှင်တွေ ဖောက်ထွင်းရယူခဲ့တဲ့ ဖိုင်တွေထဲမှာ ၂၀၁၈ ခုနှစ် ဇန်န၀ါရီလကနေ ဇူလိုင်လအတွင်း ရှင်ကျန်းက ရဲတွေ ရိုက်ယူထားတဲ့ မှတ်တမ်းဓာတ်ပုံ ၅၀၀၀ ကျော် ပါ၀င်ပါတယ်။

    တရုတ်အစိုးရ အကြီးတန်းအရာရှိတွေတဲ့ လျှို့၀ှက် ညွှန်ကြားချက်တွေ၊ ရဲတပ်ဖွဲ့ရဲ့ ဌာနတွင်းညွှန်ကြားစာတွေ၊ နှိပ်ကွပ်ရေးနည်းနာတွေ၊ အကျဥ်းစခန်းထဲမှာ ထိန်းသိမ်းခံထားရတဲ့ ၀ီဂါလူမျိုး တစ်ဦးချင်းစီရဲ့ အသေးစိတ်အချက်အလက်တွေ၊ လျှို၀ှက်စခန်းတွေရဲ့ တည်နေရာ စတာတွေကိုလည်း အချက်အလက်တွေထဲမှာ တွေ့ရပါတယ်။

    ၀ီဂါတွေရဲ့ မှတ်တမ်းဓာတ်ပုံပေါင်း ၅ ထောင်ကျော်ထဲက ၂၈၈၄ ဦးကို အခြား ရရှိထားတဲ့ အချက်အလက်တွေနဲ့ တိုက်ပြီး ဘယ်သူဘယ်၀ါလဲဆိုတာ ပညာရှင်တွေက ဖော်ထုတ်နိုင်ခဲ့ပါတယ်။

    တရုတ်အစိုးရက အကျဥ်းစခန်းတွေထဲမှာရှိတဲ့ ၀ီဂါတွေဟာ ကိုယ့်သဘောနဲ့ကိုယ် ဒီစခန်းတွေကို လာရောက်ပြီး အသက်မွေး၀မ်းကျောင်းပညာ သင်တယ်လို့ ပြောပေမယ့် ဓာတ်ပုံတွေက မျက်နှာအမူအရာတွေကိုကြည့်ရင် အဓမ္မ အကျဥ်းစခန်းထဲထည့်ထားတာကို ပေါ်လွင်နေစေပါတယ်။

    တရုတ်အစိုးရဟာ ၀ီဂါတော်တော်များများကို မုတ်ဆိတ်ထားတာ၊ ပု၀ါဆောင်းတာ၊ အရက်မသောက်တာ၊ ၀တ်ပြုဆုတောင်းတာ၊ မွတ်စလင်နိုင်ငံကို ခရီးသွားတာလို အကြောင်းအရင်းမျိုးတွေနဲ့ ဖမ်းဆီးပြီး နှစ်ရှည်ထောင်ဒဏ်ချတာ၊ အကျဥ်းစခန်းတွေထဲ ထည့်ထားတာတွေ လုပ်ဆောင်တာ ဖြစ်ပါတယ်။

    သားကြောင့် အမေကိုဖမ်းဆီး

    တာဂျီဂူလ် သာဟီရ်ဟာ အသက် ၆၀ ရှိပါပြီ။ သူမရဲ့သားဖြစ်သူက အရက်မသောက်၊ ဆေးလိပ်မသောက်တဲ့အတွက် တရုတ်အာဏာပိုင်တွေက ဘာသာရေးအစွန်းရောက်လို့ သတ်မှတ်ပြီး အကြမ်းဖက်စွဲချက်နဲ့ ထောင် ၁၀ နှစ်ချမှတ်ခဲ့ပါတယ်။ အဲဒီနောက် သာဟီရ်ကိုလည်း ၂၀၁၇ ခုနှစ်မှာ ကြံရာပါအဖြစ် ဖမ်းဆီးပြီး အကျဥ်းစခန်းထဲမှာ ထိန်းသိမ်းခဲ့ပါတယ်။

