စက်တင်ဘာ ၁၃၊ ၂၀၂၀
M-Media
-နိုင်ငံတစ်ဝှမ်း အဓမ္မပြုကျင့်မှုတွေ မြင့်တက်လာတာကြောင့် အာဖရိကအနောက်ပိုင်း လိုက်ဘေးရီးယားနိုင်ငံမှာ အရေးပေါ်အခြေအနေ ကြေငြာလိုက်ပြီး အဓမ္မကျင့်မှုတိုက်ဖျက်ရေး အစီအမံအသစ်တွေကိုလည်း ဆောင်ရွက်သွားမှာ ဖြစ်ပါတယ်။
အဓမ္မကျင့်မှု၊ လိင်ပိုင်းဆိုင်ရာစော်ကားမှုတွေ မြင့်တက်လာတဲ့အတွက် ပြီးခဲ့တဲ့လအတွင်း မြို့တော် မွန်ရိုဗီယာမှာ ထောင်နဲ့ချီတဲ့ပြည်သူတွေက ဆန္ဒပြခဲ့ကြပါတယ်။
အခုတစ်ပတ် သောကြောနေ့မှာတော့ သမ္မတ ဂျော့ဝီယာက တိုင်းပြည်ကို အရေးပေါ်အခြေအနေ ကြေငြာလိုက်ပါတယ်။ အဓမ္မပြုကျင့်မှုကိစ္စအတွက် အစိုးရရှေ့ သီးသန့်ထားပေးသွားမှာဖြစ်ပြီး၊ နိုင်ငံတစ်ဝှမ်း လိင်ပိုင်းဆိုင်ရာကျူးလွန်သူများ မှတ်တမ်းဌာနကိုလည်း ဖွဲ့စည်းလိုက်တယ်လို့ ထုတ်ပြန်ခဲ့ပါတယ်။
လိုက်ဘေးရီးယားအစိုးရဟာ လိင်ပိုင်းဆိုင်ရာနဲ့ ကျားမခွဲခြားမှုကို အခြေခံတဲ့ အကြမ်းဖက်မှု တိုက်ဖျက်ရေးအတွက် ‘အမျိုးသားလုံခြုံရေးတပ်ဖွဲ့’ ကိုလည်း ဖွဲ့စည်းခဲ့ပါတယ်။
၁၉၈၉ ခုနှစ်ကနေ ၂၀၀၃ ခုနှစ်အထိ ပြည်တွင်းစစ်ဒဏ်ခံစားခဲ့ရတဲ့ လိုက်ဘေးရီးယားနိုင်ငံမှာ အဓမ္မကျင့်မှုအန္တရာယ်ဟာ စိုးရိမ်စရာတစ်ရပ်အဖြစ် အရင်ကတည်းက ရှိခဲ့တာပါ။ ၂၀၁၆ ခုနှစ် ကုလရဲ့ထုတ်ပြန်ချက်မှာ လိုက်ဘေးရီးယားနိုင်ငံအတွင်း ဖြစ်ပွားခဲ့တဲ့ အဓမ္မကျင့်မှုတွေရဲ့ ၂ ရာခိုင်နှုန်းခန့်ကိုသာ အပြစ်ပေးအရေးယူမှု ရှိတယ်လို့ ဖော်ပြထားပါတယ်။
အခုနှစ်အတွင်း အဓမ္မပြုကျင့်မှုနှုန်းဟာ လိုက်ဘေးရီးယားမှာ သိသိသာသာ မြင့်တက်လာပါတယ်။ မေလက တစ်လအတွင်း ၈၀ ကနေ ၁၀၀ ကြား ရှိရာကနေ ဇွန်လနဲ့ ဩဂုတ်လအတွင်းမှာတော့ ၆၀၀ အထိ မြင့်တက်လာတယ်လို့ အမျိုးသမီးစွမ်းဆောင်ရည်မြှင့်တင်မှုကွန်ယက်က ပြောကြားခဲ့ပါတယ်။
သမ္မတ ဂျော့ဝီယာက ကိုရိုနာကပ်ရောဂါအတွင်း မိမိတို့ဟာ အဓမ္မကျင့်မှု ကပ်ရောဂါကိုပါ ကြုံတွေ့နေရပြီး နိုင်ငံတစ်ဝှမ်းက ကလေးငယ်တွေနဲ့ အမျိုးသမီးငယ်တွေ ထိခိုက်ခံစားနေရတယ်လို့ ပြောကြားခဲ့ပါတယ်။
Ref: Aljazeera
