Tag: Ramdan2020

မေ ၃၊ ၂၀၂၀
M-Media

-တူရကီက ချို့တဲ့သူ​တွေကို ရမ်ဇာဥပုသ်လအတွင်း အစားအသောက်တွေ ဝေငှ လှူဒါန်းနိုင်ဖို့အတွက် အာဆင်နယ်ကွင်းလယ်လူ မီဆု အိုဇေးလ်က ပေါင် ၈ သောင်း လှူဒါန်းခဲ့ပါတယ်။

လူပေါင်း ၁၆၀၀၀ ကို အစားအသောက်တွေ ကျွေးမွေးနိုင်မယ့် အဲဒီငွေကြေးကို အိုဇေးလ်ဟာ တူရကီ လခြမ်းနီအဖွဲ့ကို လှူဒါန်းခဲ့တာ ဖြစ်ပါတယ်။

“ညီအစ်ကို မီဆုကို ကျေးဇူးတင်ပါတယ်။ လိုအပ်နေသူတွေကို ကျွန်တော်တို့ အစားအသောက်တွေ ဝေပေးနိုင်တော့မှာပါ” လို့ တူရကီ လခြမ်းနီအဖွဲ့ တာဝန်ရှိသူ ကီရင်မ် ကီနစ်က ပြောကြားခဲ့ပါတယ်။

လခြမ်းနီအဖွဲ့ဖြစ်တဲ့အတွက် တစ်နှစ်ပတ်လုံး လူတွေကို ကူညီနိုင်အောင် ပြင်ဆင်ထားရပြီး၊ ပရဟိတ လုပ်ငန်းတွေအတွက် လှူဒါန်းကူညီသူ အားလုံးကို ကျေးဇူးတင်တယ်လို့လည်း ကီနစ်က ထည့်သွင်း ပြောဆိုခဲ့ပါတယ်။

တူရကီနွယ်ဖွားဖြစ်ပြီး ဂျာမနီလက်ရွေးစင်ကစားသမားတစ်ဦးဖြစ်တဲ့ အိုဇေးလ်ဟာ အာဖရိက၊ အရှေ့အလယ်ပိုင်းနဲ့ အာရှတိုက်က လိုအပ်နေသူတွေအတွက် မကြာခဏ ကူညီလှူဒါန်းသူတစ်ဦး ဖြစ်ပါတယ်။

ပြီးခဲ့တဲ့မတ်လအတွင်း အိုဇေးလ်ဟာ မြန်မာနိုင်ငံက ခွဲစိပ်ကုသဖို့ လိုအပ်နေတဲ့ ကလေးငယ် ၄၀ အတွက် ငွေကြေး ထောက်ပံ့လှူဒါန်းခဲ့ပါတယ်။

Ref: Daily Mail

ဧပြီ ၂၃၊ ၂၀၂၀
M-Media

-ဧပြီလ ၂၄ ရက်နေ့မှာ စတင်ကျရောက်မယ့် ရမ်ဇာန်ဥပုသ်လကို မိမိတို့ရဲ့ အိမ်မှာသာ ဖြတ်သန်းပြီး လူစုလူဝေးနဲ့ ဝတ်ပြုတာ၊ ဝါဖြေတာတွေကို ရှောင်ရှားကြဖို့အတွက် နိုင်ငံတကာ အစ္စလာမ့် ဓမ္မပညာရှင်တွေက အစ္စလာမ်ဘာသာဝင်တွေကို တိုက်တွန်းထားပါတယ်။

တစ်လတာကြာမြင့်မယ့် ရမ်ဇာန်ဥပုသ်လမှာ အစ္စလာမ်ဘာသာဝင်တွေဟာ ဥပုသ်လီလ ဆောက်တည်ကြရတာပါ။ အလှူဒါနပြုတာ၊ အေသေကားဖ် တရားအားထုတ်တာ၊ စုပေါင်းဝါဖြေတာ၊ အထူးဝတ်ပြုမှုဖြစ်တဲ့ သာရာဝီကို လူစုလူဝေးနဲ့ ဝတ်ပြုဆုတောင်းတာတွေဟာ ရမ်ဇာန်ဥပုသ်လမှာ ပုံမှန် လုပ်ဆောင်နေကြ ထုံးတမ်းဓလေ့တွေ ဖြစ်ပါတယ်။

