News @ M-Media

Tag: Ramdan2021

  • ဝါဖြေချိန် အလွန်အကျွံမစားရန်နှင့် ရွေးချယ်စားသောက်ရန် ယူအေအီးဆရာဝန်များ အကြံပြု

    ဝါဖြေချိန် အလွန်အကျွံမစားရန်နှင့် ရွေးချယ်စားသောက်ရန် ယူအေအီးဆရာဝန်များ အကြံပြု

    ဧပြီ ၁၆၊ ၂၀၂၁
    M-Media

    -တစ်နေကုန် အစားရှောင်ကာ ဥပုသ်သီလ ဆောက်တည်ပြီးတဲ့နောက် ညနေ ဝါဖြေတဲ့အချိန်မှာ အလွန်အကျွံမစားဖို့နဲ့ အစားအသောက်ကို ရွေးချယ်စားသောက်ကြဖို့ ယူအေအီး ဆရာဝန်တွေက အကြံပြုထားပါတယ်။

    အစ္စလာမ်ဘာသာဝင်တွေရဲ့ ရမ်ဇာန်ဥပုသ်လဟာ ဧပြီလ ၁၃ ရက်နေ့မှာ စတင်ခဲ့တာပါ။ တစ်လတာကြာမြင့်မယ့် ဥပုသ်လမှာ မနက်အရုဏ်တက်ချိန်ကနေ နေဝင်ချိန်အထိ အစားရှောင်ရပြီး ညနေဥပုသ်ထွက်တဲ့အချိန်မှာ အစားအသောက် ရွေးချယ်စားသောက်မှုအားနည်းရင် အစာအိမ်နဲ့ပတ်သက်တဲ့ ရောဂါမျိုးတွေ ဖြစ်တတ်ပါတယ်။

    ရမ်ဇာန်ဥပုသ်လရောက်တဲ့အခါ အစာအိမ်နာတာ၊ ရောင်တာလို ရောဂါမျိုးတွေနဲ့ ဆေးရုံလာရတဲ့လူနာတွေ ပိုများလာတယ်လို့ ယူအေအီးက ဆရာဝန်တွေက ပြောပါတယ်။

    တစ်နေကုန် အစာအမစားတာကြောင့် ခန္ဓာကိုယ်တွင်းက ဇီ၀ကမ္မဖြစ်စဉ်တွေ နှေးကွေးသွားတဲ့အတွက် အစားစားတဲ့အခါမှာ ဖြေးဖြေးချင်းသာ စားသင့်တယ်လို့ Burjeel ဆေးရုံက အစာအဟာရဆိုင်ရာ ဆရာဝန် အာရ်ချာနာ ဘာဂျူက ပြောပါတယ်။

    “ဥပုသ်ထွက်တဲ့အချိန် အလွန်အကျွံစားသုံးတာဟာ အစာချေနိုင်မှုကို အားနည်းစေပြီး၊ အစာမကျေတာ၊ အစာအိမ်ရောင်တာ ဝမ်းလျှောတာတွေ ဖြစ်ကာ တစ်ခါတစ်ရံ ဆရာဝန်သွားပြရတဲ့အထိ ဖြစ်တတ်ပါတယ်။ အစားအသောက်ပမာဏထက် အရည်အသွေးကို အဓိကထားရမှာပါ။ မှန်မှန်ကန်ကန် ရွေးချယ်စားသောက်မှ အားပြန်ပြည့်ပြီး ကျွန်တော်တို့ရဲ့ ဆဲလ်တွေအတွက် လုံ​လောက်တဲ့အဟာရနဲ့ ရေဓာတ် ရရှိစေမှာ ဖြစ်ပါတယ်”

    Bareen International ဆေးရုံက ကိုယ်တွင်းဆေးပညာဆိုင်ရာ စပါယ်ရှယ်လစ် ဒေါက်တာ စော်စံ ဟူမိုင်ဒါက ရမ်ဇာန်ဥပုသ်လဟာ နေထိုင်မှုပုံစံကို ပြောင်းလဲဖို့၊ ကျန်းမာရေးနဲ့ညီညွတ်တဲ့ အမူအကျင့်တွေ မွေးမြူဖို့ အကောင်းဆုံး အခွင့်အရေးဖြစ်တယ်လို့ ပြောပါတယ်။

    “ပရိုတိန်းကို လုံလောက်အောင် ဖြည့်တင်းတာ၊ ရေကို မကြာခဏ သောက်သုံးပေးတာတွေဟာ ကျန်းမာရေးအတွက် ကောင်းမွန်တဲ့ နည်းနာတွေပါ။ ရမ်ဇာန်ကို ကောင်းမွန်စွာ ဖြတ်သန်းပါ။ အစာမကျေတာကြောင့် နေမကောင်းဖြစ်ပြီး ဆေးရုံဆေးခန်းသွားရတာမျိုး မဖြစ်အောင် ရှောင်ကျဉ်ကြပါ”

