News @ M-Media

Tag: New Muslim

  • အစ္စလာမ့် အေးရိပ်ဆာယာသို့(၇)- အွန်လိုင်းပေါ်က သက်ဝင်မှု

    အစ္စလာမ့် အေးရိပ်ဆာယာသို့(၇)- အွန်လိုင်းပေါ်က သက်ဝင်မှု

    သြဂုတ်၊ ၂၃၊ ၂၀၁၂

    M-Media

    ဂျူလိုင်ရဲရင့်

    အွန်လိုင်းပေါ်က သက်ဝင်မှု(Embracing Islam In Cyberspace)

    A Colllection of Stories on Why  They Embrace Islam TMR  ( The Muslim Reader ) 2010 – 2011 , Singapore

    အွန်လိုင်းပေါ်က အစ္စလာမ့်သွေးစည်းမှုကို စတင်နှစ်သက်ခံစားမိရာမှ မုစ်လင်မ်သစ်လွင်ဖြစ်လာခဲ့သော အဖီယဟ် ကီကို ၀ါတာနာဘေး

         ဂျပန်နိုင်ငံ မြို့ငယ်လေးတစ်ခုကနေ ကြီးပြင်းလာသူဖြစ်လို့ အစ္စလာမ့်အကြောင်း ကျွန်မ ဘာမှ မသိခဲ့ပါဘူး။ ဂျပန်နိုင်ငံမှာ မုစ်လင်မ်လူဦးရေ လေးထောင်ကျော်ရှိနေပေမယ့် တကယ့်ကို လူနည်းစုလေးပါ (အများအားဖြင့် မုစ်လင်မ်သစ်လွင်တွေ ဖြစ်ကြပါတယ်)။ အစ္စလာမ်ကို ကျွန်မရှာဖွေတွေ့ရှိခြင်း နဲ့ ကျွန်မရဲ့အစ္စလာမ့်သက်ဝင်မှုဟာဖြင့် တမူထူးခြားတယ်လို့ ဆိုနိုင်ပါတယ်။ အဲ့ဒီ ဟိဒါယဟ် (လမ်းညွှန်တရား)က စက်မှုနည်းပညာပစ္စည်းတစ်ခုဖြစ်တဲ့ ကွန်ပျူတာကနေတဆင့် ရောက်ရှိလာလို့ပါဘဲရှင်။

    သူလိုကိုယ်လို ပုံသေဘ၀မှသည် …..

    ဘယ်မုစ်လင်မ်တစ်ဦးတစ်ယောက်ကိုမှ ကောင်းကောင်းကန်းကန်း မတွေ့ဆုံဖူးပေမယ့် မုစ်လင်မ်တွေကိုကြည့်ပြီး အစ္စလာမ်ဆိုတာကို ကျွန်မ သိခဲ့ပါတယ်။ ဂရိမှာ ကျွန်မ သုံးနှစ်နီးနီး အလုပ်လုပ်ယင်း နေထိုင်ခဲ့ပါတယ်။ အဲ့ဒီမှာ ကျွန်မဘ၀က အဲ့ဒီက လူတွေအတိုင်း ပုံသေကားချပ်ဖြစ်လို့နေခဲ့တယ်။ ကျွန်မလုပ်ဖော်ကိုင်ဖက်တွေနဲ့အတူ ညစဉ်ညတိုင်း သောက်စားလိုက် ကခုန်လိုက်နဲ့ ဘဲပေါ့။  ”  သက်တမ်းတိုတိုလေးထဲမှာ ပျော်သာပျော်  ” ဆိုတဲ့ အတွေးအခေါ်ကို လက်ကိုင်ပြုနေခဲ့တာလေ။

    နောက်ပိုင်းမှာကျတော့ ကံဆိုးမိုးမှောင်ကျပါလေရော။ ကျွန်မရည်းစား စီးပွားပျက်ပြီး မွဲတေသွားတယ်။ သူက ကျွန်မရဲ့ အကြွေးဝယ်ကဒ်ကိုယူသုံးယုံတင်မကသေးဘူး – ငွေချေးပေးဖို့တောင်းဆိုတဲ့အထိ ဖြစ်လာတယ်။ ကျွန်မတို့နှစ်ယောက်စလုံး ငွေခန်း သလောက်ဖြစ်လာတော့ ကျွန်မ သူ့ကို လုံးဝ မကူညီနိုင်တော့ဘူး။ သူမပြောပေမယ့် ကျွန်မသိတယ် – သူ အကြွေးပုံကြီးထဲ နစ်ဝင်နေပြီ ဆိုတာကိုလေ။

    မိခင်ကိုပြုစုဖို့ ပြည်တော်အပြန်

                   တစ်ချိန်တည်းမှာဘဲ ဂျပန်မှာရှိတဲ့ ကျွန်မမိခင်ဟာ ၀ဲဖက်ကျောက်ကပ်ကို အကြီးစားခွဲစိပ်ကုသမှုကိစ္စ ပေါ်လာခဲ့တယ်။

    မေမေဟာ ကျွန်မအပေါ်စိုးရိမ်စိတ်နဲ့ အမြဲမပြတ်ငိုကြွေးနေခဲ့တာသိရတော့ ကိုယ့်ကိုယ်ကို ပြစ်တင်လို့မဆုံးနိုင်တော့ပါဘူး။ အဲ့ဒါ  ကျွန်မကြောင့်ပေါ့ ……….။  ကျွန်မရဲ့အလုပ်အကိုင်နဲ့ ရည်းစားကိုစွန့်ခွါလို့ မွေူးရပ်မြေ မတ်ဆုယာမားမြို့ဆီ မိဘများနဲ့အတူနေဖို့ အပြေးပြန်ခဲ့ပါတယ်။ နှစ်လတိုင်တိုင် ကျွန်မဖေဖေအတွက် မနက်စာပြင်ဆင်ကူညီပေးခဲ့တယ် – ဆေးရုံမှာရှိတဲ့ မေ့မေ့ကိုပြုစုဖို့ မသွားသေးခင်အချိန်လေးမှာပေါ့။

    လေသံသဲ့သဲ့နဲ့ မေမေ့ ညည်းသံကို ကျွန်မလေ ခုထက်ထိ ကြားယောက်နေဆဲပါ။  ”  ကီကိုရယ်၊ မေမေ့ ခင်းနှီးတွေကို လဲလှယ်ပေးနေရလို့ သမီးလက်တွေ ပေကျံကုန်ပြီ၊ မေမေ စိတ်မကောင်းဘူးကွယ် ” တဲ့လေ။ ဆေးရုံထဲမှာ – မေမေ့ရှေ့မှာ ကျွန်မ မျက်ရည်တစ်စက်မှ မကျစေခဲ့ပါဘူး။ ဒါပေမယ့် နေ့စဉ်နဲ့အမျှ တစ်ကိုယ်တည်းရှိနေချိန်မှာတော့ မေမေ့ဖြစ်အင်အတွက် ကိုယ့်ကိုယ်ကို အပြစ်တင်ယင်း ငိုကြွေးနေမိတယ်။ ဘုရားသခင်က ကျွန်မအပေါ် ဒုက္ခတွေရောက်စေ – ဖြစ်စေတာက ကျွန်မကို လမ်းမှန်ဆီ ရောက်သွားစေတဲ့အကြောင်း အဲ့ဒီတုန်းက ဘယ်နားလည်ပါ့မလဲ။ မေမေပြန်ကျန်းမာလာပြီး အိမ်ပြန်ရောက်တဲ့အခါ ကျွန်မလေ အကောင်းဆုံး ပြုစုနေထိုင်ခဲ့တယ်။ ကျွန်မအပေါ် ထာဝစဉ်အချစ်ပိုတဲ့မေမေက ကျွန်မကို ဂျပန်ပြင်ပမှာ  အလုပ်တစ်ခု ထပ်ရှာဖို့ အားပေးတိုက်တွန်းရှာပါတယ်။

