News @ M-Media

Tag: Shia_Muslim

  • အာရ်ဘာအင်း (သို့မဟုတ်) အီမာမ် ဟူစိန်၏ မေတ္တာတရားကို ဖော်ကျူးသည့် ပွဲတော်

    အာရ်ဘာအင်း (သို့မဟုတ်) အီမာမ် ဟူစိန်၏ မေတ္တာတရားကို ဖော်ကျူးသည့် ပွဲတော်

    နိုဝင်ဘာ ၂၆၊ ၂၀၁၆
    M-Media

    karbala
    ကာရ်ဘာလာတွင် ရှီအာမွတ်စလင်များ ချီတက်နေကြစဉ်

    – ပြီးခဲ့တဲ့ သီတင်းပတ်အတွင်းမှာ ကမ္ဘာတစ်ဝှမ်းက သန်းနဲ့ချီတဲ့ ရှီအာ မွတ်စလင်တွေဟာ ထင်ရှားတဲ့ မွတ်စလင် အာဇာနည်တစ်ဦးကို ဂုဏ်ပြုတဲ့အနေနဲ့ အီရတ်နိုင်ငံကို ချီတက်ခဲ့ကြပြီး ဒါဟာ ကမ္ဘာပေါ်မှာ အကြီးမားဆုံး ချီတက်လမ်းလျှောက်မှုကြီးလည်း ဖြစ်ပါတယ်။

    အာရ်ဘာအင်းလို့ခေါ်တဲ့ နေ့ထူးနေ့မြတ်အတွက် အဲဒီလူတွေဟာ ဘဂ္ဂဒတ်မြို့ အနောက်တောင်ဘက် ၆၂ မိုင်အကွာမှာ ရှိတဲ့ ကာရ်ဘာလာမြို့ကို ချီတက်ခဲ့ကြတာဖြစ်ပါတယ်။ အာရ်ဘာအင်းဟာ မွတ်စလင်တို့ရဲ့ နေ့ထူးနေ့မြတ်တစ်နေ့ဖြစ်တဲ့ အာရှူရာနေ့အပြီး နောက်ထပ် ရက်ပေါင်း ၄၀ နေတဲ့အခါ ကျရောက်တာဖြစ်ပြီး တမန်တော်မုဟမ္မဒ်သခင် (ငြိမ်းချမ်းသာယာမှုသက်ရောက်ပါစေ) ရဲ့ မြေးတော် အီမာမ် ဟူစိန် အေဒီ ၆၈၀ မှာ အသတ်ခံရမှုကို ၀မ်းနည်းပူဆွေးတဲ့ အထိမ်းအမှတ်နဲ့ ရှီအာမွတ်စလင်တွေက ကျင်းပကြတာပါ။

    အဲဒီသန်းနဲ့ချီတဲ့ လူအုပ်ကြီးဟာ ကာရ်ဘာလာက အီမာမ်ဟူစိန်နဲ့ သူ့ရဲ့ညီ အဘတ်စ်တို့ရဲ့ ဂူဗိမာန်တွေဆီကို သွားရောက်ခဲ့ကြပြီး ၀တ်ပြုဆုတောင်းကာ မေတ္တာပို့ အမျှဝေခဲ့ကြပါတယ်။ အီမာမ်ဟူစိန်နဲ့ မိသားစုနဲ့ ဆွေတော်မျိုးတော်တွေဟာ အေဒီ ၇ ရာစုမှာ အိုမိုင်ယာမင်းဆက်က ဘုရင် ယဇီးဒ်အပေါ် သစ္စာခံဖို့ ငြင်းဆိုတာကြောင့် ယဇီးဒ်ရဲ့ သတ်ဖြတ်မှုကို ခံခဲ့ရတာဖြစ်ပါတယ်။

    ကာရ်ဘာလာ ပြည်နယ်ကော်စီရဲ့ အကြီးအကဲ နူဆေယက်ဖ် အလ်-ခါတာဘီက ဒီလို လာရောက်ကြသူတွေရဲ့ အရေအတွက်ဟာ ၁၇ သန်းကနေ သန်း ၂၀ ကြား ရှိမယ်လို့ ခန့်မှန်းခဲ့ပါတယ်။ အဲဒီအထဲမှာ နိုင်ငံခြားသားက ၃ သန်းလောက် ရှိနိုင်ပြီး အများစုက အီရန်တွေ ဖြစ်ပါတယ်။

    အဲဒီဒေသဟာ IS ရဲ့ ထိန်းချုပ်ရာဒေသနဲ့ သိပ်မဝေးတဲ့နေရာမှာ ရှိနေပြီး IS ကလည်း ဒီလို လာရောက်ကြသူတွေကို တိုက်ခိုက်မှုတွေ ရှိပေမယ့် အများစုကတော့ ဒီခရီးကို ခြေလျင်ပဲ လာရောက်ကြတာ ဖြစ်ပါတယ်။

