သြဂုတ် ၂၈၊ ၂၀၁၅
M-Media
– နှောင့်နှေး ကြန့်ကြာမှုများရှိခဲ့ပြီး၊ ဝေဖန်မှု ရှိနေသော်လည်း တမန်တော်မုဟမ္မဒ်သခင် (ငြိမ်းချမ်းသာယာမှု သက်ရောက်ပါစေ) ၏ အစောပိုင်းဘ၀အခြေအနေကို ရိုက်ကူးထားသည့် ရုပ်ရှင်တစ်ခုကို ယမန်နေ့က အီရန်နိုင်ငံတွင် ရုံတင်ပြသခဲ့သည်ဟု သိရသည်။
Muhammad ဟု အမည်ပေးထားသည့် အဆိုပါရုပ်ရှင်ကို အီရန်နာမည်ကျော်ဒါရိုက်တာ မာဂျစ်မာဂျီဒီက ရိုက်ကူးထားခြင်းဖြစ်ပြီး၊ မာဂျီဒီကမူ ထိုရုပ်ရှင် ရိုက်ကူးရခြင်း၏ ရည်ရွယ်ချက်မှာ အစ္စလာမ်၏ သရုပ်အမှန်ကို ကမ္ဘာကြီးအား ပြသရန်ဖြစ်သည်ဟု ပြောကြားခဲ့သည်။
ထို့ပြင် IS ကဲ့သို့ အစွန်းရောက်များနှင့် အကြမ်းဖက်အုပ်စုများကလည်း အစ္စလာမ်၏ အမည်ကို ခိုးယူကာ အလွဲသုံးစားလုပ်နေကြသည်ဟု ဆိုသည်။
“အနောက်ကမ္ဘာမှာ အစ္စလာမ်နဲ့ပတ်သက်ပြီး မမှန်ကန်တဲ့ ဖော်ပြမှုတွေ ပေါ်ထွက်လာပြီး ဒါတွေဟာ အစ္စလာမ်ရဲ့ ပုံရိပ်ကို ကြမ်းတမ်းစေပါတယ်။ ဘာပဲဖြစ်ဖြစ် ဒါတွေက အစ္စလာမ်နဲ့ ဆက်စက်မှုမရှိဘူးလို့ ကျွန်တော်တို့ ယုံကြည်ပါတယ်”
ထိုရုပ်ရှင်မှာ မုဟမ္မဒ်သခင်၏ ဘ၀အခြေနေ သုံးပိုင်းထဲမှ ပထမဆုံး တစ်ပိုင်းအကြောင်းကို ရိုက်ကူးထားခြင်းဖြစ်ပြီး မုဟမ္မဒ်သခင် မမွေးခင်ခြေအနေ၊ ဆယ်ကျော်သက်ဘ၀နှင့် တမန်တော်အဖြစ် ချီးမြှောက်ခြင်းမခံရမီအချိန်အထိ ဇာတ်ကြောင်းများပါဝင်ကာ ယမန်နေ့တွင် ရုံတင်ခဲ့သည်။
အဆိုပါရုပ်ရှင်ကို ပြီးခဲ့သည့်ဇန်န၀ါရီက တီဟီရန်တွင် ကျင်းပပြုလုပ်ခဲ့သည့် ဖဂ်ျရ် နိုင်ငံတကာရုပ်ရှင်ပွဲတော်တွင် ပထမဆုံး ပြသခဲ့သည်။ ရုပ်ရှင်တွင် မုဟမ္မဒ်သခင်၏ ရုပ်ပုံကို ဖော်ပြခြင်းမရှိဘဲ၊ ဘာသာရေးဆိုင်ရာ ဖော်ပြမှုများအတွက် အလင်း၊ အမှောင်တို့ကိုသာ အသုံးပြုထားသည်။
ထိုရုပ်ရှင် ရိုက်ကူးရေးအတွက် ကန်ဒေါ်လာ သန်း ၄၀ ခန့် ကုန်ကျခဲ့ပြီး ရုပ်ရှင်ဖြစ်မြောက်ရေးအတွက် မာဂျီဒီက ၇ နှစ်ကြာ အချိန်ယူခဲ့ရသည်။ ထို့ပြင် မုဟမ္မဒ်သခင်အကြောင်း ဖော်ပြမှုနှင့် ပတ်သက်၍ ဒုတိယမြောက် ငွေကုန်အကြေးကျအများဆုံး ရုပ်ရှင်လည်းဖြစ်ခဲ့သည်။
