Tag: MyanmarCoup2021

ဒီဇင်ဘာ ၁၅၊ ၂၀၂၁
M-Media

-မြန်မာနိုင်ငံဆိုင်ရာ အာဆီယံအထူးကိုယ်စားလှယ်အဖြစ် ဒုတိဝန်ကြီးချုပ်ကို ခန့်အပ်တာဝန်ပေးဖို့ ကမ္ဘောဒီးယားဝန်ကြီးချုပ် ဟွန်ဆန်က စီစဉ်နေပါတယ်။

ကမ္ဘောဒီးယားဟာ လာမယ့်နှစ် အာဆီယံဥက္ကဌအဖြစ် တာဝန်ယူရမှာပါ။

မြန်မာနိုင်ငံမှာ ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ဖြစ်ပေါ်လာတဲ့ မတည်ငြိမ်မှုတွေကို အထူးကိုယ်စားလှယ်တစ်ဦးခန့်ကာ ကြားဝင်ဖြေရှင်းပေးဖို့ အာဆီယံက စီစဉ်ထားတာပါ။ ဘရူနိုင်းနိုင်ငံရဲ့ ဒုတိယနိုင်ငံခြားရေးဝန်ကြီးကို အထူးကိုယ်စားလှယ်အဖြစ် ဩဂုတ်လမှာ အာဆီယံက ရွေးချယ်ခဲ့ပေမယ့် အာဏာသိမ်းစစ်ကောင်စီက ပူးပေါင်းဆောင်ရွက်မှု မရှိခဲ့ပါဘူး။

လာမယ့်နှစ် ကမ္ဘောဒီးယားက ဥက္ကဌအဖြစ် တာဝန်ယူတဲ့အချိန်မှာ ကိုယ်စားလှယ်အသစ် ထပ်ခန့်ဖို့ ရှိနေပြီး ကမ္ဘောဒီးယားဝန်ကြီးချုပ် ဟွန်ဆန်က တပည့်ဖြစ်သူ ပရက်ဆိုခွန်ကို ခန့်အပ်သွားမယ်လို့ ဒီကနေ့ ပနွမ်းပင်က ဟိုတယ်သစ်ဖွင့်ပွဲမှာ ပြောကြားခဲ့ပါတယ်။

“ဒုတိယဝန်ကြီးချုပ်နဲ့ နိုင်ငံခြားရေးဝန်ကြီးလည်းဖြစ်တဲ့ ပရက်ဆိုခွန်ကို အာဆီယံ အထူးကိုယ်စားလှယ်အဖြစ် ခန့်အပ်မယ်လို့ ကျွန်တော် ဒီကနေ့ အတည်ပြုပါတယ်”

မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးကို တွေ့ဆုံဆွေးနွေး ညှိနှိုင်းရေးအပါအဝင် ဧပြီလ အာဆီယံထိပ်သီးအစည်းအဝေးမှာ ရထားတဲ့ သဘောတူညီချက်က တာဝန်တွေအတိုင်း အထူးကိုယ်စားလှယ်က ထမ်းဆောင်ရမှာ ဖြစ်ပါတယ်။

အာဆီယံအဖွဲ့မှာ အင်ဒိုနီးရှား၊ စင်ကာပူနဲ့ မလေးရှားတို့က အာဏာသိမ်းစစ်ကောင်စီကို ဖိအားပေးကာ မြန်မာ့နိုင်ငံရေးပြဿနာကို ဖြေရှင်းလိုပေမယ့် ထိုင်း၊ ကမ္ဘောဒီးယားနဲ့ ဗီယက်နမ်တို့က စစ်ကောင်စီနဲ့ ပူးပေါင်းဆောင်ရွက်ချက်နေတာ ဖြစ်ပါတယ်။

