News @ M-Media

Tag: maungtaw

  • ဥပဒေ အပေါ်တွင် ဘယ်သူ့မှ မရှိပါဘူး။ (ပြည်သူ့လွှတ်တော် ကိုယ်စားလှယ် ဦးရွှေမောင်)

    ရခိုင်ပြည်နယ် မောင်တောမြို့နယ်တွင်  ဒုချီရာတန်းကျေးရွာအုပ်စုနှင့် အနီးတဝိုက်ကျေးရွာများတွင် ဖြစ်ပေါ်လျက်ရှိနေသော အခြေအနေများ အတွက် ပြည်သူ့လွှတ်တော် ကိုယ်စားလှယ် ဦရွှေမောင်မှ ၄င်း၏ တရားဝင် Facebook စာမျက်နှာမှာ ရေးသားထားခြင်းဖြစ်ပါတယ်။

    U Shwe Maung

    ဥပဒေ အပေါ်တွင် ဘယ်သူ့မှ မရှိပါဘူး။
    Nobody is Above the Law.
    ======================
    ချစ်ခင်လေးစားအပ်ပါသော မောင်တောခရိုင်ရှိ မိဘပြည်သူ အပေါင်းတို့ခင်ဗျား-

    ၂၀၁၄ ခုနှစ် ဇန်နဝါရီလ ၁၂ ရက်နေ့မှစ၍ ရခိုင်ပြည်နယ၊် မောင်တောမြို့နယ်၊ ဒုချီရာတန်းကျေးရွာအုပ်စုနှင့် အနီးတဝိုက်ကျေးရွာများတွင် ဖြစ်ပေါ်လျက်ရှိနေသော အခြေအနေများအတွက် ကျွန်တော်တို့ မောင်တောခရိုင်ကိုယ်စားပြု လွှတ်တော်ကိုယ်စားလှယ်များမှ အထူးဝမ်းနည်းပြီး ဖြစ်စဉ်အားလုံးကိုလဲ အနီးကပ်စောင့်ကြည့် လေ့လာနေပါတယ်။ ပျေက်ဆုံးနေသော ရဲတပ်ကြပ်ကြီးအောင်ကျော်သိန်းနှင့် အပြစ်မဲ့ ရွာသူရွာသားများ အတွက်လဲ အထူးစိုးရိမ်လျက် ရှိနေပါတယ်။

    ဒုချီရာတန်း (ခ) ကီလားတောင်ကျေးရွာအုပ်စုမှာ ဒေသခံ လူတစ်ဦးတစ်ယောက်မျှမရှိသောကြောင့် တစ်ရွာလုံး တိတ်ဆိတ်တည်ငြိမ်နေသော်လည်း ပတ်ဝန်းကျင်ရွာများတွင် တည်ငြိမ်မှု မရှိသေးကြောင်း ဒီကနေ့ မနက် ၁၁ နာရီ အချိန်တွင် ပြည်သူများ၏ တင်ပြချက်အရ သိရှိရပါတယ်။ အနီးပတ်ဝန်းကျင်ရှိ ဂေါ်ဒူဆော်ရား၊ နူရုလ်လာကျေးရွာများတွင် လုံခြုံရေးတပ်ဖွဲ့ဝင်များမှ ဝင်ရောက်ရှာဖွေ ဖမ်ဆီးမှုများ ပြုလုပ်နေသောကြောင့် ပြည်သူများ အထိန့်တလန့်ဖြစ်ကာ စိုးရိမ်လျက်ရှိနေကြကြောင်း လေ့လာသိရှိရပါတယ်။ မောင်တောဒေသတွင် လုံခြုံရေးတာဝန်ယူဆောင်ရွက်နေသော ရဲမှုးချုပ် တင်ကိုကို အား အထူးကျေးဇူးတင်ရှိပါတယ်။ ရဲမှုးချုပ်မှ ဥပဒေနှင့်အညီ ဆောင်ရွက်ရန် ညွှန်ကြားရင်လည်း အောက်ခြေ လုံခြုံရေး တပ်ဖွဲ့ဝင်များက အတိအကျ လိုက်နာမယ်လို့ ပြောလို့ မရပါဘူး။ ဒါကြောင်မလို့ ပြည်သူတွေရဲ့ပြောကြားချက်တွေကိုလဲ နားထောင်ဖို့ လိုပါတယ်။ ကျွန်တော်တို့ကိုလည်း ပြည်သူတွေက အများကြီးတင်ပြထားတာ ရှိပါတယ်။ ပြည်သူ့တွေရဲ့ ခံစားချက်၊ တင်ပြချက်တွေကို အလေးအနက်ထားဖို့ လိုပါတယ်။ ပြည်သူတွေ ပြစ်မှု ကျူးလွန်နိုင်သလို လုံခြုံရေးတပ်ဖွဲ့ဝင်တွေလဲ ပြစ်မှု ကျူးလွန်နိုင်ပါတယ်။ ပြည်သူတွေပြောတာ အားလုံး ကောလဟာလ၊ ရဲတပ်ဖွဲ့ဝင်တွေ ပြောတာ အားလုံးအမှန်လို့ ယူဆပြီး လုပ်ဆောင်နေသမျှ တရားဥပဒေစိုးမိုးမှု ဘယ်တော့မှ ရှိမှာမဟုတ် ပါဘူး။ တရားဥပဒေစိုးမိုးရေးဆိုတာ ရဲနှင့်ပြည်သူ ပူးပေါင်းဆောင်ရွက်နိုင်မှ ဖြစ်နိုင်မှာပါ။