အခုနှစ် ရမ်ဇာန်ဥပုသ်လက Covid-19 ကပ်ရောဂါ ပြန့်နှံ့မှုနဲ့ ကြုံတွေ့နေရတာပါ။ ကမ္ဘာတစ်ဝှမ်းက အစ္စလာမ့်ရေးရာ ဓမ္မသတ်မှူးတွေ၊ အစ္စလာမ်ဓမ္မပညာရှင်တွေကတော့ ကပ်ရောဂါတားဆီးရေးနဲ့ ကြိုတင်ကာကွယ်ရေးအတွက် ရမ်ဇာန်ဥပုသ်လကို မိမိတို့အိမ်မှာ မိသားစုနဲ့ဖြတ်သန်းဖို့၊ သာရာဝီဝတ်ပြုဆုတောင်းမှုကို အိမ်မှာသာ ပြုလုပ်ကြဖို့ အစ္စလာမ်ဘာသာဝင်တွေကို တိုက်တွန်းထားပါတယ်။

ဆော်ဒီအာရေဗျမှာတော့ အစ္စလာမ့် ဓမ္မသတ်မှူးချုပ်က ရမ်ဇာန်ဥပုသ်လ သာရာဝီဝတ်ပြုဆုတောင်းမှု၊ ဝါကျွတ်အီးဒ်နေ့ ဝတ်ပြုဆုတောင်းမှုတွေကို အိမ်မှာသာလုပ်ဆောင်ကြဖို့၊ စုပေါင်းဝါဖြေပွဲတွေ မလုပ်ကြဖို့ အစ္စလာမ်ဘာသာဝင်တွေကို ညွှန်ကြားခဲ့ပါတယ်။

နိုင်ငံတစ်ဝှမ်းက ဗလီဝတ်ကျောင်းတော်အားလုံးကို ပိတ်ထားမှာဖြစ်ပြီး မြင့်မြတ်ရာဗလီနှစ်ခုဖြစ်တဲ့ မက္ကာက ‘မတ်စ်ဂျစ်ဒ်ဟရမ် ဗလီ’ နဲ့ မဒီနာက ‘တမန်တော်မြတ်ဗလီ’ တွေမှာသာရာဝီ ဝတ်ပြုဆုတောင်းမှုကို အပြင်လူတွေမပါဘဲ ဗလီရှေ့ဆောင်ဆရာနဲ့ ဝန်ထမ်းတွေသာ ဝတ်ပြုမှုမှာ ဖြစ်ပါတယ်။

ပါလက်စတိုင်းနိုင်ငံ ဂျေရုစလင်မြို့က အစ္စလာမ်ဘာသာဝင်တွေရဲ့ တတိယ အမြင့်မြတ်ဆုံး ဗလီဝတ်ကျောင်းတော် အလ်အက္ကဆွာဗလီကလည်း ရမ်ဇာန်ဥပုသ်လ တစ်လလုံးကို ပိတ်ထားမယ်လို့ ထုတ်ပြန်ခဲ့ပြီး ဒါဟာ ဓမ္မသတ်ဖြတ်ထုံး၊ ဆေးဘက်ဆိုင်ရာ ပညာရှင်တွေရဲ့ အကြံပြုချက်အတိုင်း ကိုရိုနာဗိုင်းရပ်စ် တားဆီးကာကွယ်ရေးအတွက် ဆောင်ရွက်တာ ဖြစ်တယ်လို့ ဂေါပကအဖွဲ့က ပြောကြားခဲ့ပါတယ်။

အရှေ့အလယ်ပိုင်း၊ အာရှ၊ အာဖရိက၊ ဥရောပ၊ အမေရိကတို့မှာရှိတဲ့ နိုင်ငံတော်တော်များများမှာ ဗလီဝတ်ကျောင်းတော်တွေကို ရမ်ဇာန်ဥပုသ်လမှာလည်း ဆက်လက်ပိတ်ထားမှာဖြစ်ပြီး ဥပုသ်လကို အိမ်မှာသာ ဖြတ်သန်းကြဖို့ အစ္စလာမ်ဓမ္မပညာရှင်တွေက အစ္စလာမ်ဘာသာဝင်တွေကို တိုက်တွန်းထားပါတယ်။

