သြဂုတ် ၁၇၊ ၂၀၁၅
M-Media
မိုးစက်
ရန်ကုန်။ ။ ဧရာဝတီတိုင်းဒေသကြီး ပန်းတနော်မြို့ရှိ ကူဝသွလ် အစ္စလာမ်ဗလီဝတ် ကျောင်းတော်ကြီးတွင် ပန်းတနော်မြို့အနီးရှိ ရေဘေးသင့်ပြည်သူများ အိမ်ထောင် (၆၆) အိမ်စုကို ကူညီဆောင်ရွက်ထားလျက်ရှိကြောင်း သိရှိရသည်။
ပန်းတနော်အနီးရှိ ရွာများသည် ငဝန်မြစ်ရေမြင့်တက်လာမှုကြောင့် ရေကြီးရေလျှံမှုများကို လွန်ခဲ့သည့်ရက်ပိုင်းများအတွင်းက ဖြစ်ပေါ်နေခဲ့ကြသည်။
“ကျွန်တော်တို့တွေ ရွာထိသွားကြပြီးတော့ ရေတက်လို့ နေမရတဲ့သူတွေကို ဒီမြို့ထဲထိခေါ်လာပြီးတော့ ကူဝသွလ်အစ္စလာမ်ဗလီရဲ့ မဒရ်ဆာ (ဘာသာရေး စာသင်ကျောင်း) မှာ နေရာပေးထားပါတယ်။ သူတို့အတွက်အလှူရှင်တွေ မလာသေးခင်မှာလည်း ကျွန်တော်တို့ဒီမြို့မှာရှိတဲ့ ရပ်မိရပ်ဖတွေကပဲ ဝိုင်းပြီးကြည့်ရှုပေးနေပါတယ်” ဟု ပန်းတနော်မြို့မှ ဒေသခံတစ်ဦးက M-Media ပြောပါသည်။
အဆိုပါဗလီတွင် အလှူခံလက်ခံရန်နေရာဖွင့်လှစ်ထားရှိပြီး လာရောက်လှူဒါန်းသည့် ပစ္စည်းများကိုလည်း အခြားရွာများသို့ သွားရောက်ပြီး ရေဘေးသင့်ပြည်သူများကို လက်ဝယ်ပေးရောက်ခဲ့သည်ဟုသိရသည်။
ထိုရေဘေးသင့်ပြည်သူများကို ကူညီထားသော ကူဝသွလ်အစ္စလာမ်ဗလီ၏ မဒရ်ဆာ (ဘာသာရေး စာသင်ကျောင်း) မှာ လာရောက်နေထိုင်သူ ရေဘေးသင့်ပြည်သူတစ်ဦးကလည်း “ကျွန်မတို့ဒီမှာရောက်နေတာ တစ်ပတ်လောက်ရှိပြီ။ ဒီကလူတွေကလည်း အရမ်းကိုဂရုစိုက်တယ်။ ကလေးတွေဆို အိပ်တာကအစ သေချာလိုက်ကြည့်ရှုတယ်။ အလှူရှင်တွေလာပေးတာတွေကိုလည်း ကျွန်မတို့ကို တစ်ခုမကျန် ပြန်ပေးတယ်။ ထမင်းဆိုလည်း အချိန်နဲ့အမှန် ကျွေးနေပါတယ်” ဟု နေထိုင်ရပုံနှင့် ပတ်သတ်ပြီး ပြောဆိုခဲ့သည်။
ပန်းတနော်မြို့ရှိ ရေနစ်မြှပ်ခံထားရသော ရွာများသည် ရေများပြန်လည် ကျပြီဖြစ်သော်လည်း ရေလွှမ်းမိုးခြင်းဒဏ်ကို ခံထားရသောကြောင့် အချို့သောအိမ်များမှာ ပျက်ဆီးနေပြီး ပြန်လည်ပြင်ဆင် မှသာ နေထိုင်၍ရမည်ဖြစ်ကြောင်းကိုလည်း ဒေသခံတစ်ဦးက ဆိုခဲ့သည်။
အဆိုပါဗလီမှ တာဝန်ရှိသူများနှင့် ရပ်မိရပ်ဖများမှလည်း အလှူရှင်များနှင့် ပူးပေါင်းပြီး ရေဘေးသင့်ခံထားရသော ပြည်သူများအတွက် ပြန်လည်ထူထောင်ရေးလုပ်ငန်းများကို အချိန်နှင့်တစ်ပြေးညီ ဆက်လက်ဆောင်ရွက်သွားမည် ဖြစ်ပြီး ပြန်လည်ထူထောင်ရေးအတွက်လည်း အလှူရှင်များကိုလည်း လိုအပ်နေကြောင်း သိရသည်။