    လူသတ်မှုတွေ၊ မုဒိန်းမှုတွေ မြန်မာနိုင်ငံ တဝှမ်း လုံးမှာ နေ့စဉ်နှင့်အမျှ ဖြစ်နေပါတယ်။ ပြစ်မှုကျူးလွန်သူတွေကို ပြည်သူ့ရဲက ဘယ်လိုပုံစံနှင့် ဖေါ်ထုတ်ကြပါသလဲ၊ Police Procedures လို့ခေါ်တဲ့ ရဲလုပ်ထုံးလုပ်နည်းတွေရှိပါတယ်။ ပြစ်မှု ကျူးလွန်သူ တစ်ယောက် နှစ်ယောက် အတွက် တရွာလုံးက လူတွေ၊ အမျိုးသမီးတွေ၊ ကလေးတွေကို ခြိမ်းခြောက်ဖမ်းဆီးလို့ မရပါဘူး။ အဲသလို ဥပဒေလဲမရှိပါဘူး။ မြန်မာနိုင်ငံရဲတပ်ဖွဲ့ အနေနဲ့ ရာဇဝတ်မှုများကို စစ်ဆေးဖေါ်ထုတ်တဲ့အခါ ဥပဒေ၊ နည်းဥပဒေများအတိုင်း စံတစ်မျိုးတည်း ကိုသာ သုံးဖို့လိုအပ်ပါတယ်။

    ၂၀၁၂ ခုနှစ် ဇွန်လ ၃ ရက်နေ့က တောင်ကုတ် မြို့မှာ ခရီးသွားသူ ၁၀ ဦးကို အင်အား ၃ဝဝ ခန့်ရှိ လူအုပ်မှ သတ်ဖြတ်ခဲသည့် ရာဇဝတ်မှုများကို ဘယ်လိုကိုင်တွယ် ဖေါ်ထုတ်ခဲ့ပါသလဲ။ တစ်နှစ်ကြာအထိ တောင်ကုတ်နှင့် ရခိုင်ပြည်နယ်ရဲတပ်ဖွဲ့ဝင်များက မဖေါ်ထုတ်နိုင်ခဲ့လို့ နေပြည်တော်မှ အထူး ရဲတပ်ဖွဲ့ဝင်များသွားပြီး ဖေါ်ထုတ်ဖမ်းဆီးခဲ့ရတယ်။ အဖမ်းခံရသူ ၆ ဦး သာ ရှိပြီး တရားဥပဒေအရ အရေးယူဆောင်ရွက်နေကြောင်း လေ့လာသိရှိရပါတယ်။ ကျွန်တော် တင်ပြ လိုတာကတော့ ဒီတရားခံ ၆ ဦးကို ဖမ်းဆီးဖို့ လုံခြုံရေးတပ်ဖွဲ့ဝင် ဘယ်နှစ်ဦး အသုံးပြုခဲ့ပါသလဲ၊ ရွာဘယ်နှစ်ရွာကို ဝင်စီးခဲ့ပါသလဲ၊ အချိန်ဘယ်လောက်ယူခဲ့ပါသလဲ၊ ရပ်မိရပ်ဖ၊ အမျိုးသမီးနှင့် ကလေး ဘယ်နှစ်ဦးကို ဖမ်းဆီး ခဲ့ပါသလဲ၊ သေနတ် ဘယ်နှစ်ချက် ပစ်ခတ်ခဲ့ရပါသလဲ၊ အခု မောင်တောမှာ ဘယ်လိုပုံစံနဲ့ လုပ်နေကြပါသလဲ။ ဒါတွေကို ကျွန်တော်တို့ သိဖို့လိုပါတယ်။ စံတစ်မျိုးတည်းဖြစ်ဖို့လိုပါတယ်။ မဟုတ်ရင်တော့ ခွဲခြားဆက်ဆံ ဆောင်ရွက်မှုလို့ဘဲ ပြောရပါလိမ့်မယ်။

    နိုင်ငံတော်ဖွဲ့စည်းပုံအခြေခံဥပဒေက မည်သည့်ခွဲခြားဆက်ဆံမှုကိုမှ လက်မခံပါဘူး။ ဥပဒေ ချိုးဖောက်သူ မည်သူမဆို ပြစ်ဒဏ် ပေးခြင်းခံရပါမည်။ Nobody is Above the Law ဟု ဆိုတဲ့အတိုင်း ဥပဒေ အပေါ်တွင် ဘယ်သူ့မှ မရှိပါဘူး။

