News @ M-Media

Tag: Laliga2020-21

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဒီဇင်ဘာ ၂၃၊ ၂၀၂၀
    M-Media

    ဘရာဇီးလ်ဂန္တဝင်ကစားသမား ပီလီ၏ စံချိန်တစ်ခုကို မက်ဆီချိုးဖျက်

    မနေ့က ရီးယဲလ် ဗယ်လာဒိုလစ်ကို ၃ ဂိုးပြတ်နဲ့ အနိုင်ရတဲ့ပွဲမှာ ၁ ဂိုးသွင်းပေးခဲ့တဲ့ မက်ဆီဟာ ကလပ်အသင်းတစ်ခုတည်းအတွက် ဂိုးအများဆုံးသွင်းထားတဲ့ ဘရာဇီးလ်ဂန္တဝင်ကစားသမား ပီလီရဲ့စံချိန်ကို ချိုးဖျက်နိုင်ခဲ့ပြီ ဖြစ်ပါတယ်။

    ပီလီဟာ ဆန်းတို့စ်အသင်းမှာ ၁၉၅၆ ခုနှစ်ကနေ ၁၉၇၄ ခုနှစ်အထိ ၁၉ ရာသီကစားခဲ့စဉ်အတွင်း ၆၄၃ ဂိုး သွင်းယူခဲ့ပြီး မက်ဆီကတော့ ၂၀၀၅ ခုနှစ်ကနေစပြီးအခုအချိန်အထိ ဘာစီလိုနာအတွက် ၆၄၄ ဂိုး သွင်းထားနိုင်တာ ဖြစ်ပါတယ်။

    မက်ဆီဟာ ဩဂုတ်လတုန်းက အသင်းကထွက်ဖို့ ကြိုးစားခဲ့ပါသေးတယ်။ နည်းပြ ရော်နယ်ဒိုကိုးမန်းက မက်ဆီဟာ အသင်းမှာ ပျော်ရွှင်နေပြီး ဒီလို ဖန်တီးမှုကောင်းတဲ့ ကစားသမားမျိုးဟာ အသင်းအတွက် အရေးပါတယ်လို့ မနေ့ကပွဲအပြီးမှာ ပြောကြားခဲ့ပါတယ်။

    ဥက္ကဌဟောင်းကို ရာဇဝတ်မှုဖြင့် ဖီဖာက တရားစွဲ

    ဇူးရစ်ချ်မြို့က အရှုံးပြခဲ့တဲ့ ဘောလုံးပြတိုက်မှာ စီမံခန့်ခွဲမှုအမှားတွေရှိတယ်လို့ဆိုကာ ဥက္ကဌဟောင်း ဆပ်ဘလတ္တာကို ကမ္ဘာ့ဘောလုံးအဖွဲ့ချုပ် ဖီဖာက ရာဇဝတ်မှုနဲ့ ဇူးရစ်ချ်မြို့မှာ တိုင်ကြားလိုက်ပါတယ်။

    ၂၀၁၆ ခုနှစ် ဖေဖော်ဝါရီလက ဖွင့်လှစ်ခဲ့တဲ့ ဒီပြတိုက်အတွက် ဘလတ္တာလက်ထက်က ဒေါ်လာ သန်း ၁၄၀ သုံးစွဲခဲ့ရာမှာ မလျော်မကန်သုံးမှုတွေ ပါခဲ့တယ်လို့ လက်ရှိ ဖီဖာ ဘဏ္ဍာရေးအဖွဲ့က ပြောပါတယ်။

    ဒီပြတိုက်ဟာ စဖွင့်တဲ့နှစ်မှာပဲ ဒေါ်လာ သန်း ၅၀ ရှုံးခဲ့ပြီး နောက်ပိုင်းမှာ ပိတ်ဖို့အထိတောင် စီစဉ်ခဲ့တာပါ။ ဘလတ္တာရဲ့ရှေ့နေကတော့ ဖီဖာရဲ့ ဒီစွဲချက်ဟာ အခြေအမြစ်မရှိဘူးလို့ တုန့်ပြန်ပြောကြားခဲ့ပါတယ်။

    အသက် ၈၄ နှစ်အရွယ် ရှိပြီဖြစ်တဲ့ ဘလတ္တာဟာ UEFA ဥက္ကဌ မိုက်ကယ် ပလာတီနီကို ဒေါ်လာ ၂.၂၄ သန်း ပေးမှုမှာ မသမာမှုရှိခဲ့ကြောင်း တွေ့ရပြီးနောက် ဘောလုံးလောကကနေ ၆ နှစ် ပိတ်ပင်ခံထားရပါတယ်။

