သြဂုတ်လ-၁၄၊ ၂၀၁၃
M-Media
၂၀၁၃ ခုနှစ် သြဂုတ်လ ၁၃ ရက်နေ့တွင် ရခိုင်ပြည်နယ်၊ သံတွဲမြို့၊ မြို့တောင် ရပ်ကွက်မှ မွတ်စလင်ပိုင် စက်လှေ ၅ စီး နှင့် နေအိမ် ၁ လုံးကို အကြမ်းဖက်သမားတစုက မီးရှို့ဖျက်ဆီးခဲ့ကြောင်း သတင်းရရှိပါသည်။
သတင်းအသေးစိတ်ကို ထပ်မံစုံစမ်းဖော်ပြပေးသွားပါမည်။
ဇူလိုင် ၃၁၊ ၂၀၁၃
M-Media
ထွန်းတောက်
သံတွဲ ။ ။ ရခိုင်ပြည်နယ်၊ သံတွဲမြို့နယ်နှင့်ဂွမြို့နယ်တို့ ပြေးဆွဲနေသော မော်တော်ယာဉ်လိုင်းများရှိ မွတ်စလင်မ်များပိုင်သော ယာဉ်များနှင့် ယာဉ်မောင်း၊ ယာဉ်နောက်လိုက်များ ပါဝင်လုပ်ဆောင်ခြင်း မရှိစေဘဲ ဘာသာရေး လူမျိုးရေးခွဲခြားမှု ကန့်သတ်မှုတို့ကို သံတွဲမြို့နယ် မ.ထ.သနှင့် ဂွမြို့နယ် အုပ်ချုပ်ရေးမှူးတို့မှ ပြုလုပ်နေသဖြင့် မွတ်စလင်မ်ယာဉ်ပိုင်ရှင်များမှ သံတွဲခရိုင်အုပ်ချုပ်ရေးမှူးသို့ စာရေးသား တင်ပြ တောင်းဆိုလိုက်ကြောင်း သိရသည်။
အဆိုပါ အစီရင်ခံ တင်ပြရခြင်းမှာ ဇူလိုင်လ ၂၃-ရက်နေ့ ရက်စွဲဖြင့် ဂွမြို့နယ် အုပ်ချုပ်ရေးမှူးမှ ထုတ်ပြန်ခဲ့သော စာတွင် သံတွဲ-ဂွ မော်တော်ယာဉ်လိုင်းတွင် ဘင်္ဂါလီ လူမျိုးများမှ ဒရိုင်ဘာ၊ စပယ်ယာများအဖြစ် လိုက်ပါ မောင်းနှင်ခြင်း မရှိစေရန် ညွှန်ကြားပေးရန် သံတွဲ မ.ထ.သ နှင့် သံတွဲ-ဂွ မော်တော်ယာဉ် ဂိတ်မှူးထံ ပေးပို့ခဲ့သည်။ ထို့ပြင် အဆိုပါစာအတိုင်း လိုက်နာဆောင်ရွက်ရန် သံတွဲမြို့နယ် မ.ထ.သ မှလည်း သံတွဲ-ဂွ မော်တော်ယာဉ်လိုင်း ဥက္ကဌထံသို့ ဇူလိုင် ၂၇-ရက် ရက်စွဲဖြင့် ထပ်မံ အကြောင်းကြားခဲ့သည်ဟု သိရသည်။
ယင်းစာတွင် ဘင်္ဂါလီလူမျိုး ဒရိုင်ဘာနှင့် စပယ်ယာများဟု ရည်ညွှန်း သုံးစွဲထားသည်မှာ ယခုလက်ရှိ မောင်းနှင်နေသော ယာဉ်မောင်းနှင့် ယာဉ်နောက်လိုက်များကို ရည်ညွှန်းသည်ဖြစ်သည့် အတွက် ဘာသာလူမျိုးခွဲခြားမှု ပြုလုပ်ခြင်းဖြစ်သည်။ ယခုလက်ရှိ ယာဉ်မောင်းနှင့် ယာဉ်နောက်လိုက်များမှာ နိုင်ငံသား စိစစ်ရေး ကတ်ပြား တရားဝင် လက်ဝယ်ရှိသော သူများဖြစ်ကြပြီး ဘင်္ဂါလီလူမျိုး သက်သက်မဟုတ်ဘဲ ကမန်လူမျိုး၊ ကမန်-ဘင်္ဂါလီ လူမျိုးများသာဖြစ်ကြောင်းသိရသည်။