    တိုကျိုမှာဘဲ အလုပ်ဝင်ပြီ

    လစဉ်လတိုင်း မိဘတွေကို ပြန်ကြည့်နိုင်ဖို့အတွက် တိုကျိုမြို့က ဂျပန်ဘောလုံးအသင်းမှာ အလုပ်တစ်ခု ဇောက်ချ လုပ်ကိုင်လိုက်ပါတယ်။ အဲ့ဒီကာလမှာဘဲ အင်တာနက် ချက်တင်လိုင်းကနေတစ်ဆင့် စင်္ကာပူက မုစ်လင်မ်တစ်ဦးနဲ့ ကျွန်မ သိကျွမ်းခဲ့ ပါတယ်။ မုစ်လင်မ်ဆိုတာ ဘယ်လိုမျိုးလဲ – ကျွန်မ မသိခဲ့တော့ သိချင်စိတ် ပြင်းပြလာခဲ့တယ်။ အစ္စလာမ်အကြောင်းဖော်ပြတဲ့ ဂျပန် ဘာသာ ၀က်ဘ်ဆိုဒ် တစ်ခုကို ရှာဖွေလေ့လာဖြစ်တယ်။ အဲ့ဒီဆိုဒ်ရဲ့ ပင်မစာမျက်နှာ  Home Page  ကို ဖန်တီးပုံဖော်ထားသူဟာ ကျွန်မတို့ဇာတိမြို့ငယ်က အိမာမ်တစ်ပါးဖြစ်နေလို့ အလွန်ဘဲ စိတ်ဝင်စားသွားရတယ်။ အဗူ မုဟ်ဒီ စုလိုင်မာန် ဟမနာကာ တဲ့လေ။

    အဲ့ဒီဆိုဒ်ထဲကအဖွဲ့ဝင်တွေနဲ့ ကျွန်မက စတင်ပြီး အပြန်အလှန် ဆက်သွယ်ပါတော့တယ်။ ဆိုဒ်ထဲမှာ ဆောင်းပါးတွေ၊ အစ္စလာမ်နဲ့ပတ်သက်တဲ့ မေးခွန်း/ပြသနာ နဲ့ သတင်းဖော်ပြချက်တွေ – အစုံပါဝင်နေပါတယ်။ အဗူ မုဟ်ဒီကိုယ်တိုင်လည်း ကမ္ဘာတစ်လွှားက ဂျပန်လူမျိုးမုစ်လင်မ်အမျိုးသားအမျိုးသမီးတွေနဲ့ အွန်လိုင်းပေါ်ကနေ ပြောဆိုဆွေးနွေးတယ်၊ မုစ်လင်မ်သစ်လွင် တွေရဲ့ မေးမြန်းမှုများကို ဖြေဆိုကူညီပေးလေ့ရှိတယ်လေ။ ဒီလိုလျှို့ဝှက်ဆက်သွယ်မှုနဲ့ မုစ်လင်မ်မိတ်ဆွေသစ် အများအပြား ရလာတယ်။ စအူဒီအာရေဗျ၊ အင်ဒိုနီးရှား၊ အီဂျစ်၊ ဆီးရီးယား၊ မလေးရှား၊ စင်္ကာပူ၊ ဂျပန်၊ အို – ကမ္ဘာအနှံ့က လူတွေဘဲ ဆိုပါတော့။ ချက်တင်ရွန်းမ်မှာ တွေ့ရတဲ့ ဒီမုစ်လင်မ်တွေဟာ ကျွန်မအပေါ် ဆွဲဆောင်နိုင်လွန်းလှပေတယ်။ သူတို့ဟာ အင်မတန် ယဉ်ကျေးသိမ်မွေ့ကြတယ်၊ နွေးထွေးမှုရှိတယ်၊ ပြီးတော့ ရိုးသားကြတဲ့ အတွက်ကြောင့် ဖြစ်ပါတယ်။ ကျွန်မတို့ဟာ တစ်ဦးကိုတစ်ဦး တစ်ကြိမ်တစ်ခါမျှ မမြင်မတွေ့ဖူးကြသည့်တိုင်အောင် အချင်းချင်း အထူးခင်မင်ရင်းနှီးသွားပါရောလား။

     

    ကွာလာလမ်ပူက သူငယ်ချင်း
    သူတို့ရဲ့အဖွဲ့ထဲမှာ ကျွန်မ စိတ်ချမ်းသာလိုက်တာရှင်။ ဂရိမှာ ဖြတ်သန်းခဲ့ရတဲ့ ဘ၀သာယာမှုနဲ့ ကွာလွန်းမက ကွာခြားလိုက်လေခြင်း။ အဲ့ဒီနောက် စင်္ကာပူကခေါ်တဲ့ အလုပ်တစ်ခု ကျွန်မ ရသွားတယ်။  မေမေကတော့ ကျွန်မအတွက် ၀မ်းသာလိုက်တာလွန်ပါလေရော။ အခုအချိန် ကျမှ ပြန်စဉ်းစားမိတယ် – အဲ့ဒါဟာ ကျွန်မအဖို့ အားလုံးအတွက် အခွင့်အလမ်းပွင့်သွားစေခဲ့တာလေ။ ကျွန်မ မုစ်လင်မ်တွေနဲ့သိကျွမ်းပြီး အစ္စလာမ်ကိုရှာဖွေနေခဲ့စဉ်က ကျွန်မဟာ မိဘတွေအပေါ် အပြစ်ပြု မိနေသလိုမျိုး ခံစားနေခဲ့ရတယ်။ နောက်ဆုံးမှာ ကျွန်မအနေနဲ့ မုစ်လိမဟ် ( အစ္စလာမ်သာသနာဝင် အမျိုးသမီး ) ဖက်လှည့်သွားရေးအတွက် အလ္လာဟ်အရှင်မြတ် ( SWT ) ရဲ့ အစီအမံတစ်ရပ်ဘဲလို့ ဆိုရမှာပါ။ စင်္ကာပူကနေမပြန်ခင် နှစ်လအလိုမှာတော့ ယှဟာဒဟ်ကို ကြေငြာဖို့ ကျွန်မ အရံသင့် ဖြစ်သွားခဲ့ပါပြီ။

