News @ M-Media

Tag: Spain

  • ဆောက်လုပ်ချိန် ၁၄၄ နှစ် ကြာပြီးနောက် အဆုံးသတ်တော့မည့် ဘာစီလိုနာက နာမည်ကြီး ကက်သလစ်ဘုရားကျောင်း

    ဆောက်လုပ်ချိန် ၁၄၄ နှစ် ကြာပြီးနောက် အဆုံးသတ်တော့မည့် ဘာစီလိုနာက နာမည်ကြီး ကက်သလစ်ဘုရားကျောင်း

    မတ် ၂၇၊ ၂၀၂၄
    M-Media 

    -စပိန်နိုင်ငံ ဘာစီလိုနာမြို့က နာမည်ကျော် Sagrada Familia ကက်သလစ်ခရစ်ယာန်ဘုရားကျောင်း ဆောက်လုပ်မှုဟာ ၂၀၂၆ ခုနှစ်မှာ ပြီးဆုံးမယ်လို့ အာဏာပိုင်တွေက အတည်ပြု ပြောကြားလိုက်ပါတယ်။ 

    ၁၈၈၂ ခုနှစ်က စတင်တည်ဆောက်ခဲ့တဲ့ အဲဒီဘုရားကျောင်းကို ကာ့တ်လန်ဗိသုကာပညာရှင် အန်တိုနီ ဂေါင်ဒီက ဒီဇိုင်ဆွဲပေးခဲ့တာပါ။ 

    ခရစ်တော်၊ မယ်တော်မေရီ၊ တမန်တော် ၁၂ ပါး၊ ခရစ်၀င်ကျမ်းရေးသူ ၄ ဦး စတဲ့ သမ္မာကျမ်းစာပါ ပုဂ္ဂိုလ် ၁၈ ဦးကို အထိမ်းအမှတ်ပြုတဲ့  ကြောင်လိမ်တာ၀ါ ၁၈ ခု တည်ဆောက်ဖို့ ဒီဇိုင်းမှာ ပါ၀င်ပါတယ်။ 

    လက်ရှိ ဆောက်လုပ်မှု နောက်ဆုံးပိုင်းမှာ ၀တ်ပြုခန်းမဆောင်ကို ၂၀၂၅ ခုနှစ်မှာ အဆုံးသတ်နိုင်မှာဖြစ်ပြီး ခရစ်တော်ကို အထိမ်းအမှတ်ပြုတဲ့ မျှော်စင်က ၂၀၂၆ ခုနှစ်မှာ ပြီးစီးမှာ ဖြစ်ပါတယ်။

    ဒီမျှော်စင်ဟာ ၅၆၆ မီတာမြင့်မှာဖြစ်ပြီး အဲဒီမှာပါ၀င်မယ့် လက်၀ါးကပ်တိုင်က ၆၅ ပေ မြင့်မှာဖြစ်ပါတယ်။ ဒီမျှော်စင်ပြီးသွားရင် ဂျာမနီက Ulm Minster ဘုရားကျောင်းကိုကျော်ပြီး ကမ္ဘာ့ အမြင့်ဆုံးဘုရားကျောင်းအဖြစ် မှတ်တမ်း၀င်မှာ ဖြစ်ပါတယ်။ 

    နှစ် ၁၄၀ ကျော် 
    —————

    ဗိသုကာပညာရှင် ဂေါင်ဒီကွယ်လွန်ချိန် ၁၉၂၆ ခုနှစ်မှာ Sagrada Familia ဘုရားကျောင်း ဆောက်လုပ်မှု ၁၅ ရာခိုင်နှုန်းလောက်သာ ပြီးစီးခဲ့ပါတယ်။ 

    အဲဒီနောက် ဆောက်လုပ်မှု နှေးကွေးခဲ့ပြီး စပိန်ပြည်တွင်းစစ်ဖြစ်တဲ့ ၁၉၃၀ ပြည့်နှစ်တွေမှာ ရပ်ဆိုင်းခဲ့ပါတယ်။ စစ်အတွင်း ဘုရားကျောင်းထဲက ဂေါင်ဒီရဲ့ အုတ်ဂူ ဖျက်ဆီးခံခဲ့ရပြီး သူ့ရဲ့ ဒီဇိုင်းတွေ၊ မော်ဒယ်ပုံကြမ်းတွေလည်း ပျောက်ဆုံးခဲ့ပါတယ်။

