News @ M-Media

Tag: SiThuMaung

  • ၂၀၁၅ မှာဘယ်လို လွှတ်တော် ကိုယ်စားလှယ်တွေကို ရွေးသင့်သလဲ ?

    ၂၀၁၅ မှာဘယ်လို လွှတ်တော် ကိုယ်စားလှယ်တွေကို ရွေးသင့်သလဲ ?

    သြဂုတ် ၁ ၊ ၂၀၁၄
    M-Media
    .ရေးသူ- စည်သူမောင်

    ၂၀၁၅ အထွေထွေရွေးကောက်ပွဲဟာ ဘာလိုလိုနဲ့ ၁နှစ် ၀န်းကျင်သာလိုပါတော့တယ် ။ ကျနော်တို့နိုင်ငံမှာ ရွေးကောက်ပွဲနဲ့ ပတ်သက်လို့ ဖဆပလခေတ် ရွေးကောက်ပွဲ မှီလိုက်သူတွေ ဖြတ်သန်း ခဲ့ဖူးသူတွေ သက်ကြီးပိုင်းတွေထဲမှာသာ ရှိတော့သလို ၁၉၉၀ ရွေးကောက်ပွဲကို ဖြတ်သန်းဖူးသူတွေ မဲပေးသူတွေလဲ အဲဒီကာလကအသက် ၁၈နှစ်အရွယ်လူငယ်တွေဟာ ၄၂နှစ်အရွယ် သက်လတ်ပိုင်းများသာရှိပါတော့တယ် ကျနော်ကိုယ်တိုင်သည်ပင် ၂၀၁၀ ရွေးကောက်ပွဲနဲ့ ၂၀၁၂ ကြားဖြတ်ရွေးကောက်ပွဲမှာ အကျဉ်းထောင် အတွင်း ရှိနေခဲ့တာမို့ မဲလုံးဝ မပေးဖူးသေးပါဘူး ။

    ရွေးကောက်ပွဲတစ်ခု နီးလာပြီဆိုလျှင် Election Monitoring ရွေးကောက်ပွဲစောင့်ကြည့်လေ့လာရေး အဖွဲ့တွေဖွဲ့ Election Watch တွေလုပ် ။ Voter Education မဲပေးပုံအသိပညာပေး ရေးလုပ်ငန်းတွေ မဲဆန္ဒရှင်ပြည်သူတွေအတွက် လုပ်ကြပါတယ် ဒါပေမဲ့ရွေးကောက်ပွဲလဲပြီးသွားရော ကိုယ်ရွေးပေးလိုက်တဲ့ လွှတ်တော် ကိုယ်စားလှယ်ကြီးဟာ ပါလီမန် လွှတ်တော်မှာ ဘာတွေလုပ်နေလဲ ကိုယ့် မဲဆန္ဒရှင်ပြည်သူတွေရဲ့ ဆန္ဒတွေ တိုင်းပြည်မှာ ဒီမိုကရေစီစနစ်နဲ့ ကိုက်ညီမှုမရှိတော့တဲ့ ဥပဒေတွေတွေ ပြင်ဆင်တာ ဖြည့်စွက်တာတွေ ပယ်ဖျက်တာတွေ အပါအ၀င် စစ်အစိုးရခေတ်က အမိန့်ညွန်ကြားချက်များပါ မကျန် ပြန်လည်သုံးသပ်ဖို့ ဘယ်လောက်ထိ လွှတ်တော်ထဲ ကြိုးပမ်းခဲ့တယ် ဆိုတာကို ပြန်လည်စောင့်ကြည့်ဖို့ Parliament Watch ကျတော့ အားနည်းနေပါတယ် ။

    နောက်တစ်ချက်က လွှတ်တော် ကိုယ်စားလှယ်တစ်ဦးဟာ လွှတ်တော် နားချိန် ရက်တွေမှာ သက်ဆိုင်ရာ မဲဆန္ဒနယ်က ပြည်သူတွေကို လွှတ်တော် လုပ်ငန်း အတွေ့အကြုံတွေ ရှင်းပြဖို့နဲ့ ပြည်သူတွေရဲ့ လိုလားချက်တွေကို နားထောင်ပြီး လွှတ်တော်တွင်းမှာ မေးခွန်းမေးမြန်းပေးဖို့ အဆိုတင်သွင်းပေးဖို့နဲ့ သက်ဆိုင်ရာ လွှတ်တော်ရေးရာကောက်မတီများမှာ ပေါင်းစပ် အကောင်အထည်ဖော်ဖို့ လိုအပ်လျက်ရှိနေပါတယ် ။ ကိုယ်ရွေးချယ်လိုက်တဲ့ လွှတ်တော် ကိုယ်စားလှယ်ဟာ လွှတ်တော်တွင်းမှာ

