ဗြိတိသျှနယ်ချဲ့တို့က မြန်မာနိုင်ငံကို ၁၉၄၈ခု၊ဇန်နဝါရီလ ၄ရက်၊ မနက် ၄နာရီ ၂၀ မိနစ် တွင် လွတ်လပ်ရေးပေးခဲ့သည်။ ထိုသို့လွတ်လပ်ရေးကြီးရဖို့ရန် တိုင်းပြည်အတွက် အသက်သွေး၊ချွေး၊ ပေးဆပ်ခဲ့ကြသော အာဇာနည် အမျိုးသားခေါင်းဆောင်ကြီးများ ပေါ်ထွန်းခဲ့ဖူးသည်။ လွတ်လပ်ရေး ဗိသုကာကြီး တပ်မတော်ဖခင်ကြီးဟု တင်စားခံရသော ဗိုလ်ချုပ်အောင်ဆန်း အပါဝင် အာဇာနည် အမျိုးသားခေါင်းဆောင်ကြီး( ၉ )ဦးတို့သည် နယ်ချဲ့လက်ပါးစေ အလိုတော်ရှိများ၏ လုပ်ကြံသတ် ဖြတ်မှု့ကြောင့် ၁၉၄၇ခု ဇူလိုင်လ (၁၉)ရက်၊စနေနေ့ မနက် ၁၀နာရီ ၃၇ မိနစ်တွင် ရန်ကုန်မြို့ရှိ အတွင်းဝန်ရုံး (“မဆလ” အစိုးရခေတ် ဝန်ကြီးများရုံးဟုခေါ်ဆို) အစည်းအဝေးခန်းမအတွင်း အရေး ပေါ်အစည်းအဝေးပြုလုပ်နေစဉ် လုပ်ကြံခံခဲ့ရပါသည်။ ယခုဆိုလျှင်ဗိုလ်ချုပ်နှင့်တကွ အာဇာနည် ခေါင်းဆောင်ကြီးများ လုပ်ကြံခံရသည်မှာ နှစ် (၇၀) တိုင်ကြာခဲ့ပေပြီ။ သို့သော် စာရေးသူအပါဝင် မျိုးချစ်စိတ်ဓာတ်ရှိသည့် မြန်မာလူမျိုးတိုင်း ဇူလိုင်လ ၁၉ရက်ရောက်ခါနီးတိုင်း ရောက်တိုင်း ရင်ထဲ ဆို့နင့်ခံစား မျက်ရည်တွေလည်ခဲ့ရသည်မှာ နှစ်စဉ်လိုလိုပင် ဖြစ်သည်။
ဒါ့ကြောင့်လည်း တိုင်းပြည်နှင့်လူမျိုးအတွက် တန်ဖိုးကြီးကြီးပေးဆပ်ခဲ့သော အာဇာနည် ခေါင်းဆောင်ကြီးများနှင့် သူတို့၏အမှတ်တရ သမိုင်းဝင်စကားလေးများကို တင်ပြခြင်းသည် ဂုဏ် ပြုထိုက်သူကို ဂုဏ်ပြုရာရောက်သည်ဟု ခံစားမိပါသည်။
ပြည်သူ့အချစ်တော် ဗိုလ်ချုပ်အောင်ဆန်းကို ၁၉၁၅ခု ဖေဖော်ဝါရိလ ၁၃ ရက်တွင် နတ် မောက်မြို့၊ မကွေးတိုင်းတွင် မွေးဖွားခဲ့သည်။ အသက် ၃၂ နှစ် ၅လ အရွယ်တွင် ဘုရင်ခံ အမှု့ဆောင် ကောင်စီဒုတိယ ဥက္ကဋ္ဌ လွတ်လပ်ရေးမရမီ ဝန်ကြီးအဖွဲ့၏ ဒုတိယဝန်ကြီးချုပ်၊ ကာကွယ်ရေးနှင့် နို်င် ငံခြားရေး ဝန်ကြီးတာဝန်ကို ထမ်းဆောင်ခဲ့သည်။ “ ငါ့ပြည်သူတွေ အနွေးထည်ဝယ် မဝတ်နိုင်တာ ဟာ ငါ့အပြစ်” ဟုသဘောထားခဲ့သည်။ တစ်မျိုးသားလုံးအရေးကို ခေါင်းထဲအမြဲထည့်ခဲ့သော ကြောင့် “သားဖြစ်သူ ဗိုလ်ချုပ်ကို တွေ့ချင်လွန်းလို့ မကွေးက လာခဲ့တဲ့မိခင်ကြီးကို တိုင်းပြည်အရေး