    နောက်ပိုင်းမှာ မူရင်းဒီဇိုင်းကို မှီငြမ်းပြီး ပြန်လည်ဆောက်လုပ်ခဲ့ရတာဖြစ်ပါတယ်။ ၁၉၈၄ ခုနှစ်မှာ Sagrada Familia ဘုရားကျောင်းကို ကမ္ဘာ့အမွေအနှစ်အဖြစ် ယူနက်စကိုက သတ်မှတ်ခဲ့ပြီး၊ ၂၀၁၀ ခုနှစ်မှာ ပုပ်ရဟန်းမင်းကြီး ဘန်နီဒစ်က ၀တ်ပြုခွင့်ပြုခဲ့ပါတယ်။ 

    Sagrada Familia ဘုရားကျောင်း ဆောက်လုပ်ခွင့်ပါမစ် မတင်ခဲ့တာကို ၁၃၇ နှစ်ကြာ ၂၀၁၆ ခုနှစ်မှ ဘာစီလိုနာအာဏာပိုင်တွေ သိရှိခဲ့ပြီး ၂၀၁၉ ခုနှစ်မှာတော့ ဆောက်လုပ်ခွင့်ပါမစ် ထုတ်ပေးခဲ့ပါတယ်။

    Ref: CNN

  • မူးယစ်ဂိုဏ်းများ၏ ရေငုပ်သင်္ဘောကြောင့် ဥရောပရဲများ ခေါင်းခဲနေရ

    မူးယစ်ဂိုဏ်းများ၏ ရေငုပ်သင်္ဘောကြောင့် ဥရောပရဲများ ခေါင်းခဲနေရ

    ဧပြီ ၂၁၊ ၂၀၂၃

    M-Media 


    -ကိုလံဘီယာနဲ့ မက္ကဆီကိုတို့လို တောင်အမေရိက နိုင်ငံတွေက မူးယစ်ဂိုဏ်းတွေဟာ ဥရောပကို ရေငုပ်သင်္ဘောတွေတဲ့ ဘိန်းတင်ပို့တဲ့အထိ အဆင့်မြင့်မြင့် လုပ်ဆောင်လာနိုင်ပါတယ်။ 

    ၂၀၁၉ ခုနှစ်က စပိန်မှာ ပထမဆုံး ဖမ်းဆီးရမိခဲ့တဲ့ ရေငုပ်သင်္ဘောဆိုရင် လူ ၃ ယောက် လိုက်ပါနိုင်ပြီး ကန်ဒေါ်လာ သန်း ၁၅၀ ဖိုးရှိတဲ့ ဘိန်း ၃ တန် တင်ဆောင်နိုင်ပါတယ်။ 

    ကာဘွန်ဖိုက်ဘာနဲ့ တည်ဆောက်ထားတဲ့ အဲဒီ ရေငုပ်သင်္ဘောဟာ ၆၅ ပေရှည်ပြီး အင်ဂျင်၊ စတီယာတိုင်တစ်ခုနဲ့ ဒိုင်ခွက်အချို့သာ ပါ၀င်ပါတယ်။ လိုက်ပါသွားသူတွေဟာ တစ်လလောက် အသက်ရှင်နေထိုင်နိုင်ပြီး အစားအသောက်အတွက် အဟာရ၀ေဖာ၊ ငါးသေတ္တာ၊ အညစ်အကြေးစွန့်ဖို့ ပလက်စတစ်အိတ်ကလွဲရင် ဘာပစ္စည်းမှ အပိုမပါပါဘူး။

    အတ္တလန်တိတ် သမုဒ္ဒရာအလယ် ကနေရီကျွန်းနဲ့ အဇိုရီကျွန်းတစ်၀ိုက်မှာ ဘိန်းသယ်ရေငုပ်သင်္ဘော သင်္ချိုင်း ရှိနေပါတယ်။ ဘိန်းတွေတင်ပြီး သတ်မှတ်ထားတဲ့ နေရာမှာ ချပြီးသွားရင် ရေငုပ်သင်္ဘောတွေကို ရေအောက်ထဲ မြှုပ်ပစ်ကြပါတယ်။ 