    တရုတ်အစိုးရဟာ ရှင်ကျန်းမှာ သူတို့အပြစ်ရှိသူလို့ သတ်မှတ်တဲ့သူတွေရဲ့ မိသားစုတွေ၊ ဆွေမျိုးတွေကိုပါ ဖမ်းဆီးအကျဥ်းချထားတာကို ရရှိခဲ့တဲ့ အချက်အလက်တွေမှာ တွေ့ရပါတယ်။

    ၀ီဂါအမျိုးသမီး ရာဟီလ်အိုမာရ်ဟာ မှတ်တမ်းတွေအရ အသက် ၁၅ နှစ်အရွယ်မှာ သူမကို တရုတ်အစိုးရက ဖမ်းဆီးကာ အကျဥ်းစခန်းထဲ ပို့လိုက်တာပါ။ ဒါဟာ ရရှိခဲ့တဲ့ အချက်အလက်မှတ်တမ်းတွေအရ အသက်အငယ်ဆုံး အကျဥ်းချ ခံရသူ ဖြစ်ပါတယ်။

    အသက် ၇၃ နှစ်ရှိပြီဖြစ်တဲ့ အနီဟန် ဟာမစ်ကတော့ မှတ်တမ်းတွေအရ အကျဥ်းစခန်ထဲမှာ ပိတ်လှောင်ခံရတဲ့ ၀ီဂါတွေထဲမှာ အသက်အကြီးဆုံး ဖြစ်ပါတယ်။

    ရှင်ကျန်းရဲတပ်ဖွဲ့ဖိုင်

    “ရှင်ကျန်းရဲတပ်ဖွဲ့ဖိုင်များ” လို့ အမည်ပေးထားတဲ့ အဲဒီအချက်အလက်တွေထဲမှာ ထောင်နဲ့ချီတဲ့ ဓာတ်ပုံတွေ၊ စာရွက်စာတမ်းတွေ ပါ၀င်ပါတယ်။

    ဒီအချက်အလက်တွေကို ရှင်ကျန်းရဲတပ်ဖွဲ့ရဲ့ ဆာဗာတွေကို ကွန်ပျူတာပညာရှင်တွေက ဖောက်ထွင်းရယူထားတာဖြစ်ပြီး ၀ီဂါအရေး လေ့လာနေတဲ့ အမေရိကန်အခြေစိုက် ပညာရှင် ဒေါက်တာ အေဒရီယန် ဇန့်ဆီ ပေးပို့ခဲ့ပါတယ်။ ဒေါက်တာဇန့်ဟာ အမေရိကန်အခြေစိုက် Victims of Communism Memorial Foundation က ပညာရှင်တစ်ယောက်ဖြစ်ပြီး ရရှိတဲ့အချက်အလက်တွေကို အတည်ပြုကာ သတင်းဌာနတွေဆီ ပေးပိုခဲ့ပါတယ်။

    မှတ်တမ်းတွေမှာပါတဲ့ လူတွေကို ဘီဘီစီက ဆက်သွယ်လို့ရပေမယ့် သူတို့ဘယ်သူဘယ်၀ါဆိုတာနဲ့ ဘယ်မှာရှိနေလဲဆိုတာ ထုတ်မပြောလိုကြဘူးလို့ ဆိုပါတယ်။

    ရရှိခဲ့တဲ့မှတ်တမ်းတွေဟာ ၂၀၁၈ ခုနှစ်အတွင်းက ဖြစ်ပါတယ်။ ၂၀၁၉ ခုနှစ်မှာ ရှင်ကျန်းပြည်နယ်နဲ့ပတ်သက်တဲ့ မှတ်တမ်းတွေ လျှို့၀ှက်ထိန်းသိမ်းမှုအဆင့်ကို တရုတ်အစိုးရက မြှင့်တင်လိုက်ပြီး၊ ဒီအတွက် ၂၀၁၉ ခုနှစ်က မှတ်တမ်းတွေ ပါမလာတာလို့ ပညာရှင်တွေက သုံးသပ်ပါတယ်။

    “ရတဲ့ အချက်အလက်တွေက ဘာမှ မတည်းဖြတ်ရသေးတဲ့ဟာတွေပါ။ လျှော့ပေါ့ရေးထားတာမရှိဘူး။ အကြောင်းအရာစုံတယ်။ ကျွန်တော်တို့မှာ အချက်အလက်အားလုံး ရှိနေပါတယ်”