ဤကိစ္စနှင့်စပ်လျဉ်း၍ “ကျွန်တော်တို့က ကမန်တွေပါ။ ဘင်္ဂါလီလည်းမဟုတ်ဘူး။ ပြီးတော့ ဒီလို အုပ်ချုပ်ရေးမှူးနဲ့ မ.ထ.သ က လုပ်တာဟာ ကျွန်တော်တို့တွေကို လူမျိုး၊ ဘာသာအရရော၊ စီးပွားရေးအရရော ခွဲခြားဖိနှိပ်လိုက်တာပါ။ အစိုးရလက်ရှိ ကျင့်သုံးနေတဲ့ ၂၀၀၈-ခုနှစ် ဖွဲ့စည်းပုံ အခြေခံဥပဒေ ပုဒ်မ ၃၄၈ မှာ ‘နိုင်ငံသားတစ်ဦးဦးအား လူမျိုးနှင့် ကိုးကွယ်သည့် ဘာသာကို အခြေခံ၍ ခွဲခြားဆက်ဆံခြင်းမပြုရ’လို့ ပြဌာန်းပါရှိတယ်။ အခုလို စာထုတ်ပြီး မော်တော်ယာဉ်လိုင်းမှာ မွတ်စလင်မ်တွေ ပါဝင်ခြင်းမရှိစေရန် ဖိအားပေးတာဟာ အခြေခံဥပဒေကို ဖောက်ဖျက် ကျူးလွန်တာပါ။
ဒါကြောင့် ကျွန်တော်တို့က သံတွဲခရိုင် အုပ်ချုပ်ရေးမှူးဆီကို စာတင်ပြီး တွေ့ဆုံညှိနှိုင်းပေးဖိုတောင်းဆိုတာပါ။” လို့ သံတွဲမော်တော်ယာဉ်လိုင်းမှ ယာဉ်ပိုင်ရှင်တစ်ဦးက M-Media မှ ဆက်သွယ်မေးမြန်းချက်မှာ ပြောပြခဲ့ပါတယ်။
DVB မြန်မာပိုင်းမှ ကူးယူဖော်ပြပါသည်။
မနှစ်က တောင်ကုတ်မြို့ တွင် မွတ်စလင် ၁၀ ဦး သတ်ဖြတ်ခံရမှုမှာ ဦးဆောင်တယ်လို့ သံသယရှိသူ ၆ ဦးကို နေပြည်တော်က တိုက်ရိုက်ကွပ်ကဲမှုနဲ့ တောင်ကုတ်မြို့ကနေ ဇူလိုင် ၁၇ ရက်နေ့ညမှာ ဖမ်းဆီးလိုက်တယ်လို့ သံတွဲခရိုင် သတင်းမှန်ဖော်ထုတ်ရေးအဖွဲ့က အဖွဲ့ဝင် ဦးဝင်းနိုင်က ပြောပါတယ်။
ညမထွက်ရအမိန့်ပုဒ်မ ၁၄၄ ထုတ်ပြန်ထားတဲ့ သံတွဲမြို့ကို နေပြည်တော်ရဲတပ်ဖွဲ့က ရောက်လာပြီး ဖမ်းဆီးမှုကို သတင်းမပေါက်ကြားအောင် စီစဉ်ဖမ်းဆီးခဲ့တာဖြစ်ပြီး သံတွဲထောင်မှာ ချုပ်နှောင်ထားတယ်လို့ သူက ပြောပါတယ်။
“နေပြည်တော်က ဆင်းလာတဲ့ရဲက သံတွဲရဲကို အကူအညီတောင်းပြီးတော့ သံတွဲမှာရှိတဲ့ ရဲတွေရဲ့ဖုန်းတွေကိုပါ သိမ်းလိုက်တယ်။ ပြီးတော့ ကားပေါ်တက်ဆိုပြီးတော့ ပထမတော့ သူက မြောက်ဘက်ကို အယောင်ပြတာပေါ့။ သွားတာက တောင်ကုတ်သွားတာ။ မြောက်ဘက်က ကျောက်ကြီးဆိုတဲ့ရွာကို အယောင်ပြတာ။ ကျောက်ကြီးကိုဖုန်းဆက်တော့လည်း ဖုန်းတွေက ပိတ်ထားတယ်။ နောက် ၁၀ နာရီ ၄၀ မိနစ်မှာ ကျနော့်ဆီကို ဖုန်းဝင်လာတယ်။ ကား ၄ စီးဖြတ်သွားတယ်။ ရဲတွေလည်းပါသွားတယ်ပေါ့။ ဒီတော့ အခြေအနေတခုကို စောင့်ကြည့်ရမယ်ပေါ့။ သွားတာကိုတော့ သိတယ်။ အပြန်မှာ ၆ ယောက်ဖမ်းမိတယ်၊ ပြီးခဲ့နှစ် ဇွန် ၃ ရက်နေ့က သတ်တဲ့အမှုနဲ့ ၇ ဦး ဖမ်းဖို့ရာမှာ ၁ ဦးက လွတ်သွားတယ်တဲ့။ တောင်ကုတ်ကျတော့လည်း ရဲတွေကို လက်ကိုင်ဖုန်းတွေ သိမ်းပြီးတော့ ဘယ်အိမ်၊ ဘယ်သူဆိုတာကို သူတို့က စုံစမ်းပြီးသားဖြစ်နေတာ” လို့ ပြောပါတယ်။