စစ်ကောင်စီခန့် နိုင်ငံခြားရေးဝန်ကြီး ဦး၀ဏ္ဏမောင်လွင်ကို ဟွန်ဆန်က ပြီးခဲ့တဲ့တစ်ပတ်မှာ ဖိတ်​ခေါ်တွေ့ဆုံခဲ့သလို၊ လာမယ့် ဇန်နဝါရီ လဆန်းပိုင်းမှာလည်း ဟွန်ဆန်ကိုတိုင် မြန်မာနိုင်ငံကိုလာကာ အာဏာသိမ်းစစ်ခေါင်းဆောင်နဲ့ တွေ့ဖို့ရှိနေပါတယ်။

ဟွန်ဆန်ဟာ ကမ္ဘောဒီးယားကို နှစ်ပေါင်း ၄၀ နီးပါး အုပ်စိုးထားတဲ့ အာဏာရှင်တစ်ယောက်ဖြစ်ပြီး သားဖြစ်သူကို ရာထူးလွှဲပေးဖို့လည်း စီစဉ်နေပါတယ်။

Ref: The Star

ဒီဇင်ဘာ ၁၄၊ ၂၀၂၁
M-Media

-စစ်ကောင်စီရန်ကြောင့် ထွက်ပြေးလာရတဲ့ မြန်မာပြည်သူတွေကို လူသားချင်း စာနာထောက်ထားမှုဆိုင်ရာ အကူအညီတွေ ဆက်လက်ပေးအပ်သွားမယ်လို့ အိန္ဒိယ မီဇိုရမ်ပြည်နယ်ဝန်ကြီးချုပ် ဇိုရမ်သန်ဂါက ပြောကြားလိုက်ပါတယ်။

ဖေဖော်ဝါရီ ၁ ရက်နေ့က အာဏာသိမ်းပြီးနောက်ပိုင်း မြန်မာစစ်တပ်ရဲ့ အကြမ်းဖက် သတ်ဖြတ်မှုတွေကြောင့် ချင်းပြည်နယ်က ပြည်သူတွေ ထောင်သောင်းချီ အိန္ဒိယနိုင်ငံ မီဇိုရမ်ပြည်နယ်ဖက်ကို ထွက်ပြေးခိုလှုံခဲ့ရပါတယ်။

ဇိုရမ်သန်ဂါဟာ မနေ့က မြန်မာဒုက္ခသည်တွေနဲ့ တွေ့ဆုံခဲ့ပြီး မြန်မာနိုင်ငံက ခိုလှုံလာသူတွေကို အရင်ကတည်းက ကူညီပေးခဲ့ပြီး ရှေ့ဆက်လည်း ကူညီပေးဖို့ အကောင်းဆုံး ကြိုးစားသွားမယ်လို့ ထည့်သွင်းပြောဆိုခဲ့ပါတယ်။

မီဇိုရမ်အစိုးရဟာ ဒုက္ခသည်ကလေးငယ်တွေ ကျောင်းတက်နိုင်ဖို့ပါ စီစဉ်ပေထားပါတယ်။ မြန်မာဒုက္ခသည်တွေကို နိုင်ငံရေး ခိုလှုံသူတွေအဖြစ် တရားဝင်မှတ်ပုံတင်ပေးဖို့ ဗဟိုအစိုးရကို တောင်းဆိုထားသလို၊ ဝန်ကြီးချုပ် မိုဒီ၊ ပြည်ထဲရေးဝန်ကြီး အေမစ်ရှားတို့နဲ့တွေ့ဆုံကာ အကူအညီတွေပေးအပ်ဖို့ တောင်းဆိုခဲ့တယ်လို့ ဇိုရိမ်သန်ဂါက ဆိုပါတယ်။

အိန္ဒိယဟာ ကုလရဲ့ ဒုက္ခသည်ဆိုင်ရာသဘောတူညီချက်တွေမှာ လက်မှတ်ရေးထိုးထားခြင်း မရှိတဲ့အတွက် တရားဝင်ကူညီနိုင်ဖို့ အခက်အခဲတွေ ရှိနိုင်တယ်လို့ မီဇိုရမ်အစိုးရက အစောပိုင်းမှာ ထုတ်ပြန်ပြောကြားဖူးပါတယ်။