    ရဲတပ်ကြပ်ကြီး အောင်ကျော်သိန်း အပါအဝင် ဒုချီရာတန်း မူဆလင်ရွာမှ ပျောက်ဆုံးနေသော အမျိုးသမီးများ၊ ကလေးများ၊ အမျိုးသားများ အားလုံးကို ရှာဖွေတဲ့နေရာမှာ ပြည်သူများ၏ တာဝန်သိမှုနှင့် ပူးပေါင်းဆောင်ရွက်မှု အလွန် အရေးကြီးပါတယ်။ ကျွန်တော်တို့ လွှတ်တော်ကိုယ်စားလှယ်များကလည်း နယ်မြေတည်ငြိမ်အေးချမ်းရေးနှင့် တရားဥပဒေ စိုးမိုးရေးအတွက် တာဝန်ရှိသူများ ဖြစ်ကြတဲ့အတွက် နိုင်ငံတော်နှင့် လူမျိုးစုံ၊ ဘာသာစုံ ပြည်သူများ၏ အကျိုးကို ရှေ့ရှု၍ လွှတ်တော်များ၊ ဒေသဆိုင်ရာ အာဏာပိုင်များ၊ ဗဟိုအာဏာပိုင်များနှင့် ဆက်သွယ်၊ ညှိနှိုင်း၊ ပူးပေါင်းဆောင်ရွက် နေကြပါတယ်။

    ဥပဒေချိုးဖောက်သူ မည်သူ့ကိုမဆို ဥပဒေနှင့် အညီ အရေးယူနိုင်မှ နယ်မြေ တည်ငြိမ်အေးချမ်း မှုကို ဖေါ်ဆောင်နိုင်မှာဖြစ်ပါတယ်။ သို့ဖြစ်ပါ၍ နစ်နာသူများ၏ တိုင်ကြားစာများ၊ လူအသေ အပျောက် စာရင်းများ၊ သတင်းအချက် အလက်များး၊ ဓါတ်ပုံ၊ အသံဖိုင်၊ ဗွီဒီယိုဖိုင် အထောက်အထားများကို အောက်ပါ Electronic လိပ်စာများသို့ အမြန်ဆုံး ပို့ပေးကြပါရန် တိုက်တွန်းအပ်ပါတယ်။ အားလုံးကို ကျေးဇူးတင်ပါတယ်။

    မှတ်ချက်။ သတင်းအချက်အလက်ပေးပို့သူများ၏ ကိုယ်ရေးအချက်အလက်များကို အထူးလျှို့ဝှက် ထားရှိပါမည်။

    1. Viber ID: 09-500-2570
    2. WeChat ID: ShweMaung_MP
    3. Skype ID: ShweMaung.MP
    4. Facebook ID: ShweMaung.BTG
    5. Gmail ID: [email protected]

    [ Video file များကို YouTube တွင် Upload လုပ်ပြီး Link ကို အထက်ဖေါ်ပြပါ အဆင်ပြေရာ ID တစ်ခုခုသို့ Share လုပ်ပေးရင် လုံလောက်ပါတယ်။ YouTube ပေါ်တွင် Upload မလုပ်တတ်သူများ ဆက်သွယ်လာပါက ကူညီရှင်းပြပေးပါ့မယ်။ ]

    လေးစားစွာဖြင့်

    ဦးရွှေမောင်
    (မောင်တောခရိုင်ကိုယ်စားပြု လွှတ်တော်ကိုယ်စားလှယ်များကိုယ်စား)
    ပြည်သူ့လွှတ်တော်ကိုယ်စားလှယ်
    မိုဘိုင်းဖုန်း – ဝ၉-၅ဝဝ-၂၅၇ဝ

    ၂၀၁၄ ခုနှစ်၊ ဇန်နဝါရီလ ၁၈ ရက်
    ရန်ကုန်မြို့

    Link =>https://www.facebook.com/ShweMaung.BTG/posts/1402303183352043

  • မောင်တော ပဋိပက္ခ စုံစမ်းရန် နိုင်ငံတကာ တောင်းဆို

    ဧရာဝတီ
    ဇန်နဝါရီ ၁၈၊ ၂၀၁၄

    timthumb.php_

    ရခိုင်ပြည်နယ် မောင်တောမြို့နယ်တွင် အာဏာပိုင်များပါဝင်သော လူစုလူဝေး ဖြင့် တိုက်ခိုက်မှုကြောင့် မွတ်စလင်များ သေဆုံးခဲ့သည်ဆိုသော သတင်းကြောင့် ကုလသမဂ္ဂ၊ အမေရိကန်ပြည်ထောင်စုနှင့် ဗြိတိန်နိုင်ငံတို့က  မြန်မာအစိုးရအနေဖြင့် စုံစမ်းစစ်ဆေးပေးရန် ဇန်န၀ါရီလ ၁၇ ရက်နေ့တွင် တောင်းဆိုလိုက်သည်။