    ဝါဖြေတဲ့အချိန်မှာ စွန်ပလွံသီးစားပြီး ရေများများသောက်တာဟာ ခန္ဓာကိုယ်က ဂလူးကို့စ်ဓာတ် ပမာဏကို ထိန်းညှိပေးပြီး၊ အစာခြေစနစ်ကို အထောက်အကူပေးကြောင်း၊ စွန်ပလွံသီးမှာပါတဲ့ သကြားနဲ့ ကာဘိုဟိုက်ဒရိတ်က ဗိုက်အမြန်ပြည့်အောင် ကူညီပေးတာကြောင့် အလွန်အကျွံစားသုံးမှုကို တားဆီးပေးကြောင်း သူမက ထည့်သွင်းပြောဆိုခဲ့ပါတယ်။

    ဥပုသ်ထွက် ဝါဖြေတဲ့အချိန်မှာ အဆီများတာတွေရှောင်ပြီး ပရိုတိန်းပါတာတွေ စားသုံးဖို့၊ သ​ကြားဓာတ်များတဲ့အရည်တွေ၊ ကဖင်းဓာတ်ပါတာတွေကို လျှော့ပြီး အသီးဖျော်ရည်၊ ကွေကာအုပ်တွေ သောက်သုံးခြင်းဟာ အစာအိမ်ကို ပိုမိုကောင်းမွန်စေတယ်လို့လည်း ဆရာဝန်တွေက အကြံပြု တိုက်တွန်းထားပါတယ်။

    Ref: Alarabiya

  • ရမ်ဇာန်ဥပုသ်လ ဝတ်ပြုဆုတောင်းမှုဆိုင်ရာ လမ်းညွှန်ချက်များ ဆော်ဒီထုတ်ပြန်

    ရမ်ဇာန်ဥပုသ်လ ဝတ်ပြုဆုတောင်းမှုဆိုင်ရာ လမ်းညွှန်ချက်များ ဆော်ဒီထုတ်ပြန်

    ဧပြီ ၁၂၊ ၂၀၂၁
    M-Media

    -ရမ်ဇာန်ဥပုသ်လ မြင့်မြတ်ရာ ဝတ်ကျောင်းတော်တွေမှာ အွမ္မရာဟ် ဘုရားဖူးခရီးစဉ်နဲ့ နေ့စဉ် ဝတ်ပြုဆုတောင်းမှုတွေအတွက် လိုက်နာရမယ့် စည်းမျဉ်းစည်းကမ်းတွေ လမ်းညွှန်ချက်တွေကို ဆော်ဒီအစိုးရက ထုတ်ပြန်လိုက်ပါတယ်။

    မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော်တွေ၊ မြင့်မြတ်ရာနေရာတွေကို ဝင်ရောက်ပြီး အွမ္မရာဟ်ပြုချင်သူတွေ၊ ဝတ်ပြုဆု​တောင်းချင်တဲ့သူတွေဟာ ကိုဗစ်ကာကွယ်ဆေးကို ၂ ကြိမ်ထိုးထားတယ်ဆိုတဲ့ အထောက်အထား ပြနိုင်ရမှာဖြစ်ပါတယ်။

    အွမ္မရာဟ်ခရီးစဉ်အတွက် Tawakkalna နဲ့ Eatmarna အက်ပလီကေးရှင်းတွေကနေသာ လျှောက်ထားနိုင်မှာပါ။ မက္ကာမြို့လယ်တစ်၀ိုက်ကို မှတ်ပုံတင်ထားတဲ့ ကားကလွဲလို့ ဘယ်ကားမှ အဝင်မခံဘဲ မြင့်မြတ်ရာနေရာတွေမှာ ဝတ်ပြုဆုတောင်းလိုတဲ့သူတွေအနေနဲ့ လိုအပ်တဲ့ စစ်ဆေးမှု​တွေကို ခံယူနိုင်ရေး အချိန်မီလာရောက်ရမယ်လို့ ဆော်ဒီအစိုးရက ထုတ်ပြန်ထားပါတယ်။

    ကိုဗစ်အန္တရာယ်ကြောင့် မြင့်မြတ်ရာနေရာတွေထဲကို ကလေးငယ်တွေ လာခွင့်ပြုမှာမဟုတ်ပါဘူး။ တရားဝင် လျှောက်ထားခြင်းမရှိဘဲ အွမ္မရာဟ်ပြုလုပ်သူတွေအနေနဲ့ ဆော်ဒီရီယဲလ် တစ်သောင်း (ကန် ၂၆၆၇၁ ဒေါ်လာ) ဒဏ်တပ်ခံရမှာ ဖြစ်ပါတယ်။