    အဲဒီဒေသမှာ နောက်ဆုံးပြုလုပ်ခဲ့တဲ့ IS ရဲ့ တိုက်ခိုက်မှုမှာ လူပေါင်း ၈၀ နီးပါးလောက် သေဆုံးခဲ့ပြီး အများစုဟာ အာရ်ဘာအင်းအခမ်းအနားက ပြန်လာကြသူတွေဖြစ်ပါတယ်။

    IS က ရှီအာမွတ်စလင်တွေဟာ ဖောက်ပြန်ရေသမားတွေဖြစ်တယ်လို့ ကြေငြာထားပြီး သူတို့တွေကို ပစ်မှတ်ထားတဲ့ တိုက်ခိုက်မှုတွေကိုလည်း မကြာခဏ ပြုလုပ်လေ့ရှိပါတယ်။ ဒီနှစ် အာရ်ဘာအင်း အခခမ်းအနားအတွက် အီရတ်က စစ်သားနဲ့ ရဲတပ်ဖွဲ့ဝင် ၂၄၀၀၀ လောက် လုံခြုံရေးချပေးထားပါတယ်။

    ပြီးခဲ့တဲ့နှစ်တွေအတွင်း ဒီဘာသာရေးအခမ်းနားကို တက်ရောက်လာကြသူတွေဟာ IS ရဲ့ ခြိမ်းခြောက်မှုကို တုန့်ပြန်တဲ့ ဆောင်ရွက်မှုတွေလည်း ပြုလုပ်ကြပါတယ်။

    ဂျဘာရ် ကာဒမ် ခါလစ်ဆိုတဲ့ အမျိုးသားတစ်ဦးကတော့ “ဘာဆရာကနေ ကျွန်တော့်ဇနီး၊ သား ၃ ယောက်နဲ့အတူ ဒီကို လမ်းလျှောက်ပြီး လာပါတယ်။ ဒါဟာ တတိယအကြိမ်မြောက်လာတာပါ။ လွန်ခဲ့တဲ့ ၁၃ ရက်ကတည်းက လမ်းစလျှောက်ခဲ့တာဖြစ်ပြီး တနင်္ဂနွေနေ့ညက ကာရ်ဘာလာကို ရောက်ပါတယ်” လို့ ပြောကြားခဲ့ပါတယ်။

    အက် ၄၀ အရွယ်ရှိပြီဖြစ်တဲ့သူက သူ့ရဲ့ ဒီဝတ်ပြုဆုတောင်းမှုတွေဟာ IS နဲ့ တိုက်ခိုက်ဖို့ ရှေ့တန်းစစ်မျက်နှာမှာရောက်နေတဲ့ Hashed al-Shaabi လက်နက်ကိုင်အဖွဲ့အတွက် ဖြစ်လိမ့်မယ်လို့ ဆိုပါတယ်။

    krbala-2
    ကာရ်ဘာလာတွင် ရှီအာမွတ်စလင်များ ချီတက်နေကြစဉ်

    အွမ် အလီဆိုတဲ့ အမျိုးသမီးကတော့ တစ်ယောက်တည်း လာရောက်တာဖြစ်ပြီး သူ့ရဲ့ အမျိုးသားက လုံခြုံရေးတပ်ဖွဲ့တွေနဲ့အတူ ရှေ့တန်းရောက်နေတာဖြစ်ပါတယ်။

    “ကျွန်မရဲ့ သားသမီး ၃ ယောက်နဲ့အတူ လာတာပါ။ ဆာမာဝါကနေ နာဂျက်ဖ်ကို ကားနဲ့လာတယ်။ နာဂျက်ဖ်ကနေ ကာရ်ဘာလာကိုတော့ ခြေကျင်လျှောက်လာတာဖြစ်ပြီး၊ ကျွန်မအမျိုးသား ဘေးအန္တရာယ်ကင်းစေဖို့အတွက် ဆုတောင်းသွားပါမယ်။ IS တွေကို တွန်းလှန်းရာမှာ ကျွန်မတို့ကို ကြံ့ကြံ့ခံနိုင်မှု ပေးသနားဖို့၊ မူဆိုးလ်မြို့လွတ်မြောက်ဖို့ ဘုရားသခင်ထံတော်ပါးမှာ ဆုတောင်းသွားမှာဖြစ်ပြီး၊ နိုင်ငံရေးသမားတွေအနေနဲ့ ပေးဆပ်အနစ်အနာခံခဲ့ရသူတွေကို မမေ့ဖို့လည်း တိုက်တွန်းပါတယ်”