    စီးရီးအေ ပထမဆုံးအရှုံးအတွက် ပီယာလိုက ကစားသမားများကို အပြစ်တင်

    ကစားသမားတွေဟာ ပွဲအပေါ် အာရုံစူးစိုက်မှုမရှိဘူးလို့ ဂျူဗင်တပ်စ်နည်းပြ ​အန်ဒရီယာ ပီယာလိုက ဝေဖန်ပြောကြားလိုက်ပါတယ်။

    ဂျူဗင်တစ်ပ်ဟာ မနေ့က ဖီအိုရင်တီးနားကို အိမ်ကွင်းမှာ ၃ ဂိုးပြတ်နဲ့ အရှက်တကွဲရှုံးနိမ့်ခဲ့ပြီး ဒါဟာ အခုနှစ် စီးရီးအေ ပထမဆုံး ရှုံးပွဲဖြစ်သလို၊ ​၂၀၁၁ ခုနှစ်နောက်ပိုင်း အိမ်ကွင်း အဆိုးဝါးဆုံး ရှုံးနိမ့်မှုပါ။

    ပီယာလိုကတော့ ကစားသမားတွေဟာ လာတော့မယ့် ခရစ္စမတ်အားလပ်ရက်ကိုပဲ အာရုံရောက်နေပြီး ရှုံးနိမ့်မှုအတွက် မိမိတို့မှာသာ အပြစ်ရှိတယ်လို့ ဆိုပါတယ်။

    Ref: Goal, BBC

  • သောကြာနေ့​ ဘောလုံးသတင်းများ

    သောကြာနေ့​ ဘောလုံးသတင်းများ

    အောက်တိုဘာ ၉၊ ၂၀၂၀
    M-Media

    ဘာစီလိုနာမှ နောက်ဆုံးနေ့ရက်များကို ဆွာရက်ဇ်ဖွင့်ဟ

    နောက်ဆုံးနေ့ရက်တွေမှာ ဘာစီလိုနာအသင်းရဲ့ ပြုမူဆက်ဆံပုံတွေအတွက် မျက်ရည်ကျခဲ့ရတယ်လို့ အက်သလက်တီကိုမက်ဒရစ် တိုက်စစ်မှူး ဆွာရက်ဇ်က ပြောကြားလိုက်ပါတယ်။

    အသက် ၃၃ နှစ်အရွယ် ဆွာရက်ဇ်ဟာ ပြီးခဲ့တဲ့လက အက်သလက်တီကိုအသင်းကို ပြောင်းရွှေ့ကာ ၃ ပွဲကစား ၂ ဂိုး သွင်းယူထားနိုင်ပါတယ်။

    ဘာစီလိုနာနဲ့ နောက်ဆုံးရက်တွေက လေ့ကျင့်ကွင်းမှာ ဖယ်ထုတ်ခံရတာလို ကိစ္စမျိုးတွေရှိခဲ့ပြီး အင်မတန် ခက်ခဲနာကျင်စရာ နေ့ရက်တွေဖြစ်ခဲ့ကြောင်း၊ မက်ဆီလည်း မိမိလို ခံစားဖူးတဲ့အတွက် မိမိကို စာနာထောက်ခံခြင်းဖြစ်ကြောင်း ဆွာရက်ဇ်က ထည့်သွင်းပြောဆိုခဲ့ပါတယ်။

    ဆွာရက်စ်ဇ်ဟာ ဘာစီလိုနာမှာ ၆ နှစ်တာကစားပြီး ၁၉၅ ဂိုးသွင်းကာ အသင်းသမိုင်းတစ်လျှောက် တတိယဂိုးအများဆုံးသွင်းသူအဖြစ် မှတ်တမ်းဝင်ခဲ့ပါတယ်။

    ရီးယဲလ်တွင်ကစားရန်မှာ အိပ်မက်ဟု ပေါ့ဘာပြော

    လာလီဂါက ရီးယဲလ်မက်ဒရစ်အသင်းမှာ ကစားရဖို့အတွက် မိမိအတွက် စိတ်ကူးအိပ်မက်ဖြစ်တယ်လို့ မန်ယူကွင်းလယ်လူ ပေါလ်ပေါ့ဘာက ပြောကြားလိုက်ပါတယ်။