မြန်မာနိုင်ငံက ထွက်ပြေးလာရတဲ့သူတွေကို မီဇိုရမ်ပြည်သူတွေကလည်း အကူအညီတွေ ပေးနေကြပါတယ်။

Ref: News18

ဒီဇင်ဘာ ၁၃၊ ၂၀၂၁
M-Media

-နိုင်ငံတစ်ဝှမ်းက အိုးအိမ်စွန့်ခွာ ထွက်ပြေးရသူတွေ၊ အတိဒုက္ခရောက်နေသူတွေအပေါ် နိုင်ငံတကာအသိုင်းအ၀ိုင်းက ကူညီပေးနေတာတွေကို အာဏာသိမ်းစစ်ကောင်စီက ဟန့်တား နှောက်ယှက်နေတယ်လို့ လူ့အခွင့်အရေး စောင့်ကြည့်အဖွဲ့ HRW က ဒီကနေ့မှာ ထုတ်ပြန်ပြောဆိုပါတယ်။

အကူအညီပေးရေးအဖွဲ့တွေကို သွားလာမှု ကန့်သတ်ချက်အသစ်တွေ ထုတ်တာ၊ လမ်းတွေ ပိတ်ထားတာ၊ အကူအညီပစ္စည်းတွေကို ဖျက်ဆီးပစ်တာ၊ အကူအညီပေးရေးဝန်ထမ်းတွေကို တိုက်ခိုက်သတ်ဖြတ်တာ၊ ဖုန်းလိုင်းတွေ ဖြတ်တောက်ပစ်တာ စတဲ့ နည်းလမ်းပေါင်းစုံနဲ့ စစ်ကောင်စီက အကူအညီတွေကို ပိတ်ပင်နေတာပါ။

စစ်အာဏာသိမ်းပြီးနောက်ပိုင်း အခြေခံအဆောက်အဦးတွေ ပြိုလဲသွားတာ၊ ကျပ်ငွေတန်ဖိုးကျဆင်းတာ၊ ဘဏ်စနစ် အလုပ်မလုပ်တော့တာ၊ ရိက္ခာ၊ ဆေးဝါးနဲ့ အခြားအရေးပါတဲ့ အသုံးအဆောင်တွေရှားပါးတာတွေကလည်း အကူအညီပေးရေးလုပ်ငန်းတွေကို အဟန့်အတားဖြစ်စေတယ်လို့ HRW က ပြောပါတယ်။

“လူသိန်းချီ ထွက်ပြေးရအောင်လုပ်တာ၊ အသက်ရှင်ဖို့အရေးကြီးတဲ့ အထောက်အပံ့တွေကို တားဆီးတာမျိုးနဲ့ လူသားချင်းစာနာထောက်ထားမှုဆိုင်ရာ ပြဿနာဖြစ်အောင် စစ်ကောင်စီက လုပ်နေတာပါ။ ပဋိပက္ခဒဏ်ခံနေရတဲ့လူတွေ အသက်ရှင်ရပ်တည်ဖို့ လိုအပ်တဲ့အထောက်အပံ့တွေကို အာဏာသိမ်းပြီးကတည်းက ဗိုလ်ချုပ်ကြီးတွေက တားဆီးပိတ်ပင်လာတာဖြစ်ပြီး၊ ပြည်သူတွေကို အပြစ်ပေးတဲ့ပုံစံမျိုးနဲ့ ဒါတွေကို လုပ်ဆောင်တာ ဖြစ်ပါတယ်” လို့ HRW ရဲ့ အာရှဆိုင်ရာ သုတေသနပညာရှင် ရှေနာ ဘောင်ချနာက ပြောပါတယ်။