    ဒီလိုခြေစုံပစ်ဝင်ရောက်လာရတဲ့ အဓိကအကြောင်းရင်းကတော့ ကျွန်မရဲ့အပြစ်အားလုံး ခွင့်လွှတ်ခံရရေးအတွက်ဖြစ်ပါတယ်။ ဒါ့ပြင် အစ္စလာမ်က ကျွန်မကို သိက္ခာရှိတဲ့အမျိုးသမီး ဖြစ်လာစေ တာလည်း ပါတာပေါ့။ အစ္စလာမ်မှာက ကျွန်မ သိချင်တဲံအရာတိုင်းအတွက် အဖြေ ရှိနေကြတယ်။ ကျင့်ကြံဖို့လည်း လွယ်ကူတယ်လေ။ ဒါကြောင့် ကျွန်မ လုပ်သင့်တဲ့အရာနဲ့ စတင်အပ်တဲ့အချိန်ကို ရွေးချယ်လိုက်ပါတယ်။ အလ္လာဟ်အရှင်မြတ် (SWT) က ကျွန်မရဲ့ ရည်ရွယ်ချက်တိုင်းကို သိရှိနေတော်မူလေတော့ ကျွန်မရဲ့လုပ်ဆောင်မှုမှန်သမျှ အလ္လာဟ့်အတွက် ဖြစ်ရပါတော့မယ်လေ။

    အထီးမကျန်တဲ့ လက်ဦး ရမ်ဒွါန်

    ကျွန်မ မုစ်လိမဟ် ဖြစ်ပြီး နှစ်လသမီးအရွယ်မှာ ပထမဆုံး ရမ်ဒွါန်ကို ကြုံကြိုက်ခဲ့ရတယ်။ အိမ်ထဲမှာ ကျွန်မ တစ်ယောက်တည်း ………   ဒါပေမယ့် ကျွန်မ ၀မ်းနည်းအားငယ်မှုကို မခံစားရဘူး။ ဘာကြောင့်လဲဆိုတော့ ကျွန်မရဲ့ မုစ်လင်မ်သူငယ်ချင်းတွေအားလုံး အွန်လိုင်းမှာ ကျွန်မနဲ့အတူတူ ရှိနေကြလို့ပါဘဲ။ အစ္စလာမ့်သွေးစည်းမှုက နက်နဲတဲ့ခံစားချက်ကို ဖြစ်ထွန်းလာစေခဲ့ပါတယ်။

    ဒီလို အိခ်ဝါ (ညီနောင်ဖွဲ့ခြင်း)ရဲ့ အနှစ်ရသကို ရရှိစေတဲ့ အင်တာနက်ကိုလည်း ကျေးဇူးတင်မိပါတယ်။ အင်တာနက်ကနေတဆင့် ပထမဆုံး မုစ်လင်မ်မိတ်ဆွေတစ်ဦးကို ဆုံစည်းမိချိန် ကတည်းက ကျွန်မအပေါ် အလ္လာဟ့်ကရုဏာတော် သက်ရောက်လိုက်ပြီဆိုတာ ကျွန်မ သိရှိနားလည် သွားခဲ့ပါတယ်။ အခုဆိုယင် ကျွန်မဆီမှာ ဒုက္ခတစ်ခုခုကြုံလေတိုင်း အလ္လာဟ်အရှင်မြတ်ရဲ့ စမ်းသပ်ချက်တစ်ရပ်လို့ သိနေပြီလေ။ အဲ့ဒီဒုက္ခရဲ့အကျိုးဆက်က ဘာပဲဖြစ်ပါစေ ကျွန်မအတွက် အကောင်းဆုံးတစ်စုံတစ်ရာဖြစ်လာအောင် အလ္လာဟ်အရှင်က စီစဉ်ပေးတော်မူမှာပါ။ မုစ်လိမဟ် တစ်ဦးအဖြစ် ဘ၀ဆောက်တည်ခွင့်ရလို့ ကျွန်မ အလွန်တရာ ကြည်နှူးဝမ်းမြောက်မိပါတယ်။ ပြီးတော့ မုစ်လင်မ်မဟုတ်သူများအပေါ် ကျွန်မရဲ့ ရှာဖွေတွေ့ရှိချက်တွေကို

    ဝေမျှပေးနိုင်ဖို့လည်း မျှော်လင့်လျက်ပါဘဲရှင်။

     

     

    ပုံဖော်ရေးသားတင်ဆက်သူ

    Johari  Abdul  Aziz

    From –  TMR : Vol 19 , No.1 , Pg 28-29

               TMR :   Following  Faith ( 2010 – 2011 ), Pg 39

     


  • အစ္စလာမ့် အေးရိပ်ဆာယာသို့(၅)- သာတူညီမျှ မုစ်လင်မ်တို့ဘ၀

    အစ္စလာမ့် အေးရိပ်ဆာယာသို့(၅)- သာတူညီမျှ မုစ်လင်မ်တို့ဘ၀

    တန်းတူညီမျှစံနစ်ကို အပြင်းစားယုံကြည်ရာမှ အစ္စလာမ့်ဘောင်သို့ရောက်ရှိလာသော အဆင့်မြင့် မိုဘိုင်းလ်ပညာရှင် အမေရိကန်သူ ကာရိုးလ် စတုန်း – Carol Stone
    The Muslim Reader ( TMR )  နှင့်  Carol Stone ( CS ) ၏  တွေ့ဆုံမေးမြန်းချက်များ