    “ထိပ်တန်းလျို့၀ှက် စာရွက်စာတမ်းတွေ။ တရုတ်ခေါင်းဆောင်တွေ သူတို့အယူအဆကို ပွင့်ပွင့်လင်းလင်းပြောထားတဲ့ မှတ်တမ်းတွေ၊ ညွှန်ကြားလွှာတွေ၊ ဓာတ်ပုံတွေ၊ အစုံပါပဲ။ တရုတ်အစိုးရရဲ့ ၀ါဒဖြန့်မှုတွေ မဟုတ်ဘူးဆိုတာ ဗူးပေါ်သလို ပေါ်သွားပါပြီ”

    အကျဥ်းစခန်းများ

    ၀ီဂါလူမျိုးစုဒေသဖြစ်တဲ့ ရှင်ကျန်းပြည်နယ်မှာ တရုတ်အစိုးရက အကျဥ်းစခန်းကွန်ယက်တွေကို တည်ဆောက်ထားပြီး အနည်းဆုံး ၀ီဂါ ၁ သန်းလောက်ကို အကျဥ်းချထားပါတယ်။

    တရုတ်အစိုးရက ဒါတွေဟာ အသက်မွေး၀မ်းကြောင်း သင်တန်းကျောင်းတွေလို့ ကမ္ဘာကိုပြောထားပေမယ့် အခုရရှိတဲ့ အချက်အလက်တွေအရ အကျဥ်းထောင်ထက်တောင်ပိုဆိုးတဲ့နေရာတွေ ဖြစ်တယ်ဆိုတာ သိရှိခဲ့ရပါတယ်။

    အကျဥ်းစခန်းနဲ့ ပတ်သက်တဲ့ ညွှန်ကြားချက်တွေထဲမှာ စခန်းအတွင်း လက်နက်ကိုင်အစောင့်တွေသာ ချထား အသုံးပြုဖို့၊ ကင်းမျှော်စင်တွေမှာ စက်သေနတ်တွေ၊ စနိုက်ပါတွေ ချထားဖို့၊ ထွက်ပြေးတဲ့သူတွေကို နေရာတင်ပစ်သတ်ဖို့ စတာတွေ ပါ၀င်ပါတယ်။

    ဒါ့အပြင် အကျဥ်းစခန်းကလူတွေကို ရွှေ့ပြောင်းတာ၊ ဒါမှမဟုတ် ဆေးရုံပို့တာလို အခြေအနေမျိုးမှာတောင် ခေါင်းကိုအ၀တ်စွတ်ကာ၊ လက်ထိပ်ခြေထိပ်ခတ်ထား ရမယ်လို့ အာဏာပိုင်တွေက ညွှန်ကြားထားပါတယ်။

    ကျမ်းစာသင်သည့်အတွက် ထောင် ၁၀ နှစ်

    သူကတော့ အသက် ၅၈ နှစ်အရွယ် သူရ်ဆန် ကာဒရ်ပါ။ ၁၉၈၀ ပြည့်နှစ်တွေက အစ္စလာမ်ဘာသာရေးစာပေ လေ့လာမှု၊ တရားဟောမှုနဲ့ မကြာသေးခင်က မုတ်ဆိတ်အရှည်ထားမှုအတွက် အကြမ်းဖက်ခေါင်းစဥ်တပ်ပြီး ထောင်ဒဏ် ၁၆ နှစ်နဲ့ ၁၁ လ ချမှတ်ခံခဲ့ရသူဖြစ်ပါတယ်။

    လွန်ခဲ့တဲ့ ၄၊ ၅၊ ၁၀ နှစ်အရင်က လုပ်ခဲ့တဲ့ ကိစ္စတွေကြောင့် နှစ်ရှည်ထောင်ဒဏ်ချမှတ်ခံရတာကိုလည်း အချက်အလက်တွေမှာ တွေ့ရပါတယ်။

    ၀ီဂါအမျိုသားတစ်ဦးဆိုရင် ၂၀၁၀ ခုနှစ်က အဖွားဖြစ်သူနဲ့ ရက်အနည်းငယ် ကျမ်းစာသင်ခဲ့တဲ့အတွက် ၂၀၁၇ ခုနှစ်မှာ ထောင် ၁၀ နှစ် ချခံခဲ့ရပါတယ်။