    ယူကေက အာရ်ဘာအင်း ချီတက်ပွဲကို စီစဉ်သူတွေကတော့ ဒီပွဲနဲ့ပတ်သက်ပြီး မီဒီယာတွေက ဖော်ပြမှုအားနည်းတာကို ဝေဖန်ခဲ့ကြပါတယ်။

    မနှစ်က အခမ်းအနားမှာ စေတနာ့ဝန်ထမ်းအဖြစ် ဆောင်ရွက်ခဲ့တဲ့ မိုဟာမက် အလ်-ရှာရီဇီက “အဓိကမီဒီယာတွေက ဒီချီတက်မှုကို မဖော်ပြတဲ့ရည်ရွယ်ချက်က သတင်းစာ မပေါက်မှာ စိုးတာကြောင့် ဖြစ်တယ်လို့ ကျွန်တော် ထင်ပါတယ်။ ဒါကို လူတွေက သိပ်စိတ်မ၀င်စားဘူးလေ” လို့ပြောကြားခဲ့ပါတယ်။

    “ဆိုးတာက တစ်ချို့မီဒီယာတွေဟာ သတင်းတွေကို စံနှစ်မျိုးနဲ့ ဖော်ပြကြပါတယ်။ မွတ်စလင်တစ်စုက ကောင်းတာတွေ လုပ်မယ်ဆိုရင် ဒါကို မဖော်ပြဘူး။ ဖော်ပြရင်လည်း ဘာသာတရားကို မထည့်တတ်ဘူး။ ဒါပေမယ့် မွတ်စလင်တစ်ယောက်ယောက်က မဟုတ်တာလုပ်လိုက်မယ်ဆိုရင်တော့ ရှေ့ဆုံးစာမျက်နှာမှာ ဘာသာနာမည်တပ်ပြီးတော့ကို ပါလာတာပါပဲ”

    အင်္ဂလန် အစ္စလာမ့်စင်တာက ဒါရိုက်တာဖြစ်တဲ့ ဒေါက်တာ မိုဟာမက် ရှိုမာလီက “မွတ်စလင်တွေအတွက်ရော၊ မွတ်စလင်မဟုတ်သူတွေအတွက် အီမာမ်ဟူစိန်ရဲ့ ပေးဆပ်အနစ်နာခံမှု၊ မြင့်မြတ်တဲ့ သတင်းစကားတွေက အစ္စလာမ်သာသနာရဲ့ ငြိမ်းချမ်းခြင်းနဲ့ တန်ဖိုးတွေကို ကိုယ်စားပြုပြီး ဒါတွေကပဲ အီမာမ်ဟူစိန်ကို အကြမ်းမဖက်ဖို့၊ သည်းခံခွင့်လွှတ်ဖို့ တွန်းအားပေးခဲ့တာ ဖြစ်ပါတယ်။ ဒါ့ကြောင့် မွတ်စလင်မဟုတ်သူတွေ၊ မတူညီတဲ့ မွတ်စလင်မျိုးနွယ်စုတွေဟာ ဒီအခမ်းအနားအတွက် အီရတ်နဲ့ ကမ္ဘာတစ်ဝှမ်းမှာ စုရုံးကြတာဖြစ်ပါတယ်။ တိုက်တာခိုက်တာတွေမှာ မပါဝင်ဖို့ အီမာမ်ဟူစိန်ရဲ့ ဆုံးဖြတ်ချက်ဟာ လူသားထုတစ်ရပ်လုံး အတုယူနိုင်တဲ့ စံပြ စိတ်ထားပါပဲ” လို့ ပြောကြားခဲ့ပါတယ်။

    Ref: Independent

  • ရှီအာ မွတ်စလင်မ်များ ဘာသာရေး အထိမ်းအမှတ် အလံလွှင့်မှုအား IS အလံလွှင့်ဟု ဝါဒဖြန့်

    ရှီအာ မွတ်စလင်မ်များ ဘာသာရေး အထိမ်းအမှတ် အလံလွှင့်မှုအား IS အလံလွှင့်ဟု ဝါဒဖြန့်

    ဒီဇင်ဘာ ၁၀၊၂၀၁၅
    M-media
    သတင်း- မိုးစက်
    Flag
    ရန်ကုန်မြိုတွင် ရှီအာမွတ်စလင်မ်များ၏  ဝမ်းနည်းသည့် လ အထိမ်းအမှတ်များအဖြစ်  အလံအနက်ရောင် လွှင့်ထူထားသည်ကို   လူမှုကွန်ယက်တွင် IS အလံများလွှင့်ထူထားသည်ဟု လှုံ့ဆော်မှုနှင့် အတူ အစ္စလာမ် ဆန့်ကျင်ရေး ဝါဒဖြန့်မှုများ လုပ်ဆောင်ချက်များ ကို ဒီကနေ့ ဆိုရှယ်မီဒီယာမှာ အများအပြား တွေ့ရပါတယ်။

