စက်တင်ဘာ ၂၃၊ ၂၀၂၀
M-Media
-နိုင်ငံအတွင်းမှာ နေထိုင်တဲ့သူတွေအတွက် အွမ္မရာဟ် ဘုရားဖူးခွင့်ကို ဆော်ဒီအာရေဗျက လာမယ့် အောက်တိုဘာလမှာ ပြန်လည်ခွင့်ပြုတော့မယ်လို့ သိရပါတယ်။
Covid-19 ကပ်ရောဂါကြောင့် ဆော်ဒီဟာ အွမ္မရာ ဘုရားဖူးခွင့်ကို မတ်လကတည်းက ပိတ်ထားခဲ့တာပါ။ ဇူလိုင်လက ကျရောက်ခဲ့တဲ့ ဟဂျ်ဘုရားဖူးကာလမှာလည်း နိုင်ငံအတွင်းက လူ တစ်သောင်းကိုသာ ခွင့်ပြုခဲ့ပါတယ်။
ကိုဗစ်ကာလအတွင်း တစ်ရက်ကို အများဆုံး လူနှစ်သောင်းသာ အွမ္မရာပြုခွင့်ပေးဖို့ ဆော်ဒီက ပြင်ဆင်နေပါတယ်။
အောက်တိုဘာ ၄ ရက်နေ့ကစတင်ပြီး ဒီပမာဏာရဲ့ ၃၀ ရာခိုင်နှုန်းဖြစ်တဲ့ တစ်ရက်ကို လူ ၆၀၀၀ အွမ္မရာပြုခွင့် ပေးမှာဖြစ်ပြီး နိုင်ငံသားတွေနဲ့ နိုင်ငံအတွင်းနေထိုင်သူ နိုင်ငံခြားသားတွေ ပါဝင်ခွင့်ရမှာ ဖြစ်ပါတယ်။
အောက်တိုဘာ ၁၈ ရက်နေ့နောက်ပိုင်းမှာ ဒီပမာဏရဲ့ ၇၅ ရာခိုင်နှုန်းအထိ တိုးမြှင့်ခွင့်ပြုမှာပါ။
နိုဝင်ဘာ ၁ ရက်နေ့နောက်ပိုင်းကျရင် ဆော်ဒီကို လာရောက်အွမ္မရာပြုဖို့ အန္တရာယ်ကင်းတဲ့ တစ်ချို့တိုင်းပြည်တွေက လူတွေအပါအဝင် တစ်ရက်ကို လူ ၂ သောင်းခွင့်ပြုမှာဖြစ်ပြီး ကိုဗစ်ကပ်ရောဂါ အဆုံးသတ်သွားတဲ့အချိန်အထိ ဒီပမာဏအတိုင်းပဲ ဆက်ရှိနေမှာ ဖြစ်ပါတယ်။
ဒီလို အွမ္မရာပြုခွင့်ပြုရာမှာ ကိုဗစ်တားဆီးရေးအတွက် လိုအပ်တဲ့ ကြိုတင်ကာကွယ်ရေးနည်းလမ်းအားလုံးကို ဆေင်ရွက်သွားမယ်လို့ ဆော်ဒီနိုင်ငံပိုင်သတင်းဌာန SPA က ဒီကနေ့မှာ ဖော်ပြခဲ့ပါတယ်။
လက်ရှိမှာ ဆော်ဒီ ဟဂျ်နှင့် အွမ္မရာ ဝန်ကြီးဌာနဟာ မိုဘိုင်း အက်ပလီကေးရှင်းတစ်ခုကို ဖန်တီးနေပြီး အခုလနှောင်းပိုင်းမှာ အသုံးပြုနိုင်မှာ ဖြစ်ပါတယ်။ အွမ္မရာပြုလုပ်လိုသူတွေအနေနဲ့ ဒီ အက်ပလီကေးရှင်းမှာ မှတ်ပုံတင်နိုင်မှာဖြစ်ပြီး၊ အက်ပလီကေးရှင်းမှာ ဖော်ပြထားတဲ့ ကျန်းမာရေးစည်းမျဉ်းစည်းကမ်းတွေကိုလည်း လိုက်နာရမှာ ဖြစ်ပါတယ်။
ဇူလိုင်လက လူတစ်သောင်းကို ဟဂျ်ပြုခွင့်ပေးခဲ့ရာမှာ လိုအပ်တဲ့ ကြိုတင်ကာကွယ်မှုတွေ လုပ်ဆောင်ခဲ့ပြီး ကိုဗစ်ကူးစက်မှု မရှိခဲ့ဘူးလို့ ဆော်ဒီအာဏာပိုင်တွေက ထုတ်ပြန်ပါတယ်။
Ref: Aljazeera