    ၂၀၁၆ ခုနှစ်က ပေါင် ၈၉ သန်းနဲ့ မန်ယူကိုရောက်လာတဲ့ အသက် ၂၇ နှစ်အရွယ် ပေါ့ဘာဟာ အသင်းကနေ ထွက်ခွာတော့မယ်လို့ သတင်းထွက်​နေတာပါ။

    လာမယ့်နွေရာသီမှာ သက်တမ်းကုန်မှာဖြစ်ပြီး ၂၀၂၂ ခုနှစ်အထိ ဆက်ထိန်းထားဖို့လည်း မန်ယူမှာ အခွင့်အရေး ရှိနေပါတယ်။

    ပေါ့ဘာက သက်တမ်းတိုးမယ့်ကိစ္စအတွက် အသင်းနဲ့ ဆွေးနွေးထားတာမျိုး မရှိသေးကြောင်း၊ လက်ရှိ မန်ယူကစားသမားဖြစ်နေတဲ့အတွက် ​အသင်းအတွက်ပဲ အာရုံစိုက်ထားကြောင်း၊ အသင်းကို ချစ်မြတ်နိုးပြီး အကောင်းဆုံး ပေးဆပ်သွားမှာဖြစ်ကြောင်း ထည့်သွင်းပြောဆိုခဲ့ပါတယ်။

    အိုဇေးလ်ကို ဇန်နဝါရီမတိုင်ခင် စာချုပ်အဆုံးသတ်ရန် အာဆင်နယ် စီစဉ်နေ

    အာဆင်နယ်အသင်းဟာ တစ်ချိန်က အားထားရတဲ့ ကွင်းလယ်လူ မီဆုအိုဇေးလ်ရဲ့ စာချုပ်ကို ဇန်နဝါရီအပြောင်းအရွှေ့မဖွင့်ခင် အဆုံးသတ်ဖို့ စီစဉ်နေတယ်လို့ သတင်းတွေ ထွက်လာပါတယ်။

    တစ်ပတ်ကို ပေါင် ၃ သိန်းခွဲရနေတဲ့ အိုဇေးလ်ဟာ အခုရာသီကုန်မှာ စာချုပ်ပြည့်မှာပါ။ စာချုပ်အဆုံးသတ်ဖို့ကိစ္စက ပြီးခဲ့တဲ့ ၂ ပတ်အတွင်း အသင်းဖက်က ကြိုးပမ်းမှုတွေရှိပေမယ့် အိုဇေးလ်က ရာသီကုန်အထိရမယ့်လစာ ပေါင် ၁၃ သန်းစလုံးရမှ သဘောတူမယ်လို့ ပြောကြားခဲ့ပါတယ်။

    အာဆင်နယ်က ဇန်နဝါရီမတိုင်ခင် နောက်ထပ်နည်းလမ်းတစ်မျိုးနဲ့ ကြိုးပမ်းဖို့ ရှိနေပါတယ်။

    အသက် ၃၁ နှစ်အရွယ်အိုဇေးလ်ဟာ အသင်းမှာ မရွေးချယ်ခံရတာ အတော်ကြာပြီဖြစ်ပြီး ပြီးခဲ့တဲ့တစ်ပတ်က ယူရိုပါလိဂ်အတွက် ယူအီးအက်ဖ်အေကိုတင်သွင်းတဲ့ ၂၅ ဦး လူစာရင်းမှာလည်း သူ မပါဝင်ပါဘူး။