    ဂျူလိုင်ရဲရင့်

    ( TMR )   အစ္စလာမ်နဲ့ပတ်သက်တဲ့ ခင်ဗျားရဲ့စဦးအတွေ့အကြုံရယ် ၊ ပြီးတော့ နောက်ပိုင်းမှာ အစ္စလာမ်ကိုလက်ခံလာပုံလေးရယ် ပြောပြစေချင်ပါတယ်။
    ( CS )    ကောလိပ်မှာတုန်းက ကျွန်မ အစ္စလာမ်အကြောင်းကို လေ့လာခွင့်ကြုံခဲ့တယ်။ ကျွန်မ အင်္ဂလိပ်စာပြနေတချိန်ကပေါ့။ ကျောင်းသားတစ်ဦးက ကျွန်မကို လက်ဆောင်အနေနဲ့ ကုရ်အာန်တစ်စုံကိုပေးခဲ့တယ်။ ကျွန်မက စာအုပ်စင်ပေါ် အသာတင်ထားလိုက်တာ လပေါင်းများစွာကြာတဲ့အထိပါဘဲ။ ဒီလိုနဲ့ တစ်ညနေခင်းတော့ ကျွန်မရဲ့ စိတ်ပညာဆိုင်ရာမှတ်စုတွေဖတ်အပြီးမှာ ကုရ်အာန်ကို ကောက်ကိုင်လိုက်မိတယ်။
    ခါတိုင်းဆို အဲ့ဒီအချိန်မှာ အိပ်ငိုက်နေပါပြီ။ ဒါပေမယ့် မုက္ခပါဌ်တော်တစ်ရပ်က ကျွန်မကို နိုးကြားသွားစေ ပါလေရော။ အဲ့ဒါက ….. ”  စင်စစ်ဧကန် ယဟူဒီများသည်လည်းကောင်း၊ ဆွာဘီများသည်လည်းကောင်း၊ ခရစ်ယာန် များသည်လည်းကောင်း အလ္လာဟ်အရှင်မြတ်နှင့် နောက်ဆုံးနေ့တော်ကိုယုံကြည်ပြီး ဖြောင့်မတ်ကောင်းမြတ်စွာ ကျင့်မူကြပါလျှင် ထိုကဲ့သို့သောသူတို့အဖို့ စိုးရိမ်ဖွယ်ရာမရှိ၊ ပူဆွေးစရာလည်း ရှိအံ့မည်မဟုတ်ချေ “ တဲ့။ အဲ့ဒါ စူရဟ် မာအိဒဟ်ထဲက အာယသ်အမှတ် ၆၉ – ၅း၆၉ ဖြစ်ပါတယ်။ အစ္စလာမ်က ခြယ်မှုန်းပြသထားတဲ့ ဘုရားသခင်ဟာ – ကျွန်မရဲ့ ကိုယ်ပိုင်အယူအဆနဲ့ တစ်ထပ်တည်း ဖြစ်နေပါလားဆိုပြီး အမြင်ပွင့်သွားခဲ့တယ်လေ။
    လယ်ကွင်းတွေထဲငြိမ်းချမ်းစွာ ဘ၀ကိုကျောင်းပြီး သစ္စာသမာဓိရှိတဲ့ ဂျူးတွေကို ဘုရားသခင်က ပြစ်ဒဏ်ခတ်ခြင်းဟာ မမျှတဘူးရယ်လို့ ကျွန်မ အမြဲတမ်းတွေးနေခဲ့မိတာပေါ့။ အဲ့ဒီအချက်က ကျွန်မကို ကုရ်အာန်ပိုပြီးဖတ်ဖြစ်အောင် တွန်းပို့ခဲ့တာပါ။ ဖတ်ရှုလေလေ ကျွန်မယုံကြည်ထားမှုနဲ့သဘောမျှနေတဲ့ အကြောင်းအရာတွေကို တွေ့လာရလေလေ ဖြစ်နေပါတော့တယ်။ ဒီလိုနဲ့ ကျွန်မဟာ ကျောင်းမှာရှိတဲ့ မုစ်လင်မ် တစ်ဥိး တစ်ယောက်ကိုမှ လက်လွှတ်မခံဘဲ မေးမြန်းတယ်၊ ဆွေးနွေးတယ်၊ အပြန်အလှန်အချေအတင် ပြောဆိုကြည့်တယ်။ လ အနည်းငယ်အတွင်းမှာဘဲ ( ငါးလ၀န်းကျင်လောက် အကြာမှာ ထင်ပါတယ် ) အစ္စလာမ်က ကျွန်မအတွက်ဘဲဆိုပြီး သိသွားခဲ့ပါတယ်။

    ( TMR )   ကုရ်အာန်စာအုပ်ကို မရရှိခင်တုန်းက အစ္စလာမ်အကြောင်း တစ်စုံတစ်ရာ သိရှိခဲ့ပါသလား။
    ( CS )    အစ္စလာမ်အကြောင်းဆိုလို့ ဘာမှ မသိခဲ့ပါဘူးရှင်။ ကြားဖူးနားဝတောင် မရှိခဲ့ပါဘူးလို့ ဆိုရပါမယ်။
    တစ်စုံတစ်ယောက်က ကျွန်မကို မေးမြန်းလာယင်လည်း အဲ့ဒါဟာ အရှေ့ဖျားတိုင်းပြည်တွေမှာရှိတဲ့ ဘာသာရေး ယုံကြည်ချက်တစ်မျိုးလို့ ပြောမိပါလိမ့်မယ်။ ကျွန်မတို့ကျောင်းရဲ့ သင်ရိုးထဲမှာ အပိုင်းသုံးပိုင်းခွဲထားတယ် – ခရစ်ယာန်ဝါဒ၊ ဂျူးအယူဝါဒ နဲ့ အခြားဘာသာတရားများ ကဏ္ဍ ဆိုပြီးတော့ပေါ့။ နောက်ဆုံးအပိုင်းထဲမှာ ဗုဒ္ဒ၊ ဟိန္ဒူ နဲ့ အစ္စလာမ်ဘာသာတွေ ပါဝင်တယ်။ ဒါကြောင့်မို့လည်း အစ္စလာမ်ဆိုတာ အရှေ့ဖျားတိုင်းပြည်နိုင်ငံဆီက ဘာသာတရား တစ်ခုဖြစ်တယ်လို့သာ သိခဲ့ရတာလေ။

    ( TMR )   အစ္စလာမ်နဲ့ပတ်သက်ပြီး ခင်ဗျားရဲ့တွေ့ရှိချက်တွေကကို တစ်ယောက်ယောက်နဲ့ မျှဝေခံစားခဲ့တာမျိုးရှိခဲ့ဖူးပါသလား ၊ ရှိခဲ့ယင် သူတို့ရဲ့ လက်ငင်းတုန့်ပြန်မှုတွေက ဘယ်လိုပါလဲ။
    ( CS )    တကယ်တမ်းကျတော့ ကျွန်မက သီးသန့်ဆန်တဲ့လူတစ်ယောက်ပါ။ ကျွန်မရဲ့ယုံကြည်မှုကို သိုသိပ်ထားခဲ့ပါတယ်။ အကူးအပြောင်းလုပ်ပြီးတဲ့နောက် လူတွေကို ဒီအကြောင်းပြောပြတဲ့အခါမှာတော့ သူတို့တစ်တွေက စိတ်ဝင်တစားဆွေးနွေးကြပါတယ်။ ရန်ရှာမှုကို မကြုံရသလောက်ပါဘဲ။ ကျွန်မမိသားစုရဲ့တုန့်ပြန်မှုကသာ ကျွန်မကို စိတ်မချမ်းမြေ့စေခဲ့တာပါ။ ကျွန်မက ကိုယ်ဆုံးဖြတ်တာအမှန်လို့ အမြဲယူဆတတ်တဲ့လူစားမျိုးလေ။
    ဒီကိစ္စဖြစ်လာတာလောဘကြောင့်လည်းမဟုတ်၊ ငွေကြောင့်လည်း မဟုတ်ခဲ့ဘူး။ သူတို့ဘာကြောင့် လက်မခံနိုင်သလဲဆိုတာကို ကျွန်မ တော်တော်လေး နားမလည်နိုင်အောင် ဖြစ်ခဲ့ရပါတယ်။

