သြဂုတ် ၄၊ ၂၀၁၈
M-Media
– သီတင်းပတ်နဲ့ချီ မိုးသည်းထန်စွာ ရွာသွန်းမှုကြောင့် ဆည်ပေါင်း ၃၆ ခုလောက် ရေလျှံနေပေမယ့် ကျိုးပေါက်မယ့်အန္တရာယ်တော့ မရှိဘူးလို့ ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာနက ဒုတိယညွှန်ကြားရေးမှူး ဦးကြည်ဝေက ပြောကြားလိုက်ပါတယ်။
“ဆည်တွေကို ရေရှည်ခံမယ့် စံချိန်စံညွှန်းတွေ၊ သတ်မှတ်ချက်တွေနဲ့အညီ အသေအချာ ဆောက်လုပ်ထားတာ ဖြစ်ပါတယ်။ စနစ်တကျ စစ်ဆေးတာတွေကိုလည်း ပုံမှန် လုပ်ဆောင်ပါတယ်။ ဒါ့ကြောင့် ဘာမှ စိုးရိမ်စရာမလိုဘူးလို့ ပြောချင်ပါတယ်”
မြန်မာနိုင်ငံတစ်ဝှမ်းမှာ ဘဖန်းဆိတ်၊ ရေစကြို၊ မိုးနည်းချောင်းနဲ့ ကြည်အုံးကြည်ဝတို့လို ဘက်စုံသုံးဆည်တွေ အပါဝအင် ရေလှောင်တမံပေါင်း ၂၃၅ ခုလောက် ရှိနေတယ်လို့ ညွှန်ကြားရေးမှူးက ပြောပါတယ်။
၂၀၁၅ ခုနှစ်အတွင်း သဖန်းဆိပ် ရေလှောင်တမံမှာ ရေဟာ ၃.၂ ပေလောက် ရေကျော်ခဲ့ပြီး၊ ရေစကြိုရေလှောင်တမံမှာတော့ ၁၃ ပေခွဲလောက် ရေကျော်ခဲ့ပါတယ်။ မိုးနည်းချောင်းနဲ့ ကြည်အုံးကြည်ဝတို့မှာ ၃၅.၈ ပေ၊ ၃၃.၃ ပေ အသီးသီး ရေကျော်ခဲ့ပါတယ်။
ဦးကြည်ဝေကတော့ ပေ ၃၀ ဆိုတာ အမြင့်ဆုံးပမာဏဖြစ်ပြီး အဲဒီလို အမြင့်ဆုံးကို ကျော်သွားတာတောင် ဘာမှမဖြစ်ခဲ့ဘူးလို့ ဆိုပါတယ်။
ကရင်ပြည်နယ် လှိုင်းဘွဲ့မြို့နယ်က ပြည်သူ့လွှတ်တော်အမတ် ဦးခင်ချိုက အခုနှစ် ရေကြီးရေလျှံမှုကို ကရင်ပြည်နယ်၊ မွန်ပြည်နယ်နဲ့ ပဲခူးတိုင်းဒေသကြီးတို့က ဆိုးဆိုးဝါးဝါး ခံစားခဲ့ရပြီး လူတွေက စိုးရိမ်ထိတ်လန့်နေတယ်လို့ ပြောကြားခဲ့ပါတယ်။
“ဆည်တွေကို ကျွန်တော်တို့ စိုးရိမ်ပါတယ်။ တကယ်လို့ ပြည်သူတွေ တစ်ခုခုဖြစ်ပြီဆိုရင် လုပ်ဖို့ကိုင်ဖို့က တော်တော်မလွယ်ပါဘူး”
ဦးကြည်ဝေက တာဝန်ရှိသူတွေနဲ့ အင်ဂျင်နီယာတွေဟာ ဆည်တွေကို အနီးကပ် စောင့်ကြည့်နေကြပြီး၊ ကြံခိုင်မှုရှိဖို့အတွက် အချိန်နဲ့တစ်ပြေးညီ ဆောင်ရွက်နေတယ်လို့ ပြောကြားခဲ့ပါတယ်။
ပြီးခဲ့တဲ့သီတင်းပတ်တွေ မိုးသည်းထန်စွာ ရွာသွန်းပြီး တိုင်းဒေသကြီးနဲ့ ပြည်နယ် ၇ ခုမှာ ရေကြီးရေလျှံမှုတွေ ဖြစ်ပေါ်ခဲ့တာကြောင့် အနည်းဆုံး လူ ၁၂ ဦး သေဆုံးကာ လူပေါင်း တစ်သိန်းနီးပါးလောက် ဘေးလွတ်ရာကို ပြောင်းရွှေ့ခဲ့ရပါတယ်။
Ref: mmtimes