    ဖုန်းထဲမှာ တရားနားထောင်တာ၊ VPN ဆော့ဖ်၀ဲ ထည့်ထားတာလို ကိစ္စမျိုးနဲ့ ထောင်ချခံရသူတွေ ရာထောင်ချီ ရှိပါတယ်။

    ဖုန်းရှိပြီး မသုံးလို့ဆိုတဲ့အမှုနဲ့ ၁၀ နှစ်လောက်ထောင်ချခံရသူတွေကိုလည်း မှတ်တမ်းတွေမှာ တွေ့ရပါတယ်။ ဖုန်းထဲ ပိုက်ဆံမရှိလို့ ဖုန်းမသုံးနိုင်တာဟာ သူတို့ရဲ့ ဒစ်ဂျစ်တယ်စောင့်ကြည့်မှုကို ရှောင်ရှားတယ်လို့ တရုတ်အာဏာပိုင်တွေက အမှုတွဲတွေမှာ ခေါင်းစဥ်တပ်ထားပါတယ်။

    ဒါတင်မကသေးဘဲ ‘ရန်ဖြစ်တယ်’ ‘၀တ္တရားနှောက်ယှက်တယ်’ ‘အကြမ်းဖက်၀ါဒ’ စသဖြင့် ခေါင်းစဥ်အမျိုးမျိုးနဲ့ တရုတ်ရဲတွေဟာ ၀ီဂါတွေကို ထောင် ၁၀ နှစ်ကနေ အနှစ် ၂၀၊ ၃၀ အထိ ချထားတာတွေကိုလည်း အချက်အလက်တွေမှာ တွေ့ရပါတယ်။

    အိမ်မှာနေသူတွေ

    အကျဥ်းစခန်းမှာ ထိန်းသိမ်းခြင်းမရခံတဲ့ ၀ီဂါတွေလည်း တရုတ်အစိုးရရဲ့ ဖိနှိပ်ညှင်းပမ်းမှုနဲ့ မလွတ်ပါဘူး။

    အိမ်မှာနေထိုင်နေတဲ့ ၀ီဂါတွေကို သက်ကြီးရွယ်အိုတွေနဲ့ ကလေးတွေပါမကျန် ရဲတွေက အချိန်အခါမရွေး ခေါ်ယူစစ်ဆေးတဲ့ အကြောင်းအရာတွေကိုလည်း မှတ်တမ်းတွေမှာ တွေ့ရပါတယ်။

    ရှင်ကျန်းက ၀ီဂါလူ့အဖွဲ့အစည်းအားလုံးနီးပါး နေ့ညမရွေး ဒီလို ခေါ်ယူစစ်ဆေး၊ ဓာတ်ပုံရိုက်ခံရတာတွေ ရှိခဲ့ပြီး၊ ဓာတ်ပုံဖိုင် နာမည်တွေဟာ အကျဥ်းစခန်းက ဖိုင်နာမည်တွေရဲ့ ပုံစံအတိုင်း ဖြစ်နေတာကြောင့် အလိုအလျောက် မျက်နှာစောင့်ကြည့် ထောက်လှမ်းတဲ့စနစ်အတွက် မှတ်တမ်းရယူတာလို့ ပညာရှင်တွေက သုံးသပ်ပါတယ်။

    ၂၀၁၈ ခုနှစ်က အဲဒီလိုဓာတ်ပုံရိုက်ပြီး ၅ လအကြာမှာ အာဏာပိုင်တွေက တူရ်ဆန် မီမီတင်မီနဲ့ ဇနီးဖြစ်သူ အာရှီဂူလ် တူတူရ်ဂ်ဟွန်တို့ကို လာဖမ်းသွားပါတယ်။ လွန်ခဲ့တဲ့ ၆ နှစ်အရင်က တရားတစ်ပုဒ် နားထောင်တယ်ဆိုတဲ့ စွဲချက်နဲ့ပါ။

    ၁၀ နှစ်နဲ့ ၆ နှစ်အရွယ် သမီးနှစ်ယောက် အပြင်မှာကျန်တယ်လို့ မှတ်တမ်းတွေမှာ ဖော်ပြပြီး ဒီကလေးနှစ်ဦး ဘယ်လိုဖြစ်သွားလည်းဆိုတာ မပါတော့ပါဘူး။