လုံးပမ်းနေရသောကြောင့် မချစ်ချင်ယောင်ဆောင်ခဲ့သည်။ မိခင်ကြီးအိမ်ပြန်တဲ့အခါ ရထားဘူတာရုံ ကိုလိုက်ပို့ခဲ့သည်။ ရထားလည်းထွက်ရော ဘူတာရုံမှာ ဒူးထောက်ရင်း ကြိတ်မှိတ်ခံစားငိုကြွေးခဲ့ သည်။ နှလုံးသားကို အကျဉ်းချပြီး တိုင်းပြည်လွတ်လပ်ရေးအတွက် အချိန်ပေးကြိုးပမ်းခဲ့သည့် မိမိ ၏ဘဝတစ်ခုလုံးကို စတေးခဲ့သည့် ထိုကဲ့သို့ “မတစ်ထောင်၊ တစ်ကောင်ပွား” ယောက်ျား အာဇာနည် အမျိုးသားခေါင်းဆောင်ကြီးကို အာဃာတတရား အတ္တစိတ်များ၊ အာဏာရူးသွပ်မှု့များ မွန်ထူနေသော မျိုးချစ်ပါတီခေါင်းဆောင် နယ်ချဲ့ဗြိတိသျှ၏ လက်ပါးစေ ဂဠန်ဦးစောနှင့် အပေါင်းပါများ၏ နိုင်ငံတော်လုပ်ကြံမှု့ကြောင့် ကျည်ဆံ(၁၃) ချက်သင့်ကာ သူချစ်သော မြန်မာပြည်ကြီးနှင့် မြန်မာလူမျိုးတို့ကို နှုတ်ဆက်ထွက်ခွာသွားခဲ့ပေသည်။
ဗိုလ်ချုပ်၏ အစ်ကိုရင်းလည်းဖြစ်သူ ကျောင်းဆရာတစ်ဦးလည်းလုပ်ခဲ့ဖူးသူ အာဇာနည် ဦးဘဝင်းကို ၁၉၀၁ ခုနှစ်တွင် မွေးဖွားခဲ့သည်။ အသက်၄၆ နှစ်အရွယ်တွင် ရေနံချောင်း ဖဆပလ ဥက္ကဋ္ဌ၊ ကူးသန်းရောင်းဝယ်ရေးနှင့် ထောက်ပံ့ရေးဝန်ကြီးအနေဖြင့် ဗိုလ်ချုပ်၏အစိုးရအဖွဲ့တွင် တာဝန်ထမ်းဆောင်ခဲ့သည်။ ဗိုလ်ချုပ်ကို အင်္ဂလိပ်စာသင်ပေးခဲ့သော ဆရာတစ်ဦးလည်းဖြစ်သည်။ နယ်ချဲ့လက်ပါးစေ လက်ချက်ကြောင့် ကျည်ဆံ ၈ချက်သင့်ကာ ထိုနေရာတွင်ပင် အသက်ပေးလှူ သွားခဲ့သည်။
မိုင်းပွန်စော်ဘွားကြီးစပ်စံထွန်းကို ၁၉၀၇ခုနှစ်တွင် မွေးဖွားခဲ့သည်။ အသက်၄၀တွင် နယ်ခြားဒေသဆိုင်ရာ အတိုင်ပင်ခံဝန်ကြီးအနေဖြင့် တာဝန်ထမ်းဆောင်ခဲ့သည်။ ငယ်စဉ်က သူကိုယ်တိုင် “ပေါင်” ပေါ်တွင် “ကြောင်ရုပ်” ထိုးခဲ့မိတာကို ရှက်မိခဲ့ပြီး လူငယ်တွေကို “ဆေးမှင်ကြောင် မထိုးပါနဲ့လို့” မကြာခဏ မှာကြားပြောဆိုတတ်သည်။ ဦးခေါင်းတွင် ကျည်နှစ်ချက်သင့်ကာ ဇူလိုင် ၂၀ရက် မွန်းတည့်ချိန်တွင် သေဆုံးခဲ့သည်။