သံတွဲမြို့နယ်ရဲစခန်းကို ဆက်သွယ်မေးမြန်းရာမှာ အထက်က စီစဉ်တာဖြစ်လို့ ပြောလို့ မရဘူးလို့ ဖြေပါတယ်။
သံတွဲခရိုင် အုပ်ချုပ်ရေးမှူးရုံးကတော့ ဒီကိစ္စကို သူတို့မသိပါဘူးလို့ ဖြေပါတယ်။ သံတွဲခရိုင်အုပ်ချုပ်ရေးမှူး ဦးထွန်းဝေကို ဆက်သွယ်ရာမှာ သူ့ရဲ့ကိုယ်ရေးအရာရှိက သတင်းညှိနှိုင်း အစည်းအဝေးလုပ်နေလို့ မအားသေးဘူးလို့ ဖြေပါတယ်။
တောင်ကုတ်ဒေသခံတွေကို မေးမြန်းတဲ့အခါ ဒီကိစ္စကို ဇူလိုင် ၁၈ ရက်နေ့ မနက်ပိုင်းကျမှ ကြားသိရပြီး နယ်မြေခံတပ်ကလူတွေတောင် မသိဘူးလို့ ပြောပါတယ်။ ဒီမနက်မှာတော့ တောင်ကုတ်မြို့မှာ ရဲလုံခြုံရေးတိုးမြှင့်ချထားတယ်
မနှစ် ဇွန် ၃ ရက်နေ့က ရခိုင်ပြည်နယ် တောင်ကုတ်မြို့မှာ မွတ်စလင် ၁၀ ဦးကို အမည်မသိ လူအုပ်စုတစုက သတ်ဖြတ်မှု ဖြစ်ပွားခဲ့ပါတယ်။
သံတွဲမြို့ကနေ ရန်ကုန်ကို သွားတဲ့ကားတစီးကို တောင်ကုတ်မြို့အရောက်မှာ ကားပေါ်ပါ မွတ်စလင် ၈ ဦးနဲ့ သံတွဲမြို့ခံ ၂ ဦးကို အမည်မသိ လူအုပ်စုတစုက တုတ်၊ ဓားတွေနဲ့ ရိုက်နှက် သတ်ဖြတ်ခဲ့တာ ဖြစ်ပါတယ်။ ဒီအဖြစ်အပျက်မဖြစ်မီ မနက်ပိုင်းလောက်ကတည်းက ရခိုင်ပြည်နယ် ကျောက်နီမော်ကျေးရွာမှာ သတ်ဖြတ်ခံရတဲ့ အမျိုးသမီးတဦးရဲ့ပုံတွေ တောင်ကုတ်မြို့မှာ ပျံ့နှံ့ခဲ့ပါတယ်။
ဒီအကြမ်းဖက်သတ်ဖြတ်မှုကြောင့် နောက်ပိုင်းမှာ ရခိုင်ပြည်နယ် နေရာအတော်များများမှာ နေအိမ်မီးရှို့မှုတွေနဲ့ သတ်ဖြတ်မှုတွေ ဆက်တိုက်ဖြစ်ပွားခဲ့ပါတယ်။
ဇူလိုင် ၁၀၊ ၂၀၁၃
M-Media
ထွန်းတောက်
သံတွဲ ။ ။ ရခိုင်ပြည်နယ် သံတွဲမြို့အနီး ရွှေကျောင်းပြင်ရွာတွင် မွတ်စလင်မ်ပိုင် လယ်တောရှိ တဲကို မီးရှို့ဖျက်ဆီးပြီး မွေးမြူထားသော ဆိတ်နှင့် ကြက်များကို လုယက်မှုတစ်ခု ယမန်နေ့ညပိုင်းက ရွှေကျောင်းပြင်ရွာ သမင်ကန်တွင်ဖြစ်ပွားခဲ့ကြောင်း သတင်းရရှိသည်။
သမင်ကန်သည် ရွှေကျောင်းပြင်ရွာမှ မိုင်ဝက်ခန့်သာ ဝေးကွာသောနေရာဖြစ်ပြီး လယ်ယာလုပ်ငန်း လုပ်ကိုင်ကြသောနေရာလည်းဖြစ်သည်။ ရွှေလောင်းပြင်ရွာသူ မငယ်ပိုင်ဆိုင်သောလယ်ထဲရှိ တဲအား မီးရှို့ဖျက်ဆီးပြီး မွေးမြူထားသော ဆိတ်နှင့် ကြက်များကို လုယက်ယူဆောင်သွားကြောင်း၊ လုယက်ယူဆောင်သွားသူများအား လယ်တောစောင့်သူများ သိမြင်လိုက်သော်လည်း ယခုထိ မည်သို့မျှ အရေးယူမှု မရှိသေးကြောင်းသိရသည်။
