မေ-၂၀၊၂၀၁၃
M-Media
ယခုသီတင်းပတ်အတွင်း လန်ဒန်ရှိ Grosvenor House hotel တွင်ပြုလုပ်မည့် UEFA အစည်းအဝေးတွင် အသက် ၂၁ နှစ်အောက် နွေရာသီ ဥရောပချန်ပီယံဖလားပြိုင်ပွဲကို အစ္စရေး၌ ကျင်းပမည့် ဆုံးဖြတ်ချက်အား ကန့်ကွက်သောအားဖြင့် ဥရောပနိုင်ငံ အများအပြားမှ လူမှုလှုပ်ရှားသူတို့ ဆန္ဒပြကြရန် စီစဉ်လျက်ရှိသည်။
Red Card Israeli Racism campaign မှ ဆန္ဒပြသပိတ်မှောက်မှုကို ဦးဆောင်သွားမည်ဖြစ်သည်။ အစ္စရေးတို့သည် ပါလက်စတိုင်းတို့၏လူ့အခွင့်အရေးများကို စံနစ်တကျ စီမံရိုက်ချိုး ဖျက်ဆီးနေကြကြောင်း၊ အစ္စရေးနိုင်ငံသည် ပထ၀ီဝင်အနေအထားအရ ဥရောပပြင်ပတွင် ရှိနေကြောင်း၊ အစ္စရေးအား လိုက်လျောခြင်းသည် ခွဲခြားနှိမ့်ချဆက်ဆံမှုကို သွတ်သွင်းလိုက်ခြင်းသာဖြစ်ကြောင်း၊ “ ဥရောပမှာရှိတဲ့ လူမည်းကစားသမားတွေအပေါ် လူမျိုးခွဲခြားဆက်ဆံမှုကိုတောင် ဆန့်ကျင်နေကြသေးတာဘဲ။ အစ္စရေးအစိုးရကနေ ပါလက်စတိုင်းတွေအပေါ် တစိုက်မတ်မတ် တစ်ဖက်သတ်ဖန်တီးဖော်ဆောင်ထားတဲ့ လူမျိုးခွဲခြားရေးစနစ်ကို ကျွန်တော်တို့က ဘာလို့ မဆန့်ကျင်ဘဲ နေရမလဲဗျ ” ဟူ၍ Red Card Israeli Racism campaign ၏ စည်းရုံးရေးမှူး Geoffrey Lee မှ ပြောကြားသည်။
အမ်စတာဒန်တွင် ကျင်းပသော ယူရိုပါလိဂ် ဗိုလ်လုပွဲစဉ်မတိုင်မီတွင်လည်း အလားတူဆန္ဒပြမှုကို လွန်ခဲ့သည့်အပတ်၌ ဒတ်ခ်ျများက ပြုလုပ်ခဲ့ကြပြီး၊ အခြားနိုင်ငံများအတွက် စံပြဖြစ်အောင် ဒတ်ခ်ျဘောလုံးအသင်းအနေနှင့် U 21 နောက်ဆုံးပွဲစဉ်များမှ နှုတ်ထွက်ရန် တောင်းဆိုခဲ့ကြသည်။
ယင်းလှုပ်ရှားမှု၌ တစ်နှစ်မက အားပေးကူညီဆောင်ရွက်လာသူ Filmmaker Ken Loach က “ ပါလက်စတိုင်းဘောလုံးအသင်းနဲ့အခြားဘောလုံးအသင်းတွေရဲ့ အဆိုပြုချက်တွေ၊ ဥရောပတစ်ခွင်က လူမျိုးခွဲခြားမှုကို ဆန့်ကျင်တိုက်ပွဲဝင်သူများရဲ့ လူ့အခွင့်အရေးဆိုင်ရာ တိုက်တွန်းချက်တွေကို UEFA က ဥပေက္ခာပြုနေတာဟာ မယုံကြည်စရာကောင်းနေပါတယ်။ သူတို့ရဲ့ အဆိပ်သင့်ဆုံးဖြတ်ချက်ကို ပြန်သုံးသပ်ဖို့လိုတယ်။ အစ္စရေးတွေဖက်က တရားမ၀င်စွက်ဖက် ဖော်ဆောင်ထားတဲ့ ပါလက်စတိုင်း ဘောလုံးသမားတွေရဲ့အခက်အခဲတွေ အခြေအနေတွေအပေါ် UEFA အနေနဲ့ အသိအမှတ်ပြုသင့်တယ် ” ဟူ၍ ပြောကြားလိုက်သည်။
အစ္စရေး၌ သုံးနှစ်ကြာထိန်းသိမ်းခံနေရသော ပါလက်စတိုင်းဘောလုံးသမား ၀ါရင့်ရှေ့တန်းတိုက်စစ်မှူး Mahmoud Sarsak အား ယင်း ကွန်ကရက်အစီအစဉ်တွင် တက်ရောက်ခွင့်ပေးရန် ဆန္ဒပြသူများမှ UEFA ကွန်ကရက်ကိုယ်စားလှယ်များထံ တောင်းဆိုနေကြသည်။