    တရုတ်အာဏာပိုင်တွေဟာ ရှင်ကျန်းမှာ အကျဥ်းစခန်းတွေ တည်ဆောက်တဲ့ တစ်ချိန်တည်းမှာပဲ ဘော်ဒါကျောင်းတွေလည်း တစ်ဖက်မှာ တည်ဆောက်ခဲ့ပြီး ကလေး ၂ ယောက်ကို အဲဒီကျောင်းတွေဆီ ပို့လိုက်တယ်လို့ ယူဆနိုင်ပါတယ်။

    အကျဥ်းစခန်းထဲ ရောက်လာတဲ့သူတွေရဲ့ သားသမီးတွေဟာ ဒီဘော်ဒါကျောင်းတွေမှာ နှစ်ရှည်သွားနေရပြီး မိဘအစုံအလင်ရှိပေမယ့်လည်း အာဏာပိုင်တွေက အနည်းဆုံး တစ်ပတ် ၂ ရက် အဲဒီဘော်ဒါကျောင်းတွေမှာ ကလေးတွေကို အဓမ္မ တက်ခိုင်းလေ့ရှိပါတယ်။

    ရရှိခဲ့တဲ့ ရဲမှတ်တမ်းက ကလေးငယ်တွေရဲ့ ဓာတ်ပုံတော်တော်များများ ပုံစံတူခေါင်းရိတ်ထားတာတွေ့ရပြီး ဒါဟာ အစိုးရကဖွင့်ထားတဲ့ ဘော်ဒါကျောင်းတွေကို သွားတက်ရတယ်ဆိုတဲ့ လက္ခဏာ ဖြစ်ပါတယ်။

    တရုတ်အစိုးရမှတ်တမ်းတွေမှာ ၀ီဂါတွေရဲ့ ‘ဇာတိကိုဖျောက်ပစ်၊ မျိုးဆက်ကိုဖြတ်ပစ်’ လို့ တရား၀င် သုံးနှုန်းညွှန်ကြားထားပြီး ဓာတ်ပုံတွေနဲ့ တစ်ခြားအချက်အလက်တွေက ဒီမူ၀ါဒနဲ့ပတ်သက်တဲ့ ခိုင်မာတဲ့ သက်သေအထောက်အထားတွေပဲ ဖြစ်ပါတယ်။

    ဘယ်လောက်များလဲ

    ဟက်ကာတွေရရှိခဲ့တဲ့ အခုအချက်အလက်တွေထဲမှာ ရှင်ကျန်းက ၀ီဂါ ဘယ်လောက်များများကို အကျဥ်းစခန်းထဲထည့်ပြီး နှိပ်စက်နေလဲဆိုတာကိုပါ ရှင်းရှင်းလင်းလင်း သိလိုက်ရပါတယ်။

    မှတ်တမ်းတော်တော်များများဟာ ပြည်နယ်တောင်ပိုင်း တရုတ်လို ရှူဖူလိုခေါ်တဲ့ ကိုနာရှီဟာခရိုင်က ဖြစ်ပါတယ်။

    မှတ်တမ်းတွေကို လေ့လာမှုအရ ၂၀၁၇ ခုနှစ်ကနေ ၂၀၁၈ ခုနှစ်အတွင်း ကိုနာရှီဟာခရိုင်က အရွယ်ရောက်ပြီးသူတွေရဲ့ ၁၂ ရာခိုင်နှုန်းဖြစ်တဲ့ ၂၂၇၆၂ ဦး အကျဥ်းစခန်းထဲထည့်ခံရတာ၊ ဒါမှမဟုတ် ထောင်ချခံရတာတွေ ရှိတာကို တွေ့ရပါတယ်။

    ဒီပမာဏအတိုင်း ရှင်းကျန်းပြည်နယ်တစ်ခုလုံးကို ပျမ်းမျှချတွက်ရင် ၀ီဂါနဲ့ အခြားတူရကီစကားပြော လူနည်းစု စုစုပေါင်း ၁.၂ သန်းလောက် အကျဥ်းစခန်းထဲ ရောက်နေတဲ့ အနေအထားပါ။ ပညာရှင်တွေရဲ့ အရင်က တွက်ချက်မှုကလည်း အဲဒီလောက်၀န်းကျင်ရှိနေပြီး တရုတ်အစိုးရက ဒီပမာဏကို ငြင်းပါတယ်။