ရွှေကျောင်းပြင်ရွာတွင် ဗလီတစ်လုံးရှိပြီး အာရဗီဘာသာရေး စာသင်ကျောင်း သီးသန့်မရှိဘဲ မွတ်စလင်မ်အိမ်ခြေ ၂၀၀-ခန့်ရှိပါသည်။
ယခုအခါ သံတွဲမြို့အနီးတ၀ိုက် ရွာများနှင့် မွတ်စလင်မ်ရွာများတွင် မွတ်စလင်မ်များ၏ အိုးအိမ်စည်းစိမ်များ လုံခြုံရေးအထူး လိုအပ်နေကြောင်းလည်းသိရသည်။ ဂွမြို့နှင့် သံတွဲမြို့ကြားရှိ ရွာများတွင်လည်း ယခင်က တည်ငြိမ်အေးချမ်းမှုများအား မတည်ငြိမ်မှုများဖြစ်ပေါ်စေရန် ၀ါဒဖြန့် လုပ်ဆောင်မှုများ ရှိလာနေသည့်အတွက် ဒေသခံမွတ်စလင်မ်များအနေနှင့် ထိုကဲ့သို့ မတည်ငြိမ်မှုများ ဖြစ်ပေါ်လာမည်ကိုလည်း အထူးစိုးရိမ်လျက်ရှိနေကြောင်းလည်း သိရသည်။
ရခိုင်ပြည်နယ် သံတွဲမြို့တွင် ရခိုင် အမျိုးသမီးငယ်တစ်ဦးအား မွတ်စလင်မ် ၂-ယောက်မှ မုဒိမ်းကျင့်သည်ဟု သတင်းများ ထုတ်လွှင့်ပြီး အကြမ်းဖက်မီးရှို့မှုလုပ်ရပ်များ ဖြင့် လက်တုံ့ပြန်ခဲ့ကြသည်။
သံတွဲမြို့မှာ ဖြစ်ပွားခဲ့တဲ့ အကြမ်းဖက်မှုကြောင့် ဇူလိုင် ၁ရက်နေ့ထိ စာရင်းများအရ လူနေအိမ် ၅-လုံး မီးရှို့ခံရပြီး အခြားလူနေအိမ် ၇-လုံး ဖျက်ဆီးခံရပါတယ်။ ကားဂိတ်တစ်ခု မီးရှို့ဖျက်ဆီးခံရပြီး ကား(၄)စီးလည်း ဖျက်ဆီးခံခဲ့ရတယ်လို့ သံတွဲမြို့ အကြမ်းဖက်မှုရဲ့ ပျက်ဆီးဆုံးရှုံးမှုများကိုလည်း သိရပါသည်။
ဇူလိုင် ၆၊၂၀၁၃
M-Media
ထွန်းတောက်
သံတွဲ ။ ။ ရခိုင်ပြည်နယ်၊ သံတွဲမြို့ လက်ပံစုရွာ ဘုန်းကြီးကျောင်း အနီးရှိ မွတ်စလင်မ်အိမ်တစ်လုံးအား ယနေ့ည (၈း၃၀)နာရီခန့် မီးရှို့ခံရကြောင်း သိရသည်။
သံတွဲမြို့ လက်ပံစုကုန်း ဘုန်းကြီးကျောင်းနောက်ရှိ ဦးကျော်အေး၏ တဲအား အကြမ်းဖက်သမားများက ယနေ့ (၈း၃၀)နာရီခန့်က မီးရှို့ဖျက်ဆီး သွားခဲ့ပါသည်။
သံတွဲမြို့ ကျောက်ဆိပ်ရွာတွင် မွတ်စလင်မ်အိမ်ခြေ (၅)အိမ်ခန့်ရှိပြီး ထိုရွာရှိ မွတ်စလင်မ်အိမ်များသည်လည်း စိုးရိမ်ဖွယ်ရာ အနေအထားနှင့် ကြုံနေရကြောင်းသိရသည်။ အဆိုပါ မွတ်စလင်မ်အိမ်(၅)အိမ်အား ရွာမှ ထွက်ပေးရန် ရခိုင် အကြမ်းဖက် သမားများက ကြေညာချက်ထုတ် ထားကြောင်းလည်းသိရသည်။
အဆိုပါ မွတ်စလင်မ်များသည်လည်း ရခိုင်လူမျိုးများဖြစ်ပြီး အစ္စလာမ်ဘာသာကို ကိုးကွယ်ကြသူများဖြစ်ကြောင်းလည်း သိရသည်။