    ဇန်န၀ါရီလ ၁၃ ရက်နေ့ ညပိုင်းတွင် ရခိုင်ပြည်နယ်၊ မောင်တောမြို့နယ်ရှိ  မွတ်စလင် အများစု နေထိုင် သော ဒုချီးရာတန်း ကျေးရွာသို့ အာဏာပိုင်များ လာရောက်ပြီး မိုဘိုင်းလ်ဖုန်းများ သိမ်းယူခြင်း၊ အိမ်ထောင်စု လူဦးရေ စစ်ဆေးခြင်းများ ဆောင်ရွက်ခဲ့ကြောင်း၊ ယင်းသို့ ဆောင်ရွက်မှုကို မကျေနပ် သော မွတ်စလင်များက လူစုလူဝေးဖြင့် တိုက်ခိုက်မှုများ ဆောင်ရွက်ခဲ့ပြီး အာဏာပိုင်များနှင့် မွတ်စလင်များ အကြား ပဋိပက္ခများဖြစ်ပွားခဲ့ကြောင်း၊ ယင်းနောက် ရဲတပ်ကြပ်ကြီး တဦး ပျောက်ဆုံးခဲ့ပြီး ဇန်န၀ါရီလ ၁၄ ရက်နေ့ မနက်စောပိုင်းတွင် ပျောက်ဆုံးသွားသော ရဲတပ်ကြပ် တဦးကို ရှာဖွေရန် စစ်သားများ၊ ရဲများနှင့် ဒေသခံ ရခိုင်တိုင်းရင်းသားများပါဝင်သော လူစုလူဝေးက ဒုချီးရာတန်း ကျေးရွာသို့ ပြန်လည်ရောက်ရှိလာပြီး  ရွာသူရွာသားများကို တိုက်ခိုက်ကာ ပစ္စည်းများ သိမ်းယူခဲ့ကြောင်း၊ ယင်းတိုက်ခိုက်မှုအတွင်း ကလေးများ၊ အမျိုးသမီးများအပါအ၀င် လူသေဆုံးသည်ဟု ထိုင်းနိုင်ငံအခြေစိုက် လူ့အခွင့်အရေးအဖွဲ့တခုဖြစ်သော Arakan Project က ထုတ်ပြန်သည်။

    အမေရိကန်ပြည်ထောင်စုက မောင်တောပဋိပက္ခ ဖြစ်စဉ်နှင့်ပတ်သက်ပြီး မြန်မာအစိုးရအနေဖြင့် စုံစမ်းစစ်ဆေးမှုများ ပြုလုပ်ရန် တောင်းဆိုလိုက်ပြီး ကုလသမဂ္ဂလူ့အခွင့်အရေး ကိုယ်စားလှယ် ကင်တားနားကလည်း လိုအပ်သော အရေးယူ စုံစမ်းမှုများချက်ချင်းဆောင်ရွက်ရန် တောင်းဆို လိုက်ကြသည်။

    ” အမေရိကန်ပြည်ထောင်စုအနေနဲ့ ရခိုင်ပြည်နယ်မှာ အာဏာပိုင်တွေ ပါဝင်တဲ့ နှိပ်စက်ညှဉ်းပန်း မတရားပြုကျင့်မှု သတင်းတွေနဲ့ ပတ်သက်လို့ အလွန်အမင်း စိုးရိမ်ပါတယ်´´ ဟု ရန်ကုန်အခြေစိုက် အမေရိကန်သံရုံး၏ ထုတ်ပြန်ကြေညာချက်တွင် ဖော်ပြသည်။

    မြန်မာနိုင်ငံ ကုလသမဂ္ဂလူ့အခွင့်အရေး ကိုယ်စားလှယ် ကင်တားနားက “သေဆုံး၊ ဒဏ်ရာမှုတွေ ဖြစ်တယ်ဆိုရင် မြန်မာအစိုးရအနေနဲ့ နိုင်ငံတကာ ဥပဒေတွေအောက်မှာ သမာသမတ်ကျတဲ့ ထိရောက် လျှင်မြန်တဲ့ စုံစမ်းစစ်ဆေးမှုတွေလုပ်ပြီး ပြစ်မှုကျူးလွန်သူတွေကို အရေးယူပါ။ လျှင်မြန်ပြီး ပွင့်လင်းတဲ့ အရေးယူမှုတွေက နောက်ထပ် ပဋိပက္ခတွေ မဖြစ်ဖို့ တားဆီးနိုင်ပါလိမ့်မယ်” ဟု ဆိုသည်။