    တရုတ်ခေါင်းဆောင်တွေရဲ့ သဘောထား

    ရရှိခဲ့တဲ အထောက်အထားတွေထဲမှာ တရုတ်ခေါင်းဆောင်တွေက ၀ီဂါတွေအပေါ်ထားရှိတဲ့ မုန်းတီးစိတ်၊ ဖိနှိပ်ညှင်းပမ်းလိုစိတ်တွေကိုလည်း အထင်းသား တွေ့ရပါတယ်။

    တရုတ်ပြည်သူ့လုံခြုံရေး၀န်ကြီး ကျောက်ခချီရဲ့ ၂၀၁၈ ခုနှစ် ဇွန်လ ရှင်ကျန်းကိုလာတဲ့ ခရီးစဥ်မှာ ပြည်နယ်တောင်ပိုင်းက အနည်းဆုံး ၀ီဂါ ၂ သန်းလောက် အစွန်းရောက်အတွေးအခေါ်တွေ ကူးစက်နေတယ်လို့ ပြောခဲ့ကြောင်း လျှို့၀ှက်ဖိုင်ထဲမှာ မှတ်တမ်းတင်ထားပါတယ်။

    ဒီလူ ၂ သန်းကို ဖမ်းဆီးထိန်းသိမ်းနိုင်ရေး အဆောက်အဦးတွေ ဆောက်ပေးတာ၊ ရန်ပုံငွေထုတ်ပေးတာတွေအတွက် သမ္မတ ရှီကျင့်ဖျင်ကို ကျေးဇူးတင်တယ်လို့လည်း သူက ထည့်ပြောပါတယ်။

    သိပ်မကြာခင်အချိန်ကအထိ ရှင်ကျန်းကွန်မြူနစ်ပါတီ အတွင်းရေးမှုးအဖြစ် တာ၀န်ထမ်းဆောင်ခဲ့တဲ့ ချန်ကျန်ဂိုရဲ့ ၂၀၁၇ ခုနှစ်က စစ်တပ်နဲ့ ရဲတပ်ဖွဲ့ကိုပြောတဲ့ မိန့်ခွန်းမှာလည်း ၀ီဂါတွေကို အကျဥ်းစခန်းထဲထည့်ပြီး ပုံစံပေးတာဟာ ၅ နှစ်လောက်နဲ့ မလုံလောက်ကြောင်း၊ ၀ီဂါတွေဟာ ပြဿနာကောင်တွေသာဖြစ်ကြောင်း ထည့်သွင်းပြောဆိုခဲ့တာကို လျှို့၀ှက်မှတ်တမ်းမှာ တွေ့ရပါတယ်။

    တရုတ်ရဲ့ တုန့်ပြန်မှု

    အချက်အလက်တွေကို ဆန်းစစ်အတည်ပြုခဲ့တဲ့ မီဒီယာအဖွဲ့အစည်းတွေက မေးမြန်းမှုကို အမေရိကန်ပြည်ထောင်စုမှာရှိတဲ့ တရုတ်သံရုံးက တုန့်ပြန်ခဲ့ပါတယ်။

    ရှင်ကျန်းမှာ သူတို့လုပ်ဆောင်နေတာတွေဟာ အစွန်းရောက်၀ါကို တိုက်ဖျက်ဖို့ဖြစ်ပြီး၊ ဒေသတွင်းမှာ တည်ငြိမ်အေးချမ်းမှုနဲ့ စီးပွားရေး ဖွံ့ဖြိုးတိုးတက်မှုကို ခံစားနေရတယ်လို့ သံရုံးရဲ့ ထုတ်ပြန်ချက်မှာ ဖော်ပြထားပါတယ်။