    (၁) အဆိုဘယ်နှစ်ခုကို တင်နိုင်သလဲ ဒါမှမဟုတ် ထောက်ခံဆွေးနွေးနိုင်သလဲ

    (၂) Cross Question မေးနိုင်ခဲ့သလဲ (သို့) အရေးကိစ္စတစ်ခုပေါ်မှာ ဘယ်လောက်ထိ Debate လုပ်နိုင်ခဲ့သလဲ

    (၃) မေးခွန်းဘယ်နှခုမေးမြန်းနိုင်ခဲ့ပြီး အဲဒီမေးခွန်းဟာ အကောင်အထည် ဖော်ဆောင်ရွတ်တဲ့ အဆင့်ထိ ရောက်ခဲ့ပါသလား

    (၄) ဥပဒေကြမ်း အဆင့်ထိ ရောက်ရှိသွားတဲ့အနေအထားအထိ ကိုယ့်ရဲ့အဆိုဟာထောက်ခံမှုရခဲ့ပါသလား

    စသည်ဖြင့် လွှတ်တော် ကိုယ်စားလှယ် တစ်ဦးရဲ့တာဝန်ဖြစ်တဲ့ ပြည်သူ့အသံ ပြည်သူ့ဆန္ဒကို Legislative ဥပဒေပြုရေး အခန်းကဏ္ဍကနေ တိုင်းပြည်တာဝန်တွေ တိုင်းပြည် အတွက် အရေးကြီးကိစ္စတွေကို စိတ်အား ထက်သန်စွာ ဆွေးနွေးငြင်းခုံနေရမှာပါ။

    ကျနော်တင်ပြခဲ့တဲ့ အထက်ကအချက်တွေ ထက်လဲ လွှတ်တော်ကိုယ်စားလှယ်တစ်ဦးရဲ့ တာဝန်တွေဟာ ပိုကောင်းပိုနေဦးမှာပါ ။ အဲဒီလိုလွှတ်တော်ထဲမှာ ကိုယ်ရွေးချယ်လိုက်တဲ့ အမတ်ဟာ ဘာတွေလုပ်ခဲ့တယ်ဆိုတဲ့ သတင်း အချက်အလက်တွေကို သိနိုင်ဖို့သက်ဆိုင်ရာ မြို့နယ်တိုင်း မြို့နယ်တိုင်းမှာ Parliament Watch လုပ်မည့် အဖွဲ့အစည်းများ CSO များ တက်ကြွလှုပ်ရှားသူများ ဟာနေတာကိုတွေ့နေရပါတယ် ဘာကြောင့်လဲဆိုတော့ ယခုရွေးကောက်ပွဲ သက်တမ်း အပြီးနောင်လာမယ့် ၂၀၁၅ ရွေးကောက်ပွဲဟာ ကိုယ်ရွေးချယ်လိုက်တဲ့ အမတ်ကသာ ထပ်မံဝင်ရောက် ယှဉ်ပြိုင်မယ်ဆိုရင် အဲဒီ လွှတ်တော် ကိုယ်စားလှယ်ရဲ့ ပြီးခဲ့တဲ့ လွှတ်တော်သက်တမ်းအတွင်း ကြိုးပမ်း လုပ်ဆောင်ချက်များကသာ နောင်ရွေးကောက် ပွဲမှာ ပြန်လည်မဲပေးသင့် မသင့်ဆိုတာကို အဆုံးအဖြတ်ပေးရမှာ ဖြစ်တဲ့အတွက်ကြောင့်ပဲဖြစ်ပါတယ် ။

