ဇန်နဝါရီ ၁၁၊ ၂၀၂၀
M-Media
-အိုမန်နိုင်ငံကို အုပ်စိုးသူ ဆူလ်တန် ကဘူးစ်ဟာ သောကြာနေ့ညနေပိုင်းက ကွယ်လွန်သွားခဲ့ပြီး ယဉ်ကျေးမှုဝန်ကြီးဟောင်း ဟေသမ် ဘင် တာရစ် အလ် စအစ်က အိုမန်ဘုရင်သစ်အဖြစ် ကျမ်းကျိန်ခဲ့ပါတယ်။
အသက် ၇၉ နှစ်အရွယ် ဆူလ်တန် ကဘူးစ်ဟာ နာတာရှည်ရောဂါကို ခံစားနေရတာဖြစ်ပြီး မကြာသေးခင်ကဘဲ ဂျာမနီနဲ့ ဘယ်လ်ဂျီယံတို့မှာ ဆေးကုသမှု ခံယူခဲ့ရပါတယ်။
ဆူလ်တန် ကဘူးစ်ကွယ်လွန်မှုအတွက် ၃ ရက်တာ ဝမ်းနည်းဖွယ်နေ့ကို အိုမန်နိုင်ငံက ကြေငြာခဲ့ပြီး နိုင်ငံတော်အလံကို ရက်ပေါင်း ၄၀ ကြာ တိုင်တစ်၀က် လွှင့်ထူမှာ ဖြစ်ပါတယ်။ ဈာပနအခမ်းအနားကို စနေနေ့ နေ့လည်ပိုင်းက မြို့တော် မူစကတ်မှာ ပြုလုပ်ခဲ့ပြီး ပြည်သူထောင်သောင်းချီ တက်ရောက်ခဲ့ပါတယ်။
ယဉ်ကျေးမှုဝန်ကြီးဟောင်း ဟေသမ် ဘင် တာရစ် အလ် စအစ်ကို နိုင်ငံရဲ့ ဆူလ်တန်သစ်အဖြစ် အိုမန်အာဏာပိုင်တွေက ရွေးချယ်ခဲ့ပါတယ်။ ဒါဟာ ဆူလ်တန်ကဘူးစ်ရဲ့ အိတ်ပိတ်စာအရ ဆက်ခံသူကို ရွေးချယ်ခဲ့တာဖြစ်တယ်လို့ ဆိုပါတယ်။
၁၉၇၀ ပြည့်နှစ်က သွေးမထွက်တဲ့ အာဏာသိမ်းမှုနဲ့ ဖခင်ကို ဖြုတ်ချခဲ့တဲ့ ဆူလ်တန် ကဘူးစ်ဟာ အိုမန်နိုင်ငံကို ခေတ်နောက်ကျတဲ့နိုင်ငံတစ်ခုကနေ ခေတ်မီတဲ့နိုင်ငံတစ်ခု ဖြစ်လာအောင် ဦးဆောင်နိုင်သူလို့ မှတ်ယူခံထားရသူပါ။ ကဘူးစ်ဟာ လူဦးရေ ၄ သန်းကျော်သာရှိတဲ့ အိုမန်ကို ကြားနေနိုင်ငံတစ်ခုအဖြစ် ဖန်တီးကာ အရှေ့အလယ်ပိုင်းနဲ့ နိုင်ငံတကာက အချို့ကိစ္စတွေမှာ ကြားဝင် စေ့စပ်ပေးမှုတွေလည်း ပြုလုပ်ခဲ့ပါတယ်။
ကဘူးစ်မှာ ညီအစ်ကိုမောင်နှမအရင်းနဲ့ သားသမီးတွေမရှိဘဲ အနီးဆုံးဆွေမျိုးက ဝမ်းကွဲညီအစ်ကိုတွေဖြစ်ပြီး ဆူလ်တန်သစ်အဖြစ် ရွေးချယ်တင်မြှောက်ခံရသူ အလ် စအစ်ဟာ ကဘူးစ်ရဲ့ ညီဝမ်းကွဲဖြစ်ပါတယ်။
Ref: Aljazeera