    ရှင်ကျန်းနဲ့ပတ်သက်ပြီး ကမ္ဘာကြီးက ပြောဆိုနေတာတွေဟာ အလိမ်အညာတွေ ၀ါဒဖြန်မှုတွေသာဖြစ်တယ်လို့ သံရုံးကဆိုပြီး၊ ပေါက်ကြားလာတဲ့ အထောက်အထားတွေကို ရှင်းလင်းတာမျိုး မရှိခဲ့ပါဘူး။

    Ref: BBC

  • ဝီဂါနှင့် အခြားလူနည်းစုများကို တရုတ်အစိုးရက လုပ်အားခေါင်းပုံဖြတ်မှု အကြီးအကျယ် လုပ်ဆောင်နေ

    ဝီဂါနှင့် အခြားလူနည်းစုများကို တရုတ်အစိုးရက လုပ်အားခေါင်းပုံဖြတ်မှု အကြီးအကျယ် လုပ်ဆောင်နေ

    ဖေဖော်ဝါရီ ၁၂၊ ၂၀၂၂
    M-Media

    -တရုတ်အစိုးရဟာ နိုင်ငံအနောက်ပိုင်း ရှင်းကျန်းပြည်နယ်က ဝီဂါနဲ့ အခြားလူနည်းစုတွေအပေါ် လုပ်အားခေါင်းပုံဖြတ်မှု မူဝါဒတွေ ဆက်လက်ကျင့်သုံးနေတယ်လို့ နိုင်ငံတကာ အလုပ်သမားအဖွဲ့ (ILO) က ပြောကြားလိုက်ပြီး နိုင်ငံတကာစံနှုန်းတွေအရ အလုပ်ခိုင်းစေဖို့လည်း တိုက်တွန်းလိုက်ပါတယ်။

    ချိုးဖောက်မှုတွေမှာ အဓမ္မလုပ်အား ခိုင်းစေတာ၊ မဖြစ်နိုင်တဲ့ ကုန်ထုတ်လုပ်မှုစံချိန်တွေ သတ်မှတ်တာ၊ အလုပ်ချိန် အများအပြားခိုင်းစေတာတွေ ပါဝင်တယ်လို့ Application of International Labour Standards ခေါင်းစဉ်နဲ့ ထုတ်ပြန်တဲ့ စာမျက်နှာ ၈၇၀ ပါ အစီရင်ခံစာမှာ ILO က ဖော်ပြထားပါတယ်။

    ရှင်ကျန်းပြည်နယ်က လူနည်းစုတွေဖြစ်တဲ့ ဝီဂါနဲ့ အခြား တူရကီမျိုးနွယ် စုစုပေါင်း ၁၃ သန်းလောက်ဟာ လူမျိုး၊ ဘာသာတရားတွေကြောင့် တရုတ်အစိုးရရဲ့ စနစ်တကျ ပစ်မှတ်ထား ခေါင်းပုံဖြတ်အမြတ်ထုတ်မှုကို ခံနေရ​တယ်လို့ အစီရင်ခံဏာမှာ ဖော်ပြထားပါတယ်။

    ဒီချိုးဖောက်မှုတွေဟာ ဆက်လက်ဖြစ်ပွားနေပြီး တရုတ်အစိုးရက ဆင်းရဲမွဲတေမှုလျှော့ချရေး၊ အသက်မွေးဝမ်းကြောင်း သင်တန်း၊ အလုပ်မှတစ်ဆင့် အသိပညာပေးရေး၊ အစွန်းရောက်မှုတိုက်ဖျက်ရေး စတဲ့ ခေါင်းစဉ်အမျိုးမျိုး တပ်ထားတယ်လို့ ILO ရဲ့ လေ့လာဆန်းစစ်မှုမှာ တွေ့ရှိခဲ့ရပါတယ်။

    တရုတ်ရဲ့ လုပ်အားခေါင်းပုံဖြတ်မှု အဓိကစီမံကိန်းက အကျဉ်းစခန်းတွေဖြစ်ပါတယ်။ ရှင်ကျန်းပြည်နယ်တစ်၀ိုက် အကျဉ်းစခန်းကွန်ယက်ကို တည်ဆောက်ထားပြီး ဝီဂါနဲ့ အခြားလူမျိုးစုငယ်​ ၁.၈ သန်းလောက်ကို ထိန်းသိမ်းကာ အဓမ္မလုပ်အားခိုင်းစေကာ၊ လုပ်ငန်းခွင်ဆိုင်ရာ ချိုးဖောက်မှုတွေဟာ ဒီအကျဉ်းစခန်းတွေမှာရော နိုင်ငံတစ်ဝှမ်းက လုပ်ငန်းခွင်တွေမှာပါ တွေ့ရတယ်လို့ အစီရင်ခံစာမှာ ထည့်သွင်းဖော်ပြထားပါတယ်။