    ( TMR )   အစ္စလာမ်ကိုလက်ခံပြီးနောက်မှာမှ ထူးထူးခြားခြား ခံစားမိတာမျိုးရှိပါသလား။ ငါ့ရဲ့ရွေးချယ်မှု မှန်မမှန်ဆိုတာမျိုးပေါ့လေ။
    ( CS )       အိုး – သိပ်ရှိတာပေါ့ရှင်။ ကျွန်မ အကူးအပြောင်းလုပ်ပြီး တစ်နှစ်လောက်အကြာမှာပေါ့။ အမျိုးသမီး Racket Ball ပြိုင်ပွဲကနေ ရပ်နားခံရတယ်။ ဆောင်းတွင်းကြီးဖြစ်လို့ ချမ်းစိမ့်လိုက်တာ လွန်ပါလေရော။ အဲ့ဒီအခါတုန်းက အိမ်အပြန် တစ်လမ်းလုံးငိုကြွေးယင်း လမ်းလျှောက်နေခဲ့မိတာကို အမှတ်ရပါတယ်။
    ကျွန်မရဲ့မိသားစုဝင်အားလုံးရော ကျွန်မရဲ့အရင်းနှီးဆုံးသူငယ်ချင်းတွေပါ ကျွန်မကို အရမ်းစိတ်ဆိုးနေခဲ့ကြ တယ်လေ။ ကျွန်မလည်း  –  အို၊ ဖန်ဆင်းရှင်။ ကျွန်မကို အစ္စလာမ်ဆိုတာကို သိသွားအောင် ဘာလို့ပြုတော်မူလိုက်တာလဲ လို့ မိမိဖာသာ ရေရွတ်မိပါတယ်။  ဘာကြောင့်လဲဆိုတော့ မသိနားမလည်တဲ့သူကို ပြစ်ဒဏ်မပေးဘူး  ဆိုတဲ့အာယသ်တော် တစ်ခုကို ကျွန်မသိထားလို့ဖြစ်ပါတယ်။ ဒါပေမယ့် ဘုရားသခင် ပေးကမ်းတော်မူတဲ့ အရာမှန်သမျှထဲမှာ ကောင်းမြတ်တဲ့ အကြောင်းရပ်တစ်ရပ်ရပ် ရှိကိုရှိတယ်၊ ပြီးတော့ အဲ့ဒီအရာနဲ့ ရှင်သန်နေထိုင်သွားရမယ်ဆိုတာကိုလည်း ကျွန်မ အသိဝင်ခဲ့ ပါတယ်။ အဲ့ဒီအချက်က ကျွန်မအဖို့ စိတ်ဖြေစရာ ရရှိစေပြီး ခိုင်မြဲသွားစေခဲ့တာပါ။

    ( TMR )   အစ္စလာမ်ကိုလက်ခံလိုက်တဲ့အခါ စွန့်လွှ့တ်လိုက်ရတဲ့ အရာတွေ ဒါမှမဟုတ် ပြင်ဆင်ညှိနှိုင်းရတဲ့ အရာတွေရှိခဲ့ပါသလား။
    ( CS )       ကျွန်မ အစ္စလာမ်ကို မကူးပြောင်းခင်ကတည်းက အစ္စလာမ့်နည်းကျအရာတွေ တော်တော်များများ ကျွန်မဆီမှာ ရှိနှင့်နေခဲ့ပါတယ်။ ကျွန်မက အရက်၊ ဆေးလိပ် မသောက်စားဘူး။ မူးယစ်ဆေးဝါး မသုံးဘူး။ အမြဲတစေ ချာ့ခ်ျဘုရားရှိခိုးကျောင်းတက်နေခဲ့သူဖြစ်တယ်။ ကျွန်မအဖို့ ပြောင်းလဲပြင်ဆင်လိုက်ရတာကတော့ ၀တ်စား ဆင်ယင်မှုပုံစံ တစ်ခုပါဘဲ။ အကူးအပြောင်းဖြစ်ကာစမှာ နေရောင်ခံဝတ်စုံ  Sun Dress ကို ၀တ်နေဖြစ်သေးတယ်။ နောက်ပိုင်းမှာတော့ အ၀တ်အစား ထူထူဝတ်ဆင်လာတယ်။ လက်မောင်းသားအနားစတွေ ခပ်ရှည်ရှည်ဖြစ်လာပါတယ်။ ဆံပင်ကိုဖုံးကွယ်ရတဲ့ကိစ္စကတော့ ကျွန်မအဖို့ အချိန်တော်တော်ယူခဲ့ရတယ်ရှင့်။

    ( TMR )   ခင်ဗျားရဲ့ စိတ်ဓါတ်ကြံ့ခိုင်မှုအတွက် လူတစ်ဦးဦးဆီက အကူအညီ ရယူခဲ့ပါသလား။
    ( CS )       မရှိသလောက်ပါဘဲရှင်။ ကိုယ့်ဖာသာ လုပ်ယူရတာပါ။ အုပ်စုဖွဲ့ဆွေးနွေးမှုတွေဖြစ်လာအောင် ကျွန်မစည်းရုံးတယ်။ အဖွဲ့ဝင်တွေကို ပံ့ပိုးမှုတွေလုပ်တယ်။ သူတို့ကိုကြည့်ယင်း စိတ်ဓါတ်ကျလိုက် ပြန်မြှင့်တင်လိုက် – ပြိုကွဲလိုက် ပြန်စုစည်းလိုက်နဲ့ပေါ့။ သူတို့ကို ကူညီဖို့အတွက် ကျွန်မကိုယ်တိုင်က မကြံ့ခိုင်လို့ ဘယ်ဖြစ်မလဲလေ။

    ( TMR )   စင်္ကာပူမှာဆိုယင် လူတစ်ဦးဟာ မုစ်လင်မ်သစ်လွင် ဖြစ်သွားတာနဲ့ အခြားသူတွေက သူ့ကို မလေးလူမျိုးဖြစ်သွားပြီလို့ ထင်မြင်တတ်ကြတယ်။ ခင်ဗျားအနေနဲ့ရော အလားတူအဖြစ်မျိုး ကြုံဖူးပါသလား။
    ( CS )       အဲ့ဒါ အသိနိမ့်ကျမှု သက်သက်ပါဘဲ။ တစ်ချို့ (မိရိုးဖလာ) မုစ်လင်မ်တွေက ရှင်တို့ကို ယဉ်ကျေးမှုနဲ့ဖိအားပေးနေတာပါ။ ရှင်တို့ (မုစ်လင်မ်သစ်လွင်)တွေဟာ ပတ်ဝန်းကျင်အသစ်မှာ အဆင်မပြေမှုတွေ ကြုံတွေ့နေရတဲ့ကြားက အဲ့ဒီဖိအားတွေကြောင့် ပိုပြီးတော့ မသက်မသာ ဖြစ်သွားရမှာ အမှန်ဘဲ။