ချို့တဲ့ပြည်သူတွေထံ နိုင်ငံတကာအသိုင်းအ၀ိုင်းက ထောက်ပံ့ကူညီတာကို မြန်မာစစ်တပ်ဟာ အရင်ကတည်းက နည်းမျိုးစုံနဲ့ ပိတ်ပင်ဟန့်တားတဲ့အကျင့် ရှိပါတယ်။

​မြန်မာနိုင်ငံမှာ အသက်ရှင်ရပ်တည်ဖို့ အရေးကြီးတဲ့ အထောက်အပံ့တွေ လိုအပ်သူအရေအတွက်ဟာ ဖေဖော်ဝါရီ ၁ ရက် စစ်အာဏာသိမ်းမှုမတိုင်ခင်က ၁ သန်းလောက် ရှိရာကနေ ၂၀၂၂ ခုနှစ်မှာ ၁၄.၄ သန်း ရှိလာမှာဖြစ်ပြီး အဲဒီအထဲက ၅ သန်းကျော်ဟာ ကလေးငယ်တွေဖြစ်မယ်လို့ ကုလသမဂ္ဂက ခန့်မှန်းတွက်ချက်ထားပါတယ်။ ၂၀၂၂ ခုနှစ်မှာ နိုင်ငံလူဦးရေရဲ့ ၂၅ သန်းကနေ ထက်ဝက်နီးပါးလောက် ဆင်းရဲမွဲတေမှု သတ်မှတ်ချက်အောက်မှာ နေထိုင်ရလိမ့်မယ်လို့လည်း ကုလ ဆိုပါတယ်။

အကူအညီပေးရေး အဖွဲ့တွေကို စစ်ကောင်စီက နှောက်ယှက်ဟန့်တားမှုနဲ့ပတ်သက်ပြီး ကုလ၊ လူ့အခွင့်အရေးကောင်စီ၊ လုံခြုံရေးကောင်စီ၊ အလှုရှင်အဖွဲ့အစည်းတွေနဲ့ နိုင်ငံတကာအသိုင်းအ၀ိုင်းကလည်း ပြီးခဲ့တဲ့လတွေမှာ ကြေငြာချက်တွေထုတ်ပြီး ဝေဖန်ရှုတ်ချထားပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း မြန်မာစစ်တပ်ရဲ့ အကြမ်းဖက်သတ်ဖြတ်မှုကြောင့် နိုင်ငံတစ်ဝှမ်း လူ ၁၃၀၀ ကျော် သေဆုံးခဲ့ပြီး၊ ထောင်သောင်းချီ ဖမ်းဆီးနှိပ်စက်ခံခဲ့ရပါတယ်။ စစ်အာဏာသိမ်းမှုကို ဆန့်ကျင်တဲ့ဒေသတွေမှာ စစ်တပ်က ရွာလုံးကျွတ် မီးရှို့တာတွေ၊ ခိုးဆိုးလုယက်မှုတွေ လုပ်ဆောင်တာကြောင့် အိုးအိမ်စွန့်ခွာထွက်ပြေးရသူအရေအတွက် မြင့်တက်လာပါတယ်။

ကုလသမဂ္ဂက မြန်မာပြည်တွင်း အိုးအိမ်စွန့်ခွာထွက်ပြေးသူအရေအတွက်ဟာ ၆၃၈၀၀၀ လောက်ရှိနေတယ်လို့ ခန့်မှန်းထားပါတယ်။

Ref: HRW.org

ဒီဇင်ဘာ ၁၂၊ ၂၀၂၁
M-Media

-ကုလဆိုင်ရာ မြန်မာသံအမတ် ဦးကျော်မိုးထွန်းကို တိုက်ခိုက်လုပ်ကြံဖို့ ကြိုးစားမှုနဲ့ နယူးယောက်မှာ ဖမ်းဆီးခံထားရတဲ့ ရဲဟိန်းဇော်က ပြစ်မှုကျူးလွန်ဖို့ ကြံစည်ခဲ့ကြောင်း ဝန်ခံလိုက်ပါတယ်။