    အကျဉ်းစခန်းတွေမှာ အလွန်အမင်းခက်ခဲကြမ်းတမ်းအောင် လုပ်ဆောင်တာ၊ လွတ်လပ်စွာသွားလာလှုပ်ရှားမှု ပိတ်ပင်တာ၊ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ညှင်းပမ်းတာတွေလည်း ရှိပါတယ်။ အကျဉ်းစခန်းထဲကလူတွေဟာ များသောအားဖြင့် ဝါဂွမ်း ရိတ်သိမ်းရေးလုပ်ငန်း၊ အဝတ်အထည်နဲ့ ဖိနပ်ထုတ်လုပ်ရေးလုပ်ငန်းတွေမှာ အဓမ္မ လုပ်အားခိုင်းစေခံရတာ ဖြစ်ပါတယ်။

    တရုတ်နိုင်ငံရဲ့ တစ်ခြားဒေသတွေမှာလည်း ဝီဂါအလုပ်သမားတွေဟာ သီးခြားနေထိုင်၊ အလုပ်လုပ်ရတာ၊ တရုတ်စာကို မဖြစ်မနေ သင်ရတာ၊ ယဉ်ကျေးမှုနဲ့ ဘာသာရေးဆိုင်ရာ ထုံးတမ်းတွေကျင့်သုံးခွင့်မရတာ စတဲ့ ချိုးဖောက်မှုဒဏ်တွေ ဆက်လက်ခံစားနေရတာကို ILO ရဲ့ လေ့လာဆန်းစစ်မှုမှာ တွေ့ခဲ့ရပါတယ်။ ဝီဂါအလုပ်သမားတွေဟာ တရုတ်အစိုးရက သတ်မှတ်ထားတဲ့ အနိမ့်ဆုံးလုပ်ခထက် ပိုနည်းတဲ့ လုပ်ခကိုသာ ရရှိကြပါတယ်။

    တရုတ်အစိုးရက ILO ရဲ့ ဒီတွေ့ရှိချက်တွေဟာ မဟုတ်မှန်ဘူးလို့ တုန့်ပြန်ခဲ့ပါတယ်။

    တရုတ်စကား သင်ခိုင်းတာဟာ ဝီဂါတွေရဲ့ ဘာသာစကားကျွမ်းကျင်မှု တိုးတက်စေဖို့နဲ့ အလုပ်အကိုင်အခွင့်အလမ်း ပိုမိုရရှိစေဖို့ဖြစ်ပြီး၊ အနိမ့်ဆုံးလုပ်ခထက် လျှော့ပြီးရတယ်ဆိုတာကလည်း လုံး၀အခြေအမြစ်မရှိဘူးလို့ ဆိုပါတယ်။

    ရှင်ကျန်းပြည်နယ်အစိုးရအဖွဲ့က မိမိတို့မှာ အလုပ်သမားအခွင့်အရေးကို ကာကွယ်ရေးပြီး အလုပ်သမားတွေ တိုင်ကြားလာတာကို ဖြေရှင်းပေးမယ့် မူဝါဒမျိုး ရှိနေတယ်လို့ တုန့်ပြန်ပြောကြားခဲ့ပါတယ်။

    အနိမ့်ဆုံးလုပ်အားခ အပြည့်အ၀​ပေးရမယ်ဆိုတဲ့ အချက်ကို လုပ်ငန်းရှင်တွေက လိုက်နာမှုရှိလားဆိုတာ စုံစမ်းစစ်ဆေးသွားမယ်လို့ တရုတ်အစိုးရက ထည့်သွင်းပြောဆိုခဲ့ပြီး လုပ်ငန်းရှင်တွေအနေနဲ့ ဒီသတ်မှတ်ချက်ကို လိုက်နာဖို့ တိုက်တွန်းခဲ့ပါတယ်။

    Ref: Reuters