အတွင်းဝန် ဦးအုန်းမောင်ကို ၁၉၁၃ခုတွင် မွေးဖွားခဲ့ပြီး အသက် ၃၄ နှစ်အရွယ်တွင် ဒုတိယ အတွင်းဝန် (အိုင်စီအက်စ်) ရာထူးအပြင် သယ်ယူပို့ဆောင်ရေးနှင့် လမ်းပန်းဆက်သွယ်ရေးဋ္ဌာနဝန် ကြီးအနေဖြင့် တာဝန်ထမ်းဆောင်ခဲ့သည်။ သယ်ယူပို့ဆောင်ရေးစီမံကိန်းစာရွက်ကြီးကို ကိုင်စွဲကာ အစည်းအဝေးခန်းမထဲကို ငါးမိနစ်စောကာဝင်ခဲ့သည်။ “ကံဆိုးတယ် ပြောမလား၊ ကံကောင်းတယ် ပြောမလား” လူသတ်သမားရဲ့ကျည်ဆံ ၅တောင့်က သူ့ကိုယ်ထဲနစ်ဝင်သွားလိုက်တာယူလာခဲ့တဲ့ စီမံကိန်းစာရွက်ကြီး သွေးစွန်းသွားခဲ့တာ သမိုင်းသက်သေတစ်ခုဖြစ်သွားခဲ့တယ်။
ဆရာကြီးဒီးဒုတ်ဦးဘချိုကို ၁၈၉၃ခုနှစ်တွင် မွေးဖွားခဲ့သည်။ ဒီးဒုတ်ဂျာနယ်တွင် မိမိတတ် သည့် ကလောင်စွမ်းနှင့် တိုင်းပြည်အတွက် ရှိသမျှခွန်အားပေးဆပ်ရင်း အသက်၅၄ နှစ်အရွယ်တွင် ပြန်ကြားရေးဝန်ကြီးတာဝန်ကို ထမ်းရွက်နေစဉ် လူသတ်သမား၏ ကျည်ဆံတစ်ခု ဦးနှောက်ထဲဝင် ခဲ့ပြီး ကျည် ၅ ချက်သင့်ကာ ဇူလိုင်လ ၁၉ရက် နေ့လည်ပိုင်းတွင် ဆေးရုံကြီး၌ ကွယ်လွန်ခဲ့သည်။
အာဇာနည်ခေါင်းဆောင်ကြီး သခင်မြကို ၁၈၉၇ခုတွင် မွေးဖွားခဲ့ပြီး ၁၉ ဇူလိုင်တွင် ထမင်းကို ခပ်သွက်သွက်စားကာ ဇနီးသည်ကို နှုတ်ဆက် အ်ိမ်ကအထွက် ဂျစ်ကားနှင့်ခြံတံခါးငြိနေတာတွေ့ တော့ ဇနီးဖြစ်သူက အတိတ်နိမိတ်ကံမကောင်းလို့ ယူဆတာနဲ့ “မသွားပါနဲ့လို့” ပြောတဲ့ ဇနီးသည် ကို တစ်ချက်ကလေးပြုံးပြပြီး “ငါ့ကို ဗိုလ်ချုပ်စောင့်နေလိမ့်မယ်” လို့ ဖြေကြားခဲ့တဲ့ သခင်မြဟာ အသက် ၅၀မှာ ဘဏ္ဏာရေးဝန်ကြီးတာဝန်ကို ထမ်းရွက်နေစဉ်ဖြစ်တယ်။ “နှုတ်လုံတဲ့လူ” ဟု ခေါင်း ဆောင်များကြားထင်ရှားခဲ့ပြီး လူသတ်သမား၏ ကျည်တစ်ချက်အဆုတ်ကို ဖောက်ကာ ထိုနေရာ တွင်ပင် သေဆုံးခဲ့သည်။
မန္တလေးမြို့က အမျိုးသားကျောင်း၊ ကျောင်းအုပ်ဆရာကြီးဖြစ်သူ ဆရာကြီး ဦးရာဇတ်ကို ၁၈၉၈ ခုနှစ်တွင် မန္တလေးတိုင်း၊မိတ္ထီလာမြို့တွင်မွေးဖွားခဲ့သည်။ အသက်၄၉ နှစ်အရွယ် ဗိုလ်ချုပ်၏ အစိုးရအဖွဲ့တွင် ပညာရေး နှင့် အမျိုးသားရေး စီမံကိန်းဝန်ကြီးအဖြစ် တာဝန်ထမ်းဆောင်နေစဉ် အတွင်းဝန်ရုံး အစည်းအဝေးခန်းမတွင် ကျည်ဆံ ၆ ချက်သင့်ကာ ဒဏ်ရာအပြင်းအထန်ရနေစဉ် အတွင်း အနီးနားက သူတွေကို ပြောဆိုခဲ့တာက “ ဗိုလ်ချုပ်နှင့် သခင်မြကို အရင်ကြည့်ပါ။ ကျွန်တော်က အရေးမကြီးဖူး” ဟုပြောဆိုခဲ့သော ကိုယ်ချင်းစာနာစိတ်ပြင်းပြပြီး မေတ္တာဓာတ်ကြီးမား သူ အမျိုးသားကျောင်းအုပ်ဆရာကြီး၏ ရင်းတွင်းဖြစ် ခံစားချက် သမိုင်းဝင်စကားသည် မြန်မာ့သ မိုင်းတွင် ဘယ်သူဖျက်ဖျက် ဘယ်တော့မှဖျက်လို့ရမည့် အရာမဟုတ်ပေ။