    သမ္မတပြောရေးဆိုခွင့်ရှိသူ ဦးရဲထွဋ်၊ ရခိုင်ပြည်နယ်အစိုးရ ပြောရေးဆိုခွင့်ရှိသူ ဦးဝင်းမြိုင်က မွတ်စလင်များ အသတ်ခံရသည်ဆိုသော မောင်တောပဋိပက္ခဖြစ်စဉ်နှင့်ပတ်သက်၍ ငြင်းဆိုလိုက်ပြီး ယင်းသတင်းကို ရေးသားဖော်ပြခဲ့သော အေပီနှင့် ဧရာဝတီ သတင်းဌာနတို့၏ သတင်းရေးသားချက်များ မှားယွင်းကြောင်း အစိုးရပိုင် သတင်းဌာနများတဆင့် တုံ့ပြန်ရေးသားခဲ့သည်။

    ယမန်နေ့က ဧရာဝတီ သတင်းဌာန အင်္ဂလိပ်ပိုင်းအနေဖြင့် Arakan Project က ထုတ်ပြန်ချက်ကို သတင်းရေးသား ပေးပို့ခြင်းဖြစ်ပြီး ယင်းသတင်းအပေါ် ပြန်ကြားရေး ဒုဝန်ကြီး ဦးရဲထွဋ်၊ ရခိုင်ပြည်နယ်အစိုးရ ဦးဝင်းမြိုင်၊ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှ မွတ်ဆလင် လွှတ်တော်ကိုယ်စားလှယ် ဦးအောင်မျိုးမင်းနှင့် ဦးရွှေမောင်တို့၏ သဘောထားအမြင်များကိုလည်း ထည့်သွင်းဖော်ပြခဲ့သည်။

    ဦးရဲထွဋ်က သတ်ဖြတ်မှုနှင့် ပတ်သက်ပြီး သတင်းများ မရရှိကြောင်း၊ ရဲတပ်ကြပ် ပျောက်ဆုံးနေဆဲ ဖြစ်ကြောင်း ပြောကြားပြီး ဦးဝင်းမြိုင်ကလည်း ပျောက်ဆုံးဆဲ ရဲတပ်ကြပ်ကို မွတ်ဆလင် ၈၀ ခန့်က “တိုက်ခိုက်”ခဲ့ကြောင်း ပြောသည်။ သို့သော် မည်သည့်အတွက် တိုက်ခိုက်ကြသည်နှင့် နောက်ဆက်တွဲ ဖြစ်ရပ်များအကြောင်း မပြောဆိုပေ။

    ဦးအောင်မျိုးမင်းကမူ  ဒုချီးရာတန်းရွာသို့ ၎င်းနှင့် အစိုးရအရာရှိများ ရောက်သွားရာ လူအိုများနှင့် အမျိုးသမီး အချို့သာ မြင်ခဲ့ရကြောင်း၊ ရွာမှာ ခြောက်ကပ်နေကြောင်း၊ သို့သော် ပဋိပက္ခဖြစ်ပွားခဲ့ခြင်းနှင့် ပတ်သက်၍ အချိန်မရသဖြင့် ရွာခံများကို မမေးမြန်းခဲ့ရကြောင်း၊ သေဆုံး ဒဏ်ရာရသူများကို မမြင်ခဲ့ရကြောင်း ဆိုသည်။

    ဦးရွှေမောင်ကလည်း ပဋိပက္ခသတင်းကို ကြားကြောင်း၊ လူအများအပြား ပျောက်နေကြောင်း၊ ဒုချီးရာတန်းရွာတွင် လုံခြုံရေးတပ်ဖွဲ့ ရာချီပြီး တပ်စွဲထားကြောင်း ဆိုသည်။

    လန်ဒန်အခြေစိုက် ဘီဘီစီ မြန်မာသတင်းဌာနကမူ ရခိုင်ပြည်နယ် မောင်တောမြို့နယ် ဒူချီရာတန်း အလယ် ကျေးရွာတွင် ပျောက်ဆုံးသွားသော ရဲတပ်ကြပ်ကို ရှာဖွေနေရာ အာဏာပိုင်များက ရွာသား ၈၀ ကျော်ကို ဖမ်းဆီးထားသည်ဟု ရခိုင်ပြည်နယ်အစိုးရ ပြောခွင့်ရသူကို ကိုးကားပြီး သတင်းဖော်ပြပြီး ယင်းသို့ ၀င်ရောက် ရှာဖွေစဉ် ရဲများ၏ အကြမ်းဖက်မှုကြောင့် ရွာသား ၇ ဦး သေဆုံးခဲ့ရသည်ဟု ဗြိတိန်အခြေစိုက် ရိုဟင်ဂျာ အစည်းအရုံးက ထုတ်ပြန်ထားကြောင်း သတင်းရေးသားဖော်ပြသည်။

    ဧရာဝတီသတင်းဌာနအနေဖြင့်မူ ရခိုင်ပြည်နယ်၊ မောင်တောမြို့နယ်တွင် ဖြစ်ပွားသည်ဆိုသော သတ်ဖြတ်မှုများနှင့် ပတ်သက်ပြီး အသေးစိတ် အတည်ပြု နိုင်ခြင်း မရှိသေးပါ။

