Tag: ProphetDay

ဖေဖော်ဝါရီ ၁၂၊ ၂၀၁၄
M-Media
လမင်း

ရန်ကုန်  ။       ။   မြန်မာနိုင်ငံမှာ ညီညွတ်ချင်ရင်တော့ အားလုံးသော တိုင်းရင်းသားတွေဟာ သည်းခံသင့် သလောက် သည်းခံမှဖြစ်မယ်လို့ ယနေ့ ဆုတောင်းပြည့် အစ္စလာမ်ဝတ်ကျောင်းတော်တွင် ကျင်းပပြုလုပ်သော ၁၄၈၈ ကြိမ်မြောက် တမန်တော် မုဟမ္မဒ်သခင်(ဆွ) ၏ မွေးနေ့အထိမ်းအမှတ် အခမ်းအနားတွင် ဦးအောင်နိုင်(B.Sc.) ကပြောကြားခဲ့သည်။

မိမိ၏ စိတ်ငြိမ်းချမ်းမှသာ ကိုယ်ခန္ဓာငြိမ်းချမ်းမှုကိုရရှိမှာ ဖြစ်ကြောင်း၊ လူတစ်ဦး လူတစ်စုငြိမ်းချမ်းမှသာ တိုင်းပြည် တစ်ပြည်လုံး ငြိမ်းချမ်းသာယာနိုင်မည် ဖြစ်သည်ဟု ၎င်းကပြောကြားခဲ့သည်။ မိမိနိုင်ငံ တိုးတက်ဖွံ့ဖြိုး ကောင်းစားနိုင်ရန် တာဝန်ကျေရန် လိုအပ်ကြောင်း၊ သည်းခံခွင့်လွှတ်မှုရှိအောင် ကြိုးစားနေထိုင်သင့်ကြောင်း၊ ခွင့်လွှတ်သည်းခံမှသာ လောကကြီးငြိမ်းချမ်းမှု ရရှိနိုင်မည် ဖြစ်ကြောင်း ပြောကြားခဲ့ပါသည်။

တမန်တော် မုဟမ္မဒ်(ဆွ) မွေးနေ့ အခမ်းအနားကြီးကို ဘာသာပေါင်းစုံညီညွတ်ရေးကို ရှေးရူလျက် ဘာသာအသီးသီးမှ ပုဂ္ဂိုလ်များကို ဖိတ်ကြားခဲ့ရာ ဘာသာအသီးသီးမှ တက်ရောက်ခဲ့ကြပါသည်။ ကြွရောက်လာသော ဧည့်ပရိတ်သတ်အသီးသီးမှ မဟာတမန်တော်မြတ်ကြီးအကြောင်းနှင့် ငြိမ်းချမ်းရေးတရားများကို ဟောပြောခဲ့ပါသည်။

“ဘာသာမတူတိုင်းသာ ရန်သူတွေဖြစ်ရရင်တော့ လောကကြီးမှာ မိတ်ဆွေ ဆိုတာတောင်ရှိလာမှာ မဟုတ်တော့ဘူး၊ တစ်ယောက်နဲ့ တစ်ယောက် နားလည်မှုရှိမှ လောကကြီးက ငြိမ်းချမ်းမှာဖြစ်တယ်။ မိမိဘာသာရဲ့ အနှစ်သာရကို မိမိအရင်သိအောင်လုပ်၊ ပြီးရင်တော့ သူများတွေကိုမျှဝေရမယ်။ တစ်ဘာသာနဲ့တစ်ဘာသာ နားလည်မှ ငြိမ်းချမ်းမှာပါ။ လေ့လာရာမှာလည်း အတွင်းကျကျ လေ့လာရမယ်။ လူတွေအားလုံးဟာ နာမည်တွေနဲ့ မွေးလာတာ မဟုတ်ပါဘူး။ အားလုံးသော လူတွေဟာ ဖြူစင်တဲ့ နှလုံးသားတစ်စုံနဲ့ မွေးဖွားလာတာပါ” ဟု ဒေါက်တာ စောလှိုင်ဘွား ကပြောကြားခဲ့ပါသည်။

ဆက်လက်ပြီး စာရေးဆရာမ သာယာဝတီ ဒေါ်စန်းစန်းနွဲ့က”အန်တီအနေနှင့် ဖိတ်ကြားခံရလို့ အရမ်းဝမ်းသာမိပါတယ်။ ခေါင်းဆောင်တွေပြောတဲ့ တရားတွေကို အရမ်းကို နားထောင်ချင်နေတာ ကြာပါပြီ။ ဟိုးအရင်ကတည်းက မြန်မာနိုင်ငံတော်ကြီးမှာ တိုင်းရင်းသားပေါင်းစုံလ က်တွဲပြီးနေလာခဲ့တာ အခုလို ဖြစ်ပျက်နေတာ တွေမြင်ရတော့ ယုံတောင်မယုံနိုင်ဘူး။ အားလုံးဟာ ငြိမ်းချမ်းရေးကို အတူယှဉ်တွဲလုပ်ဆောင်ဖို့ လိုအပ်နေပြီဖြစ်ပါတယ်” ဟုပြောကြားခဲ့သည်။