    နိုင်ငံတစ်ဝှမ်းက ဗလီဝတ်ကျောင်းတော်တွေမှာ သာရာဝီ ဝတ်ပြုဆုတောင်းမှုကို မိနစ် ၃၀ အတွင်း အပြီး ပြုလုပ်ရမှာ ဖြစ်ပါတယ်။

    မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော်တွေကို လာရောက်ကြသူတွေအနေနဲ့ ကိုဗစ်စည်းမျဉ်းစည်းကမ်းတွေကို ကြပ်ကြပ်မတ်မတ် လိုက်နာဖို့ ဆော်ဒီအစိုးရက တိုက်တွန်းနှိုးဆော်ထားပါတယ်။

    (ဓာတ်ပုံ – မက္ကာမြို့ရှိ မြင့်မြတ်ရာ ကအ်ဘာဝတ်ကျောင်းတော်ရှေ့တွင် အစ္စလာမ်ဘာသာဝင် အမျိုးသား၊ အမျိုးသမီးများ ကိုဗစ်စည်းကမ်းနှင့်အညီ ဝတ်ပြုဆုတောင်းနေစဉ်)

    Ref: Arab News

  • ရမ်ဇာန် ဥပုသ်လတွင် လူစု၍ ဝါထမင်းစားမှု၊ ဝါဖြေမှုကို ဆော်ဒီ ခွင့်မပြုသေး

    ရမ်ဇာန် ဥပုသ်လတွင် လူစု၍ ဝါထမင်းစားမှု၊ ဝါဖြေမှုကို ဆော်ဒီ ခွင့်မပြုသေး

    ဧပြီ ၇၊ ၂၀၂၁
    M-Media

    -ကိုဗစ်ကူးစက်မှု ဖြစ်ပွားမှာကို စိုးရိမ်တဲ့အတွက် ရမ်ဇာန်လ ဗလီဝတ်ကျောင်းတော်တွေမှာ မနက် ဝါထမင်းစုစားတာ၊ ညနေဝါထွက် ဝါစုဖြေတာတွေကို ခွင့်ပြုမှာမဟုတ်ဘူးလို့ ဆော်ဒီအာရေဗျ အစိုးရက ထုတ်ပြန်ပါတယ်။

    အစ္စလာမ်ဘာသာဝင်တို့ရဲ့ ရမ်ဇာန်ဥပုသ်လဟာ လာမယ့်တစ်ပတ်မှာ စတင်မှာပါ။ ဥပုသ်လအတွင်း ဗလီတွေ၊ အိမ်တွေ၊ အများပြည်သူနဲ့ သက်ဆိုင်တဲ့ နေရာတွေမှာ ဝါထမင်းစားတာ၊ ဝါဖြေတာတွေ ပုံမှန်ပြုလုပ်လေ့ရှိပေမယ့် ကိုဗစ်ကူးစက်တဲ့ မနှစ်က စတင်ပြီး ဒါတွေ လုပ်ဆောင်လို့ မရတော့ပါဘူး။

    ပြီးခဲ့တဲ့နှစ်ကလည်း ဆော်ဒီဟာ လူစုပြီး ဝါထမင်းစားတာ၊ ဝါဖြေတာတွေကို ပိတ်ပင်ခဲ့သလို၊ ဗလီဝတ်ကျောင်းတွေမှာ ဥပုသ်လတစ်လလုံး သာရာဝီ အထူးဝတ်ပြုဆုတောင်းမှုကိုလည်း ခွင့်မပြုခဲ့ပါဘူး။ အခုနှစ်မှာ သာရာဝီ ဝတ်ပြုဆုတောင်းမှုအတွက် သတင်းမထုတ်ပြန်သေးပေမယ့် ရမ်ဇာန်ဥပုသ်လအတွက် လိုအပ်တဲ့ သတ်မှတ်ချက်တွေကို မကြာခင် ထုတ်ပြန်သွားမယ်လို့ ဆော်ဒီအာဏာပိုင်တွေက ပြောပါတယ်။

    ပြီးခဲ့တဲ့နှစ် ဇွန်လက ဆော်ဒီအာရေဗျမှာ တစ်ရက်ကို ကိုဗစ်ကူးစက်သူ ၄၀၀၀ လောက်ရှိခဲ့ပေမယ့် ဇန်နဝါရီလမှာတော့ တစ်နေ့ကို ၁၀၀ အောက်အထိ ကျဆင်းသွားပါတယ်။ ဒါပေမယ့် ပြီးခဲ့တဲ့ရက်ပိုင်းမှာ ကူးစက်သူ တစ်နေ့ ၇၀၀ လောက်အထိ ပြန်တက်လာပါတယ်။

    Ref: Alarabiya