    ယခု သတင်းသည် ၂၀၁၄ ခုနှစ် အာဆီယံဥက္ကဋ္ဌ ရာထူးကို မြန်မာနိုင်ငံက စတင်ထမ်းဆောင်ပြီး ပုဂံတွင် အာဆီယံ နိုင်ငံခြားရေးဝန်ကြီးများ အစည်းအဝေး ကျင်းပချိန်နှင့်လည်း တိုက်ဆိုင်နေသည်။

    အစည်းအဝေး တက်ရောက်လာသော အင်ဒိုနီးရှား နိုင်ငံခြားရေးဝန်ကြီး Marty Natalegawa က ရခိုင်ပြည်နယ်တွင် ဖြစ်ပွားနေသော လူမျိုးရေး ပဋိပက္ခများသည် မြန်မာနိုင်ငံ ပြင်ပထိ ရိုက်ခတ်ကြောင်း၊ အင်ဒိုနီးရှားရှိ အစွန်းရောက်များက ယင်းအပေါ် ခုတုံးလုပ်လာကြကြောင်း ဧရာဝတီသို့ ပြောဆိုသည်။

    ပြန်ကြားရေး ဒုဝန်ကြီး ဦးရဲထွဋ်ကမူ “ဘင်္ဂါလီ အရေးဟာ ကျနော်တို့ရဲ့ ပြည်တွင်းရေးသာ ဖြစ်တယ်။ အဖွဲ့ဝင်နိုင်ငံတွေအနေနဲ့ တောင်းဆိုလာခဲ့ရင်တောင် အာဆီယံ ဆွေးနွေးပွဲတွေမှာ ဒီကိစ္စ မဆွေးနွေးပါဘူး” ဟု ပြောဆိုသည်။

    ရခိုင်ပြည်နယ်တွင် ၂၀၁၂ ခုနှစ်တွင် ဖြစ်ပွားခဲ့သော ပဋိပက္ခဖြစ်စဉ်များကြောင့် လူပေါင်း ၁၉၂ ဦး သေဆုံးခဲ့ပြီး ၂၆၅ ဦး ဒဏ်ရာရရှိခဲ့ကာ  နေအိမ်ပေါင်း ၈၆၁၄ ဆုံးရှုံးခဲ့ရသည်ဟု ရခိုင်ပဋိပက္ခများ စုံစမ်းစစ်ဆေးရေး ကော်မရှင်၏ အစီရင်ခံစာတွင် ဖော်ပြထားသည်။

    ဓါတ်ပုံ-စစ်တွေအနီး မွတ်ဆလင်ဒုက္ခသည် ယာယီစခန်းတခုကို လုံခြုံရေးတပ်ဖွဲ့ဝင်တဦးက စောင့်ကြပ်နေသည်ကို ၂၀၁၃ ခုနှစ် မေလက မှတ်တမ်းတင်ထားခဲ့သည်။ (ဓာတ်ပုံ – ဂျေပိုင် / ဧရာဝတီ)

    http://burma.irrawaddy.org/news/2014/01/18/53610.html

  • ၉၆၉ တရားပွဲလုပ်ပြီး ၁ လ အကြာ မောင်တောတွင် ရိုဟင်ဂျာ အမျိုးသမီးနှင့် ကလေးငယ်များအား သတ်ဖြတ်မှုများဖြစ်ပွား

    ဇန်နဝါရီ ၁၇၊ ၂၀၁၄
    M-Media

    “မောင်တောတွင် ရခိုင်လူမျိုးများမှ ရိုဟင်ဂျာ အမျိုးသမီးများနှင့် ကလေးငယ်များအား သတ်ဖြတ်ခဲ့ကြောင်း  ကူညီကယ်ဆယ်ရေး အဖွဲ့တစ်ခုက ပြော”

    20121025204125308734_20
    – ရခိုင်ပြည်နယ်မြောက်ပိုင်း မောင်တောမြို့နယ်ရှိ ရွာတစ်ရွာတွင် ဗုဒ္ဓဘာသာဝင် ရခိုင်လူမျိုးများမှ  ရိုဟင်ဂျာ အမျိုးသမီးများနှင့် ကလေးငယ်များအား ဓားများထိုးကာ သတ်ဖြတ်ခဲ့သည်ဟု ကူညီကယ်ဆယ်ရေး အဖွဲ့တစ်ခုက ပြောကြားခဲ့ပါတယ်။

