ဧပြီ ၁၀၊ ၂၀၂၀
M-Media
-ကိုရိုနာဗိုင်းရပ်စ်ရဲ့ နောက်ဆက်တွဲ စီးပွားရေး ကျဆင်းမှုကြောင့် ကမ္ဘာတစ်ဝှမ်း လူပေါင်း သန်း ၅၀၀ လောက်အထိ ဆင်းရဲတွင်းထဲ ရောက်နိုင်တယ်လို့ နိုင်ငံတကာ အကူအညီပေးရေးအဖွဲ့ Oxfam က ပြောကြားလိုက်ပြီး ထိခိုက်မှုအရှိဆုံးလူတွေကို ကူညီ ဖေးမပေးဖို့လည်း နိုင်ငံတွေကို တိုက်တွန်းခဲ့ပါတယ်။
ဩစတေးလျ အမျိုးသားတက္ကသိုလ် (ANU) နဲ့ လန်ဒန် Kings ကောလိပ်တို့က ပြုလုပ်ခဲ့တဲ့ သုတေသနအရ ဆင်းရဲမွဲတေသူအရေအတွက်ဟာ လူပေါင်း သန်း ၄၀၀ ကနေ သန်း ၆၀၀ လောက် အထိ မြင့်တက်လာမယ်လို့ ဆိုပါတယ်။ ဒါဟာ ကမ္ဘာတစ်ဝှမ်း နှစ်ပေါင်း ၃၀ အတွင်း ပထမဆုံးအကြိမ် မြင့်တက်မှုလည်း ဖြစ်ပါတယ်။
ကိုရိုနာဗိုင်းရပ်စ်ရဲ့ နောက်ဆက်တွဲရိုတ်ခက်မှုဟာ ၂၀၃၀ ခုနှစ်မှာ ဆင်းရဲမွဲတေသူပပျောက်ရေး ကုလရဲ့ စီမံကိန်းအပေါ် ခြိမ်းခြောက်မှုတစ်ခု ဖြစ်လာလိမ့်မယ်လို့ Oxfam ရဲ့ အစီရင်ခံစာမှာ ဖော်ပြထားပါတယ်။
ကပ်ရောဂါ ပြီးဆုံးပြီးတဲ့နောက် ကမ္ဘာ့လူဦးရေ သန်း ၇၈၀၀ ရဲ့ ထက်ဝက်ကျော်လောက်ဟော ဆင်းရဲမွဲတွေမှုအောက်မှာ နေထိုင်ရမယ်လို့လည်း လေ့လာဆန်းစစ်သူတွေက ပြောပါတယ်။ ဆင်းရဲတွင်းထဲ ရောက်သွားမယ့် သန်း ၅၀၀ လောက်မှာ ၄၀ ရာခိုင်နှုန်းဟာ အရှေ့အာရှနဲ့ ပစိတ်ဖိတ်ဒေသတွေတို့မှာ ဖြစ်လာမှာဖြစ်ပြီး၊ အာဖရိက ဆဟာရဒေသနဲ့ တောင်အာရှတို့မှာ သုံးပုံတစ်ပုံ ရှိမှာ ဖြစ်ပါတယ်။
“ဖွံ့ဖြိုးဆဲနိုင်ငံတွေမှာ လူမှုဖူလှုံရေး အစီအမံတွေကို တော်တော်လေး ကျယ်ကျယ်ပြန့်ပြန့် လုပ်ဆောင်ဖို့ လိုအပ်တယ်ဆိုတာကို ကျွန်တော်တို့ရဲ့ တွေ့ရှိချက်တွေက ညွှန်ပြနေပါတယ်။ နောက်ပြီး ဖွံ့ဖြိုးဆဲနိုင်ငံတွေမှာ Covid ရဲ့ နောက်ဆက်တွဲကိစ္စတွေကို အာရုံစိုက်ဖို့၊ နိုင်ငံတကာအသိုင်းအဝိုင်းက အကူအညီပေးနိုင်ရေး ကျယ်ကျယ်ပြန့်ပြန့် စဉ်စားထားဖို့လည်း လိုပါတယ်” လို့ သုတေသနမှာ ပါဝင်ခဲ့တဲ့ Kings ကောလိပ်က ပရော်ဖက်ဆာ အန်ဒီ ဆွန်မ်နာက ပြောကြားခဲ့ပါတယ်။
ကိုရိုနာဗိုင်းရပ်စ်ကြောင့် ကမ္ဘာတစ်ဝှမ်းက လူ ၄ ဘီလီယံလောက်ဟာ စီးပွားရေးနဲ့ ဝင်ငွေတွေမှာ ထိခိုက်ခဲ့ပြီး လူမှုဖူလှုံရေးလို အစိုးရရဲ့ ထောက်ပံ့ပံ့မှုတွေ မရကြဘူးလို့ Oxfam GB ရဲ့ အကြီးအကဲ ဒန်နီ ဆရစ် ကန်ဒါရာဂျာက ပြောကြားခဲ့ပါတယ်။
Ref: BBC