    မူးယစ်ဂိုဏ်းတွေဟာ ဂူယာနာနဲ့ ဆူရီနမ်တို့က တောနက်တွေထဲမှာ အင်ဂျင်နီယာတွေနဲ့ ရေငုပ်သင်္ဘောတွေကို တိတ်တဆိတ် ဆောက်လုပ်ကြတာ ဖြစ်ပါတယ်။ 

    “မူးယစ်မှောင်ခိုဂိုဏ်းတွေဟာ လွန်ခဲ့တဲ့ နှစ် ၂၀ ကျော်လောက်ကတည်းက ရေငုပ်သင်္ဘောတွေနဲ့ ပစ္စည်းပို့နေကြတာပါ။ ကျွန်တော်တို့ဖမ်းမိထားတာက နှစ်စီးပဲရှိပါသေးတယ်။ ရေငုပ်သင်္ဘောတွေကို ခြေရာခံဖို့ တော်တော်ခက်ပါတယ်” လို့ စပိန်အမျိုးသားရဲတပ်ဖွဲ့ရဲ့ မူးယစ်နှိမ်နှင်းရေးအဖွဲ့ ကော်မရှင်နာမင်းကြီး အန်တိုနီယို မာတီနက်ဇ် ဒူအာတေးက ပြောပါတယ်။ 

    အမေရိကန်ပြီးရင် ဥရောပဟာ ဘိန်းမှောင်ခိုင်လုပ်ငန်းရဲ့ အကြီးဆုံး စျေးကွက်တစ်ခုဖြစ်ပါတယ်။ မူးယစ်မှောင်ခိုသမားတွေဟာ ရေငုပ်သင်္ဘော ရာချီသုံးကာ ဥရောပကို ပစ္စည်းပို့ကြပြီး အခုအချိန်အထိ ၂ စီးသာ ဖမ်းမိထားပါတယ်။ ဒီဖမ်းဆီးမှုဟာ စပိန်မှာ ဖြစ်ပါတယ်။ 

    ဘိန်းလုပ်ငန်းဟာ အမြတ်အစွန်း အလွန်ရလွယ်တဲ့ လုပ်ငန်းဖြစ်ပြီး၊ ငွေးကြေးခ၀ါချမှုတွေ၊ ခြစားမှုတွေလည်း ရှိနေတာကြောင့် ဥရောပမှာ ဒီလုပ်ငန်းကို နှိမ်နှင်းဖို့ ခက်သွားပြီလို့ ဘယ်လ်ဂျီယံ တရားသူကြီး မီခေးလ် ကလိုင်စီက ပြောပါတယ်။

    “မူးယစ်မှောင်ခိုသမားတွေဟာ အမြတ်အစွန်းအရမ်းရတယ်။ သင်္ဘောကျင်းတွေ၊ ရဲတွေနဲ့ ပတ်သက်ရာပတ်သက်ကြောင်း လူတွေက သူတို့ပေးတာကျွေးတာတွေကို စားနေကြတယ်။ ငွေးကြေးခ၀ါချမှု၊ ခြစားမှုတွေလည်း ရှိနေတယ်ဆိုတော့ ရာဇ၀တ်ဂိုဏ်းတွေကို ကျွန်တော်တို့ ဘယ်လို ထိန်းနိုင်တော့မလဲ။ မရတော့ပါဘူး”

    ဘယ်လ်ဂျီယံဟာ မူးယစ်းဆေးပြဿနာကို ကြီးကြီးမားမား ရင်ဆိုင်နေရတဲ့ ဥရောပနိုင်ငံဖြစ်ပါတယ်။ တရားသူကြီး ကလိုင်စီကိုလည်း မူးယစ်ဂိုဏ်းတွေက ပြန်ပေးဆွဲသတ်ဖြတ်ဖို့အထိ ကြံတဲ့အတွက်ရဲတပ်ဖွဲ့က အနီးကပ် စောင့်ရှောက်ပေးထားရပါတယ်။