    အဆိုပါ အကြမ်းဖက်သတ်ဖြတ်မှုမှာ ပြည်နယ်အနောက်ပိုင်း ဒူချာယတန်းရွာတွင် ကြာသာပတေးနေ့က ဖြစ်ပွားခဲ့ခြင်ဖြစ်ပြီး သေဆုံးသူ အရေအတွက် အတိအကျကို မသိရှိရသေးဘဲ အနည်းဆုံး တစ်ဒါဇင်ကျော်မည်ဟု ရခိုင်ပြည်နယ်တွင် ကူညီကယ်ဆယ်ရေးလုပ်ငန်းများကို လုပ်ဆောင်နေသည့် Arakan Project မှ ခရစ်လီဝါက ပြောကြားခြင်းဖြစ်ပါတယ်။

    သေဆုံးသူများမှာ ရဲများ၊ စစ်သားများ၏ ပစ်ခတ်ရိုက်နှက်မှုကြောင့် သေဆုံးရခြင်းမဟုတ်ဘဲ၊ ဗုဒ္ဓဘာသာဝင် ရခိုင် ဒေသခံတွေရဲ့ ဓားဖြင့်ထိုးသတ်မှုကြောင့် သေဆုံးရခြင်းဖြစ်နိုင်ကြောင်း အဆိုပါ Arakan Project မှ ထုတ်ပြန်သည့် ဖြစ်စဉ် အကျဉ်းချုပ်တွင် ဖော်ပြထားပါတယ်။

    ဒေသခံတစ်ဦးက အသတ်ခံရသူများမှာ အမျိုးသမီး ၁၇ ဦးနှင့် ကလေး ၅ ဦးတို့ဖြစ်ကြသည်ဟု ပြောကြားခဲ့ပါတယ်။

    အခင်းဖြစ်ပွားရာဒေသမှာ ပြီးခဲ့တဲ့လက ၉၆၉ လို့သိကြတဲ့ သံဃာတွေက ရိုဟင်ဂျာ မွတ်စလင်အားလုံးကို နှင်ထုတ်ပစ်ဖို့ အသံချဲ့စက်တွေနဲ့ လိုက်လံဟောကြားခဲ့ရာက နှစ်ဖက်တင်းမာမှုတွေ ပေါ်ပေါက်လာခဲ့တယ်လို့ Arakan Project အဖွဲ့ က Chris Lewa က ပြောဆိုကြောင်း RFA ရဲ့ သတင်းမှာဖော်ပြပါရှိပါတယ်။

    RFA မှာ ဖော်ပြထားသော သတင်းတပုဒ်တွင်  ရခိုင်ပြည်နယ် ဘူးသီးတောင် လွှတ်တော်အမတ် ဦးရွှေမောင်း အခင်းဖြစ်ပွားမှုနဲ့ ပတ်သက်ပြီး အောက်ပါအတိုင်းပြောပါတယ်။

    “သက်ဆိုင်ရာ ကာယကံရှင်တွေကတော့ သူတို့ရဲ့နီးစပ်ရာ ဆွေမျိုးတွေရဲ့ ပြောပြချက်အရပဲ သိရတယ်၊ သူတို့ကိုယ်တိုင်ကလည်း အလောင်းကို မမြင်တွေ့နိုင်သေးဘူး၊ ဘာဖြစ်လို့လဲဆိုတော့ ရွာထဲကိုသွားလို့မရလို့၊ ဒီလိုအခြေအနေမှာ ဒါကိုထင်သာမြင်သာရှိအောင် လုပ်ပေးမှသာ ပကတိအခြေအနေမှန်ကိုသိမယ်၊ အားလုံးကိုလုံခြုံမှုပေး၊ အားလုံးကိုအာမခံပေး၊ အဲဒီမှာအမှန်တကယ် ပြစ်မှုကျူးလွန်တဲ့လူကို ပြစ်ဒဏ်ပေးရမယ်”

    သို့သော်လည်း ရခိုင်ပြည်နယ်ပြောရေးဆိုခွင့်ရှိသူ ၀င်းမြိုင်ကမူ ထိုဒေသတွင် အခြေအနေမှာ တင်းမာနေသည်မှာ မှန်ကန်သည်ဟု ပြောကြားခဲ့ပြီး၊  အများအပြားသတ်ဖြတ်ခံရမှု သတင်းအား ငြင်းဆိုခဲ့ပါတယ်။

    ယခုဖြစ်ပွားခဲ့သော ရိုဟင်ဂျာများ အစုလိုက် အသတ်ဖြတ်ခံရမှုနှင့်ပတ်သက်ပြီး ပြည်တွင်း မြန်မာမီဒီယာများတွင် ယခုအချိန်ထိ ဖော်ပြခြင်းတစုံတရာ မတွေ့ရှိရသေးပေ။

    Ref: AP &RFA

  • မောင်တောမြို့ တောင်ဖက်ပိုင်းဒေသ တရုတ်ကုမ္ပဏီ ရှားပါးသတ္တုများ တွေ့ရှိ

    ဇန်နဝါရီ ၁ ၊ ၂၀၁၃

    Titanium

    ရခိုင်ပြည်နယ်၊ မောင်တောမြို့ တောင် ပိုင်း အလယ်သံကျော်ကမ်းခြေနဲ့ ရသေ့တောင်မြို့နယ် အငူမော် ကမ်းခြေတဝိုက်မှာ တရုတ်နိုင်ငံ အခြေစိုက် Gold Finder သတ္တုတူးဖော်ရေးကုမ္ပဏီက အလူမီနီယမ် Aluminiumနဲ့ တိုက်တေနီယမ် Titaniumဓါတ်သတ္တုတွေ အမြောက်အများ တွေ့ရှိ ထားတယ်လို့ RFA က စုံစမ်းသိရပါတယ်။