ကမ်းဘရစ်ဂျ် အစ္စလာမ့်ကောလိပ်က ဌာနမှူးဖြစ်ပြီး နာမည်ကျော် အစ္စလာမ့်ပညာရှင်လည်းဖြစ်တဲ့ အက္ကရမ် နဒဝီက သာရာဝီကို မိမိတို့ရဲ့အိမ်မှာ ဝတ်ပြုဆုတောင်းပေမယ့်လည်း အကျိုးကုသိုလ် လျော့မသွားဘူးလို့ ပြောကြားခဲ့ပါတယ်။

“၂ ယောက်၊ ဒါမှမဟုတ် ၂ ယောက်ထက်ပိုရင် စုပေါင်းဝတ်ပြုမှု အထမြောက်ပါတယ်။ ပုံမှန် စုပေါင်းဝတ်ပြုနေကြနေရာမှာ ဝတ်ပြုတာဟာ ကိုယ်နဲ့ တစ်ခြားသူတွေရဲ့ ကျန်းမာရေးကို ထိခိုက်မယ်ဆိုရင် နေအိမ်မှာပဲ ဝတ်ပြုလို့ ရပါတယ်”

ပါကစ္စတန်မှာ ဗလီတွေဖွင့်ထား

ပါကစ္စတန်အစိုးရက နိုင်ငံအတွင်း အစ္စလာမ့်ဓမ္မပညာရှင်တွေနဲ့ ဆွေးနွေးမှု ပြုလုပ်ခဲ့ပြီးတဲ့နောက် ဗလီတွေကို ရမ်ဇာန်ဥပုသ်လအတွက် ကန့်သတ်ချက်နဲ့ ဖွင့်ခွင့်ပေးခဲ့ပါတယ်။

အဲဒီကန့်သတ်ချက်တွေထဲမှာ ကောဇောမခင်းဖို့၊ လက်ဆွဲမနှုတ်ဆက်ဖို့ လူအကန့်အသတ်နဲ့သာ ဝတ်ပြုဖို့ စတာတွေ ပါဝင်ပါတယ်။

ရုပ်သံကတစ်ဆင့် ဝတ်ပြုမှု

ကိုရိုနာကပ်ရောဂါပြန့်နှံ့မှုနောက်ဆက်တွဲ လူစုလူဝေးနဲ့ ဝတ်ပြုဆုတောင်းဖို့ မဖြစ်နိုင်တာကြောင့် ကမ္ဘာ့နိုင်ငံတွေက ဗလီတစ်ချို့ဟာ စုပေါင်းဝတ်ပြုဆုတောင်းမှုကို အွန်လိုင်းကနေတစ်ဆင့် အစ္စလာမ်ဘာသာဝင်တွေ ပါဝင်နိုင်အောင် ဆောင်ရွက်ပေးခဲ့ပါတယ်။

သောကြာနေ့ ဝတ်ပြုဆုတောင်းမှုက ‘ခွသ်ဘာ ဒေသနာ’ ကို ဆိုရှယ်မီဒီယာတွေ၊ ဝဘ်ဆိုက်တွေကနေ တိုက်ရိုက်လွှင့်ပေးတာမျိုးပါ။ အပတ်စဉ် အစ္စလာမ်ဘာသာရေးသင်ခန်းစာတွေကို ဗီဒီယိုတွေနဲ့ ပို့ချပေးတာမျိုးလည်း လုပ်ဆောင်ခဲ့ပါတယ်။

ရမ်ဇာန်ဥပုသ်လမှာလည်း အွန်လိုင်းကနေ စုပေါင်းဝါဖြေတာ၊ ကိုရန်ကျမ်းစာ သင်ပေးတာ၊ တရားဒေသနာ ဟောကြားတာတွေ အွန်လိုင်းကနေတစ်ဆင့် လုပ်ဆောင်သွားဖို့လည်း ဗလီတစ်ချို့က စီစဉ်နေပါတယ်။

အွန်လိုင်းကနေ စုပေါင်းဝတ်ပြုဆုတောင်းမှုဟာ အထမမြောက်ဘူးလို့ ပညာရှင်အများစုရဲ့ သုံးသပ်မှုတွေလည်း ရှိနေပါတယ်။

Ref: Aljazeera