    ( TMR )   အမေရိကမှာရှိနေတဲ့ မုစ်လင်မ်အများစုဟာ အာရပ်လူမျိုး နဲ့ အိန္ဒိယ-ပါကစ္စတန်အနွယ်ဝင်တွေလို့ ကျွန်တော်တို့သိထားပါတယ်။ ကျွန်တော်တို့ စင်္ကာပူမှာကြုံရတဲ့ မလေးယဉ်ကျေးမှုကိစ္စလို ”  အစ္စလာမ့်ယဉ်ကျေးမှု နဲ့ ကိုယ်ပိုင်ယဉ်ကျေးမှု မကွဲပြားတဲ့ ပြသနာတွေ ”  ခင်ဗျားတို့ဆီမှာ တွေ့ရပါသလား။
    ( CS )       ကျွန်မတို့ဆီမှာ အဲ့ဒီလိုပြသနာတွေ များမှများပါဘဲရှင်။ မိမိရဲ့ယဉ်ကျေးမှုကသာလျှင် အဟုတ်အမှန် လို့ပြောပြီး သူတို့ရဲ့ ကိုယ်ပိုင်ယဉ်ကျေးမှုတွေအပေါ် ကိုယ်စီကိုယ်ငှ တစ်ယူသန် အစွဲကြီးနေလိုက်ကြတာလေ။ အမေရိကန်မုစ်လင်မ်တွေက သူတို့ကြားထဲ ညှပ်နေရတယ်။ ဒီတော့ ကျွန်မတို့ကလည်း ဟိုတစ်စ သည်တစ်စ ကောင်းနိုးရာရာကောက်နှုတ်လို့ ကျွန်မတို့နဲ့ အံဝင်ကိုက်ညီနိုင်တာကို ကြည့်ပြီး ပုံဖော်ကြရတာပါဘဲ။

    ( TMR )   ခင်ဗျားတွေ့လိုက်ရတဲ့ အစ္စလာမ်သာသနာရဲ့ပသာဒ တစ်ရပ်ရပ်ကို အသိပေးဝေမျှပေးချင်တာရှိယင် …….
    ( CS )       ဟုတ်ကဲ့။ ကုရ်အာန်အာယသ်တော် ၅း၆၉ က အစ္စလာမ်ဟာ ဘယ်လောက်ထူးခြားတယ်ဆိုတာ ကျွန်မကိုပထမဦးဆုံးအမြင်ပွင့်စေခဲ့တယ်။ ဘယ်သူက ဘယ်ဘာသာတရားကို ကိုးကွယ်ယုံကြည်နေပါစေ – အလ္လာဟ်အရှင်မြတ်က လူတိုင်းအပေါ် မေတ္တာထားတော်မူတယ် ဆိုတဲ့အကြောင်းပါဘဲ။ ခရစ်ယာန်အယူဝါဒမှာ ခရစ်ယာန် များသာလျှင် ကောင်းကင်ဘုံကိုသွားကြရပြီး ကျန်သူအားလုံးကတော့ ငရဲလားရမယ်လို့ ဆိုတယ်။ အစ္စလာမ်မှာကတော့ ဘယ်မုစ်လင်မ်ကိုမှ တစ်ဖက်သတ် ပ,စားပေးမထားတာမျိုး မရှိဘူး။ မုစ်လင်မ်ဖြစ်ပါတယ်ဆိုယုံနဲ့ ငရဲဘုံက ကင်းလွတ်သွားမယ်လို့ ဆိုမထားဘူးလေ။ အစ္စလာမ်ဟာ တရားမျှတမှုအပေါ် တကယ့်ကို အလေးအနက်ပြုထားပါတယ်။

    ( TMR )   ဒါဖြင့် အခြားသော မုစ်လင်မ်သစ်လွင်တွေကို တစ်စုံတစ်ရာလမ်းညွှန်မှု ပေးနိုင်ပါမလား။
    ( CS )       ‘  ငါဟာ နေ့စဉ်နေ့တိုင်း ခြေတစ်လှမ်းကို ရှေ့ဆက်တိုးသွားမယ် ”  ဆိုတဲ့ ကျွန်မရဲ့ကိုယ်ပိုင် ဒဿနကိုဘဲ ပြောနိုင်ပါတယ်။ နေ့တစ်နေ့ကုန်လွန်လေတိုင်း ကျွန်မ ပြန်လှည့်ကြည့် (ဆင်ခြင်) ပါတယ်။ မိမိကိုယ်ကို တိုးတက်မြင့်မားလာအောင် ဆောင်ရွက်ထားတာရှိမရှိ ကိုယ့်ကိုယ်ကို မေးမြန်းပါတယ်။ ကျွန်မကိုကျွန်မ တိုးတက်မြင့်မား လာတာကိုဘဲ တွေ့မြင်ချင်လို့ပါ။ နေ့စဉ် ဆွလာသ်ငါးကြိမ်ဝတ်ပြုရေး၊ ရမ်ဒွန်တစ်လလုံး ဥပုသ်သီတင်းဆောက်တည်ရေး ဆိုပြီး ကိုယ့်ကိုယ်ကို စည်းကမ်းချမှတ်ဖို့ အများကြီး လိုအပ်ပါသေးတယ်။ မိမိကိုယ်ကို ခက်ခဲမှုဆီ တွန်းမပို့လိုက်ပါနဲ့၊ ဒါပေမယ့် ရှေ့ဆက်နိုင်အောင် ကိုယ့်ဖာသာ ကြပ်မတ်ဖို့လိုအပ်ပါတယ်  လို့  မုစ်လင်မ် သစ်လွင်များကို ကျွန်မ အကြံပြုလိုက်ပါတယ်။ ကျန်တဲ့ကိစ္စတွေကတော့ အလ္လာဟ်အရှင်မြတ် (SWT) ရဲ့ အလိုတော်ပေါ့ရှင်။

    Interview Section

    A Colllection of Stories on Why  They Embrace Islam TMR  ( The Muslim Reader ) 2010 – 2011 , Singapore
    From –  TMR : Vol 7 , No.4 , Pg 24-25
    TMR :   Following  Faith ( 2010 – 2011 ), Pg 27-28

  • အတိတ်က ဆွိယံမ် (My Fast In The Past)

    အတိတ်က ဆွိယံမ် (My Fast In The Past)

    ငယ်စဉ်ဘ၀ ကျေးလက်ရွာငယ်မှာရှိခဲ့စဉ်က မလေးကလေးငယ်များနှင့်အတူ ဥပုသ်စောင့်ခဲ့ခြင်းက နောင်သော် အစ္စလာမ်သို့ သက်ဝင်မှု ဖြစ်သွားစေသူ မဇ်လန်း အဗ်ဒုလ္လာဟ် ဆိုချင်ဘွန်း

    ကျွန်တော့်ငွေကြေးအကြပ်အတည်းကို ဥပုသ်သီလစောင့်ထိန်းမှုနဲ့ နည်းလမ်းကောင်းတစ်ခုအဖြစ် ဖြေရှင်းခဲ့တာပါ။