    Ref: Daily Mail, BBC

  • စနေနေ့ဘောလုံးသတင်းများ

    စနေနေ့ဘောလုံးသတင်းများ

    စက်တင်ဘာ ၂၆၊ ၂၀၂၀
    M-Media

    ဆွာရက်ဇ်ထွက်သွားသည့်ကိစ္စအတွက် ဘာစီလိုနာကို မက်ဆီဝေဖန်

    တိုက်စစ်မှူးဆွာရက်ဇ်ဟာ အသင်းကနေ မထိုက်တန်စွာ ထွက်ခွာခဲ့ရတယ်လို့ ဘာစီလိုနာတိုက်စစ်မှူး လီယွန်နယ် မက်ဆီက ဝေဖန်ပြောကြားလိုက်ပါတယ်။ နည်းပြသစ် ရော်နယ်ကိုးမန်းက သူ့ရဲ့ အနာဂတ်အစီအစဉ်မှာ မထည့်သွင်းဘူးလို့ ပြောတဲ့အတွက် ထွက်ခွာခဲ့ရတာဖြစ်တယ်လို့ ဆွာရက်ဇ်က သတင်းစာရှင်းလင်းပွဲမှာ မျက်ရည်လည်ရွဲနဲ့ ပြောကြားခဲ့ပါတယ်။ မက်ဆီက ဆွာရက်စ်ဟာ အသင်းရဲ့သမိုင်းမှာ အရေးပါတဲ့ ကစားသမားတစ်ယောက်ဖြစ်ပြီး အသင်းက ဒီလိုမဆက်ဆံသင့်ကြောင်း၊ ဒီလိုအခြေအနေ ဖြစ်လာတဲ့အတွက်လည်း မအံ့ဩမိကြောင်း မနေ့က Instagram စာမျက်နှာမှာ ရေးသားခဲ့ပါတယ်။ မက်ဆီဟာ အသင်းကနေ ထွက်ခွာခွင့်နဲ့ပတ်သက်လို့ ပြီးခဲ့လမှာ အသင်းဥက္ကဌ ဘာတိုမြူနဲ့ အခြေအတင်ဖြစ်ခဲ့ပြီး နောက်ဆုံး ဘာစီလိုနာမှာ ဆက်ရှိ​​ခဲ့ရပါတယ်။

    ဝုလ်ဗ်နှင့် ဝက်စ်ဟမ်းတို့၏ Covid-19 ရလဒ်များ အချိန်မီမသိရ

    ကစားသမားတွေနဲ့ ဝန်ထမ်းတွေ ကိုဗစ်စစ်ဆေးချက်အဖြေ အချိန်မီမရတဲ့အတွက် စိတ်ပျက်ရတယ်လို့ ပရီးမီးယားလိဂ်ကလပ် ဝုလ်ဗ်နဲ့ အ၀က်စ်ဟမ်းအသင်းတို့က ပြောကြားလိုက်ပါတယ်။ ဓာတ်ခွဲခန်းတွေမှာ အလုပ်များနေတာကြောင့် ရလဒ်တွေ မရသေးတာပါ။ ဝုလ်ဗ်နည်းပြ နူနို အက်စ်ပီရီတိုက ဒါကိစ္စကြောင့် တနင်္ဂနွေနေ့ပွဲအတွက် ပြင်ဆင်ရာမှာ အလွန်အမင်းဒုက္ခရောက်ကြောင်း ပြောကြားခဲ့သလို တနင်္လာနဲ့ ဗုဒ္ဓဟူးနေ့မှာ ပွဲတွေကစားရဖို့ရှိတဲ့ ဝက်စ်ဟမ်းအသင်းရဲ့ လက်ထောက်နည်းပြ အလန် အာရ်ဗင်းကလည်း ရလဒ်မသိဘဲ ကစားရမယ့်အခြေအနေမျိုး ရောက်နေတယ်လို့ ဆိုပါတယ်။ ဝက်စ်ဟမ်းအသင်းက နည်းပြ မိုယက်စ်၊ နောက်ခံလူ ဒီအုပ်၊ ကွင်းလယ်လူ ကူလန်တို့ဟာ ကိုဗစ်ပိုးတွေ့တဲ့အတွက် သီးသန့်နေထိုင် ကုသနေရပါတယ်။

    အာဆင်နယ်တွင်ဆက်ရှိနေသည့် အကြောင်းအရင်းနှစ်ခုကို အူဘာမေယန် ဖွင့်ဟ

    အသင်းပြောင်းရမယ့် အခွင့်ရေးတွေကို ပယ်ချက အာဆင်နယ်မှာဆက်ရှိနေတဲ့ အဓိကအကြောင်းအရင်း ၂ ခု ရှိတယ်လို့ အာဆင်နယ်တိုက်စစ်မှူး အူဘာမေယန်က ပြောကြားလိုက်ပါတယ်။ အသင်းနဲ့ စာချုပ်တစ်နှစ်သာကျန်တော့တဲ့ အသက် ၃၁ နှစ်အရွယ် အူဘာမေယန်ဟာ နွေရာသီအပြောင်းအရွှေ့ကာလတွင်း အသင်းကနေ ထွက်ခွာမယ်လို့ သတင်းထွက်ခဲ့ပြီး လာလီဂါက ဘာစီလိုနာ၊ စီးရီးအေက အင်တာမီလန်တို့လို အသင်းကြီးတွေက ခေါ်ယူဖို့ စိတ်ဝင်စားခဲ့ပါတယ်။ အူဘာမေယန်က အသင်းအတွက် ဗျူဟာသစ်ဖန်တီးကာ အသင်းတိုးတက်အောင် ဆောင်ရွက်ပေးခဲ့တဲ့ နည်းပြ မီခေလ်းအာတီတာ၊ အသင်းနဲ့ မိမိအပေါ်ထားရှိတဲ့ ပရိတ်သတ်တွေရဲ့ ချစ်ခြင်းမေတ္တာတွေကြောင့် အသင်းမှာ ဒီလို ဆက်ရှိနေတာ ဖြစ်တယ်လို့ ဆိုပါတယ်။