    လွှတ်တော်ထဲထိုင် ငိုင်နေသူများ Active မဖြစ်ခဲ့သူများ ဘာမဟုတ်သည့်ကိစ္စများကို ရေးကြီးခွင်ကျယ် အဆိုတင်သွင်းနေသူများ မေးခွန်းမေးမြန်းနေသူများကို လူရွေးမှားခဲ့လို့ နောက်ထပ် ၅နှစ်သက်တမ်းကို ထိုင်စောင့်နေရမယ့်အစား Right of Recall လို့ခေါ်တဲ့ လွှတ်တော်ကိုယ်စားလှယ် တစ်ယောက်ကို ပြန်လည်ဖြုတ်ချနိုင်ခွင့် တာဝန်မှပြန်လည် ရုတ်သိမ်း ပိုင်ခွင့် အခွင့်အရေးဟာ မဲဆန္ဒရှင်ပြည်သူတိုင်းရဲ့ ဥပဒေ ကပေးထားတဲ့ အခွင့်အရေးများရှိနေပါတယ် ။ ကိုယ်ရွေးချယ်ခဲ့ရာ လွှတ်တော် ကိုယ်စားလှယ် တစ်ယောက်ဟာ ပြည်သူကိုကိုယ်စားမပြုတော့ဘူး ကိုယ့်သက်ဆိုင်ရာ မြို့နယ် ဒေသ တိုင်းအလိုက် မဲဆန္ဒရှင်ဦးရေ သက်မှတ်ထားသော ရာခိုင်နှုန်းက ကန့်ကွက်တင်ပြလာပါက ရွေးကောက်ပွဲကော်မရှင်ကရော လွှတ်တော်ကပါ ထိုကိုယ်စားလှယ်ကို ပယ်ဖျက်ပေးဖို့ တာဝန်မှ ရပ်စဲပေးဖို့နဲ့ ပြန်လည် အစားထိုးရွေးချယ်ရန် ကြားဖြတ်ရွေးကောက်ပွဲ ကျင်းပပေးဖို့တာဝန်ရှိပါတယ် ။

    ဒီမိုကရေစီစနစ်ရဲ့ အခြေခံဟာ ပြည်သူဆန္ဒပါ ။ ဒီမိုကရေစီနိုင်ငံရေးစနစ်မှာ ပြည်သူသာလျှင် အာဏာရှိတယ်လို့ နိုင်ငံရေး ဒဿန ပညာရှင် အများအပြားက အဓိပ္ပာယ် ဖွင့်ဆိုထားတာတွေ ရှိပါတယ် နိုင်ငံတော်၏ အချုပ်အခြာ အာဏာသည် နိုင်ငံသူနိုင်ငံသားများထံ မှသာ ဆင်းသက်ရမည်ဟု ကြွေးကြော်ထားသော ကျန်ုပ်တို့နိုင်ငံ ။ ပြည်သူ့ဆန္ဒ လွှတ်တော် ဆန္ဒဟု ဆောင်ပုဒ်များ ကပ်ထားသော ကျွန်ုပ်တို့ လွှတ်တော် ။ ပြည်သူ့အသံ လွှတ်တော်အသံဟု တင်စားထားသော ကျန်ုပ်တို့လွတ်တော် ကြီးအားစောင့်ကြည့်မည့် Parliament Watch များများလုပ်နိုင်ကြပါစေ ။

    ခေါင်းပေါင်းစ တလူလူ တိုက်ပုံအရောင်တဖိတ်ဖိတ်နှင့် ဟန်ရေးပြ လွှတ်တော်ကိုယ်စားလှယ် များအား ကျန်ုပ်တို့ပြည်သူများမှ အလိုမရှိပါ မဲဆန္ဒရှင်ပြည်သူများ အကျိုး တိုင်းပြည်၏ အမှန်တကယ်လိုအပ်နေသည့် အရေးအရာများကို ပြုပြင်ပြောင်းလဲနိုင်ရေး အတွက် လွှတ်တော်အတွင်း ရဲဝံ့စွာ တက်ကြွစွာဆွေးနွေးနေသော လွှတ်တော် အမတ်မင်းများကိုသာ အလိုရှိနေပါကြောင်း အသိပေးလိုက်ရပါသည် ။

    ၂၁.၇.၂၀၁၄
    စည်သူမောင် (ရန်ကုန်စီးပွားရေးတက္ကသိုလ်)