    Ref: BBC 

  • ရေငုပ်ဒရုန်းသင်္ဘောတွေပါ သုံးလာတဲ့ ဥရောပက မူးယစ်ဂိုဏ်းများ

    ရေငုပ်ဒရုန်းသင်္ဘောတွေပါ သုံးလာတဲ့ ဥရောပက မူးယစ်ဂိုဏ်းများ

    ဇူလိုင် ၆၊ ၂၀၂၂
    M-Media

    -မူးယစ်ဆေးတင်သွင်းရေး ရည်ရွယ်တည်ဆောက်ထားတဲ့ ရေအောက် ဒရုန်းသင်္ဘောတွေကို စပိန်အာဏာပိုင်တွေက ပြီးခဲ့တဲ့တစ်ပတ်မှာ ဖမ်းဆီးလိုက်ပါတယ်။

    မူးယစ်ဂိုဏ်းတွေ ရေအောက်ဒရုန်းသုံးဖို့ ကြိုးစားမှုကို စပိန်မှာ ပထမဆုံး တွေ့ရှိရတာပါ။

    ၁၄ လကြာ စုံစမ်းစစ်ဆေးမှုတွေ ပြုလုပ်ခဲ့ပြီးတဲ့နောက် ဒရုန်းသင်္ဘော ၃ စီးနဲ့အတူ လူ ၈ ဦးကို မြို့ ၃ မြို့မှာ ဖမ်းဆီးခဲ့တာဖြစ်ပါတယ်။

    ဒရုန်းသင်္ဘောတွေဟာ မူးယစ်ဆေး ၂၀၀ ကီလိုဂရမ် သယ်ဆောင်နိုင်ပြီး မော်ရိုကိုဖက်ကနေ ဂျီဘရော်တာရေလက်ကြားကို ဖြတ်ကာ စပိန်အထိပို့ဆောင်ဖို့ ရည်ရွယ် တည်ဆောက်ထားတာလို့ စပိန်ရဲတပ်ဖွဲ့က ပြောပါတယ်။

    ဖမ်းဆီးရမိတဲ့ ရေအာက်ဒရုန်း ၃ စီးမှာ တစ်စီးက လုံး၀ တည်ဆောက်ပြီးသွားပြီး နောက်ထပ်နှစ်စီးက တည်ဆောက်ဆဲအနေအထားမှာ ရှိနေပါတယ်။ ပြင်သစ်က မူးယစ်ဂိုဏ်းတွေပါ ဒီဒရုန်းတွေသုံးဖို့ ရည်ရွယ်ထားတာပါ။

    GPS လမ်းပြစနစ်ပါ၀င်တဲ့အတွက် ဒီသင်္ဘောတွေကို ကမ္ဘာရဲ့ ဘယ်နေရာကမဆို အင်တာနက်ရှိရုံနဲ့ ထိန်းသိမ်းမောင်းနှင်နိုင်ပါတယ်။

    ဖမ်းဆီးရမိတဲ့ လူတွေဟာ မူးယစ်မှောင်ခိုလုပ်နိုင်ရေး ကုန်း၊ ရေ၊ လေ အဆင့်မြင့် သယ်ယူပို့ဆိုင်ရေးယာဥ်တွေ တည်ဆောက်ဖို့ ဖွဲ့စည်းထားတဲ့ အဖွဲ့ ဖြစ်ပြီး အီလက်ထရောနစ်နဲ့ နည်းပညာပိုင်းဆိုင်ရာ ပညာရှင်တွေ ပါ၀င်တယ်လို့ စပိန်ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

    ဒရုန်းသင်္ဘောတွေအပြင် အခြား ယာဥ်မျိုးစုံ ၁၄ စီး၊ မူးယစ်ဆေး၀ါးနဲ့ ငွေစက္ကူအများအပြားကိုလည်း စပိန်ရဲတပ်ဖွဲ့က သိမ်းဆည်းနိုင်ခဲ့ပါတယ်။

    Ref: BBC

  • မိခင်ကိုသတ်၍ ချက်စားသူတစ်ဦးကို စပိန်တွင် ဖမ်းဆီးတရားစွဲဆို

    မိခင်ကိုသတ်၍ ချက်စားသူတစ်ဦးကို စပိန်တွင် ဖမ်းဆီးတရားစွဲဆို

    ဧပြီ ၂၃၊ ၂၀၂၁
    M-Media

    -မိခင်အရင်ကို သတ်ပြီး အပိုင်းပိုင်းတစ်ကာ ချက်စားသူတစ်ဦးကို ဖမ်းဆီး တရားစွဲဆိုထားတယ်လို့ စပိန်ရဲတပ်ဖွဲ့က ထုတ်ပြန်ပါတယ်။