    ကျွန်တော့်သူငယ်ချင်းတွေဟာ မလေးလူမျိုးချည်းဖြစ်ခဲ့တယ်။ တခြား တရုတ်ကလေးတွေနဲ့ ကျွန်တော် အပေါင်းအသင်း မလုပ်နိုင်ခဲ့ပါဘူး။ ဘာဖြစ်လို့လဲဆိုတော့ သူတို့နဲ့အတူ နေ့စဉ်လိုလို ရုပ်ရှင်ရုံကိုသွားဖို့ ကျွန်တော့်မှာ ငွေကြေးမတတ်နိုင်လို့ဘဲ ဖြစ်ပါတယ်။ ကျွန်တော် ၁၅ နှစ်သားအရွယ်တုန်းက ကိုယ်ပိုင်အုပ်စုလေး ရှိချင်ခဲ့တယ်။ မလေး ကောင်လေးတွေက ကျွန်တော့်ကို အလွယ်တကူဘဲ လက်ခံခဲ့ကြတယ်။ ဒါပေမယ့် သူတို့နဲ့တွဲယင် ၀က်သားမစားရဘူးဆိုတဲ့ စည်းကမ်းချက်ကိုတော့ လိုက်နာရတယ်လေ။ ဒီကိစ္စက ကျွန်တော့်အတွက် မခဲယဉ်းလှပေဘူး။ အိမ်မှာလည်း မစားရသလောက်ဘဲကိုး။ ရမ်ဒွါန်လ မရောက်ခင်အထိ ကျွန်တော်တို့ဟာ ရိုတီပလာတာ၊ နဆီလီမဒ်တွေ အတူတကွ စားကြသောက်ကြနဲ့ပေါ့ဗျာ။

    သူတို့တတွေ ဥပုသ်လစောင့်တဲ့အခါကျတော့ ကျွန်တော်ကလည်း စားသောက်တဲ့အလုပ်ကို မလုပ်တော့ဘူး။ ဒီတော့ သူတို့ကပြောတယ်။ ကျွန်တော့်အနေနဲ့ အဲ့ဒီလို မလုပ်သင့်ဘူးတဲ့၊ ကျွန်တော်က မုစ်လင်မ် မဟုတ်လို့ပါတဲ့။ သူတို့ရဲ့အသိမှာက မုစ်လင်မ်ဖြစ်မှ ဥပုသ်စောင့်ရတယ်ဆိုတဲ့ အချက်တစ်ချက်ဘဲ ရှိနေလို့လေ။ ဒီအခါမှာ ကျွန်တော်က ” ဒါဆိုယင် မင်းတို့ရဲ့ဘုရားသခင်က မတရားလိုက်တာ! မုစ်လင်မ်တွေလုပ်တဲ့အတိုင်း လုပ်ချင်နေသူကို ဘုရားသခင်က သေအောင်လုပ်ပါ့မလားကွ ” လို့ ပြောလိုက်မိတယ်။ ဒါနဲ့ သူတို့က ကျွန်တော့်ကို မနက်အရုဏ်ကနေ ညနေနေ၀င်ချိန် အထိ ဘာမှမစားမသောက်ဘဲ ဥပုသ်စောင့်ခွင့်ပေးလိုက်တယ်။ ဒါပေမယ့် ကျွန်တော့်ကို စဟူးရ် (စဟ်ရီ)ကိစ္စ ပြောပြဖို့ မေ့နေခဲ့ကြတယ်လေ။

    ပထမဆုံး ဥပုသ်စောင့်တဲ့နေ့ အတန်းနားချိန်မှာ အတန်းဖော်တရုတ်လေးက ကျွန်တော့်ကို အပြင်ဆွဲခေါ်သွားပြီး ပြောပါလေရော ” မင်းတော်တော် နုံအတဲ့ကောင်! မလေးတွေက သူတို့ဖာသာ အစာအငတ်ခံတာကို မင်းက ဘာကြောင့် လိုက်လုပ်နေတာလဲ ” တဲ့။ ကျွန်တော်က သူ့ကိုတွန်းဖယ်လိုက်ပြီး အသာလေးပြန်ပက်လိုက်တာပေါ့။ ” ငါ စမ်းကြည့်ယုံ သက်သက်ပါကွာ၊ သူတို့တောင် အစာရေစာ မစားသောက်ဘဲနေနိုင်သေးယင် ငါလည်း ဘာလို့ မနေနိုင်ရမှာလဲ ” လို့လေ။ အဲ့ဒီလို ရွှတ်နောက်နောက်လုပ်လိုက်တဲ့အတွက် တစ်နေကုန်လုံး ကျွန်တော့်မှာ အနှောင့်အယှက်ကင်းခဲ့တာလို့ တွေးမိပါတယ်။ ဆာလောင်တဲ့ – ရေငတ်တဲ့ဒဏ်ပိလာတော့ ဂီတာတီးယင်း၊ ဒရမ်စည်းချက်ရိုက်ယင်းနဲ့ ကျွန်တော့်မှာ အလုပ်ကိုရှုပ်နေတော့တာပါဘဲ။ သေခြင်းတရားဆိုတာ ကျွန်တော့်အတွေးထဲမှာ မပေါ်ရေးချမပေါ်။ ဒါပေမယ့်လည်း နေ၀င်ချိန်ရောက်ဖို့ ကြာလှချည်လားဆိုပြီး ခံစားခဲ့ရတာတော့အမှန်ပါ။ ကျွန်တော့်သူငယ်ချင်းတွေ ဘယ်သူကမှ ဒီလိုမျိုး မပြုကြပါဘူး။ ဒီလိုနဲ့ တစ်နေ့တာအချိန်ကို ကျော်ဖြတ်နိုင်ခဲ့တယ်။

    ကျွန်တော်တို့ဟာ ကိုယ့်အိမ်ကိုယ်ပြန်ပြီး ညနေစာစားနေကျဖြစ်တယ်။ သူငယ်ချင်းတွေက ၀ါလွှတ်ဝါဖြေဖို့ ပျော်ပျော် ရွှင်ရွှင်ပြန်သွားကြတဲ့အခါ ကျွန်တော်လည်း အိမ်ကိုပြန်လို့ ရေခဲသေတ္တာထဲက ရေတစ်ခွက်၊ ပန်းသီးတစ်လုံးနဲ့ ကိုယ့်ကိုယ်ကို ဆုချလိုက် တာပေါ့ (ဘာရမလဲ)။ မေမေချက်ထားတဲ့ ၀က်သားချိုချဉ်ကြော်နဲ့ဝါဖြေဖို့က ကျွန်တော့်အဖို့ အမြင်မတော် ဆင်တော်နဲ့ ခလောက်ဆိုသလိုမျိုး ဖြစ်နေစေပါတယ်။ ပြီးတော့ သူငယ်ချင်းတွေအပေါ်မှာလည်း စည်းဖောက်ရာရောက်သွားမယ် မဟုတ်လား? ကျွန်တော့်ဘ၀တစ်သက်တာမှာ ဒီရေတစ်ခွက်နဲ့ ဒီအရည်ရွှမ်းပန်းသီးတစ်လုံးလောက် အရသာရှိတာမျိုး မကြုံဖူးပေါင်ဗျာ။