  • (၇ ဇူလိုင်/ ၁၉ ဇူလိုင် ) အာဇာနည်မျိုး သေရိုးမရှိ

    ဇူလိုင်-၁၅၊၂၀၁၃
    M-Media
    စည်သူမောင်

    july19

    ဗိုလ်ချုပ်အောင်ဆန်း အပါအ၀င် အာဇာနည်ခေါင်းဆောင်ကြီးများ လုပ်ကြံခံရသည်မှာ ၆၆နှစ်ပြည့်ခဲ့လေပြီ။ ကျွန်တော်တို့နိုင်ငံ၏ လွတ်လပ်ရေးကြိုးပမ်းမှု ၊ အာဏာရှင်ဆန့်ကျင်ရေး၊ ဒီမိုကရေစီရေး လူ့အခွင့်အရေးအတွက် သမိုင်းတလျှောက်မှာ တိုင်းပြည်အတွက် မိမိအသက်ကိုစတေး၍ ပေးဆပ်ခဲ့ကြသောအာဇာနည်ခေါင်းဆောင် အများအပြား ပေါ်ထွန်းခဲ့ ဘူးလေသည်။ အထူးသဖြင့်ယခုလကဲ့သို့ဇူလိုင်လသည် မိုးစက်များနှင့်အတူ သွေးစွန်းခဲ့ရသည့် သမိုင်း ကို ၀မ်းနည်းစွာဦးညွတ် ရမည့်အချိန်ကာလတစ်ခုဖြစ်ခဲ့လေသည်။

    ၇ ဇူလိုင် / ၁၉ ဇူလိုင် ဘယ်တော့မှ မေ့နိုင်လိမ့်မည် မဟုတ်ပါ။ ဇူလိုင်သမိုင်းသည်ကျောင်းသား အာဇာနည် အမျိုးသားအာဇာနည်တို့ သွေးဖြင့်ရေးခဲ့သောလ ၊

    အဓိပတိလမ်းတွေသွေးစွန်းခဲ့..။
    တက္ကသိုလ်မြေသွေးစွန်းခဲ့…။
    ကျောင်းတံခါးတွေသွေးစွန်းခဲ့…။
    အတွင်းဝန်ရုံးသွေးစွန်းခဲ့…။

    နိုင်ငံရေးအာဏာကို လက်နက်အားကိုးနည်းလမ်းဖြင့်ရယူရန် ကြိုးပမ်းခဲ့သောလူတစ်စု၏ ယုတ်မာရက်စက်မှုဖြင့်ဗိုလ်ချုပ်အောင်ဆန်းအပါအ၀င် အာဇာနည်ခေါင်းဆောင်ကြီးများ လုပ်ကြံခံခဲ့ရသော်လည်း ထိုလက်နက်အားကိုးဖြင့်နိုင်ငံရေးအာဏာကို ရယူရန်ကြိုးစားခဲ့သည့် ဂဠုန်ဦးစော အပေါင်းအပါ တစ်စုတို့ နိုင်ငံရေးအာဏာ မရခဲ့သည့်အပြင်ကြိုးစင်ပေါ်တက် သမိုင်း၏ ဒဏ်ခတ်ခြင်းကို ပါခံခဲ့ရ လေသည်။ အာဏာဟူသည်လက်နက်အားကိုးနည်းလမ်းဖြင့် မရနိုင်ပြည်သူလူထု၏ ယုံကြည် ထောက်ခံမှုရှိမှသာလျှင် ရရှိနိုင်ကြောင်း (၁၉) ဇူလိုင်က အာဏာရူးများကို သင်ခန်းစာပေးခဲ့လေသည်။