“ကျွန်တော်တို့ဟာ တမန်တော်မြတ်ကြီးရဲ့ လမ်းစဉ်ကိုသာ လိုက်နာရင် အားလုံးဟာ ငြိမ်းချမ်းမှုရရှိမှာ ဖြစ်ပါတယ်။ တမန်တော်မြတ်ပြုလုပ်ခဲ့တဲ့ လမ်းစဉ်တွေဟာလည်း ငြိမ်းချမ်းမှုအတွက်လုပ်ခဲ့တာ ဖြစ်တယ်။ ကိုယ်တော်မြတ်ဟာ အနီ၊ အဖြူ၊ အညို စတဲ့ အရောင်တွေ ခွဲခြားပြီးပြုလုပ်ခဲ့တာ မဟုတ်ပါဘူး အားလုံးအတွက်ဖြစ်ပါတယ်။ တမန်တော်ရဲ့လမ်းစဉ်အတိုင်း ကျွန်တော်တို့လိုက်နာနိုင်အောင် ကြိုးပမ်းကြရပါ့မယ်” ၈၈ ကျောင်းသားခေါင်းဆောင်တစ်ဦးဖြစ်သူ ကိုမြအေးက ပြောခဲ့ပါသညသည်။

တမန်တော်မုဟမ္မဒ်သခင်မွေးနေ့သို့ ကြွရောက်လာသော ဧည့်ပရိတ်သတ် အပေါင်းတို့ စုပေါင်း၍ စလာမ်မေတ္တာများ ပို့သခဲ့ကြပြီး ဆုမွန်ဒိုအာဖြင့် အခမ်းအနားကို ရုပ်သိမ်းခဲ့ပါသည်။

ဖေဖော်ဝါရီ ၂၊ ၂၀၁၄
M-Media
ချမ်းငြိမ်းအေး

“တမန်တော်မြတ်ကြီးက ဗလီထဲမှာတောင် ခရစ်ယာန်တွေကို ဘုရား ရှိခိုးခွင့်ပေးခဲ့တယ်” လို့ ခရစ်ယာန် ဓမ္မတက္ကသိုလ်မှ ပါမောက္ခဒေါက်တာ စောလှိုင်ဘွား မဟာတမန်တော်နေ့ မှာ ဟောပြော

ရန်ကုန်။     ။ အစ္စလာမ်ဘာသာဝင်တို့၏ နှစ်ဘ၀သခင် ကျေးဇူးတော်ရှင်ဖြစ်သော မဟာတမန်တော်မြတ်ကြီး မုဟမ္မဒ်သခင် (ငြိမ်းချမ်းပါစေသား) ဖွားမြင်သန့်စင်သောနေ့ ၁၄၈၈ ကြိမ်မြောက် အထိမ်းအမှတ် ဓမ္မသဘင်နှင့် ဘာသာပေါင်းစုံ ချစ်ကြည်ရေး အခမ်းအနားကို သာကေတမြို့နယ်တွင် ယနေ့ ဖေဖော်ဝါရီလ(၂) ရက် နံနက် ၉ နာရီမှ နေ့လည် ၁၂ နာရီထိ ပြုလုပ်ခဲ့ပါသည်။

အခမ်းအနားကို ကျမ်းတော်မြတ်ကုရ်အာန်ရွတ်ဖတ် သရဇ္ဈာယ်၍ ဖွင့်လှစ်ပေးခဲ့ပြီးနောက် အစီအစဉ်အတိုင်း တရားဒေသနာများ ဟောကြားခဲ့ကြသည်။  မြို့နယ် သံဃ နာယက ဥက္ကဌ ဘဒ္ဒန္တအဂ္ဂသာမိ၊ တိပိဋကရေ အရှင်သူမြတ်က ” တစ်ဘာသာနဲ့တစ်ဘာသာ မတူညီကြပေမယ့် ချစ်ကြည်နေရမယ့် အချိန်ပဲဖြစ်တယ်။ အခုဒီပွဲကို တက်ရောက်လာတာလည်း ဘာသာပေါင်းစုံဆိုတဲ့ စကားလုံးကို နှစ်သက်လို့ တက်ရောက်လာတာပါ။ လောကကြီးကို သာယာချင်ရင်တော့ ငြိမ်းချမ်းချင်ရင်တော့ သည်းခံမှုနဲ့ ခွင့်လွှတ်မှု ရှိဖို့ပဲလိုအပ်ပါတယ်” ဟု  မိန့်ကြားခဲ့သည်။