မုဟမ္မဒ်သခင်နှင့်ပတ်သက်သည့် ပထမဆုံး ရုပ်ရှင်ကို ဒါရိုက်တာ မွတ်စ်တာဖာ အက်ကဒ်က The Message ဟူသော အမည်ဖြင့် ရိုက်ကူးကာ ၁၉၇၆ ခုနှစ်တွင် ဖြန့်ချီခဲ့ပြီး မုဟမ္မဒ်သခင် တမန်တော်အဖြစ် ချီးမြှောက်ခံရပြီးနောက်ပိုင်းမှ ကွယ်လွန်ချိန်အထိ အကြောင်းအရာများကို ဖော်ပြထားသည်။ ထိုရုပ်ရှင်တွင်လည်း မုဟမ္မဒ်သခင်၏ ရုပ်ပုံကို ဖော်ပြခဲ့ခြင်းမရှိပေ။
ဝေဖန်မှုများ
ထိုရုပ်ရှင် ရိုက်ကူးထုတ်လုပ်မှုနှင့်ပတ်သက်၍ မွတ်စလင်ကမ္ဘာတွင် ဝေဖန်မှုများလည်း ရှိနေသည်။
“သေချာတာက ဆော်ဒီလို နိုင်ငံအချို့က ဒီရုပ်ရှင်နဲ့ပတ်သက်ပြီး ပြဿနာရှိပါလိမ့်မယ်။ ဒါပေမယ့် တူရကီ၊ အင်ဒိုနီးရှား၊ မလေးရှားနဲ့ အရှေ့တောင်အာရှက နိုင်ငံတော်တော်များများအပါအ၀င် အစ္စလာမ့်မစ်နိုင်ငံ အများအပြားက ဒီရုပ်ရှင်ကို တောင်းဆိုထားကြပါတယ်” ဟု ဒါရိုက်တာ မာဂျီဒီက ပြောကြားခဲ့သည်။
ထိုရုပ်ရှင်ကို ဝေဖန်သူများမှာ ဆော်ဒီတစ်နိုင်ငံတည်းမဟုတ်ချေ။ အီဂျစ်နိုင်ငံ အလ်-အဇ်ဟာရ် တက္ကသိုလ်ကလည်း တမန်တော်များအား အနုပညာဖြင့် ပုံဖော်ခြင်းမှာ ၎င်းတို့၏ နာမ်ပိုင်းဆိုင်ရာ အခြေအနေကို သေးသိမ်သွားစေနိုင်သောကြောင့် ထိုသို့ဖော်ပြခြင်းကို ကန့်ကွက်ခဲ့ကာ တမန်တော်များ၏ ရုပ်ပုံများအား ဖော်ပြခြင်းသာမက၊ အသံဖော်ပြခြင်းကိုလည်း ဆန့်ကျင်ခဲ့သည်။
“တမန်တော်တွေရဲ့ နေရာမှာ သရုပ်ဆောင်တဲ့သူတွေက နောက်ပိုင်းမှာ ရာဇ၀တ်ကောင်တွေအဖြစ် သရုပ်ဆောင်တာလည်း ရှိကောင်းရှိနိုင်ပါတယ်။ ဒါဆိုရင် ကြည့်တဲ့သူတွေက ဒီဇာတ်ကောင်တွေကို ရာဇ၀တ်မှုတွေနဲ့ တွဲမြင်သွားနိုင်ပါတယ်” ဟု အလ်-အဇ်ဟာရ်အကြီးအကဲ အဟ်မဒ် အလ်-တိုင်ယစ်ဘ်၏ အကြံပေးဖြစ်သူ အဘ်ဒဲလ် ဒေယမ် နိုဆီရ်းက ပြောကြားခဲ့သည်။
Ref: Onislam