    7 julyနိုင်ငံလွတ်လပ်ရေးအတွက် တိုင်းတပါးနယ်ချဲ့လက်အောက်မှ လွတ်မြောက်ရေးရရှိရန် ပေးဆပ်ခဲ့ကြသော အာဇာနည်ခေါင်းဆောင် ကြီးများ၏ စိတ်ဓာတ်သည် အဘယ်နည်း? အာဇာနည် စိတ်ဓာတ်ဆိုသည်မှာ မိမိတိုင်းပြည် ဖွံ့ဖြိုးစေလိုသော ဆန္ဒ ၊ ပြည်သူလူထုအား ကောင်စားစေလိုသော စိတ်ဓာတ် ၊ မိမိ အကျိုးထက်နိုင်ငံ အကျိုးကိုသာ ကြည့်တတ်သောနှလုံးသား ကို ဆိုလိုရင်းဖြစ်ပါသည်။ ကျဆုံးလေပြိးသော အာဇာနည် ခေါင်းဆောင်ကြီးများကို ကျွန်တော်တို့ ၀မ်းနည်းစွာ ဦးညွတ် အလေးပြုရုံမျှနှင့် ဇူလိုင် ၀မ်းနည်းမှတ်တမ်းသည် မပြည့်စုံ။ ထိုသမိုင်းကို သွေးဖြင့်ရေးသားခဲ့သော ခေါင်းဆောင်များ၏ စိတ်ဓာတ်ကို ကျွန်တော်တို့မွေးမြူ၍နိုင်ငံ အရေး ၊ ဒီမိုကရေစီရေး ။ တိုင်းပြည်တိုးတက်ရေးအတွက် စိတ်အားထက်သန်စွာ နီုင်ငံ၏ ဒီမိုကရေစီ အသွင်ကူးပြောင်းရေး ကာလတွင် ပြည်သူလူထု တစ်ရပ်လုံး မျက်ချေမပြတ် ပါဝင်ပတ်သက်ကြဖို့ လိုအပ်ပါလိပ့်မည် ။ သမိုင်း စာမျက်နှာသစ်များကို ကျွန်တော်တို့ ချွေးစက်များဖြင့်ဆက်လက် ရေး သားဖို့လိုပါသည်။ လျှောက်လှမ်းဖို့လိုပါသည်။ ဤနည်းဖြင့်သာ ကျွန်ုပ်တို့သည် ယခုကျရောက်သော (၆၆)နှစ်မြောက် အာဇာနည်နေ့ မှစ၍ခေါင်းဆောင်ကြီးများ၏ ဆန္ဒကိုဆက်လက် အကောင် အထည်ဖော်ကြပါစို့ ။ အာဇာနည်စိတ်ဓာတ်မွေးမြူကြပါစို့ ။

    နိုင်ငံလွတ်လပ်ရေး ကြိုးပမ်းမှုများတွင် ရဟန်းအာဇာနည် ၊ကျောင်းသားအာဇာနည် ၊ လယ်သမားအာဇာနည် ၊ အမျိုးသားအာဇာနည် ကြီးများ အများအပြားပေါ်ထွန်းခဲ့လေရာ အာဇာနည်နေ့ ဟု အစိုးရရုံးပိတ်ရက် အဖြစ်ကြေ ငြာ၍ တစ်မျိုးသားလုံး ၀မ်းနည်းဖွယ်နေ့ တစ်နေ့အဖြစ် ဂုဏ်ပြုသတ် မှတ်ခဲ့သောအမျိုးသားခေါင်းဆောင် ၊ လွတ်လပ်ရေးဗိသုကာကြီး ဦးအောင်ဆန်းနှင့် တကွ အာဇာနည်ခေါင်းဆောင်များကိုသာ ကျွန်တော်တို့ရင်ထဲတွင် အမှတ်ရနေရုံနှင့် မလုံလောက်ဘဲ ထို အာဇာနည်ခေါင်းဆောင်ကြီးများကဲ့သို့ စွန့်လွတ်အနစ်နာခံရဲသည့် သတ္တိများကိုလဲ မွေးမြုရမည်ဖြစ်လေသည်။