    ကမ္ဘာတဝှမ်း အစ္စလာမ်ဘာသာ သက်ဝင်ယုံကြည်သူများတွင် အဓိကအားဖြင့် စန္နီ နှင့် ရှီအာ အုပ်စုကြီး နှစ်ခုရှိရာ ရှီအာ မွတ်စလင်မ်များက တမန်တော်မုဟမ္မဒ် (Peace be upon him) ၏ မြေးတော်နှစ်ဦးဖြစ်သူ အီမာမ် ဟူစိန် နှင့် အီမာမ် ဟာဆန် တို့ ကွယ်လွန်ခြင်း ဝမ်းနည်းခြင်း အထိမ်းအမှတ် အဖြစ် အလံအနက်ရောင် အောက်ခံဖြင့် ထိုအနက်ပေါ်တွင် သာဝကကြီး အလီ (တမန်တော် မုဟမ္မဒ်နောက် စတုထ္ထမြောက် အုပ်ချူပ်မှု ရာထူးဆက်ခံသူ)  ကိုင်ဆောင်ခဲ့သော ဓားပုံဖြင့် အလံပြုလုပ်ထားပြီး ထိုအလံကို နှစ်စဉ် လွှင့်ထူခဲ့သည့် အထိမ်းအမှတ်ဖြစ်တယ်လို့ သိရပါတယ်။

    “ကျွန်တော်တို့ နှစ်စဉ် လတိုင်း ဒီနှစ်လဆို ဒီအလံနက်ထောင်ခဲ့တာ ကြပါပြီ။ အင်္ဂလိပ် လက်ထက် ခေတ်ကတည်းကပါ။ ခုမှ တချို့ အပုတ်ချချင်တဲ့လူတွေက IS အလံဆိုပြီး ပြောဆိုနေကြတာပါ။ ကျွန်တော်တို့ ရှီအာတွေ ကိုယ်တိုင်ကိုက IS ကိုကန့်ကွက် ရှုတ်ချသူတွေပါ။ IS စပေါ်လာကတည်းက ကန့်ကွက်ခဲ့တာပါ။ အီရန်နိုင်ငံကလည်း ISIS ကိုကန့်ကွက်တယ်ဆိုတာ အတည်အလင်းပြောပြီးသားပါ” လို့ အလံလွှင့်ထူရခြင်းနှင့် ပတ်သက်ပြီးး ၃၂ လမ်း ရှီအာ ဗလီမှ ရှေ့ဆောင်ဆရာ တစ်ဦးဖြစ်သူ မော်လဝီ မအိဆူးမ်က M-Media ကိုပြောပါတယ်။

    အဆိုပါ IS အလံဟု ဝါဒဖြန့်နေသူများသည် ဗိုလ်ဆွန်ပက်လမ်း (ယခင်မောင်ထော်လေးလမ်း) ရှိ ကာရှီး​အေမာမ်​ဘာရာ (ဝတ်ပြုဆုတောင်းရာနေရာ) တွင် လွှင့်ထူးထားသော အလံကို ဓာတ်ပုံရိုက်ပြီး လူမှုကွန်ယက်တွင် IS အလံများ လွှင့်ထူထားသည်ဟု ရေးသားထားကြခြင်း ဖြစ်သည်။

    ယနေ့ ဒီဇင်ဘာလ ၁၀ ရက်နေ့သည်  အီမာမ် ဟာဆန် (အ.စ) ကွယ်လွန်ခြင်းအထိမ်းအမှတ်နေ့အဖြစ် ရှီအာ မွတ်စလင်မ် များက ဆူးလေ လမ်း (၃၀) တစ်ဝိုက်တွင် လှည့်လည်ခြင်း အခမ်းအနား အတွက် သက်ဆိုင်ရာ တာဝန်ရှိသူများထံမှလည်း ခွင့်ပြုမိန့် ရယူထားပြီးလည်း ဖြစ်ကြောင်း သိရပါတယ်။

    ၂၀၁၂ ခုနှစ်က စတင်အရှိန်မြင့်တက်လာသည့် အစ္စလာမ်ဆန့်ကျင်ရေး လှုံ့ဆောင်မှုများ ရွေးကောက်ပွဲ မတိုင်ခင် အရှိန်လျော့ကျခဲ့ပြီး NLD အနိုင် ရရှိပြီးနောက် ယခုတဖန် လှုံ့ဆော်မှုများ ပုံစံအမျိုးအမျိုး ဖြင့် အရှိန်မြင့်တက်လာနေကြောင်း လေ့လာသူတွေက သုံးသပ်ကြပါတယ်။