ဆက်လက်၍ မြန်မာနိုင်ငံ ခရစ်ယာန် ဓမ္မတက္ကသိုလ်မှ ပါမောက္ခဒေါက်တာ စောလှိုင်ဘွားမှ “တစ်ယောက်ထဲ ငြိမ်းချမ်းရေးကို တည်ဆောက်လို့ မရပါဘူး အားလုံးညီညွတ်မှ ဖြစ်မဲ့အချိန်ပါ။ သူ့ဘာသာ ကိုယ့်ဘာသာကို ကောင်းကောင်း မသိကြတဲ့အချိန်မှာ ဒီလိုပွဲတွေ ကျင်းပတာဟာ အရမ်းကို ကောင်းမွန် ပါတယ်။ ဂျီဟာဒ်နဲ့ ပတ်သက်ပြီးလဲ အားလုံးက အစ္စလာမ်ဘာသာဝင်တွေကို အထင်မှားနေကြပါတယ်။ တမန်တော်မြတ်ကြီး ကပြောခဲ့တယ် မတရားတဲ့ အုပ်ချုပ်သူတွေရဲ့ `ရှေ့မှာ အမှန်တရားကို ပြောခြင်းဟာ အကောင်းဆုံးသော ဂျီဟာဒ်ပဲလို့ ပြောခဲ့ပါတယ်။ တမန်တော်မြတ်ကြီးက ဗလီထဲမှာတောင် ခရစ်ယာန် ဘာသာဝင်တွေကို ဘုရား ရှိခိုးခွင့်ပေးခဲ့ပါတယ်။ တမန်တော်မြတ်ကြီးက လူသားအချင်းချင်းကိုလေးစားတဲ့အတွက်ပဲ ဖြစ်ပါတယ်” ဟု ပြောကြားခဲ့သည်။

“ကိုယ့်ကိုယ်ကို လိမ်မှာအောင်စိတ်ထိန်းနိုင်ရပါ့မယ်။ စလာမ်ပေးတယ်ဆိုတာလည်း အင်မတန်ချစ်စရာကောင်းတဲ့ ဓလေ့ပါပဲ။ ငြိမ်းချမ်းပါစေလို့ မေတ္တာပို့တာ အရမ်းကောင်းမွန်တဲ့စကားလေးပါ။ ကောင်းတာကိုပဲ လုပ်ခိုင်းတာ တရားဓမ္မပါပဲ” ဟု ဟိန္ဒူပညာရှင် ဦးအောင်နိုင်မှ ငြိမ်းချမ်းရေးတရား တိုက်ကျွေးခဲ့သည်။

ဆက်လက်ပြီး အလ်ဟာဂ်ျ ခလီဖွာဆရာ ဦးအေးလွင်မှ “သူ့အကြောင်း ကိုယ့်အကြောင်းသိဖို့ ဒီအခမ်းအနားတွေကို ကျင်းပနေရတာပါ။ အစ္စလာမ်မှာ မိန့်ဆိုထားတာက ပတ်ဝန်းကျင်ကို အသံနဲ့၊ အနံ့ နဲ့တောင် ဒုက္ခပေးလို့မရပါဘူး။ တမန်တော်ကို ဓားကိုင်ပြီး သာသနာပြုတယ်လို့ပြောနေကြတယ်။ အိန္ဒိယခေါင်းဆောင်ကြီး မဟတ္တမ ဂန္နီက ပြောကြားခဲ့တာရှိတယ်။ တမန်တော်က ဓားကိုင်ပြီး သာနာပြုရင် အဲ့ဒီဓားဟာ မေတ္တာဓား ဖြစ်တယ်လို့ ပြောကြားခဲ့တယ်” ဟု ဟောပြောခဲ့ပါသည်။

ထို့နောက် တမန်တော် မုဟမ္မဒ်သခင်(ဆွ) အား ဂုဏ်ပြုသည့် ဓမ္မတေး လင်္ကာများရွတ်ဆိုပြီး အခမ်းအနားကို ဆုမွန်ဒိုအာဖြင့် ရုပ်သိမ်းခဲ့ပါသည်။ အခမ်းအနားသို့ ဘာသာပေါင်းစုံမှ ညီအကိုမောင်နှမ များတက်ရောက်ခဲ့ကြပါသည်။