ဦးကျော်မိုးထွန်းကို လုပ်ကြံဖို့ ကြံစည်မှုနဲ့ပတ်သက်ပြီး အမေရိကန်ရဲတပ်ဖွဲ့က ရဲဟိန်းဇော်နဲ့ ဖြိုးဟိန်းထွဋ်ဆိုတဲ့ မြန်မာလူငယ်နှစ်ဦးကို ဩဂုတ်လမှာ ဖမ်းဆီးခဲ့ပါတယ်။ ဒီကိစ္စမှာ ထိုင်းနိုင်ငံက မြန်မာစစ်တပ်ကို လက်နက်ရောင်းနေသူ တစ်ဦးလည်း ပါဝင်ပတ်သက်နေပါတယ်။

အသက် ၂၀ ကျော်အရွယ် ရဲဟိန်းဇော်ဟာ အခြား ၂ ဦးနဲ့ပေါင်းပြီး ဦးကျော်မိုးထွန်းကို ရာထူးကထွက်ဖို့ ဖိအားပေးကာ၊ လက်မခံရင် သတ်ဖြတ်ဖို့အထိ ကြံစည်ခဲ့တယ်လို့ ရှေ့နေတွေက ပြောပါတယ်။ ဒီလုပ်ကြံမှုအတွက် ကန်ဒေါ်လာ ၅ ထောင်ပေးဖို့လည်း ရဲဟိန်းဇော်က သဘောတူခဲ့ပါတယ်။

သောကြာနေ့က ကြားနာမှုမှာ ရဲဟိန်းဇော်က အမေရိကန်မြေပေါ်မှာပဲ ဦးကျော်မိုးထွန်းကို တိုက်ခိုက် သတ်ဖြတ်ဖို့ ကြံစည်ခဲ့ကြောင်း ဝန်ခံခဲ့တယ်လို့ ရှေ့နေ ဒါမီယံ ဝီလီယံက ပြောပါတယ်။ နိုင်ငံခြား သံအမတ်တွေနဲ့ တာဝန်ရှိသူတွေရဲ့ လုံခြုံရေး၊ ဒီကြံစည်မှုမှာ ပါဝင်ရှိသူတွေကို တရားဥပဒေရှေ့မှောက် ခေါ်ဆောင်လာနိုင်ရေးအတွက် စွမ်းစွမ်းတမံ ဆောင်ရွက်ပေးခဲ့တဲ့ ဥပဒေစိုးမိုးရေးတာဝန်ရှိသူတွေ၊ အစိုးရအဖွဲ့တွေကို ကျေးဇူးတင်တယ်လို့လည်း ဝီလီယံက ထည့်သွင်းပြောဆိုခဲ့ပါတယ်။

ဒေါ်အောင်ဆန်းစုကြည်အစိုးရလက်ထက်က ကုလသံအမတ်အဖြစ် ခန့်အပ်ခံခဲ့ရတဲ့ ဦးကျော်မိုးထွန်းဟာ အာဏာသိမ်းစစ်ကောင်စီကို ဆန့်ကျင်ခဲ့တဲ့အတွက် စစ်ကောင်စီက ဖယ်ရှားဖို့ ကြိုးစားနေတာ ဖြစ်ပါတယ်။ နယူးယောက်က လူငယ်နှစ်ဦး ဦးကျော်မိုးထွန်းကို လုပ်ကြံဖို့ကြိုးစားမှုမှာ စစ်ကောင်စီက ပါဝင်ပတ်သက်မှုရှိလားဆိုတာ အတိအကျ မသိရပါဘူး။

ရဲဟိန်းဇော်ကို မေလမှာ အမိန့်ချဖို့ရှိနေပြီး ထောင်ဒဏ် ၅ နှစ်အထိ ချမှတ်ခံရဖွယ် ရှိနေပါတယ်။