    ကျူးလွန်သူဟာ အလ်ဘာတို ဆန်းချက်ဆိုသူဖြစ်ပါတယ်။ အသက် ၆၆ နှစ်အရွယ် သူ့အမေရဲ့ မက်ဒရစ်မြို့ကတိုက်ခန်းကို ၂၀၁၉ ခုနှစ်မှာ ရဲတွေက ဝင်ရှာခဲ့ပြီးတဲ့နောက် ဆန်းချက်ကို ဖမ်းဆီးခဲ့တာ ဖြစ်ပါတယ်။

    အိမ်ထဲမှာ ခန္ဓာကိုယ်အစိတ်အပိုင်းတွေ ပြန့်ကျဲနေပြီး တစ်ချို့အစိတ်အပိုင်းတွေကို ကော်ဘူးထဲထည့်ထားကာ တစ်ချို့ကို ချက်ပြုတ်ရင်းတန်းလန်းနဲ့ ဆန်းချက်ကို မိတာပါ။

    မိခင်ကို လည်ပင်းညှစ်သတ်ကာ ခုတ်ထစ်ချက်စားပြီး ခွေးကိုလည်း ကျွေးတယ်လို့ ဖမ်းဆီးစဉ်မှာ ဆန်းချက်က ဝန်ခံခဲ့ပေမယ့် တရားရုံးမှာတော့ ဒီကိစ္စကို သူမမှတ်မိဘူးလို့ ထွက်ဆိုခဲ့ပါတယ်။

    ဆန်းချက်ဟာ စိတ်ပိုင်းဆိုင်ရာ ပြဿနာရှိပြီး၊ မူးယစ်ဆေး အလွန်အကျွံသုံးစွဲတဲ့မှတ်တမ်းရှိကာ မိခင်ပေါ်မှာ အကြမ်းဖက်တဲ့အတွက် ရဲစခန်းအတိုင်ခံထားရသူလည်း ဖြစ်ပါတယ်။

    Ref: BBC

  • စပိန်တွင် နှစ်ပေါင်း ၁၂၀၀ သက်တမ်းရှိ မွတ်စလင်သုဿန်တစ်ခု တွေ့ရှိ

    စပိန်တွင် နှစ်ပေါင်း ၁၂၀၀ သက်တမ်းရှိ မွတ်စလင်သုဿန်တစ်ခု တွေ့ရှိ

    နိုဝင်ဘာ ၂၁၊ ၂၀၂၀
    M-Media

    -စပိန်နိုင်ငံ အရှေ့မြောက်ပိုင်း အရာဂွန်ဒေသမှာ နှစ်ပေါင်း ၁၂၀၀ လောက် သက်တမ်းရှိတဲ့ မွတ်စလင်သုဿာန်တစ်ခုကို ရှေးဟောင်းပညာရှင်တွေက ရှာဖွေတွေ့ရှိခဲ့ပြီး လူသားရုပ်ကြွင်းတွေကို တူးဖော်လေ့လာနေကြပါတယ်။

    ဇာရာဂိုဇာမြို့အနီး တော့စ်တီမြို့က အဲဒီ သုဿာန်ဟာ ၈ ရာစုလောက်က တည်ရှိခဲ့တာပါ။ ရုပ်ကြွင်းပေါင်း ၄၅၀၀ လောက်ရှိပြီး လက်ရှိအချိန်အထိ အုတ်ဂူပေါင်း ၄၀၀ လောက်ကို ပညာရှင်တွေက တူးဖော်ထားပါတယ်။

    သက္ကရာဇ် ၇၁၁ ခုနှစ်မှာ အာရပ်တွေဟာ အိုက်ဘေးရီးယန်းကျွန်းဆွယ်ကို သိမ်းပိုက်နိုင်ခဲ့ပြီး နောက်ထပ် နှစ်ပေါင်း ၇၀၀ လောက် စိုးမိုးအုပ်ချုပ်ခဲ့ပါတယ်။ ၁၄၉၂ ခုနှစ်မှာ ဥရောပဘုရင်တွေကို ရှုံးနိမ့်ပြီး အာရပ်တွေရဲ့ အိုက်ဘေးရီးယားကို စိုးမိုးမှုလည်း အဆုံးသတ်ခဲ့ရပါတယ်။

