သြဂုတ် ၂၁၊ ၂၀၁၇
M-Media
– ဉာဏ်ရည်တု (AI) နည်းပညာကို အသုံးပြုထားတဲ့ လူသတ်စက်ရုပ် (Killer robot) တွေ တီထွင်ထုတ်လုပ်နေတာကို တားမြစ်ပေးဖို့အတွက် ကမ္ဘာ့ထိပ်တန်း နည်းပညာပညာရှင် ၁၀၀ ကျော်က ကုလသမဂ္ဂကို တိုက်တွန်းလိုက်ပါတယ်။
ဒီလို AI နည်းပညာအသုံးပြု လက်နက်တွေ ထုတ်လုပ်မှုကို ‘စစ်မက်ဆိုင်ရာ တတိယ တော်လှန်ရေး’ လို့ အမည်ပေးထားပြီး ပညာရှင်တွေရဲ့ တိုက်တွန်းစာမှာ ဒီကိစ္စအတွက် သတိပေးခဲ့ကာ ပြဿနာတွေ တစ်သီတစ်သန်းကြီး ဖြစ်လာလိမ့်မယ်လို့လည်း ပြောကြားခဲ့ပါတယ်။
ရက်စက်တဲ့ လက်နက်တွေ ဖြစ်လာနိုင်ပြီး အပြစ်မဲ့ပြည်သူတွေအပေါ် အကြမ်းဖက်သမားတွေက အသုံးပြုလာနိုင်တဲ့ ဒီလက်နက်တွေကို တားမြစ်ဖို့အတွက် ပညာရှင်တွေဟာ ပြင်းထန်တဲ့ စကားလုံးတွေနဲ့ တိုက်တွန်းခဲ့ပြီး ဒါကိုလုပ်ဆောင်ဖို့ အချိန် သိပ်မရှိတော့ဘူးလို့လည်း သတိပေးခဲ့ပါတယ်။
Killer robot ဆိုတာ လူသားရဲ့ ကိုင်တွယ်မှုမပါဘဲ ပစ်မှတ်ကို ရွေးချယ်ပစ်ခတ်နိုင်တဲ့ လက်နက်အမျိုးစားဖြစ်ပြီး လက်ရှိမှာ တီထွင်နေဆဲအဆင့်မှာသာ ရှိနေပါတယ်။ ဒါပေမယ့် အမှန်တကယ် ပေါ်ထွက်လာဖို့ နီးစပ်နေပါတယ်။
ကုလကို တောင်းဆိုခဲ့တဲ့ နည်းပညာဂုရု ၁၀၀ ကျော်မှာ Space X ပိုင်ရှင် အေလွန်မက်စ်၊ ဂူးဂဲလ်ရဲ့ DeepMind ကို ပူးတွဲတည်ထောင်သူ မူစတာဖာ ဆူလေမန်တို့လည်း ပါဝင်ပြီး ကုလရဲ့ တားမြစ်လက်နက်စာရင်း CCW မှာ ထည့်သွင်းပေးဖို့လည်း တိုက်တွန်းခဲ့ပါတယ်။
အဲဒီကိစ္စအတွက် ကုလဟာ ဒီနေ့မှာ တွေ့ဆုံဆွေးနွေးဖို့ ရှိပေမယ့် မလုပ်ဖြစ်ဘဲ နိုဝင်ဘာလအထိ ရွှေ့ဆိုင်းခဲ့ပါတယ်။ ကုလဟာ အရင်ကလည်း Killer robot တွေကို ပိတ်ပင်ရေး ဆွေးနွေးမှုတွေ ပြုလုပ်ဖူးပါတယ်။
၂၀၁၅ ခုနှစ်ကလည်း နည်းပညာ၊ သိပ္ပံနဲ့ သုတေသန နယ်ပယ်က ပညာရှင် ၁၀၀၀ ကျော်လောက်ဟာ ဒီလက်နက်တွေကို တားဆီးဖို့ သတိပေးခဲ့ဖူးပါတယ်။
Ref : BBC