Ref : The Star

ဒီဇင်ဘာ ၁၀၊ ၂၀၂၁
M-Media

-စစ်အာဏာသိမ်းမှုဆန့်ကျင်ရေး ဆန္ဒပြသူတွေအပေါ် စစ်ကောင်စီတပ်တွေက စနစ်တကျ အကြမ်းဖက် တိုက်ခိုက်သတ်ဖြတ်မှုနဲ့ပတ်သက်ပြီး စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ရာဇဝတ်မှုဆိုင်ရာ စုံစမ်းစစ်ဆေးမှုလုပ်ဖို့ မြန်မာ့အရေးဆောင်ရွက်နေတဲ့ အဖွဲ့တစ်ခုက နိုင်ငံတကာ ရာဇဝတ်ခုံရုံး (ICC) ကို တောင်းဆိုလိုက်ပါတယ်။

မြန်မာစစ်တပ်ရဲ့ လူ့အခွင့်အရေးချိုးဖောက်မှု၊ အကြမ်းဖက်မှုတွေကို မှတ်တမ်းယူနေတဲ့ Myanmar Accountability Project (MAP) အဖွဲ့က ဒီကနေ့ ICC ကို စာနဲ့ သက်သေအထောက်အထားတွေ ပေးပို့ခဲ့ပြီး ဖေဖော်ဝါရီ ၁ ရက်နေ့​နောက်ပိုင်း စစ်ကောင်စီတပ်တွေက လုပ်နေတဲ့ လူသားထုအပေါ် ကျူးလွန်တဲ့ ရာဇဝတ်မှုတွေအတွက် စစ်ခေါင်းဆောင်မှာ တာဝန်ရှိတယ်လို့ ဖော်ပြထားပါတယ်။

“သူ့ရဲ့ကွပ်ကဲမှုအောက်က လုံခြုံရေးတပ်ဖွဲ့ဝင်တွေ ကြမ်းကြုတ်တဲ့ရာဇဝတ်မှုတွေကို အကြီးအကျယ် ကျူးလွန်မှုနဲ့ပတ်သက်ပြီး မတရားအာဏာသိမ်းလိုက်တဲ့ စစ်ခေါင်းဆောင်မှာ တာဝန်ရှိပါတယ်” လို့ MAP ရဲ့ ဒါရိုက်တာ ခရစ် ဂန်းနက်စ်က ပြောပါတယ်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ICC က ပြစ်ဒဏ်ချမှတ်နိုင်မယ်ဆိုတဲ့ မျှော်လင့်ချက်မျိုး မိမိတို့ ထားရှိပြီး ဖမ်း၀ရမ်းထုတ်ဖို့အတွက် ခိုင်လုံတဲ့ အထောက်အထား အများအပြား ရှိနေတယ်လို့ ယုံကြည်ကြောင်း ဂန်းနက်စ်က ထည့်သွင်းပြောဆိုခဲ့ပါတယ်။

ဖေဖော်ဝါရီ ၁ ရက်​နေ့ အာဏာသိမ်းပြီးနောက်ပိုင်း စစ်ကောင်စီတပ်တွေရဲ့ အကြမ်းဖက်မှုကြောင့် ​နိုင်ငံတစ်ဝှမ်း လူ ၁၃၀၀ ကျော် သေဆုံးခဲ့ပြီး ထောင်နဲ့ချီ ဖမ်းဆီနှိပ်စက်ခံခဲ့ရပါတယ်။

ကုလရဲ့ မြန်မာနိုင်ငံဆိုင်ရာ စုံစမ်းစစ်ဆေးရေးအဖွဲ့ခေါင်းဆောင် နီကိုလက်စ် ကူမီဂျန်က အာဏာသိမ်းပြီးနောက်ပိုင်း စစ်ကောင်စီတပ်တွေရဲ့ ကျူးလွန်မှုအထောက်အထား စုစုပေါင်း ၂၁၉၀၀၀ ကျော်ကို စုဆောင်းထားတယ်လို့ ထုတ်ပြန်ထားပါတယ်။

Ref: TRT