    Basque Country တက္ကသိုလ်က သုတေသန ပညာရှင်တွေကတော့ တော့စ်တီမြို့အပါအဝင် စပိန်မှာရှိခဲ့တဲ့ အာရပ်မွတ်စလင်တွေရဲ့ အမွေအနှစ်တွေဟာ ဖျောက်ဖျက်ခံထားရတယ်လို့ ပြောကြားခဲ့ပါတယ်။

    တော့စ်တီမြို့က ဒီ မွတ်စလင်သုဿာန်ကို ၂၀၁၀ ခုနှစ်မှာ စတင်တွေ့ရှိခဲ့တာ ဖြစ်ပြီး ကနဦးမှာ ရုပ်ကြွင်း ၄၄ ခု ကို တူးဖော်ခဲ့ပါယ်။ နောက်ပိုင်းမှာတော့ ၅ ဧကအကျယ်ရှိတဲ့ ဒီသုဿာန်ကို အသေးစိတ် တူးဖော်မှုတွေလုပ်ဖို့ အာဏာပိုင်တွေက စီစဉ်ခဲ့ပါတယ်။ အခုအချိန်အထိ ရုပ်အလောင်း ၄၀၀ လောက်ကို တူးဖော်ထားနိုင်ပါတယ်။

    “ဒီလိုတူးဖော်တာမျိုးက ကြုံတောင့်ကြုံခဲ ကိစ္စဖြစ်ပါတယ်။ အံ့ဩစရာပါပဲ” လို့ El Patiaz ယဉ်ကျေးမှုအဖွဲ့အစည်းရဲ့ အစ္စလာမ်သုဿာနများတူဖော်လေ့လာမှုဆိုင်ရာ အကြီးအကဲ မနုဿဗေဒပညာရှင် မီရီယမ် ပီနာ ပါဒို့စ်က ပြောကြားခဲ့ပါတယ်။

    ရုပ်ကြွင်းအားလုံးကို အစ္စလာမ့်ထုံးစံဖြစ်တဲ့ မက္ကာမြို့ဖက်ကို မျက်နှာမူကာ မြှုပ်နှံထားတာလို့လည်း သူမက ပြောပါတယ်။

    ဒီလိုတူးဖော်တွေ့ရှိမှုကြောင့် ဒေသတွင်းမှာ ပျောက်ကွယ်နေတဲ့ အာရပ်မွတ်စလင်တွေရဲ့ အမွေအနှစ်တွေကို ပိုမိုသိရှိဖော်ထုတ်နိုင်လိမ့်မယ်လို့ ပညာရှင်တွေက သုံးသပ်ပါတယ်။

    “ဒီဒေသအတွင်း အစ္စလာမ်ဘာသာနဲ့ အစ္စလာမ့်ယဉ်ကျေးမှု တည်ရှိခဲ့တာတွေဟာ ကျွန်မတို့ ထင်ထားတာထက် ပိုပြီး နက်နဲတယ်ဆိုတာ တွေ့လာရပါတယ်။ မွတ်စလင်တွေ စပိန်ကို စရောက်လာပြီးနောက်ပိုင်း တော့စ်တီဒေသမှာ ကြီးမားတဲ့ မွတ်စလင်လူ့အဖွဲ့အစည်းတစ်ခု ရှိခဲ့တယ်ဆိုတာ ကျွန်မတို့ မြင်ရတယ်။ ရုပ်ကြွင်း ၄၀၀ လောက် တူးဖော်ရရှိတာကိုကြည့်ရင် မွတ်စလင်တွေဟာ ဒီဒေသမှာ ရာစုနှစ်ချီ နေထိုင်ခဲ့တယ်ဆိုတာ ထင်ရှားပါတယ်”

    အခုတွေ့ရှိတဲ့ သုဿာန်ကနေ တူးဖော်ရရှိတဲ့ ရုပ်ကြွင်းတွေကို စနစ်တကျသိမ်းဆည်းကာ သုတေသန ပြုလုပ်သွားမယ်လို့ ပီနာ ပါဒို့စ်က ထည့်သွင်းပြောဆိုခဲ့ပါတယ်။

    Ref: CNN