    ကျွန်တော်အပျော်ရွှင်ဆုံးကတော့ ကျွန်တော်တို့တစ်တွေ ညဉ့်သွားရည်စာ သွားစားကြတာပါဘဲ။ ၀ါဖြေပုံနဲ့ ပတ်သက်ပြီး သူတို့တစ်တွေ ကိုယ်စီကိုယ်ငှ စကားဖလှယ်နေတာကို ကျွန်တော် အားကျလိုက်တာလေ။ အဲ့ဒီနောက် သူတို့အိမ်တွေမှာ ညနေစာ လာစားဖို့ ကျွန်တော့်ကို မကြာခဏ ဖိတ်ခေါ်လာပါတော့တယ်။ တစ်လတာလုံး အဖုအထစ်မရှိ ကုန်လွန်သွားတဲ့အခါ အတွေ့အကြုံချင်း ဖလှယ်ကြရာက ကျွန်တော်တို့အားလုံး အရင်ကထက် ပိုရင်းနှီးလာတယ်လို့ ခံစားလိုက်ရတယ်။ ဒါပေမယ့်လည်း မုစ်လင်မ်တစ်ဦးဖြစ်လာဖို့ ကျွန်တော့်မှာ စဉ်းကိုမစဉ်းစားဖြစ်သေးတာအမှန်ပါဘဲ။

    နောက်တစ်နှစ်မှာလည်း ရမ်ဒွန်တစ်လလုံးကို ကျွန်တော် ဒီအတိုင်း အပြည့်အ၀ ကျော်ဖြတ်ခဲ့ပြန်တယ်။ ဒီတစ်ကြိမ် မှာတော့ ဥပုသ်စောင့်တာကို ကျွန်တော်ကျင့်သားရသွားပါပြီ။ အမှန်ပြောရယင် ကျွန်တော့်ငွေကြေးအကြပ်အတည်းကို ဥပုသ်သီလစောင့်ထိန်းမှုနဲ့ နည်းလမ်းကောင်းတစ်ခုအဖြစ် ဖြေရှင်းခဲ့တာပါ။ ကျွန်တော့်အဖို့ အဖိုးအထိုက်တန်ဆုံးကတော့ ဒီလုပ်ရပ် ကနေတစ်ဆင့် ငါအောင်မြင်သွားပြီဆိုတဲ့ခံစားချက် ရရှိခဲ့ခြင်းပါ။ ဖန်ဆင်းရှင်ဟာ မုစ်လင်မ် မဟုတ်သူတွေအပေါ် မကောင်းမြင်မှု မရှိတဲ့အကြောင်း၊ ဥပုသ်သီလစောင့်ထိန်းခြင်းက မသေနိုင်ဘူး – ရုပ်ပိုင်းချည့်နဲ့မှုလည်း မဖြစ်စေဘူးဆိုတဲ့အကြောင်း ကျွန်တော် သူတို့ကို သက်သေပြသနိုင်ခဲ့ပြီလေ။

    တတိယနှစ် ရမ်ဒွန်လအတွင်းမှာ National Service ( NS ) ၀င်ရတဲ့အခါ ကျွန်တော် နာနာကျင်ကျင်ခံစားခဲ့ရတယ်။ ချွေးထွက်အောင်လုပ်ရတဲ့ကိစ္စကြောင့် မဟုတ်ပါဘူး။ သမားတော်ရဲ့ဆေးထိုးပေးမှုက ကျွန်တော့် ဥပုသ် စောင့်ထိန်းခြင်းကို အနှောက်အယှက်ဖြစ်သွားစေတာကြောင့်ပါ။ အဲ့ဒီနေ့ရဲ့နေ့လည်စာကို ကင်တင်းန် မှာစားတော့ မချိတင်ကဲ ဖြစ်နေရလေခြင်း။ တကယ့်ကို ရှက်ကိုးရှက်ကန်းကြီးဖြစ်နေခဲ့ရပါတယ်။ ဆေးထိုးသွင်းခြင်းက ဥပုသ်ကို မပျက်စေဘူးဆိုတာ သိလိုက်ရတဲ့နောက်မှာတော့ ကျွန်တော်လေ နာကြင်စွာခံစားရပြန်ပါလေရော။

    စနေနေ့တစ်ရက်နေ့လည်ခင်း ကျွန်တော့်အခန်းတန်းလျားလေးမှာ တစ်ကိုယ်တည်းထိုင်နေယင်းနဲ့ အတွေးတစ်စ ရုတ်ခြည်းဝင်ရောက်ရိုက်ခတ်လာတယ်။ အဲ့ဒီနေ့က ဟိဂ်ျရီ ၁၃၉၈ ၊ ရှအ်ဗာန်လ ၁၃ ရက်။ ရမ်ဒွန်လရောက်ဖို့ ရက်သိပ်မလိုတော့ဘူး။ ” ငါဟာ မုစ်လင်မ်မဟုတ်သူအဖြစ်နဲ့ ရမ်ဒွန်သုံးလ (၃ နှစ်)အထိ ဥပုသ်စောင့်နေမိခဲ့ပါပကောလား ! မုစ်လင်မ်တစ်ဦးအနေနဲ့ ဥပုသ်သီလကို ပီပီပြင်ပြင် စောင့်ထိန်းချင်လိုက်တာ ” ဆိုပြီးတော့ပေါ့လေ။

    ၁၃၉၈ ခုနှစ်၊ ယှအ်ဗာန်လ ၁၅ ရက်နေ့၊ ကျွန်တော့်ရဲ့ အစ္စလာမ့်ကူးပြောင်းမှုကို ဂျာမီယဟ်မှာ တရားဝင် ဆောင်ရွက်ခဲ့တယ်။ အဲ့ဒီနေ့မှာဘဲ အထိမိဆုံးအလုပ်တစ်ခုကို ကျွန်တော် ပြုလုပ်ခဲ့ပါတယ်။ ကျွန်တော် မုစ်လင်မ်ဖြစ်လာခြင်း အထိမ်းအမှတ်နဲ့ စွန္နဟ် ဆွိယံမ် စောင့်ထိန်းလိုက်တာလေ။

    အဲ့ဒီနှစ်ရဲ့ ရမ်ဒွန် တစ်လလုံးမှာဖြင့် စိတ်ကြည်နူးလိုက်ရတာဗျာ။ အဲ့ဒီတစ်လအတွင်းမှာဘဲ ကျမ်းမြတ်ကုရ်အာန် ဘာသာပြန် အစအဆုံးကို ပြီးဆုံးအောင် ဖတ်နိုင်ခဲ့ပါတယ်။ အခုဆိုယင် ဥပုသ်သီလစောင့်ထိန်းခြင်းရဲ့ ကျက်သရေမင်္ဂလာ အစစ်အမှန်ကို ခံစားတတ်သွားပါပြီ။ အစာရေစာ ရှောင်ယုံသက်သက်မဟုတ်တော့ဘူး။ ငွေကြေးချွေတာရေးနည်းလမ်းအနေနဲ့လည်း မမြင်တော့ဘူး။ လုံးလုံးလျားလျား အတွေးသစ် အမြင်သစ်နဲ့တစ်ကွ ဥပုသ်သီလ စောင့်ထိန်းလျက်ရှိနေပါပြီခင်ဗျာ။

    မဇ်လန်း အဗ်ဒုလ္လာဟ် ဆိုချင်ဘွန်း
    From – TMR : Vol 7 , No.1 , Pg 31-32 ,
    TMR : Following Faith ( 2010 – 2011 ) Pg 29-30

    စလာမ်၊ ဒုအာအ်ဖြင့်
    ဂျူလိုင်ရဲရင့်