ဆရာကြီး ဦးရာဇတ်၏ သက်တော်စောင့်ရဲဘော်ကိုထွေးကို ၁၉၂၉ခု တွင် မွေးဖွားခဲ့ပြီး လူသတ်သမား ရန်ကြီးအောင်ပစ်လိုက်သော ကျည် ၄ချက်သင့်၍ နေရာတွင်ပင် သေဆုံးသွား ခဲ့သည်။ ကွယ်လွန်ချိန်တွင် အသက် ၁၈နှစ် လူပျို၊လူလွတ်တစ်ဦးဖြစ်ခဲ့ပြီး အာဇာနည်ဟူသည် အသက်ကြီး ငယ်မရွေး ဖြစ်နိုင်သည်ကို သမိုင်းသွေးရေးကာ လူငယ်ထုအတွက် သက်သေပြသွားခဲ့ ပါသည်။ ယနေ့ခေတ် လူငယ်ထု အတုယူ အားကျစရာပင်ဖြစ်သည်။
ကရင်အမျိုးသား ခေါင်းဆောင်ကြီး မန်းဘခိုင်ကို ၁၉၀၃ ခုနှစ်တွင် မွေးဖွားခဲ့ပြီး ကရင်-ဗမာ ချစ်ကြည်ရေးကို ပျက်ပြားအောင် သွေးထိုးခဲ့သည့် ဗြိတိသျှနယ်ချဲ့ကို တုန့်ပြန်ခဲ့သည့် စကားတစ်ခွန်း ဖြစ်သည့် “ ကိုယ့်လူမျိုးအချင်းချင်း လက်အောက်ရောက်တာဟာ တိုင်းတစ်ပါးလက်အောက်ရောက်တာထက် အများကြီးသာပါတယ်” ဟူ၍ ပြောခဲ့သောစကားသည် “သူ့ကျွန်မခံစိတ် ပြင်းပြပုံ” ကို မီးမောင်းထိုးပြလျက်ရှိသည်။ အသက်၄၄ နှစ်အရွယ်တွင် စက်မှု့ လက်မှု့နှင့် အလုပ်သမားဝန်ကြီး အဖြင့် တာဝန်ယူနေပြီး လွတ်လပ်ရေးရပြီး အစိုးရဖွဲ့လျှင် ဒုတိယဝန်ကြီးချုပ် ခန့်ထားရန် ဗိုလ်ချုပ်က လျာထားခဲ့သူလည်းဖြစ်သည်။ ကျည်ဆံ ၁၅ ချက် အများ ဆုံးသင့်ကာ နေရာတွင်ပင်သေဆုံးခဲ့ပါသည်။
မည်သို့ပင်ဆိုစေ အာဇာနည်တို့သည် လူသာသေပြီး နာမည်နှင့်သမိုင်း ဘယ်တော့မျှ မသေ ကြောင်း အာဏာရှင်တို့သည် လူမသေ၊အသက်ရှည်သော်ငြားလည်းပဲ နာမည်နှင့် သမိုင်းအစော ကြီး သေသွားတတ်ကြောင်း သက်သေပြသ သွားခဲ့ပါသည်။ထို့အပြင် အာဇာနည်ခေါင်းဆောင်တွေ က တိုင်းပြည်အတွက် ဘာတွေပေးဆပ်ရမလဲဆိုတာကို အမြဲတွေးတော လုပ်ဆောင်တတ်ကြ ကြောင်း အတုစံနမူနာကောင်းများကို ယနေ့လူငယ်အပေါင်း အတုယူကာ အမိနိုင်ငံတော်ကြီး အတွက် တိုးတက်မှု့အလုံးစုံကို လုပ်ဆောင်သင့်ပါကြောင်း ၁၉ ဇူလိုင်အာဇာနည်နေ့က မီးမောင်းထိုးပြသနေပါကြောင်း တင်ပြလိုက်ပါသည်။
ဂျက်ဖရီတင်အုန်း(ရန်ကုန်စက်မှု့တက္ကသိုလ် R.I.T)