    ထို့ပြင်…

    • ၁၉၂၉စက်တင်ဘာလ ၂၉ရက်နေ့တွင် နယ်ချဲ့အင်္ဂလိပ်အစိုးရ ကိုဆန့်ကျင်မှုဖြင့် ရန်ကုန် အကျည်းထောင်အတွင်း ဖမ်းဆီးထိန်းသိမ်းခံရပြီး ရက်ပေါင်း(၁၆၆)ရက်တိုင် အစာငတ်ခံတိုက်ပွဲဝင်ကာ ပျံလွန်တော်မူသွားခဲ့သော အာဇာနည် ဆရာတော်ဦးဝိစာရ ကဲ့သို့ရဟန်းအာဇာနည်များ ။
    • ၁၉၃၁နိုဝင်ဘာလ ၂၁ရက်နေ့တွင်နယ်ချဲ့အစိုးရအား လက်နက်စွဲကိုင်၍ တော်လှန် တိုက်ပွဲဝင်ခဲ့ပြီး သာယာဝတီ အကျဉ်းထောင်တွင် ကြိုးပေး ကွပ်မျက်ခံရသည့် ဂဠုန်ဆရာစံ ကဲ့သို့ လယ်သမား အာဇာနည်ကြီးများ ။
    • ၁၉၃၈ ဒီဇင်ဘာ၂၀ရက်နေ့တွင် (ယခုဗိုလ်ချုပ်အောင်ဆန်းနှင့် အာဇာနည်ခေါင်းဆောင်ကြီးများ ကျဆုံးခဲ့ရာ) အတွင်းဝန်ရုံးရှေ့ စပတ်လမ်းမ (ယခုဗိုလ်အောင်ကျော်လမ်း) ထက်တွင် ကျောင်းသားရာပေါင်းများစွာနှင့် အတူ ငြိမ်းချမ်းစွာ ဆန္ဒပြခဲ့ပြီး နယ်ချဲ့လက်ပါးစေ မြင်းစီးပုလိပ်များ၏ တုတ်ချက်ဖြင့်ဒီဇင်ဘာ၂၂ရက်နေ့တွင် ကျဆုံးသွားခဲ့သော ကျောင်းသားခေါင်းဆောင် ကိုအောင်ကျော် (နေမျိုးသီဟသူရဗိုလ်အောင်ကျော်) ကဲ့သို့ကျောင်းသား အာဇာနည်များ။
    • ၁၃၀၀ ပြည့်အရေးတော်ပုံ ကာလအတွင်း နယ်ချဲ့ဆန့်ကျင်ရေး အမျိုးသား လွတ်မြောက်ရေးအတွက် ကြိုပမ်းခဲ့ကြပြီး အသက်ပေးလှူသွားခဲ့သော မန္တလေးအာဇာနည် (၁၇)ပါးကဲ့သို့အာဇာနည်များ။
    • ၁၉၆၂ခုနှစ် ဇူလိုင်လ(၇) ရက်နေ့တွင်ရန်ကုန်တက္ကသိုလ် မန္တလေးဆောင်ရှေ့၌ တော်လှန်ရေးကောင်စီ အစိုးရ၏ အာဏာသိမ်းမှုကို ဆန့်ကျင်ကန့်ကွက် ဆန္ဒဖော်ထုတ်ခဲ့ကြသည့် ကျောင်းသားများအား ဗိုလ်နေ၀င်းအစိုးရ၏ ရက်စက် ရမ်းကားစွာ ပစ်သတ်မှုကြောင့် ကျောင်းသားရာချီ၍ တက္ကသိုလ် မြေ ပေါ်တွင် အသက်ပေးသွားခဲ့ရသည့် ကျောင်းသားအာဇာနည်များ ။
    •  ၁၉၇၄-၇၅ ကျောင်းသားလှုပ်ရှား မှုကို ခေါင်းဆောင်ပါဝင်ခဲ့ပြီး အင်းစိန်ထောင်တွင်းအာဏာရှင် တို့၏ကြိုးပေးကွပ်မျက်ခြင်းကိုခံရသော ကျောင်းသားခေါင်းဆောင် ဆလိုင်းတင်မောင်ဦး ကဲ့သို့ကျောင်းသားအာဇာနည်များ ။
    • ၁၉၈၈ ဒီမိုကရေစီရေး တောင်းဆိုလှုပ်ရှားမှုတွင် အသက်ပေးစွန့်လှူသွားသော အာဇာနည် ရဟန်းရှင် လူ ကျောင်းသားပြည်သူများအား ကျွန်ုပ်တို့အမှတ်ရနေရမည်ဖြစ်ပေသည်။