    အဲဒီကမ်းခြေတဝိုက်မှာ အလူမီနီယမ်နဲ့ တိုက်တေနီယမ် ဓါတ်သတ္တုတွေပါဝင်တဲ့ ရှားပါးသဲမြေတွေကို တွေ့ရှိရတာဖြစ်ပြီး အဲဒီ  Gold Finder ကုမ္ပဏီအနေနဲ့ စမ်းသပ်မှုတွေ ပြုလုပ်နေဆဲဖြစ်ကြောင်း ရခိုင်ပြည်နယ် အစိုးရအဖွဲ့ သစ်တောနဲ့ သတ္တုဝန်ကြီး ဦးအောင်သန်းတင်က RFA ကို ပြောကြားပါတယ်။

    Gold Finder ကုမ္ပဏီအနေနဲ့ပြည်ထောင်စု အစိုးရ၊ပြည်နယ်အစိုးရတွေရဲ့ ခွင့်ပြုချက်နဲ့ ပြီးခဲ့တဲ့ နိုဝင်ဘာလဆန်းပိုင်းက စတင်ပြီး  စမ်းသပ်မှုတွေ ပြုလုပ်နေတာလို့ သိရပါတယ်။ အဲဒီကမ်းခြေတွေက သဲမြေတွေဟာ သဲတန်ချိန်ပေါင်း ၅ဝဝ မှာ အလူမီနီယမ်နဲ့ တိုက်တေနီယမ် သတ္တုအလေးချိန် ၁ တန်အထိ သန့်စင်ရယူနိုင်တယ်လို့လည်း သိရပါတယ်။

    တိုက်တေနီယမ်သတ္တုဟာ အဖိုးတန်ဓါတ် သတ္တုတစ်မျိုးဖြစ်ပြီး ပေါ့ပါးပြီးမာကျောတဲ့အတွက် လေယာဉ်အင်ဂျင်နဲ့ ဒုံးကျည်တွေ၊ အာကာသယာဉ်တွေပြုလုပ်ရာမှာ အသုံးပြုတဲ့ သတ္တု တစ်မျိုးဖြစ်တယ်လို့ ကျွမ်းကျင်သူတွေက ပြောကြပါတယ်။

    via RFA

  • မောင်တောမြို့ ကိုင်းကြီး မွတ်စလင်မ်ကျေးရွာ မီးရှို့ခံရ

    မောင်တောမြို့ ကိုင်းကြီး မွတ်စလင်မ်ကျေးရွာ မီးရှို့ခံရ

    နိုဝင်ဘာ ၁၉၊ ၂၀၁၂
    M-Media
    ထွန်းတောက်

    ရခိုင်ပြည်နယ် မောင်တောမြို့ရှိ ကိုင်းကြီးမွတ်စလင်မ်ကျေးရွာအား ၂၀၁၂ ခုနှစ် နိုဝင်ဘာ ၁၉ ရက် ည ၁၀-နာရီခန့်က အကြမ်းဖက်သမားများက မီးရှို့ခဲ့ကြောင်း သတင်းရရှိပါတယ်။

    “အခုည ၁၀-နာရီလောက်က မောင်တောက ကိုင်းကြီးဆိုတဲ့ မွတ်စလင်မ်ရွာကို အကြမ်းဖက်သမားတွေက မီးစရှို့ခဲ့တာ။ နတလကလူတွေပါ မီးရှို့တာက။ မွတ်စလင်မ်အိမ် ၂၀-လောက် လောင်သွားပြီ။ ကျန်တဲ့ သတင်းကို ဆက်လက်စုံစမ်းနေပါတယ်။ အခုတော့ နစက ရောက်လာပြီး မီးမရှို့ဖို့ တားနေတယ်။

    ပြဿနာတွေ ငြိမ်နေပြီးအခုမှ ပြန်ထလုပ်တာ အိုဘားမားရဲ့မိန့်ခွန်ုကြောင့်များလားလို့ထင်တယ်။ ကျွန်တော်လည်း အခု ဖုန်းနဲ့ခြိမ်းခြောက်ခံနေရတယ်။ ဘယ်သူလဲလို့မေးတာလည်းမဖြေဘူး။ ကိုင်းကြီးက မွတ်စလင်မ်တွေအတွက် ဆုတောင်းပေးကြပါဦးဗျာ”လို့ မောင်တောမြို့ခံမှ M-Media ကို ပြောပြလာပါတယ်။