ဧပြီ ၂၆၊ ၂၀၁၉
M-Media
– အနာဂတ်မှာ ပေါ်ထွက်လာမယ့် ကားပျံတွေဟာ ဖန်လုံအိမ် ဓာတ်ငွေ့ကို ပိုမိုလျှော့ချနိုင်ပြီး ရာသီဥတု ပြောင်းလဲမှုကြောင့် ဖြစ်ပေါ်လာမယ့် ဆိုးကျိုးတွေကို ပိုမိုလျော့ပါးစေလိမ့်မယ်လို့ မကြာသေးခင်က အမေရိကန်နိုင်ငံမှာ ပြုလုပ်ခဲ့တဲ့ သုတေသနတစ်ခုမှာ တွေ့ခဲ့ရပါတယ်။
ကမ္ဘာတစ်ဝှမ်းက နည်းပညာကုမ္ပဏီတွေဟာ အများပြည်သူ သယ်ယူပို့ဆောင်ရေးမှာ အသုံးပြုနိုင်မယ့် ကားပျံတွေကို အပြိုင်အဆိုင် တီထွင်ထုတ်လုပ်နေကြပြီး လာမယ့် ၁၀ စုနှစ်မှာ ကျယ်ကျယ်ပြန့်ပြန့် သုံးစွဲဖို့ စီစဉ်နေပါတယ်။ ဒေါင်လိုက် အတက်အဆင်း ပြုလုပ်နိုင်မယ့် VTOL လို့ခေါ်တဲ့ အဲဒီ ကားပျံတွေဟာ လက်ရှိမှာတော့ နမူနာအဆင့်မှာ ရှိနေပါသေးတယ်။
မီချီဂန်တက္ကသိုလ်နဲ့ Ford မော်တော်ကား ကုမ္ပဏီက ပညာရှင်တွေဟာ လျှပ်စစ်ဓာတ်အားနဲ့ မောင်းနှင်မယ့် ကားပျံတွေရဲ့ အချိန်နဲ့ စွမ်းအင် ချွေတာနိုင်မှု၊ ဘာဝပတ်ဝန်းကျင်အပေါ် ရိုက်ခတ်မှုတွေကို နမူနာထုတ်ထားတာတွေကိုကြည့်ကာ လေ့လာဆန်းစစ်ခဲ့ပြီး အခုလအစောပိုင်းက Nature Communications ဂျာနယ်မှာ ဖော်ပြခဲ့ပါတယ်။
‘လေပေါ်တက္ကဆီ’ လို့အမည်ပေးထားပြီး အမြင့်ပေ ၁၀၀၀ နဲ့ ၂၀၀၀ ကြားမှာ တစ်နာရီကို မိုင် ၁၅၀ နဲ့ ၂၀၀ ကြားအထိ မောင်းနှင်နိုင်မယ့် Uber ကုမ္ပဏီထုတ် ကားပျံဟာ လေယာဉ်မှူးတစ်ဦး၊ ခရီးသည် ၃ ဦးအပြည့်နဲ့ အသုံးပြုမယ်ဆိုရင် ၆၂ မိုင်သွားတိုင်း သာမန်ကားတွေထက် ကာဘွန်ဒိုင်အောက်ဆိုက် ထုတ်လွှတ်မှု ၅၂ ရာခိုင်နှုန်း လျော့နည်းသွားတာကို လေ့လာမှုမှာ တွေ့ခဲ့ရပါတယ်။ သာမန် လျှပ်စစ်ကားတွေနဲ့ယှဉ်ရင်တော့ ကာဘွန်ထုတ်လွှတ်မှုကို ၆ ရာခိုင်နှုန်း လျှော့ချနိုင်မှာ ဖြစ်ပါတယ်။
ကားပျံတွေဟာ လက်ရှိအသုံးပြုနေတဲ့ လျှပ်စစ်ကားတွေနဲ့ယှဉ်ရင် ခရီးတိုတွေမှာ သိပ်ပြီး ထူးခြားမှုမရှိပေမယ့် ခရီးဝေးသွားမယ်၊ ကားနဲ့ သွားရခက်တဲ့နေရာတွေကို သွားရောက်မယ်ဆိုရင် စွမ်းအင်နဲ့ အချိန်ချွေတာမှု၊ သဘာဝပတ်ဝန်းကျင် ထိန်းသိမ်းစောင့်ရှောက်မှုတွေအတွက် ပိုမို အကျိုးဖြစ်ထွန်းမယ်လို့လည်း လေ့လာမှုမှာ တွေ့ခဲ့ရပါတယ်။ အသံဆူညံမှုနဲ့ ထုတ်လုပ်မှု ကုန်ကျစားရိတ် လျှော့ချနိုင်ရေး သုတေသနတွေ ထပ်လုပ်ဖို့ လိုအပ်တယ်လို့လည်း သုတေသန ပညာရှင်တွေက သုံးသပ်ခဲ့ပါတယ်။
Ref :CNN