    လူ့သမိုင်းဟူသည် လက်နက်ဝါဒီ လူရမ်းကားများ၏ တရားမဲ့ရမ်းကားရာ နယ်မြေအရိုင်း ဘုံမဟုတ်ကြောင်းကို အာဇာနည်နေ့ကအမှတ်ရနေစေပါလိပ့်မည်။ အာဇာနည်အမျိုးသား ခေါင်းဆောင် ကြီး ဗိုလ်ချုပ်အောင်ဆန်း၏ ပုံရိပ်များနှင့် လယ်သမား အာဇာနည်ကြီး ဂဠုန်ဆရာစံ/ရေနံမြေ သပိတ် ခေါင်းဆောင်အာဠာဝက သခင်ဖိုးလှကြီးစသော ခေါင်းဆောင်များ၏ ပုံရိပ်များသည်ငွေစက္ကူများပေါ် တွင်ဖျောက်ဖျက်ခံခဲ့ရသော်လည်း ကျွနုပ်တို့၏ နှလုံးသားထဲတွင် ကွယ်ပျောက်၍မသွားခဲ့ သမိုင်း စာမျက်နှာများထက်တွင် ဖျောက်ဖျက်၍မရခဲ့ ။ ရဲရင့်မြင့်မြတ် သူတို့၏ အတ္ထုပတ္ထိသည် ဘယ်အချိန်ဖတ်ဖတ် ကျွနုပ်တို့၏နှလုံးအိမ်ထဲတွင် မှိုမတက်ခဲ့ပေ..။

    တခေတ်တစ်ခါက အစိုးရဌာန အဆောက်အဦးရုံးခန်း များတွင် တစ်ခမ်းတစ်နား ချိတ်ဆွဲထားသည့် အမျိုးသားခေါင်းဆောင်ကြီး၏ ဓာတ်ပုံများမှာ ဆယ်စုနှစ်နှစ် စုခန့်အများပြည်သူ၏ မြင်ကွင်းများမှ ပျောက်ကွယ်ခဲ့ရာမှ ယခုနိုင်ငံတော် သမ္မတ၏ ရုံးခန်းမှစ၍ အများ ပြည်သူနေ့စဉ်အသုံးပြုရာ ဘတ်(စ်)ကားမကျန်နေရာ အနှံပြန်လည် တွေ့မြင်လာရပြီဖြစ်လေသည်။ သမိုင်းဟူသည် ဘယ်သောအခါကမှ ပျောက်ကွယ်သွားရိုး ထုံးစံမရှိခဲ့ပေ။ သမိုင်းကို မှေးမှိန်အောင်ပြုလုပ်ခဲ့ကြ ကောင်းပြုလုပ်ခဲ့ကြပါလိပ့်မည်။ သို့သော် အမှန်တရားကို ဖျောက်ဖျက်၍မရနိုင်.. အာဇာနည်မျိုးသေရိုးမရှိခဲ့လေပြီ ။

    ထို့ကြောင့်ကျွန်ုပ်တို့သည် အာဇာနည်ခေါင်းဆောင်ကြီးများ၏ တိုင်းပြည်အတွက် ကိုယ်ကျိုးစွန့် အနစ်နာခံရဲသည့် စိတ်ဓာတ်ကို မွေးမြူကြပါစို့…။
    သမိုင်းအဆက်ဆက်လွတ်လပ်ရေး ၊ အာဏာရှင်စနစ် ဆန့်ကျင်ရေး ၊ ဒီမိုကရေစီရေးအတွက် အသက်ပေး စွန့်လှူသွားသော အာဇာနည်ခေါင်းဆောင်များအား အလေးအမြတ်ပြုကြပါစို့။
    ဗိုလ်ချုပ်အောင်ဆန်းနှင့်တကွ ကျဆုံးလေပြီးသော အာဇာနည်ခေါင်းဆောင်ကြီးများအား ၁၉.၇.၂၀၁၃ နံနက် ၁၀နာရီ ၃၇မိနစ်တွင် နေရာအနှံမှ ၀မ်းနည်း ဥသြသံများ ကားဟွန်းသံများ ကြားရသည်နှင့် တစ်ပြိုင်နက် မိမိတို့ရောက်ရှိ နေသည့်နေရာများတွင် ၀မ်းနည်းစွာ ရပ်တန့်လျှက် ကျွန်ုပ်တို့ ခန္ဓာကိုယ်များဖြင့်ငြိမ်သက်စွာ အလေးပြုကြပါစို့ ကျွန်ုပ်တို့၏ နှလုံးသားများဖြင့် ဦးညွတ်ကြပါစို့….။

    စည်သူမောင်
    3rd year B.Eon (stats.) Y.I.E 2007 sep.
    ရန်ကုန်စီးပွားရေးတက္ကသိုလ်ကျောင်းသားများသမဂ္ဂ(တ.က.သ)