    Ref: BBC, Goal

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    စက်တင်ဘာ ၁၈၊ ၂၀၂၀
    M-Media

    Social Distancing နှင့်ကစားသည့် ဘောလုံးအသင်း ၃၇ ဂိုးပြတ်ရှုံး

    ဂျာမနီ အပျော်တမ်းလိဂ်တစ်ခုက Ripdorf အသင်းဟာ ကိုဗစ်ကိုကြောက်ပြီး ခပ်ခွာခွာစည်းမျဉ်း (Social Distancing) နဲ့ ကစားတာကြောင့် ပြိုင်ဘက် SV Holdenstedt II အသင်းကို ၃၇ ဂိုး ဂိုးမရှိနဲ့ ရှုံးနိမ့်ခဲ့ပါတယ်။

    SV Holdenstedt II အသင်းဟာ ပြီးခဲ့တဲ့တစ်ပတ်က ကိုဗစ်ပိုးတွေ့သူတစ်ဦးနဲ့ ထိတွေ့မှုရှိခဲ့တာပါ။ ပြိုင်ဘက်တစ်သင်းလုံး ကိုဗစ်စစ်ပြီး ပိုးမရှိပေမယ့် ၁၄ ရက်မပြည့်သေးတဲ့အတွက် စိတ်ချရတဲ့အခြေအနေမျိုးဖြစ်နေတာကြောင့် Socail Distancing နဲ့ကစားတာလို့ Ripdorf အသင်းက ထုတ်ပြန်ပါတယ်။

    ပွဲကိုရွှေ့ဆိုင်းဖို့ တောင်းဆိုခဲ့ပေမယ့် ပြိုင်ပွဲကျင်းပရေးအဖွဲ့က လက်မခံဘဲ ပွဲမကစားရင်လည်း ဒဏ်​ငွေဆောင်ရမှာကြောင့် ကွင်းအတွင်းရှိရမယ့် အနည်းဆုံး ကစားသမားပမာဏ ၇ ဦးနဲ့ Ripdorf က ပွဲကို ကစားခဲ့တာ ဖြစ်ပါတယ်။

    ဘာစီလိုနာထက် ရီးယဲလ်မက်ဒရစ်ကို ကိုင်ချင်သည်ဟု ပိုချက်တီနို ဖွင့်ဟ

    ဘာစီလိုနာက ဆက်သွယ်လာတယ်ဆိုတဲ့ သတင်းတွေကို စပါးနည်းပြဟောင်း ပိုချက်တီနိုက ငြင်းဆိုခဲ့ပြီး လာလီဂါမှာဆိုရင် ရီးယဲလ်မက်ဒရစ်အသင်းကို နည်းပြခွင့်ရရေးဟာ သူ့ရဲ့အိပ်မက် ဖြစ်တယ်လို့ ပြောဆိုလိုက်ပါတယ်။

    ဖလားလက်မဲ့ရာသီကို ကြုံရတဲ့အတွက် နည်းပြ စတီယန်ကို ထုတ်ပယ်ခဲ့ပြီးနောက် ဘာစီလိုနာအသင်းဟာ ပိုချက်တီနိုကို ချိတ်နေတယ်ဆိုပြီး သတင်းတွေ ထွက်နေတာပါ။

    ပြင်သစ်လိဂ်ဝမ်းက ပီအက်စ်ဂျီနဲ့ မိုနာကို၊ စီးရီးအေက ဂျူဗင်တပ်စ်နဲ့ အင်တာမီလန်၊ ပေါ်တူဂီက ဘင်ဖီကာ စတဲ့ အသင်းတွေက ဆက်သွယ်နေတယ်ဆိုတဲ့ သတင်းတွေကိုလည်း ပိုချက်တီနိုက ငြင်းပါတယ်။

    ၂၀၁၈ ခုနှစ်က ပိုချက်တီနိုကို ရီးယဲလ်က ခေါ်ယူဖို့ ကြိုးစားခဲ့ပေမယ့် စပါးနဲ့ စာချုပ်ရှိတဲ့အတွက် မသွားဖြစ်ခဲ့ပါဘူး။

    Ref: BBC